1. Dan lasanble Kretien, ki kitsoz tou bann zom bizin fer?

 LERWA David ti dir so garson Salomon: “To bizin for ek azir kouma enn zom.” (1 Ler. 2:​1-3) Dan lasanble Kretien, tou bann frer bizin swiv sa konsey-la. Pou zot fer sa, zot bizin aprann obeir bann lalwa Zeova, ek zot bizin met an pratik bann prinsip Labib dan tou domenn zot lavi. (Lik 2:52) Kifer li bien inportan ki bann zenn frer vinn bann zom ki ena matirite?

2-3. Kifer li bien inportan ki bann zenn frer vinn bann Kretien ki ena matirite?

² Bann frer ena bann responsabilite bien inportan dan zot fami ek dan zot lasanble. Zenn frer, sirman twa osi to’nn pans lor bann responsabilite ki to pou ena dan lavenir. Kitfwa to ena lobzektif pou servi Zeova aplintan, pou vinn enn serviter lasanble, ek plitar, enn ansien. Kitfwa to pans pou marye osi ek pou gagn bann zanfan. (Efe. 6:4; 1 Tim. 3:1) Pou to realiz sa bann lobzektif-la, ek pou to asim bien to bann responsabilite, to bizin vinn enn Kretien ki ena matirite. b

³ Ki kitsoz kapav ed twa pou vinn enn frer ki ena matirite? To bizin aprann ek devlop bann kapasite ki bien inportan. Me ki to kapav fer depi aster-la mem pou to prepar twa pou bann responsabilite ki to pou ena dan lavenir?

4. Kotsa to kapav trouv bann bon lexanp pou imite? (Get zimaz osi.)

⁴ Rod bann bon lexanp ki to kapav imite. Dan Labib, ena lexanp boukou fidel serviter Zeova ki bann zenn frer kapav imite. Parmi zot, ti ena bann zom ki ti bien kontan Zeova, ek ki ti asim bien zot responsabilite pou pran swin pep Zeova. To kapav osi swiv lexanp bann frer ki ena matirite  dan to fami ek dan to lasanble. (Ebre 13:7) Ek to kapav osi swiv lexanp Zezi. (1 Pier 2:21) Kan to etidie lexanp sa bann fidel serviter Zeova la, reflesi lor bann zoli kalite ki zot ti ena. (Ebre 12:​1, 2) Apre sa, gete kouma to kapav swiv zot lexanp.

5. Kouma to kapav devlop to kapasite pou reflesi, ek kifer sa bien inportan? (Psom 119:9)

⁵ Devlop ek servi bien “to kapasite pou reflesi.” (Prov. 3:21) Enn zom ki servi bien so kapasite pou reflesi, li pa azir lor enn kout tet. Okontrer, li pou reflesi bien avan li azir. Alor, fer zefor pou devlop sa kapasite-la ek servi li bien. Kifer? Parski dan lemond azordi, ena boukou zenn zom ki fer par zot latet, ouswa zot les zot lemosion kontrol zot kan zot pran bann desizion. (Prov. 7:7; 29:11) Bann rezo sosial, bann fim, ek Internet kapav osi inflians fason ki bann zenn azir ek panse. Kouma to kapav aprann pou servi bien to kapasite pou reflesi? Pou koumanse, aprann bann prinsip ki ena dan Labib. Sa pou ed twa pou pans parey kouma Zeova. Apre sa, reflesi kouma kan to met sa bann prinsip-la an pratik, to gagn bann bienfe. Ek apre, servi sa bann prinsip-la pou to pran bann desizion ki pou fer Zeova plezir. (Lir Psom 119:9.) Si to devlop bien to kapasite pou reflesi, sa pou ed twa pou vinn enn Kretien ki ena matirite. (Prov. 2:​11, 12; Ebre 5:14) Anou gete kouma to kapasite pou reflesi kapav ed twa dan de sitiasion: (1) dan fason ki to azir avek bann ser, ek (2) dan bann desizion ki to pran konsernan to laparans.

