1. Kouma nou kone ki dipin ti inportan pou bann dimounn dan lepase?

 DAN lepase, bann dimounn ti konsider dipin kouma enn manze bien inportan. (Zen. 14:18; Lik 4:4) Avredir, li ti telman inportan ki Labib servi mo “dipin” pou koz lor manze an zeneral. (Mat. 6:11) Zezi osi ti servi dipin dan de gran mirak ki li ti fer. (Mat. 16:9, 10) Nou kapav trouv enn sa bann mirak-la dan Zan sapit 6. Amezir ki nou pou examinn Zan sapit 6, nou pou trouv bann leson ki nou kapav met an pratik azordi.

2. Ki ti arive dan Betsayda?

² Enn zour, apre enn kanpagn predikasion, bann zapot Zezi ti bien fatige. Alor, zot ti mont dan enn bato ansam avek Zezi, ek zot ti al lot kote lamer Galile pou ki zot kapav repoze. (Mark 6:7, 30-32; Lik 9:10) Zezi ti amenn zot apar dan enn lavil ki apel Betsayda. Ek bien vit, enn lafoul dimounn ti ariv kot zot ti ete ek ti antour zot. Selman, Zezi pa ti inior zot. Avek boukou bonte, li ti pran letan pou ansegn zot lor Rwayom Bondie ek pou geri bann ki malad. Selman, “tar dan lapremidi,” bann disip kitfwa ti pe demann zotmem, ‘Kouma sa bann dimounn-la pou gagn kitsoz pou zot manze?’ Kitfwa sertin parmi zot ti ena inpe manze ar zot. Selman, laplipar parmi zot ti pou bizin al dan bann vilaz pou aste manze. (Mat. 14:15; Zan 6:4, 5) Ki Zezi ti fer dan sa sitiasion-la?

ZEZI TI FER ENN MIRAK POU NOURI LAFOUL

3. Ki Zezi ti dir so bann zapot fer? (Get lor kouvertir.)

³ Zezi ti dir so bann zapot: “Li pa neseser ki bann-la ale; donn zot kitsoz pou manze zotmem.” (Mat. 14:16) Sa ti paret  enn kitsoz inposib, parski ti ena apepre 5,000 zom. Ek si nou kont bann madam ek bann zanfan, kitfwa ti ena apepre 15,000 dimounn pou nouri. (Mat. 14:21) Lerla, Andre ti dir: “Ala enn ti garson ki ena sink dipin lorz ek de ti pwason. Me ki sa pou servi pou sa kantite dimounn-la?” (Zan 6:9) Dan sa lepok-la, se bann dimounn ki ti mizer ki ti manz dipin lorz. Ek kitfwa sa de ti pwason ki sa garson-la ti done, ti bann pwason ki’nn met sek ek ki sale, pa bann pwason ki fre. Kanmem sa, sa kantite dipin ek pwason ki sa ti garson-la ti done, pa ti pou ase pou nouri tou sa dimounn-la.

4. Ki nou kapav aprann dan Zan 6:11-13? (Get zimaz osi.)

⁴ Zezi ti anvi montre lospitalite anver sa bann dimounn-la. Alor, li “ti demann tou dimounn pou asiz an group lor lerb.” (Mark 6:39, 40; lir Zan 6:11-13.) Apre sa, Zezi ti priye so Papa ek ti remersie Li pou sa sink dipin ek sa de pwason-la. Kan Zezi ti fer sa, li ti montre ki se Zeova ki ti donn sa manze-la, ek Zezi ti bien rekonesan pou sa. Se enn zoli rapel pou nou osi, pa vre! Parey kouma Zezi, fode pa nou bliye pou priye avan ki nou manze. Alor, ninport kotsa nou ete, ki nou dan travay, dan lekol, avek nou fami, ouswa nou tousel, li bon ki nou pran labitid pou priye Zeova avan ki nou manze. Kan Zezi ti priye, li ti demann so bann disip pou partaz sa manze-la avek lafoul, ek tou dimounn ti manze ziska ki zot vant plin. Anplis, ti ena telman boukou manze ki bann-la pa ti reisi manz tou. Zezi pa ti anvi ki zet sa manze ki ti reste la. Alor, li ti demann so bann disip pou ramas tou seki ti reste, pou ki zot kapav servi li apre. Li pa ti fer gaspiyaz, ek li ti servi  bann kitsoz ki li ti ena avek sazes. Se enn zoli lexanp pou nou. Nou osi, nou bizin pa fer gaspiyaz, ek nou bizin servi bann kitsoz ki nou ena avek sazes. Si to enn paran, to kapav servi sa zistwar-la pou ansegn to zanfan linportans pou priye avan manze, pou montre lospitalite, ek pou montre li zenere.

