1. Kan nou reflesi lor lafwa ki Abraam ti ena, ki kestion nou kapav poz nou-mem?

 MEM si boukou dimounn inn tann koz lor Abraam, kitfwa zot pa konn boukou kitsoz lor li. Me twa, sirman to konn boukou kitsoz lor Abraam. Par exanp, to kone ki Labib dir ki Abraam li “papa tou bann ki ena lafwa.” (Rom. 4:11) Selman, kitfwa to demann tomem, ‘Eski mo kapav ena enn lafwa for parey kouma Abraam?’ Wi, to kapav.

2. Kifer li inportan nou etidie lexanp Abraam? (Zak 2:​22, 23)

² Pou nou ena enn lafwa for parey kouma Abraam, nou bizin etidie so lexanp. Abraam inn touletan fer seki Zeova inn demann li. Par exanp, li ti kit so lakaz ek li ti al res bien lwin, li ti res dan bann latant pandan plizir lane, ek li ti pre pou sakrifie so garson Izaak. Abraam ti bizin ena enn lafwa bien for an Zeova pou li fer sa bann kitsoz-la, ek gras-a sa li ti gagn faver Zeova ek Zeova ti konsider li kouma so kamarad. (Lir Zak 2:​22, 23.) Zeova anvi ki twa osi to gagn so faver ek ki to vinn so kamarad. Se pou sa rezon-la ki Li’nn fer Pol ek Zak koz lor lexanp Abraam. Anou gete kouma zot fer sa dan Romin sapit 4 ek Zak sapit 2. Dan sa de sapit-la, Pol ek Zak toule-de dir enn kitsoz bien inportan lor Abraam.

3. Lor ki verse Pol ek Zak toule-de ti koze?

³ Pol ek Zak toule-de koz lor Zenez 15:6. Sa verse-la dir: “Abram ti ena lafwa dan Zeova; ek akoz sa Zeova ti konsider li kouma enn zom zis.” Kan enn kikenn fer  Zeova plezir, Zeova konsider li kouma enn kikenn ki zis, ouswa drwat. Alor, mem si nou inparfe ek ki nou fer pese, Zeova kapav konsider nou kouma enn kikenn ki drwat. Extraordiner, pa vre! Sirman twa osi to anvi ki Zeova konsider twa kouma enn kikenn ki drwat. Alor, anou gete kifer Zeova ti dir ki Abraam li drwat, ek anou gete seki nou bizin fer pou ki Zeova konsider nou kouma bann dimounn ki drwat.

4. Kifer nou pa drwat devan lizie Zeova?

⁴ Dan let ki li ti ekrir bann Romin, Pol dir ki tou dimounn fer pese, ek akoz sa nou pa drwat devan lizie Zeova. (Rom. 3:23) Me kanmem sa, Zeova kapav konsider nou kouma bann dimounn ki drwat, ek nou kapav gagn so faver. Kouma? Pol servi lexanp Abraam pou explik sa.

5. Kifer Zeova ti kapav konsider Abraam kouma enn kikenn ki zis? (Romin 4:​2-4)

⁵ Se kan Abraam ti dan pei Kanaan ki Zeova ti dir ki li enn kikenn ki zis. Kifer Zeova ti dir ki Abraam li zis? Eski se parski Abraam ti pe swiv Lalwa Moiz? Non. (Rom. 4:13) Sa lepok-la, Zeova pa ti ankor donn Lalwa. Se plis ki 400 an apre ki Zeova ti donn bann Izraelit sa lalwa-la. Alor, kouma Zeova ti kapav konsider Abraam kouma enn kikenn ki zis? Dan so bonte extraordiner, Zeova ti konsider Abraam kouma enn dimounn ki zis, parski li ti ena lafwa an Li.—Lir Romin 4:​2-4.

6. Kouma Zeova kapav konsider enn kikenn ki fer pese, kouma enn kikenn ki drwat?

⁶ Pol dir ki kan enn dimounn ena lafwa dan Bondie, Bondie “konsider lafwa sa dimounn-la kouma enn kitsoz ki drwat.” (Rom. 4:5) Pol dir osi: “Ala seki David osi dir kan li koz lor lazwa enn dimounn ki Bondie konsider kouma drwat mem si sa dimounn-la so travay setadir so bann aksion pa an-akor konpletman avek lalwa: ‘Ere bann dimounn ki finn gagn pardon pou zot bann move aksion ek ki zot bann pese finn kouver; ere sa dimounn ki Zeova pa pou pran kont so pese ditou.’” (Rom. 4:​6-8; Ps. 32:​1, 2) Bondie pardonn, ouswa kouver, pese bann ki ena lafwa an Li. Li pardonn zot net ek Li nepli pran kont bann pese ki zot inn fer. Zeova konsider sa bann dimounn-la kouma bann dimounn drwat parski zot ena lafwa an Li.