6. Kan enn zenn frer pans parey kouma Zeova, kouma sa ed li pou respekte bann ser?

⁶ Kan to pans parey kouma Zeova, to pou respekte bann ser. Par exanp, pena nanye demal ki enn zenn frer interese avek enn ser. Selman, si li pena lintansion pou marye avek ser-la, enn frer ki pans parey kouma Zeova, pa pou fer nanye ki kapav donn ser-la linpresion ki li anvi sorti avek li. (1 Tim. 5:​1, 2) Ek si li pe frekant enn ser, li pou fer tou pou protez repitasion ser-la. Par exanp, kan zot sorti, li  pou veye ki touletan ena enn sapron avek zot.—1 Kor. 6:18.

7. Kan enn zenn frer pans parey kouma Zeova, kouma sa ed li pou pran bann bon desizion konsernan so labiyman ek so kwafir?

⁷ Kan enn zenn frer pans parey kouma Zeova, sa ed li pou pran bann bon desizion konsernan so labiyman ek so kwafir. Bien souvan, se bann dimounn ki imoral ek ki pa kontan Zeova ki lans bann lamod. Ek bann linz ki lamod azordi, bien souvan zot moulan ouswa zot fer bann zom resanble bann fam. Kan enn zenn frer ki ena matirite swazir so linz, li pou swiv bann prinsip Labib ek li pou swiv lexanp bann serviter Zeova ki fidel dan lasanble. Li pou osi demann limem: ‘Eski bann swa ki mo fer montre ki mo ena bon zizman ek ki mo respekte lezot? Kan lezot get mwa, eski fasilman zot trouve ki mo enn kikenn ki kontan Bondie?’ (1 Kor. 10:​31-33; Tit 2:6) Kan enn zenn frer servi bien so kapasite pou reflesi, pa zis so bann frer ek ser ki pou respekte li, Zeova osi pou respekte li.

8. Kouma enn zenn frer kapav vinn enn kikenn lor ki lezot kapav konte?

⁸ Vinn enn kikenn lor ki lezot kapav konte. Sa pou ed twa pou okip bien tou bann responsabilite ki to gagne. (Lik 16:10) Anou get lexanp Zezi. Li ti enn kikenn ki serye ek responsab. Li ti asim tou bann responsabilite ki Zeova ti donn li, mem kan sa ti difisil. Li ti kontan bann dimounn, sirtou so bann disip, ek li ti donn so lavi pou zot. (Zan 13:1) Parey kouma Zezi, fer zefor pou asim bien tou bann responsabilite ki to gagne. Si to pa kone kouma pou fer enn travay, montre limilite ek demann bann frer ki ena matirite pou ed twa. Kan donn twa enn travay, pa bakle travay-la. (Rom. 12:11) Okontrer, fer to maximum ek fer li bien, parski to pe fer li “pou Zeova, ek pa pou bann zom.” (Kol. 3:23) Li vre ki to pa parfe, alor ena modesti ek rekonet bann erer ki to fer.—Prov. 11:2.

9. Kifer enn zenn frer bizin devlop bann kapasite ki itil?

⁹ Pou to vinn enn Kretien ki ena matirite, to bizin devlop bann kapasite ki itil. Sa pou ed twa pou asim bann responsabilite ki to pou gagne dan lasanble. Sa pou osi ed twa pou to gagn enn travay pou to kapav pran twa ek to fami swin. Ek sa pou osi ed twa pou ena enn bon relasion avek lezot. Anou get de-trwa kapasite ki to kapav devlope.

10-11. Kan enn zenn frer aprann lir ek ekrir bien, ki bienfe li ek lasanble kapav gagne? (Psom 1:​1-3) (Get zimaz osi.)

¹⁰ Aprann lir ek ekrir bien. Labib dir ki, pou ki enn kikenn li ere ek li reisi so lavi, li bizin lir Parol Bondie toulezour ek reflesi lor la. (Lir Psom 1:​1-3.) Kan to lir Labib  toulezour, to pou aprann konn Zeova so fason panse, ek sa pou ed twa pou pans parey kouma Li. (Prov. 1:​3, 4) Se sa kalite zom-la ki nou bizin dan lasanble. Kifer?