5. Ki kitsoz sa lafoul-la ti anvi fer kan zot ti trouv Zezi fer bann mirak, ek kouma Zezi ti reazir?

⁵ Bann dimounn ti inpresione ar fason ki Zezi ti ansegne, ek osi par bann mirak ki li ti fer. Zot ti kone ki Moiz ti dir ki Bondie ti pou avoy enn gran profet pou zot. Alor, kitfwa zot ti panse ki sa profet-la se Zezi limem. (Det. 18:15-18) Kitfwa zot ti panse osi ki Zezi ti pou enn gran dirizan, ek ki li ti pou kapav nouri tou dimounn ki ena dan Izrael. Se akoz sa ki lafoul-la ti anvi “trap [Zezi] pou fer li vinn lerwa.” (Zan 6:14, 15) Sa lepok-la, se bann Romin ki ti pe diriz bann Zwif. Si Zezi ti les bann Zwif fer li vinn lerwa, sa ti pou koumadir li pe partisip dan bann zafer politik ek ki li ti pe pran par bann Zwif. Selman, Zezi pa ti fer sa. Okontrer, Labib dir ki li ti “al lor montagn.” Mem si lezot ti met presion lor li, Zezi pa ti partisip dan bann zafer politik. Enn zoli leson pou nou, pa vre!

6. Kouma nou kapav swiv lexanp Zezi? (Get zimaz osi.)

⁶ Azordi, li vre ki bann dimounn pa pou demann nou pou fer enn mirak pou donn zot manze, pou geri bann ki malad, ouswa  pou vinn zot dirizan. Me kitfwa zot kapav demann nou pou vot pou enn kikenn, ouswa pou soutenir enn kikenn ki zot panse pou amelior bann kitsoz. Zezi inn donn nou enn zoli lexanp. Li ti refiz partisip dan bann zafer politik. Kan nou lir Labib, nou trouve ki inpe letan apre sa, li ti dir: “Mo Rwayom pa fer parti dan sa lemond-la.” (Zan 17:14; 18:36) Antan ki Kretien, nou bizin pans parey kouma Zezi ek swiv so lexanp. Kouma nou kapav fer sa? Nou fer sa kan parey kouma Zezi, nou soutenir Rwayom Bondie, nou koz lor la ar lezot, ek nou priye pou ki li vini. (Mat. 6:10) Me ena ankor boukou kitsoz ki nou kapav aprann ar sa mirak ki Zezi ti fer la.

“ZOT PA TI’NN KONPRAN KI VEDIR MIRAK KI ZEZI TI FER AR DIPIN”

7. Ki Zezi ti fer, ek kouma bann zapot ti reazir? (Zan 6:16-20)

⁷ Apre ki Zezi ti nouri lafoul, li ti dir so bann zapot kit sa landrwa-la ek retourn Kafarnaom. Lerla, li ti al lor montagn pou ki lafoul pa fer li vinn lerwa. (Lir Zan 6:16-20.) Kan bann zapot ti lor bato, ti ena enn tanpet lor lamer, avek bann gro divan ek bann gro vag. Lerla, Zezi ti mars lor delo pou al zwenn so bann zapot. Inpe apre, li ti dir Pier mars lor delo pou vinn zwenn li. (Mat. 14:22-31) Ek kan Zezi ti mont lor bato-la, divan-la ti kalme net. Bann zapot ti etone ek zot ti dir: “To vremem Garson Bondie.” a (Mat. 14:33) Li inpe drol ki bann zapot dir sa bann parol-la apre ki Zezi mars lor delo, ek pa kan li ti fer enn mirak pou nouri bann milye dimounn, pa vre! Mark, ki ti ekrir lor seki ti arive, ti donn bann lezot detay lor la. Li ti ekrir: “[Bann zapot] ti bien etone, parski zot pa ti’nn konpran ki vedir mirak ki Zezi ti fer ar dipin, ek dan zot leker, zot ti ankor gagn difikilte pou konpran.” (Mark 6:50-52) Avredir, bann zapot Zezi pa ti konpran ki kantite pouvwar Zeova ti donn Zezi. Me zis apre sa, Zezi ti rekoz lor sa mirak ki li ti fer ar dipin la, ek li ti ansegn zot enn lot leson.

