1. Ki nou bizin fer pou nou vinn enn Kretien ki ena matirite?

 BANN zanfan grandi bien vit, pa vre! Anplis, se enn kitsoz ki otomatik. Zot pa bizin fer zefor pou grandi. Parkont, pou vinn enn Kretien ki ena matirite, li pa otomatik; nou bizin fer bann zefor. b (1 Kor. 13:11; Ebre 6:1) Pou nou gagn matirite, nou bizin ena enn bon lamitie avek Zeova. Nou bizin osi So lespri sin pou nou devlop bann zoli kalite, bann kapasite ki itil, ek pou nou prepar nou pou bann responsabilite ki nou pou gagne dan lavenir.—Prov. 1:5.

2. Ki nou aprann dan Zenez 1:​27, ek ki nou pou examine dan sa lartik-la?

² Kan Zeova ti kree bann imin, “li ti kree zot zom ek fam.” (Lir Zenez 1:27.) Li vre ki bann zom ek bann fam zot diferan fizikman, me zot diferan dan lezot domenn osi. Par exanp, Zeova inn donn bann zom ek bann fam bann responsabilite ki diferan. Alor, zot bizin devlop bann kalite ek bann kapasite ki pou ed zot pou asim zot bann responsabilite. (Zen. 2:18) Dan sa lartik-la, nou pou gete seki enn zenn ser bizin fer pou ki li vinn enn Kretien ki ena matirite. Dan prosin lartik, nou pou gete seki bann zenn frer bizin fer.

3-4. Kotsa bann zenn ser kapav trouv bann zoli lexanp ki zot kapav swiv? (Get zimaz osi.)

³ Labib koz lor bann fam ki ti servi Zeova ek ki ti bien kontan Li. (Get lartik « Les femmes dans la Bible : que  pouvons-nous apprendre d’elles ? » lor jw.org.) Ek kouma nou text prinsipal montre, zot ti “ekilibre dan zot bann labitid” ek “fidel dan tou kitsoz.” Dan nou bann lasanble osi, ena boukou madam ki vremem kontan Zeova ek nou kapav aprann boukou kitsoz avek zot.

⁴ Zenn ser, eski to konn de-trwa ser dan to lasanble ki ena matirite ek ki to kapav swiv zot lexanp? Reflesi lor bann zoli kalite ki zot ena ek gete kouma to kapav devlop sa bann kalite-la twa osi. Dan bann prosin paragraf, nou pou get trwa zoli kalite ki bann ser bizin ena.

5. Kifer limilite bien inportan pou ki enn ser ena matirite?

⁵ Limilite bien inportan pou ki enn Kretien ena matirite. Si enn ser ena limilite, li pou ena enn bon lamitie avek Zeova ek avek lezot. (Zak 4:6) Par exanp, si enn ser ena limilite ek li kontan Zeova, li pou obeir prinsip lotorite ki Zeova inn etabli. (1 Kor. 11:3) Li pou swiv sa prinsip-la dan so fami ek dan so lasanble. c

6. Kouma bann zenn ser kapav ena limilite parey kouma Rebeka?

⁶ Anou get lexanp Rebeka. Li ti enn madam ki ti ena sazes. Li ti kone kouma ek kan pou azir, ek li pa ti ezite pou pran bann gran desizion. (Zen. 24:58; 27:​5-17) Me kanmem sa, li ti ena limilite ek li ti respekte lotorite. (Zen. 24:​17, 18, 65) Parey kouma Rebeka, si to ena limilite ek to swiv prinsip lotorite ki Zeova inn etabli, to pou enn bon lexanp pou to fami ek dan to lasanble.