¹¹ Dan lasanble, nou bann frer ek ser bizin bann zom ki kapav ansegne ek donn bann konsey ki sorti dan Labib. (Tit 1:9) Si to lir ek ekrir bien, to pou kapav prepar bann diskour ek bann repons ki pou ankouraz lezot ek ogmant zot lafwa. To pou kapav osi pran bann not ki itil kan to etidie ek kan to ekout bann diskour dan renion ek dan bann lasanble. Lerla, to pou kapav servi sa bann not-la pou fer to lafwa vinn pli for ek pou ankouraz lezot.

12. Ki kitsoz kapav ed twa pou kominik bien?

¹² Aprann kominike bien. Enn frer bizin aprann kominik bien. Enn kikenn ki kominik bien, li ekout lezot ek li konpran zot santiman. (Prov. 20:5) Li kapav osi aprann pou konpran lezot gras-a ton zot lavwa, lexpresion zot figir, ek bann zes ki zot fer. Pou to reisi aprann tousala, to bizin pas letan ar lezot. Si to touletan kominik ar lezot par mail ouswa par mesaz, kitfwa li pou difisil pou to kominik bien avek bann dimounn kan zot fas-a-fas ar twa. Alor, rod bann lokazion ek fer zefor pou kominik avek lezot fas-a-fas.—2 Zan 12.

13. Ki lot kitsoz ankor enn zenn frer bizin aprann? (1 Timote 5:8) (Get zimaz osi.)

¹³ Aprann depann lor tomem. Pou to vinn enn frer ki ena matirite, to bizin kapav pran tomem swin ek osi okip to fami. (Lir 1 Timote 5:8.) Dan sertin pei, bann zenn frer aprann enn metie ar zot papa, ouswa ar enn lot manb zot fami. Ek dan lezot pei, bann zenn zom aprann travay ouswa aprann enn metie kan zot ankor lekol. Li enn lavantaz si to aprann enn metie ki pou ed twa gagn enn travay. (Zist. 18:​2, 3; 20:34; Efe. 4:28) Aprann travay dir, ek fini tou travay ki to koumanse. Lezot pou remark sa ek zot pou kone ki to enn kikenn ki serye. Lerla, to pou ena plis sans pou gagn enn travay ek pou gard travay-la. Bann kalite ek bann kapasite ki nou’nn gete ziska ler, zot bien inportan pou ki enn Kretien kapav asim bann responsabilite ki li pou gagne dan lavenir. Anou get sertin parmi sa bann responsabilite-la.

14. Kouma enn zenn frer kapav prepar li pou servi Zeova aplintan?

¹⁴ To kapav servi Zeova aplintan. Boukou frer ki ena matirite inn koumans  servi Zeova aplintan kan zot ti ankor zenn. Servis pionie kapav ed enn zenn frer pou adapte li ar diferan kalite dimounn. Sa kapav osi ed li pou aprann fer enn bidze, ek pou pa depans plis ki seki li gagne. (Fil. 4:​11-13) Enn kitsoz ki kapav ed twa pou servi Zeova aplintan se servis pionie tanporer. Boukou inn fer pionie tanporer pandan enn sertenn letan, ek sa inn ed zot pou vinn pionie permanan. Kan to fer pionie permanan, sa kapav donn twa lokazion pou partisip dan lezot form servis aplintan, kouma par exanp lor konstriksion ouswa dan Betel.

15-16. Kouma enn zenn frer kapav prepar li pou servi kouma serviter lasanble ouswa ansien?

¹⁵ To kapav servi kouma serviter lasanble ouswa ansien. Tou bann frer bizin fer zefor pou ena bann kalite ki bizin ek pou ranpli bann kondision pou servi kouma ansien dan lasanble. Labib dir ki bann frer ki fer sa zefor-la, zot pe rod fer “enn bon travay.” (1 Tim. 3:1) Avan ki enn frer vinn ansien, li bizin ranpli bann kondision pou servi kouma serviter lasanble. Bann serviter lasanble fer boukou kitsoz pou ed bann ansien. Avek limilite, bann ansien ek bann serviter lasanble pran swin bann frer ek ser, ek zot bien aktif dan predikasion. Bann zenn frer kapav ranpli kondision pou vinn enn serviter lasanble kan zot ankor adolesan. Ek si enn serviter lasanble ranpli bann kondision pou vinn ansien, li kapav nome mem si li ena 20 an.