8-9. Kifer enn lafoul dimounn ti pe rod Zezi? (Zan 6:26, 27)

⁸ Sa lafoul ki Zezi ti nouri la, ti plis interese pou gagn manze, ki ekout bann lansegnman Zezi. Kifer nou dir sa? So landemin, zot ti revinn dan mem landrwa kot Zezi ti nouri zot. Me Zezi ek so bann zapot pa ti la. Alor, zot ti mont lor bann bato ki ti sorti Tiberiad, ek zot ti al Kafarnaom pou al rod Zezi. (Zan 6:22-24) Eski zot ti fer sa parski zot ti anvi aprann plis lor Rwayom Bondie? Non. Zot ti fer sa parski zot ti anvi ki Zezi nouri zot ankor. Kouma nou konn sa?

⁹ Kan zot ti reisi trouv Zezi pre ar Kafarnaom, Zezi pa ti ezite pou dir zot ki zot ti pe rod li parski zot ti anvi gagn manze. Li ti dir zot ki mem si zot ti “manz dipin ziska ki zot vant plin,” sa manze-la ti ‘enn manze ki kapav gate.’ Lerla, li ti dir zot ki zot bizin plito travay pou enn “manze ki pa gate ek ki fer gagn lavi pou touletan.” (Lir Zan 6:26, 27.) Zezi ti dir zot ki se so Papa ki donn sa kalite manze-la. Kan bann-la ti tande ki ena enn manze ki kapav fer zot gagn lavi pou touletan, kitfwa zot ti gagn sok! Ek kitfwa zot ti pe reflesi lor seki zot ti bizin fer pou ki zot kapav gagn sa kalite manze-la.

10. Ki sa bann dimounn-la ti bizin fer pou ki zot kapav gagn lavi pou touletan?

¹⁰ Sa bann Zwif-la ti anvi kone ki travay ouswa ki kitsoz zot ti bizin fer pou ki zot kapav gagn sa kalite manze-la. Kitfwa zot  ti pe pans bann “travay” ki Lalwa Moiz ti demann zot pou fer. Me Zezi ti dir zot: “Pou akonpli travay Bondie, zot bizin ena lafwa dan sa kikenn ki li’nn avoye la.” (Zan 6:28, 29) Alor, pou ki zot kapav “gagn lavi pou touletan,” zot ti bizin ena lafwa dan Zezi, sa kikenn ki Bondie inn avoye la. Avredir, Zezi ti deza koz lor la avan. (Zan 3:16-18, 36) Ek inpe plitar, li ti pou rekoz lor la ankor.—Zan 17:3.

11. Kouma bann Zwif ti montre ki zot ti anvi gagn zis manze? (Psom 78:24, 25)

¹¹ Sa bann Zwif-la pa ti ena lafwa dan Zezi. Akoz sa, zot ti dir Zezi: “Ki mirak to pou fer pou ki nou kapav trouve ek krwar twa?” (Zan 6:30) Apre sa, zot ti dir Zezi ki zot bann anset dan lepok Moiz ti gagn lamann, ki ti koumadir dipin. (Ne. 9:15; lir Psom 78:24, 25.) Sa ti montre ki zot ti gagn traka zis manze. Ek kan Zezi apre sa ti koz lor “vre dipin ki sorti dan lesiel,” ki donn lavi pou touletan, ek ki pa parey kouma lamann, zot pa ti mem poz li bann kestion pou esey konpran seki li ti pe rod dir. (Zan 6:32) Zot ti telman konsantre lor seki zot ti bizin lor plan fizik, ki zot pa ti mem esey konpran seki Zezi ti pe explik zot lor lavi pou touletan. Ki leson nou aprann?

