Enn zour, enn ser ki res Nouvel-Zeland ti get enn video ki ti explike kouma Zeova pa zis ena konpasion, me Li montre konpasion. (Iza. 63:​7-9) Li ti desid pou met an pratik seki li ti aprann ek li ti rod bann lokazion pou ed lezot. Plitar sa zour-la, kan li ti al sipermarse, li ti zwenn ar enn madam ki ti enn klosar. Li ti demann madam-la si li kapav aste enn manze pou li, ek madam-la ti aksepte. Kan ser-la ti amenn manze-la, li ti koz lor Zeova ar madam-la ek li ti montre li trak Eski Soufrans Pou Arete enn Zour?

Madam-la ti koumans plore. Li ti dir ser-la ki li ti grandi dan laverite, me ki sa fer bien lontan ki li’nn kit laverite. Selman, pa tro lontan, li ti priye Zeova pou retourn ver Li. Ser-la ti donn madam-la enn Labib, ek madam-la ti aksepte enn letid Labib. a

Parey kouma Zeova, nou kapav montre konpasion anver bann dimounn, ek anver nou fami ek nou bann frer ek ser. Nou kapav montre konpasion osi kan nou rod bann lokazion pou koz lor Zeova ar lezot.