¹⁶ Kouma to kapav prepar twa pou asim sa bann responsabilite-la? Labib donn enn lalis bann kondision ki to bizin ranpli. Ek sa bann kondision-la, zot baze lor bann kalite ki to bizin devlope, kouma par exanp to lamour pou Zeova, pou to fami, ek pou to bann frer ek ser. (1 Tim. 3:​1-13; Tit 1:​6-9; 1 Pier 5:​2, 3) Fer zefor pou konpran bien sak kondision, ek priye Zeova pou to kapav ranpli tou bann kondision. c

17. Kouma enn zenn frer kapav prepar li pou vinn enn mari ek enn sef fami? (Get zimaz osi.)

¹⁷ To kapav desid pou marye ek pou vinn enn sef fami. Sertin frer ki ena matirite desid pou res selibater, parey kouma Zezi ti dir. (Mat. 19:12) Selman, si to desid pou marye, to pe aksepte pou asim de lezot responsabilite, setadir pou vinn enn mari ek enn sef fami. (1 Kor. 11:3) Zeova anvi ki enn mari kontan so madam, ek ki  li pran li swin lor plan fizik, emosionel, ek spiritiel. (Efe. 5:​28, 29) Bann kalite ek bann kapasite ki nou’nn examine dan sa lartik-la, kouma par exanp devlop kapasite pou reflesi, respekte bann madam, ek vinn enn kikenn lor ki lezot kapav konte, kapav ed twa pou vinn enn bon konzwin. Sa pou prepar twa pou asim bien to bann responsabilite kouma mari ek sef fami.

18. Kouma enn zenn frer kapav prepar li pou vinn enn papa?

¹⁸ To kapav desid pou vinn papa. Apre ki to marye, to kapav desid pou gagn zanfan. Kouma lexanp Zeova kapav ed twa pou vinn enn bon papa? (Efe. 6:4) Zeova pa ti ezite pou dir so garson Zezi ki Li bien kontan li. (Mat. 3:17) Si to vinn enn papa, fer an-sort ki to dir to zanfan ki kantite to kontan li. Pa ezite pou felisit li pou bann bon kitsoz ki li fer. Bann papa ki swiv lexanp Zeova, zot ed zot zanfan pou vinn bann Kretien ki ena matirite. To kapav prepar twa depi aster-la mem pou asim sa responsabilite-la, kan to pran swin to fami ek to bann frer ek ser dan lasanble, ek kan to pa ezite pou dir zot ki kantite to kontan zot. (Zan 15:9) Si to fer sa, sa pou ed twa pou vinn enn bon mari ek enn bon papa. Me an-atandan, to pou bien itil dan lame Zeova, dan lasanble, ek pou to fami.

19-20. Ki kitsoz pou ed enn zenn frer pou vinn enn Kretien ki ena matirite? (Get zimaz lor kouvertir.)

¹⁹ Zenn frer, to pa pou vinn enn Kretien ki ena matirite enn kout koumsa! To pou bizin rod bann bon lexanp pou to imite, devlop to kapasite pou reflesi, vinn enn kikenn lor ki lezot kapav konte, devlop bann kapasite ki itil, ek prepar twa pou bann responsabilite ki to kapav gagne dan lavenir.

²⁰ Kan to mazinn tousala, kitfwa sa kapav paret inposib pou fer. Selman, to kapav fer li. Pa bliye ki Zeova anvi ed twa. (Iza. 41:​10, 13) To bann frer ek ser osi pou ed twa. Kan to pou vinn enn Kretien ki ena matirite, to pou ena enn zoli lavi ek to pou ere. Zenn frer, nou bien kontan twa! Nou swete ki Zeova kontign beni twa, pandan ki to fer bann zefor pou vinn enn Kretien ki ena matirite!—Prov. 22:4.