7. Kifer nou kapav dir ki bann fidel serviter Zeova dan lepase ti bann dimounn ki drwat?

⁷ Mem si Zeova ti konsider Abraam, David, ek so bann lezot fidel serviter kouma bann dimounn ki drwat, zot ti ankor inparfe. Me parski zot ti ena lafwa, Zeova ti konsider zot kouma bann dimounn ki drwat. Akoz zot lafwa, zot ti diferan ar bann dimounn ki pa ti ador Zeova. (Efe. 2:12) Dan let ki li ti ekrir bann Romin, Pol explike ki nou bizin ena lafwa pou ki nou kapav vinn kamarad Bondie. Abraam ek David ti bann kamarad Bondie parski zot ti ena lafwa an Li. Nou osi nou kapav vinn kamarad Bondie si nou ena lafwa an Li.

8-9. Ki sertin sef relizie panse lor seki Pol ek Zak ti ekrir, ek kifer zot pans sa?

⁸ Eski ena enn lien ant lafwa ek bann aksion? Sa fer plizir santenn lane ki bann sef relizie pa dakor lor la. Sertin dir ki,  pou gagn lavi sov, bizin zis ena lafwa dan Segner Zezi Kris. Kitfwa to’nn deza tann zot dir, “Krwar dan Zezi ek to pou gagn lavi sov.” Zot kapav mem servi bann parol lapot Pol ki dir: ‘Bondie konsider enn dimounn kouma drwat mem si sa dimounn-la so bann aksion pa an-akor avek lalwa.’ (Rom. 4:6) Lezot sef relizie dir ki, pou gagn lavi sov, bizin vizit bann plas ki Legliz konsider kouma sakre ek fer osi bann bon aksion. Zot kapav mem servi Zak 2:​24, ki dir: “Pou deklar enn zom kouma enn dimounn drwat par bann aksion ek pa zis par lafwa.”

⁹ Akoz sa de diferan lopinion-la, sertin exper Labib panse ki Pol ek Zak pa ti dakor lor seki enn dimounn bizin fer pou li gagn faver Bondie. Sertin sef relizie dir ki Pol ti panse ki bann dimounn bizin zis ena lafwa dan Bondie pou zot kapav gagn So faver, alor ki Zak ti panse ki bann dimounn bizin fer bann bon aksion pou gagn faver Bondie. Enn profeser dir ki Zak pa ti dakor ek pa ti konpran kifer Pol ti dir ki enn dimounn bizin zis ena lafwa pou ki Bondie konsider li kouma drwat. Selman, Zeova ti servi so lespri sin pou fer Pol ek Zak ekrir zot bann let. (2 Tim. 3:16) Alor, bizin ena enn lexplikasion bien sinp pou konpran seki zot inn dir. Ek pou nou konpran sa, nou bizin konpran lor ki size sakenn ti pe koze.

10. Lor ki “aksion” Pol ti koze? (Romin 3:​21, 28) (Get zimaz osi.)

¹⁰ Dan Romin sapit 3 ek 4, lor ki “aksion” Pol ti pe koze? Li ti pe koz sirtou lor “seki lalwa demande,” setadir lor lalwa ki Zeova ti donn bann Izraelit atraver Moiz.  (Lir Romin 3:​21, 28.) Li posib ki dan lepok Pol, sertin Kretien Zwif ti panse ki zot ti bizin kontign swiv Lalwa Moiz. Akoz sa, Pol ti servi lexanp Abraam pou montre zot ki zot ti nepli bizin swiv Lalwa pou ki zot gagn faver Bondie. Li ti explik zot ki zot ti bizin ena lafwa. Sa bien ankourazan, parski sa montre nou ki si nou ena lafwa dan Bondie ek dan Zezi, nou kapav gagn faver Bondie.

11. Lor ki “aksion” Zak ti koze?

¹¹ Parkont, “bann aksion” ki trouv dan Zak sapit 2, se pa Lalwa Moiz lor ki Pol ti koze. Zak ti pe koz lor bann aksion, ouswa bann aktivite, ki bann Kretien bizin fer toulezour. Sa bann aksion-la ti pou montre si enn Kretien vremem ena lafwa dan Bondie. Anou get de lexanp ki Zak ti servi.

12. Kouma Zak explik lien ki ena ant lafwa ek bann aksion? (Get zimaz osi.)

¹² Dan so premie lexanp, Zak dir ki enn Kretien bizin pa get figir. Li servi lexanp enn zom ki zanti anver enn dimounn ris, me ki maltret enn dimounn pov. Zak dir ki bann aksion sa dimounn-la montre ki li pena lafwa. (Zak 2:​1-5, 9) Dan so deziem lexanp, Zak koz lor enn kikenn ki trouve ki ‘enn frer ouswa enn ser pena linz ek pena ase manze.’ Selman, li pa fer nanye pou ed li. Mem si sa dimounn-la dir ki li ena lafwa, so bann aksion pa montre sa. Se akoz sa ki Zak dir ki “lafwa tousel, san bann aksion, li mor.”—Zak 2:​14-17.