7. Kouma bann zenn ser kapav ena modesti parey kouma Ester?

⁷ Modesti se enn lot kalite inportan ki tou bann Kretien bizin ena. Labib dir ki “lasazes li avek bann dimounn modes.” (Prov. 11:2) Ester ti enn fidel serviter Zeova ki ti ena modesti. Akoz sa, li pa ti  vinn gran-nwar kan li ti vinn larenn. Par exanp, kan so kouzin Mardose ti donn li enn konsey, li ti ekout li ek li ti swiv konsey-la. (Est. 2:​10, 20, 22) Twa osi to kapav montre ki to ena modesti kan to rod konsey ar lezot ek to swiv sa bann konsey-la.—Tit 2:​3-5.

8. Dapre 1 Timote 2:​9, 10, kouma modesti kapav ed enn ser pou swazir bien so linz ek so kwafir?

⁸ Ester ti montre modesti dan enn lot fason osi. Mem si li “ti ena enn zoli lekor ek enn zoli tre,” li pa ti atir latansion lor limem. (Est. 2:​7, 15) Kouma bann ser kapav swiv lexanp Ester? Nou trouv enn fason ki zot kapav fer sa dan 1 Timote 2:​9, 10. (Lir.) Lapot Pol ti dir ki bann ser bizin abiy “avek modesti ek bon zizman.” Bann mo Grek ki servi dan sa verse-la vedir ki enn ser bizin abiy dan enn fason ki apropriye pou lokazion ek li bizin reflesi osi lor lefe ki so linz ek so kwafir kapav ena lor lezot. Antouka, nou bien fier kan nou bann ser swiv sa konsey-la ek ki zot abiy zot avek modesti!

9. Ki nou kapav aprann ar lexanp Abigail?

⁹ Disernman se enn lot kalite ki tou bann ser bizin devlope pou ki zot gagn matirite. Ki ete disernman? Se bon zizman, setadir kapasite pou kone si enn kitsoz li bon ouswa li pa bon ek pou swazir pou fer seki bon. Anou get lexanp Abigail. So misie ti pran enn move desizion ki ti pou amenn maler lor tou bann dimounn ki ti res dan so lakaz. Me Abigail ti ena disernman, ek li ti konpran seki li ti bizin fer pou ki bann dimounn ki res kot li, gagn lavi sov. (1 Sam. 25:​14-23, 32-35) Disernman kapav ed nou osi pou kone kan nou bizin koze ek kan nou bizin res trankil. Ek li ed nou pou interes nou ar lezot, san ki nou mel nou dan zot bann zafer.—1 Tes. 4:11.

10-11. Si to aprann lir ek ekrir bien, ki bienfe twa ek lezot osi pou gagne? (Get zimaz osi.)

¹⁰ Bann ser bizin devlop bann kapasite ki itil. Sertin kapasite ki enn zenn ser pou aprann depi tipti, pou ed li toutlong so lavi. Anou get de-trwa lexanp.

¹¹ Aprann lir ek ekrir bien. Dan sertin kiltir, li pa inportan ki bann tifi aprann lir ek ekrir. Me sa bann kapasite-la bien inportan pou bann Kretien. d (1 Tim. 4:13) Alor, pa les nanye anpes twa aprann lir ek ekrir bien. Kifer? Parski sa bann kapasite-la kapav ed twa pou gagn enn travay. Zot kapav osi ed twa pou etidie  ek ansegn pli bien Parol Bondie. Me pli inportan, sa pou permet twa vinn pli pros ar Zeova, parski to pou kapav lir so Parol ek reflesi lor la.—Zozwe 1:8; 1 Tim. 4:15.

