SIRMAN to bien apresie tou bann kado ki Zeova inn donn twa, ek to bien kontan ki Li les twa deside kouma to pou servi sa bann kado-la. Divin se enn parmi bann kado ki Bondie inn donn bann imin. Labib dir: “Manze fer leker kontan, ek divin fer lavi vinn zoli.” (Ekle. 10:19; Ps. 104:15) Selman, sirman to’nn remarke ki boukou dimounn gagn bann problem lalkol. Anplis, depandan zot kiltir ek kotsa zot reste, bann dimounn ena diferan lopinion lor lalkol. Me ki kitsoz kapav ed bann Kretien pou pran bann bon desizion konsernan lalkol?

Dan ninport ki kiltir nou sorti, ek ninport kotsa nou reste, nou bizin swiv bann konsey Bondie pou nou kapav pran bann bon desizion. Si nou fer sa, nou pou gagn bann bienfe.

Partou dan lemond, bann dimounn bwar boukou lalkol ek zot bwar souvan. Sertin bwar parski zot santi zot rilax apre, ek lezot bwar pou fer fas ar zot bann problem. Dan sertin pei, kan enn kikenn bwar boukou lalkol, sa montre ki li for ouswa ki li enn vre zom.

Selman, bann Kretien swiv bann konsey ki zot Kreater inn donn zot. Par exanp, Bondie dir nou ki nou gagn bann move konsekans kan nou bwar tro boukou. Kitfwa nou’nn deza lir Proverb 23:​29-35 ki dekrir enn kikenn ki’nn sou ek bann konsekans ki li’nn gagne akoz sa. a Daniel, enn ansien ki res Lerop, rapel kouma li ti ete avan ki li vinn dan laverite. Li dir: “Mo ti abitie bwar boukou ek sa ti fer mwa pran bann move desizion. Akoz sa, mo ti fer bann kitsoz ki pa ti bizin, ek ziska ler sa ankor pe fatig mwa.”

Kouma nou kapav pran bann bon desizion ek evit bann problem ki bann dimounn gagne akoz zot bwar tro boukou lalkol? Nou bizin les bann prinsip Labib gid nou kan nou pran bann desizion.

Anou gete seki Labib dir lor lalkol, ek anou gete osi kifer sertin dimounn bwar.

Labib pa kondann lalkol. Okontrer, li dir ki nou kapav bwar avek moderasion, ek ki inpe divin kapav fer nou dibien. Labib dir: “Manz to manze ek bwar to divin avek leker kontan.” (Ekle. 9:7) Parfwa, Zezi ti bwar divin, ek bann lezot fidel serviter Zeova osi ti bwar divin.—Mat. 26:​27-29; Lik 7:34; 1 Tim. 5:23.

Selman, Labib fer enn gran diferans ant bwar inpe lalkol ek bwar ziska sou. Li dir: “Pa soul zot ar divin.” (Efe. 5:18) Labib dir osi ki “bann soular . . . pa pou erit Rwayom Bondie.” (1 Kor. 6:10) Alor, Zeova pa kontan ditou kan enn dimounn bwar tro boukou ouswa ki li bwar ziska sou. Olie ki nou fer parey kouma bann dimounn ki otour nou, nou bizin swiv bann prinsip ki ena dan Labib, ek sa pou fer Bondie plezir.

Ena bann dimounn ki tini bien lalkol, akoz sa zot panse ki zot kapav bwar boukou. Me sa osi li danzere. Labib dir ki, si enn kikenn “esklav boukou divin,” sa kapav fer li fer bann erer bien grav ek gat so lamitie avek Zeova. (Tit 2:3; Prov. 20:1) Zezi osi ti dir ki, si enn kikenn “bwar plis ki bizin,” sa kapav anpes li rant dan lemond nouvo. (Lik 21:​34-36) Alor, kan enn Kretien bwar lalkol, ki kitsoz kapav ed li pou evit bann problem?

Dan sertin kiltir, li normal ki enn kikenn bwar boukou. Selman, fode pa nou les nou inflianse par nou kiltir kan nou bwar lalkol. Bann Kretien anvi fer Zeova plezir, akoz sa nou fer seki Zeova dir konsernan manze ek bwar. Labib dir: “Kan zot pe manze, kan zot pe bwar ouswa ninport ki kitsoz ki zot pe fer, fer tou pou laglwar Bondie.” (1 Kor. 10:31) Anou get de-trwa kestion ek de-trwa prinsip Labib ki kapav ed nou.

Eski mo bwar pou ki lezot aksepte mwa? Exod 23:2 dir: “Fode pa to swiv lafoul.” Dan sa verse-la, Zeova ti pe averti bann Izraelit. Li ti dir zot ki fode pa zot fer parey kouma bann dimounn ki pa fer Li plezir. Bann Kretien osi swiv sa konsey-la azordi. Si nou les lezot inflians nou bann desizion ek fason ki nou konsider lalkol, tigit-tigit sa kapav fer nou aret swiv bann prinsip Zeova ek gat nou lamitie avek Li.—Rom. 12:2.

Eski mo bwar pou montre lezot ki mo for? Dan sertin kiltir, li normal ki bann dimounn bwar boukou lalkol. (1 Pier 4:3) Me gete seki 1 Korintien 16:13 ankouraz nou pou fer. Li dir: “Res lor zot gard, tini ferm dan lafwa, ena kouraz, vinn for.” Alor, eski lalkol vremem kapav fer enn dimounn vinn for? Non. Okontrer, lalkol anpes bann dimounn pou reflesi kouma bizin ek pou pran bann bon desizion. Alor, kan enn kikenn bwar boukou lalkol, sa pa vedir ki li for. Okontrer, sa vedir ki li ena enn febles! Izai 28:7 montre kouma akoz lalkol, enn kikenn pe balote kan li pe marse ek li’nn pran bann move desizion.

