1. Kifer nou kapav dir ki Abraam ti ena rezon pou met so lespwar dan Zeova?

 ZEOVA ti promet so kamarad Abraam ki li ti pou gagn enn garson, ek ki tou bann nasion lor later ti pou gagn bann benediksion gras-a li. (Zen. 15:5; 22:18) Abraam ti ena enn gran lafwa dan Bondie. Akoz sa, li ti sir ki bann promes Zeova ti pou realize. Selman, kan Abraam ti ena 100 an ek Sara 90 an, zot pa ti ankor gagn zanfan ki Zeova ti promet zot. (Zen. 21:​1-7) Kanmem sa, Labib dir: “Abraam ti ena lespwar ek ti ena lafwa ki li ti pou vinn papa boukou nasion parey kouma seki Bondie ti’nn dir.” (Rom. 4:18) Nou kone ki promes ki Zeova ti fer Abraam ti realize. Li ti vinn papa ek li ti gagn enn garson, parey kouma Zeova ti promet li. Kifer Abraam ti sir ki Zeova ti pou tini so promes?

2. Kifer Abraam ti sir ki Zeova ti pou tini So promes?

² Abraam ti ena enn bon lamitie ar Zeova. Akoz sa, li “ti vremem sir ki Bondie ti kapav fer seki Li ti’nn promet.” (Rom. 4:21) Abraam ti ena lafwa dan Zeova. Akoz sa, Zeova ti konsider li kouma enn kikenn ki drwat ek Abraam ti gagn So faver. (Zak 2:23) Ek kouma Romin 4:18 montre, Abraam ti ena lafwa ek li ti met so lespwar dan Zeova. Aster-la, anou gete seki lapot Pol dir lor lesperans dan Romin sapit 5.

3. Ki kitsoz Pol explike konsernan nou lesperans?

³ Pol explike kifer nou kapav sir ki nou “lesperans pa desevwar nou.” (Rom. 5:5) Li ed nou osi pou konpran kouma nou lesperans kapav kontign grandi. Amezir ki nou examinn Romin 5:​1-5, anou reflesi kouma nou lesperans konsernan lavenir inn vinn pli for avek letan. Sa lartik-la pou osi montre nou kouma nou kapav fer nou  lesperans vinn ankor pli for. Lapot Pol koz lor enn lesperans extraordiner ki “pa desevwar nou.” Pou koumanse, anou koz lor sa lesperans-la.

4. Lor ki kitsoz Romin 5:​1, 2 koze?

⁴ Lir Romin 5:​1, 2. Pol ti ekrir sa bann parol-la pou bann frer ek ser dan lavil Rom. Sa bann frer ek ser la ti aprann konn Zeova ek Zezi, zot ti montre ki zot ti ena lafwa, ek zot ti vinn bann Kretien. Akoz sa, Bondie “finn deklar [zot] kouma bann dimounn drwat akoz [zot] lafwa,” ek Li ti donn zot so lespri sin. Sa bann frer ek ser la ti gagn enn zoli lesperans!

5. Ki lesperans bann Kretien dan premie siek ti ena?

⁵ Plitar, Pol ti ekrir bann Kretien dan Efez konsernan lesperans ki Bondie ti donn zot. Sa lesperans-la ti enn leritaz pou “bann ki sin.” (Efe. 1:18) Pol ti osi dir bann Kolosien kotsa zot ti pou gagn sa rekonpans-la. Li ti dir zot ki sa lesperans-la “finn rezerve pou zot dan lesiel.” (Kol. 1:​4, 5) Alor, lesperans ki sa bann Kretien-la ti gagne, se ki zot ti pou resisite pou viv pou touletan dan lesiel, ek zot ti pou regne ansam ar Zezi.—1 Tes. 4:​13-17; Rev. 20:6.

6. Ki Frer Franz ti dir konsernan so lesperans?

⁶ Bann Kretien ki ena lesperans pou al viv dan lesiel, bien kontan zot lesperans. Enn parmi zot, Frer Frederick Franz, ti dir seki li ti resanti konsernan sa lesperans-la. Li ti dir: “Nou sir ki nou lesperans pou realize. Sakenn parmi bann 144,000 pou gagn rekonpans ki Bondie inn promet li. Nou pou gagn plis ki seki nou kapav mazine.” Apre ki li ti servi Zeova ar fidelite pandan plizir dizenn lane, an 1991 Frer Franz ti dir: “Sa lesperans-la ankor ena boukou valer pou nou. . . . Plis nou atann li,  plis nou apresie li. Li vo lapenn ki nou atann li, mem si nou bizin atann enn milyon lane pou nou gagn li. Plis letan pase, plis sa lesperans-la vinn pli vre pou mwa.”

