Eski to finn lir bann nimero Latour Degard pou sa lane-la? Alor, gete si to kapav reponn sa bann kestion-la:

Ki savedir ‘sanz nou fason panse’? (Rom. 12:2)

Sa pa vedir ki nou bizin fer zis de-trwa bon kitsoz. Nou bizin examinn noumem ek fer ninport ki sanzman ki bizin, pou ki nou lavi an-akor avek seki Bondie demande.—w23.01, p. 8-9.

Kouma nou kapav res lor nou gard kan nou trouv seki pe pase dan lemond?

Nou bien kontan kan nou trouve kouma bann kitsoz ki pe arive dan sa lemond-la, pe realiz bann profesi. Me si nou esey devine seki pou arive ek ki nou koz sa ar lezot, sa kapav kree divizion. Plito, nou bizin koz lor bann kitsoz ki ena dan bann piblikasion ki lorganizasion Zeova donn nou. (1 Kor. 1:10)—w23.02, p. 16.

Ki diferans ena ant batem Zezi ek batem so bann disip?

Zezi pa ti bizin promet Zeova ki li pou fer So volonte, parski li ti ne dan enn pep ki ti deza promet Zeova ki zot pou fer So volonte. Li pa ti bizin repanti parski li ti enn zom parfe.—w23.03, p. 5.

Kouma nou kapav les pli boukou dimounn reponn dan renion?

Kan nou donn bann ti repons, lezot pou ena letan pou reponn. Fode pa nou koz lor tro boukou lide, sinon lezot pa pou ena nanye pou dir.—w23.04, p. 23.

Izai 35:8 koz lor “Semin ki Sin.” Ki sa semin-la reprezante?

Dan lepase, sa semin sinbolik la ti reprezant semin ki bann Zwif ti pran depi Babilonn pou zot retourn Zerizalem. Ki li reprezante dan nou lepok? Pandan plizir santenn lane avan 1919, sa semin-la ti reprezant bann travay ki bann dimounn ti fer pou ki lezot kapav sorti dan Gran Babilonn, kouma par exanp tradir ek inprim bann Labib. Bann serviter Bondie mars lor “Semin ki Sin” kan zot kontign ador Zeova, ek sa pou fer zot gagn boukou benediksion.—w23.05, p. 15-19.

Ki sa de madam dan Proverb sapit 9 la reprezante?

Liv Proverb koz lor “enn fam ki bet” ki invit bann dimounn, me so bann invite fini dan “Tom.” Li koz osi lor enn madam ki reprezant “vre sazes,” ek bann ki aksepte so linvitasion, zot “mars lor semin lintelizans” ek zot gagn lavi. (Prov. 9:​1, 6, 13, 18)—w23.06, p. 22-24.

Dan fason ki Li ti azir ar Lot, kouma Zeova inn montre ki Li ena limilite ek ki Li rezonab?

Zeova ti dir Lot kit Sodom ek al dan bann montagn. Kan Lot ti sipliy Zeova pou ki li al Zoar, Zeova ti les li ale.—w23.07, p. 21.

Ki kitsoz enn madam kapav fer kan so misie get pornografi?

Fode pa li panse ki se so fot. Li bizin res konsantre lor so lamitie avek Zeova ek reflesi lor lexanp bann madam ki ti bien trakase ek ki ti rod led Zeova. Li kapav ed so mari pou evit bann sitiasion ki kapav fer li tom dan tantasion.—w23.08, p. 14-17.

Kan enn kikenn poz nou bann kestion lor nou bann krwayans, kouma sazes kapav ed nou pou reponn avek douser?

Nou kapav demann nou-mem kouma so bann kestion kapav ed nou pou konpran ki kitsoz inportan pou li. Sa pou ed nou pou reponn li avek douser.—w23.09, p. 17.

Kouma Mari ti gagn lafors, ek ki nou aprann ar so lexanp?

Kan li ti aprann ki li ti pou vinn mama Lemesi, Mari ti gagn lafors gras-a lezot. Gabriel ek Elizabet ti sit bann Lekritir pou ankouraz li. Nou osi nou kapav gagn lafors ar nou bann frer ek ser.—w23.10, p. 15.

Kouma Zeova kapav reponn nou lapriyer?

Li promet ki Li pou ekout nou lapriyer, me Li pran kont so proze kan Li fer sa. (Zer. 29:12) Kan nou priye Zeova pou mem kitsoz, Li kapav reponn nou dan diferan fason, me Li pou touletan soutenir nou.—w23.11, p. 21-22.

Romin 5:2 deza koz lor “lesperans,” alor kifer Pol rekoz lor la dan verse 4?

Kan enn dimounn tann koz lor bon nouvel, li aprann ki bann dimounn ena lesperans pou viv pou touletan lor later ki pou vinn enn paradi. Me kan li gagn bann leprev, li andir zot, ek li santi ki li ena faver Zeova, so lesperans vinn pli vre ek sa tous li personelman.—w23.12, p. 12-13.