12. Kouma Proverb 31:26 kapav ed twa pou kominike bien?

¹² Aprann kominike bien. Li inportan ki bann Kretien aprann fer sa. Lor sa size-la, disip Zak ti donn enn bon konsey. Li ti dir: “Tou dimounn bizin rapid pou ekoute, pa prese pou koze.” (Zak 1:19) Kan to ekout lezot bien kan zot koze, to montre konpasion anver zot. (1 Pier 3:8) Si to pa pe tro konpran seki enn kikenn pe dir twa, to kapav poz li de-trwa kestion san ki to met li malalez. Apre sa, reflesi avan to koze. (Prov. 15:28) To kapav demann tomem: ‘Eski seki mo pou dir, li vre ek ankourazan? Eski sa pou montre ki mo ena respe ek ki mo zanti?’ To kapav osi aprann ar bann ser ki konn ekout lezot ek ki koz avek zantiyes. (Lir Proverb 31:26.) Ekout bien bann kitsoz ki zot dir ek osi kouma zot dir sa. Plis to pou aprann kominike bien, plis to pou ena enn bon relasion avek lezot.

13. Kouma to kapav aprann okip enn lakaz? (Get zimaz osi.)

¹³ Aprann okip lakaz. An zeneral, se bann madam ki okip lakaz. To mama ouswa enn lot ser kapav montre twa kouma pou fer sa. Enn ser, ki apel Cindy, dir: “Enn parmi bann pli bon kitsoz ki mo mama inn aprann mwa, se ki kan mo fer enn travay bien, sa donn mwa lazwa. Li’nn montre mwa kouma pou kwi, pou netwaye, pou koud linz, ek pou servi bien mo larzan. Gras-a sa, mo kapav okip momem ek fer plis pou Zeova. Li’nn osi aprann mwa pou montre lospitalite anver lezot, ek gras-a sa mo’nn zwenn bann frer ek ser ki’nn vinn bann bon lexanp pou mwa.” (Prov. 31:​15, 21, 22) Enn madam ki okip bien so lakaz ek ki montre lospitalite anver lezot, li enn benediksion pou so fami ek pou so lasanble.—Prov. 31:​13, 17, 27; Zist. 16:15.

14. Ki to kapav aprann ar lexanp Crystal, ek ki kitsoz to bizin rapel?

¹⁴ Aprann debrouy twa par tomem. Tou bann Kretien ki ena matirite bizin aprann debrouy zot par zotmem. (Fil. 4:11) Enn ser, ki apel Crystal, dir: “Kan mo ti kolez, mo bann paran ti ed mwa pou swazir bann size ki plitar ti pou ed mwa. Mo papa ti ankouraz mwa pou fer “accounts,” ek sa finn bien servi mwa apre lekol.” Li bon ki to aprann bann kitsoz ki pou permet twa gagn enn travay, me to bizin osi aprann zer bien to kas. (Prov. 31:​16, 18) Si to pa fer bann det initil ek ki to aprann kontant twa ar seki  to ena, to pou kapav fer plis pou servi Zeova.—1 Tim. 6:8.

15-16. Kouma bann ser selibater zot bann bon lexanp pou lezot? (Mark 10:​29, 30)

¹⁵ Si to devlop bann zoli kalite ek bann kapasite ki itil, sa pou prepar twa pou lavenir. Anou get de-trwa kitsoz ki kapav arive.

¹⁶ To kapav desid pou res selibater. Zezi ti dir ki sertin kapav swazir pou res selibater, ek se samem ki sertin ser desid pou fer, mem si dan zot kiltir li pa normal ki zot pa marye. (Mat. 19:​10-12) Ena lezot ki res selibater pou lezot rezon. Pou Zeova ek Zezi, bann selibater ena boukou valer. Partou dan lemond, bann ser selibater zot bann bon lexanp dan zot lasanble. Parski zot kontan ek zot vremem gagn traka zot bann frer ek ser, zot vinn bann ser ek bann mama spiritiel pou boukou dan lasanble.—Lir Mark 10:​29, 30; 1 Tim. 5:2.