7-8. Ki lesperans laplipar dimounn ena? (Romin 8:​20, 21)

⁷ Laplipar bann dimounn ki pe servi Zeova azordi ena enn lot lesperans. Zot ena mem lesperans ki Abraam, setadir zot ena lesperans pou viv pou touletan lor later ki pou dirize par Rwayom Bondie. (Ebre 11:​8-10, 13) Pol ti koz lor sa lesperans extraordiner la. (Lir Romin 8:​20, 21.) Kan to ti fek aprann bann promes ki ena dan Labib, ki kitsoz to’nn plis kontan? Eski se promes ki enn zour to pou vinn parfe ek ki to pou nepli fer pese? Ouswa eski se promes ki enn zour to pou kapav retrouv bann dimounn ki’nn mor, kan zot pou resisite lor later ki’nn vinn enn paradi? Gras-a lesperans ki Bondie inn donn nou, nou kapav sir ki tou sa bann kitsoz extraordiner la pou realize.

⁸ Ninport ki lesperans nou ena, ki li dan lesiel ouswa lor later, nou ena enn zoli lesperans ek sa rann nou zwaye. Me nou lesperans kapav vinn pli vre pou nou. Kouma? Lapot Pol koz lor la. Anou gete seki li dir apre.

9-10. Ki kitsoz bann Kretien kone zot pou gagne? (Romin 5:3) (Get zimaz osi.)

⁹ Lir Romin 5:3. Pol dir ki bann leprev kapav fer nou lesperans vinn pli vre pou nou. Sa kapav etonn nou! Selman, tou bann disip Zezi kone ki zot pou gagn bann leprev. Anou get lexanp Pol. Li ti dir bann Kretien Tesalonik: “Kan nou ti avek zot, nou ti abitie dir zot alavans ki nou pou pas dan bann leprev, ek se samem ki’nn arive.” (1 Tes. 3:4) Ek li ti dir bann Korintien: “Mo bann frer, nou pa anvi kasiet  zot bann difikilte ki nou’nn gagne . . . nou ti mem per pou nou lavi.”—2 Kor. 1:8; 11:​23-27.

¹⁰ Azordi osi, bann Kretien kone ki zot pou gagn tou kalite leprev. (2 Tim. 3:12) Kan to’nn vinn dan laverite, eski to’nn gagn persekision akoz to lafwa dan Zezi? Eski to bann fami ek to bann kamarad inn boufonn twa, ouswa maltret twa? Eski to’nn gagn bann problem dan travay parski to “onet dan tou kitsoz”? (Ebre 13:18) Eski gouvernman inn persekit twa parski to pe koz lor to lesperans ar lezot? Pol dir ki nou bizin zwaye kan nou gagn bann leprev. Kifer li dir sa?

11. Kifer nou bizin fer zefor pou andir ninport ki leprev nou gagne?

¹¹ Nou bizin zwaye kan nou gagn bann leprev parski sa ed nou pou devlop enn kalite bien inportan. Romin 5:3 dir: “Leprev fer gagn landirans.” Tou bann Kretien pou gagn bann leprev. Alor, nou bizin fer zefor pou andir ninport ki leprev nou gagne. Kifer? Parski si nou andir nou bann leprev ek nou kontign servi Zeova, nou pou reisi trouv so bann promes konsernan lavenir realize. Nou pa anvi resanble bann lagrin dan lexanp Zezi, ki ti tom parmi bann ros. O-koumansman, sa bann dimounn-la ti bien kontan kan zot ti tann mesaz Zezi. Me kan zot ti gagn bann “problem ouswa persekision,” zot ti aret swiv li. (Mat. 13:​5, 6, 20, 21) Li vre ki nou pa kontan kan nou gagn bann leprev ek persekision! Selman, kan nou andire, nou gagn bann bienfe. Kifer nou dir sa?

12. Ki bienfe nou gagne kan nou andir bann leprev?

¹² Zak koz lor bann bienfe ki nou gagne kan nou andir bann leprev. Li dir: “Les landirans fini so travay, pou ki zot vinn konple ek san defo dan tou domenn, ek ki zot pa mank nanye.” (Zak 1:​2-4) Alor, Zak dir ki landirans ena enn lobzektif: Li ed nou pou devlop pli bien bann kalite kouma pasians ek lafwa, ek li ed nou pou kont plis lor Bondie. Nou gagn osi enn pli gran bienfe kan nou andire.

13-14. Ki arive kan nou andire, ek ki lefe sa ena lor nou lesperans? (Romin 5:4)

¹³ Lir Romin 5:4. Pol dir ki landirans fer “gagn laprobasion Bondie.” Alor, kan nou andire, nou gagn faver Zeova. Me sa pa vedir ki Zeova kontan kan nou gagn bann leprev. Li kontan kan nou andire avek fidelite. Sa bien ankouraz nou kan nou kone ki, kan nou andir bann leprev, nou fer leker Zeova kontan!—Ps. 5:12.