13. Ki lexanp Zak servi pou montre lien ki ena ant lafwa ek bann aksion? (Zak 2:​25, 26)

¹³ Zak ti servi lexanp Raab, ek li ti dir ki Raab ti montre par so bann aksion ki li ti  ena lafwa. (Lir Zak 2:​25, 26.) Raab ti tann koz lor Zeova, ek li ti konpran ki Zeova ti pe soutenir bann Izraelit. (Zozwe 2:​9-11) Akoz sa, kan lavi de espion Izraelit ti an danze, Raab ti protez zot. Li ti montre par so bann aksion ki li ti ena lafwa an Zeova. Se pou sa rezon-la ki, mem si Raab pa ti enn Izraelit, Zeova ti konsider li kouma enn kikenn ki drwat, parey kouma Abraam. So lexanp montre nou ki se par nou bann aksion ki nou montre ki nou ena lafwa.

14. Kouma nou kone ki Pol ek Zak pa’nn kontredir zot kamarad?

¹⁴ Alor, Pol ek Zak ti pe koz lor de size bien diferan kan zot ti pe koz lor lafwa ek bann aksion. Pol ti pe dir bann Kretien Zwif ki zot pa ti pou gagn faver Zeova si zot zis swiv Lalwa Moiz. Parkont, Zak ti pe explik tou bann Kretien ki se par zot bann bon aksion ki zot montre ki zot ena lafwa.

15. Sit sertin kitsoz ki nou kapav fer pou montre ki nou ena lafwa. (Get zimaz osi.)

¹⁵ Zeova pa demann nou pou fer parey kouma Abraam, pou ki Li konsider nou kouma bann dimounn ki drwat. An realite, ena boukou lezot kitsoz ki nou kapav fer pou montre ki nou ena lafwa. Par exanp, nou kapav akeyir bann nouvo kan zot vinn Lasal, ek nou kapav ed nou bann frer ek ser kan zot bizin led. Nou bizin osi okip bien nou fami. Zeova bien kontan kan nou fer sa bann kitsoz-la, ek Li promet ki Li pou beni nou. (Rom. 15:7; 1 Tim. 5:​4, 8; 1 Zan 3:18) Enn parmi bann pli bon fason nou montre ki nou ena lafwa se kan nou bien aktif dan predikasion.  (1 Tim. 4:16) Par nou bann aksion, nou kapav montre ki nou aksepte ki Zeova diriz nou ek ki nou ena lafwa dan so bann promes. Si nou fer sa, nou kapav sir ki Li pou konsider nou kouma enn kikenn ki drwat ek Li pou dir ki nou so kamarad.

16. Dan lexanp Abraam, ki lien ena ant lesperans ek lafwa?

¹⁶ Dan Romin sapit 4, nou aprann enn lot leson inportan ar Abraam. Sa sapit-la montre nou ki lesperans bien inportan. Zeova ti promet ki “boukou nasion” ti pou gagn benediksion gras-a Abraam. Abraam ti ena enn zoli lesperans, pa vre! (Zen. 12:3; 15:5; 17:4; Rom. 4:17) Selman, mem kan Abraam ti ena 100 an ek Sara 90 an, zot pa ti ankor gagn garson ki Zeova ti promet zot. Akoz zot laz, kitfwa sa ti paret inposib ki Abraam ek Sara gagn enn zanfan. Me eski sa ti teste lafwa Abraam? Labib dir: “Abraam ti ena lespwar ek ti ena lafwa ki li ti pou vinn papa boukou nasion.” (Rom. 4:​18, 19) Alafin, promes ki Zeova ti fer Abraam ti realize. Abraam ti vinn papa enn zoli garson ki ti apel Izaak.—Rom. 4:​20-22.

17. Kouma nou kone ki nou kapav vinn kamarad Zeova?

¹⁷ Parey kouma Abraam, nou kapav vinn kamarad Zeova ek gagn So faver. Pol fer nou konpran sa, kan li dir: “Sa bann parol-la . . . pa ti ekrir zis pou Abraam, me osi pou nou, ki Bondie pou konsider kouma bann dimounn drwat, parski nou krwar dan [Bondie] ki’nn resisit nou Segner Zezi.” (Rom. 4:​23, 24) Parey kouma Abraam, nou bizin ena lafwa an Zeova, nou bizin fer bann bon aksion, ek nou bizin sir ki bann promes Zeova pou realize. Dan prosin lartik, nou pou examinn Romin sapit 5, kot lapot Pol koz lor lesperans.