Se Zeova ki donn nou lafors pou nou fer seki bon, ek pou Li donn nou sa lafors-la, nou bizin res lor nou gard ek tini ferm dan lafwa. (Ps. 18:32) Nou fer sa kan nou fer bien atansion pou evit bann danze ek kan nou pran bann desizion ki pa pou gat nou lamitie ar Zeova. Zezi ti ena enn bon lamitie ar Zeova, ek boukou dimounn ti respekte li parski li ti ena kouraz ek li ti bien deside pou fer seki bon.

Eski mo bwar pou aret mazinn mo bann problem? Enn ekrivin Psom ti dir: “Sak fwa mo ena traka ek problem to [Zeova] konsol mwa pou mo regagn lazwa.” (Ps. 94:19) Si  ena enn kitsoz ki pe trakas twa, se Zeova ki kapav ed twa, pa lalkol. To kapav rod led Zeova kan to priye Li pli souvan. To kapav osi rod konsey ar enn Kretien ki ena lexperyans. An realite, kan enn kikenn bwar pou aret mazinn so bann problem, sa pa ed li pou pran bann bon desizion. (Oze 4:11) Daniel, ki nou ti mansione taler-la, dir: “Mo ti bien trakase ek mo ti santi mwa koupab pou seki mo ti fer. Akoz sa, mo ti bwar pou mo bliye mo bann traka. Selman, sa ti fer mwa gagn pli boukou problem ankor. Mo ti nepli ena respe pou momem ek sertin kamarad ti aret frekant mwa.” Ki kitsoz ti ed Daniel? Li dir: “Mo ti rann mwa kont ki se pa lalkol ki ti pou ed mwa; se Zeova ki ti pou ed mwa. Mo ti bizin aprann kont lor Li. Alafin, mo ti reisi rezoud tou mo bann problem.” Fode zame nou bliye ki Zeova touletan pre pou ed nou, mem kan nou dan bann sitiasion bien difisil.—Fil. 4:​6, 7; 1 Pier 5:7.

Si to abitie bwar lalkol, to kapav reflesi lor sa bann kestion-la pou kone si to ena bann sanzman pou fer. ‘Eski enn manb mo fami ouswa enn bon kamarad inn fer mwa bann remark konsernan labwason?’ Si wi, kitfwa sa vedir ki to’nn pran enn move labitid ouswa ki to ena enn problem ar labwason. ‘Eski mo pe bwar pli boukou?’ Si sa arive, kitfwa sa vedir ki to pe vinn alkolik. ‘Si mo pa bwar lalkol pandan de-trwa zour, eski mo santi ki sa mank mwa?’ Si to dan sa sitiasion-la, sa vedir ki to enn alkolik, ek kitfwa to pou bizin led pou to reisi sorti dan sa piez-la.

Sertin Kretien pa bwar lalkol parski zot pa kontan so gou. Ena lezot ki pa bwar pou evit bann problem ki kapav gagne akoz lalkol. Si enn to kamarad desid pou pa bwar lalkol, to bizin respekte so desizion ek fode pa to kritik li.

Ena sertin Kretien ki fixe zot bann limit konsernan labwason. Sertin fixe enn limit lor kantite ki zot bwar, ek lezot fixe enn limit konsernan komie fwa zot pou bwar. Par exanp, kitfwa zot desid pou bwar enn sel fwa par semenn, ouswa pou bwar avek moderasion  pandan bann repa. Sertin fixe enn limit konsernan labwason ki zot pou bwar. Par exanp, kitfwa zot desid pou bwar labier ouswa divin avek moderasion, me zot pa pou bwar bann for ek bann cocktail. Kan enn kikenn fixe li bann limit konsernan labwason, li pli fasil pou li kontrol li. Ek si nou’nn fixe nou bann limit, fode pa nou trakase lor seki lezot pou panse lor nou.

Selman, nou bizin osi pran kont santiman lezot. Romin 14:21 dir: “Vomie to pa manz laviann ouswa bwar divin ouswa fer ninport ki kitsoz ki pou afebli lafwa to frer.” Kouma to kapav swiv sa konsey-la? To bizin ena konsiderasion pou lezot. Si to panse ki, si to bwar, sa pou deranz to frer, alor lamour pou pous twa pou pa bwar. Kan to fer sa, to montre ki to kontan ek respekte to frer. To montre ki to pe rod so lavantaz, avan to prop lavantaz.—1 Kor. 10:24.

Bann Kretien bizin swiv osi bann lalwa ki gouvernman inn mete konsernan lalkol. Par exanp, ena enn lalwa ki dir apartir ki laz enn kikenn kapav bwar, ek fode pa ki enn kikenn li bwar avan ki li kondir ouswa avan ki li travay lor sertin masinn.—Rom. 13:​1-5.

Zeova inn donn nou boukou zoli kado, ek Li’nn osi les nou deside kouma nou pou servi sa bann kado-la. Enn parmi sa bann kado-la se ki nou kapav swazir seki nou pou manze ek seki nou pou bwar. Kan nou pran bann bon desizion dan sa bann domenn-la, nou fer nou Papa Zeova plezir, ek nou montre ki nou apresie sa zoli kado ki Li’nn fer nou la!