¹⁴ Abraam osi ti gagn bann leprev, ek kan li ti andir zot avek fidelite, sa ti fer Zeova plezir. Akoz sa, Zeova ti konsider li kouma enn kikenn ki drwat, ek Li ti dir ki Abraam ti so kamarad. (Zen. 15:6; Rom. 4:​13, 22) Nou osi nou kapav vinn enn kikenn ki drwat devan lizie Zeova ek vinn so kamarad. Pou nou gagn faver Zeova, sa pa depann lor kantite kitsoz ki nou fer pou servi Li, ouswa lor bann privilez ki nou ena. Li donn nou so faver parski nou andir nou bann leprev ar fidelite. Ninport ki laz nou ena, ninport ki kapasite nou ena, ek dan ninport ki sitiasion nou ete, nou tou nou kapav andire. Eski to pe andir  enn leprev ek to pe res fidel ar Zeova? Si wi, to kapav sir ki to ena faver Zeova. Kan nou kone ki nou pe fer Zeova plezir, sa fer nou ena plis konfians dan bann promes ki Li’nn fer nou, ek sa fer nou lesperans vinn pli vre.

15. Ki kitsoz Pol dir dan Romin 5:​4, 5, ek ki kestion nou kapav poz nou-mem?

¹⁵ Kouma Pol ti explike, nou gagn laprobasion Zeova kan nou andir bann leprev ek nou res fidel anver Li. Me remarke seki Pol dir apre: “Laprobasion Bondie fer gagn lesperans, ek lesperans pa desevwar nou.” (Rom. 5:​4, 5) Me avan sa, dan Romin 5:​2, Pol ti dir ki bann Kretien dan lavil Rom ti deza ena enn lesperans, “lesperans pou gagn laglwar ar Bondie.” Alor, si sa bann Kretien-la ti deza ena enn lesperans, kifer Pol rekoz lor lesperans ankor?

16. Servi enn lexanp pou explike kouma lesperans grandi? (Get zimaz osi.)

¹⁶ Pou nou konpran seki Pol inn dir, nou bizin rapel ki lesperans se enn kalite ki bizin kontign grandi. Anou pran enn lexanp: Eski to rapel premie fwa ki to ti tann dir ki later pou vinn enn paradi, ek ki to pou kapav viv lor la pou touletan? Sa lepok-la, kitfwa to ti trouv sa extraordiner, me to pa ti sir ki sa ti pou vremem realize. Selman, plis to’nn aprann konn Zeova ek bann promes ki ena dan Labib, plis sa lesperans-la inn vinn pli vre pou twa ek li’nn grandi.

17. Apre to batem, kouma to lesperans inn kontign grandi?

¹⁷ Apre to batem, amezir ki to ti pe grandi lor plan spiritiel, to lesperans osi ti pe kontign grandi. (Ebre 5:13–6:1) Kitfwa osi to’nn viv seki ena dan Romin 5:​2-4. To’nn gagn plizir leprev,  me parski to’nn andir zot, to’nn santi ki to ena faver Zeova. Ek parski to kone ki to ena faver Zeova, to ena foul konfians ki to pou gagn bann kitsoz ki Li’nn promet twa. Azordi, to lesperans li pli for ki kan to ti fek konn laverite. Li’nn vinn pli vre pou twa, ek li tous twa personelman. Li ena enn linflians lor to lavi. Par exanp, li ena enn lefe lor fason ki to tret to fami, lor bann desizion ki to pran, ek lor fason ki to servi to letan.

18. Ki garanti Zeova donn nou?

¹⁸ Lapot Pol koz lor enn lot kitsoz bien inportan konsernan nou lesperans. Li dir ki, apre ki nou’nn gagn laprobasion Bondie, nou kapav sir ki nou pou trouv bann promes Zeova realize. Kifer nou kapav sir? Pol donn bann Kretien sa garanti-la: “Lesperans pa desevwar nou; parski finn ranpli nou leker ar lamour Bondie gras-a lespri sin ki Bondie finn donn nou.” (Rom. 5:5) Alor, nou kapav sir ki bann promes Zeova pou realize.

19. Ki kitsoz nou kapav sir konsernan nou lesperans?

¹⁹ Mazinn promes ki Zeova ti fer Abraam, kouma li ti ena faver Zeova, ek kouma li ti vinn so kamarad. Eski Abraam so lespwar ti dan vid? Labib dir: “Apre ki Abraam ti’nn montre ki li ti ena pasians, li ti gagn sa promes-la.” (Ebre 6:15; 11:​9, 18; Rom. 4:​20-22) Zeova pa ti desevwar Abraam! Alor, nou kapav sir ki, si nou res fidel anver Zeova, nou pou trouv so bann promes realize. Nou lesperans li vre, li fer nou gagn lazwa, ek li pa pou desevwar nou! (Rom. 12:12) Lapot Pol dir sa bann parol bien ankourazan la: “Ki Bondie ki donn lesperans ranpli zot ar lazwa ek lape parski zot ena konfians an li, pou ki zot ena lesperans an-abondans ek ki zot ranpli ar pwisans lespri sin.”—Rom. 15:13.