17. Kouma enn zenn ser kapav prepar li pou servi Zeova aplintan?

¹⁷ To kapav servi Zeova aplintan. Nou bann ser, “zot enn gran larme” ek zot fer boukou dan predikasion. (Ps. 68:11) Eski to kapav organiz twa pou to servi Zeova aplintan? Kitfwa to kapav servi kouma pionie, kouma volonter lor konstriksion, ouswa kouma Betelit. Si to fixe enn parmi sa bann lobzektif-la, priye Zeova pou ki Li ed twa. Koz avek bann ki’nn deza realiz sa lobzektif-la, ek demann zot seki to kapav fer pou to realiz to lobzektif. Apre sa, fer enn program ki pou permet twa realiz to lobzektif. Si to reisi servi Zeova aplintan, sa pou ouver lezot laport pou twa dan so servis.

18. Si enn ser desid pou marye, kifer li bizin swazir bien so mari? (Get zimaz osi.)

¹⁸ To kapav desid pou marye. Bann kalite ek bann kapasite ki nou’nn trouve dan sa lartik-la, kapav ed twa pou vinn enn bon madam. Si to pe pans pou marye, to bizin swazir bien ar kisann-la to pou marye. Se enn parmi bann pli gran desizion ki to pou pran dan to lavi. Pa bliye ki, kan to pou marye, to pou bizin respekte lotorite to mari. (Rom. 7:2; Efe. 5:​23, 33) Alor, to bizin poz twa sa bann kestion-la: ‘Eski sa frer-la enn Kretien ki ena matirite? Eski li pe met Zeova an premie dan so lavi? Eski  li pran bann bon desizion? Eski li aksepte bann erer ki li fer? Eski li ena respe pou bann madam? Eski li pou kapav pran mwa swin lor plan spiritiel, materyel, ek emosionel? Eski li enn kikenn ki responsab? Par exanp, ki bann responsabilite li ena dan lasanble, ek eski li asim zot bien?’ (Lik 16:10; 1 Tim. 5:8) Pa bliye osi ki, si to anvi gagn enn bon mari, tomem to pou bizin enn bon madam.

19. Kan Labib dir ki enn madam li “enn led,” kifer se enn loner?

¹⁹ Labib dir ki enn bon madam, li “enn led” pou so mari, ek li “enn kikenn ki al bien ar li.” (Zen. 2:18) Eski Labib pe denigre bann madam? Non! Okontrer, kan Labib dir ki enn madam li enn “led,” se enn loner, parski Labib souvan dekrir Zeova kouma enn led (Ps. 54:​4, NW; Ebre 13:6) Enn madam li enn bon led pou so mari kan li soutenir li. Par exanp, kan so mari pran bann desizion pou lafami, li korper avek li. Ek parski li kontan Zeova, madam-la pou ede pou ki so mari ena enn bon repitasion. (Prov. 31:​11, 12; 1 Tim. 3:11) To kapav prepar twa depi aster-la mem pou vinn enn bon madam, kan to ogmant to lamour pou Zeova ek kan to ed to fami ek to lasanble.

20. Ki lefe enn bon mama kapav ena lor so fami?

²⁰ To kapav desid pou gagn zanfan. Apre zot maryaz, twa ek to mari kapav desid pou gagn bann zanfan. (Ps. 127:3) Alor, li bon ki to reflesi alavans lor seki to bizin fer pou ki to kapav vinn enn bon mama. Bann kalite ek bann kapasite ki nou’nn gete dan sa lartik-la, pou ed twa pou vinn enn bon madam ek enn bon mama. Kan to ena lamour, bonte, ek pasians, to pou ede pou ki to fami ere, ek to bann zanfan pou santi zot an sekirite.—Prov. 24:3.

21. Ki nou resanti pou nou bann ser, ek kifer? (Get zimaz lor kouvertir.)

²¹ Nou bien kontan nou bann ser pou tou seki zot fer pou Zeova ek pou so bann serviter. (Ebre 6:10) Zot fer boukou zefor pou devlop bann kalite ek bann kapasite, pou ki zotmem ek bann dimounn ki otour zot ere, ek zot prepar zot bien pou seki kapav arive dan lavenir. Nou bann ser ki nou bien kontan, zot vremem ena boukou valer dan lorganizasion Zeova!