SEKI BIZIN PLI INPORTAN POU NOU

12. Kouma Zezi ti montre ki kitsoz ti pli inportan pou li?

¹² Ena enn leson inportan ki nou kapav aprann dan Zan sapit 6. Obeir Bondie ek ena enn bon lamitie avek Li, se samem ki bizin pli inportan pou nou. Kan Satan ti tant Zezi, Zezi ti ansegn sa pwin inportan-la kan li ti dir: “Zom bizin viv, pa zis ar dipin, me ar tou parol ki sorti dan labous Zeova.” (Mat. 4:3, 4) Ek dan so Sermon lor Montagn, li ti montre ki kantite li inportan ki nou ena enn bon lamitie ar Bondie. (Mat. 5:3) Alor, sakenn bizin demann limem, ‘Eski fason ki mo viv montre ki mo lamitie avek Zeova, se samem ki pli inportan pou mwa?’

13. (a) Eski li normal ki nou priye pou bann kitsoz ki nou bizin? Explike. (b) Kouma lavertisman ki Pol ti donn bann Kretien so lepok konsern nou osi azordi? (1 Korintien 10:6, 7, 11)

¹³ Li normal ki nou priye pou bann kitsoz ki nou bizin ek osi pou profit sa bann kitsoz-la. (Lik 11:3) Labib dir ki li bon ki enn dimounn ‘manze, bwar ek gagn lazwa ar travay dir ki li’nn fer.’ Labib dir ki sa li “sorti dan lame vre Bondie.” (Ekle. 2:24; 8:15; Zak 1:17) Selman, nou bizin fer atansion pou pa les bann kitsoz materyel vinn kitsoz ki pli inportan dan nou lavi. Nou kapav aprann plis lor la, kan nou get seki lapot Pol ti dir bann Kretien dan premie siek. Li ti koz lor move lexanp bann Izraelit, sirtou seki zot ti fer kan zot ti pre ar Montagn Sinai. Pol ti averti bann Kretien, ek li ti dir zot: “Pa dezir bann move kitsoz, parey kouma [bann Izraelit] inn fer.” (Lir 1 Korintien 10:6, 7, 11.) Zeova ti fer enn mirak pou ki bann Izraelit gagn manze. Me parski zot ti anvi gagn plis manze, sa manze ki Zeova ti donn zot la ti vinn enn “move kitsoz” pou zot. (Nonb 11:4-6, 31-34) Ek kan zot ti ador sa vo an-or la, bann Izraelit ti montre ki zot ti plis interese ar manze, bwar, ek profit lavi, olie ki zot ki obeir Zeova. (Ex. 32:4-6) Pol ti servi sa lexanp-la pou averti bann Kretien so lepok, parski zot ti pe viv lepok kot Zerizalem ek so tanp ti pou detrir. Azordi, nou pe viv lepok lafin. Alor, li bien inportan ki nou ekout bien lavertisman lapot Pol.

14. Ki Labib dir konsernan manze ki pou ena dan lemond nouvo?

¹⁴ Kan Zezi ti dir ki nou bizin priye pou “dipin ki nou bizin pou zordi,” li ti osi ansegn nou ki nou bizin priye pou ki volonte  Bondie fer “lor later parey kouma dan lesiel.” (Mat. 6:9-11) Kouma later pou ete kan Rwayom Bondie pou dirize? Labib montre nou ki enn parmi bann kitsoz ki Bondie pou fer, se ranpli later ar manze. Dan Izai 25:6-8, Labib dir ki bann dimounn pou ena boukou manze kan Rwayom Bondie pou dirize. Ek Psom 72:16 dir: “Pou ena sereal an-abondans lor later; lao lor bann montagn, pou ena enn gran labondans.” Sa lepok-la, to pou kapav kwi to manze prefere ek sey bann nouvo reset. To pou kapav osi plant to prop karo rezin ek bwar divin ki to’nn fer ar to lame. (Iza. 65:21, 22) Wi, tou dimounn ki pou res lor later pou kapav profit sa bann zoli kitsoz-la.

15. Bann ki pou resisite, ki zot pou bizin aprann? (Zan 6:35)

¹⁵ Lir Zan 6:35. Anou reflesi lor sa bann dimounn ki Zezi ti nouri gras-a enn mirak la. Mem si boukou parmi zot pa ti ena lafwa dan Zezi, kitfwa zot pou resisite ek nou pou kapav zwenn sertin parmi zot. (Zan 5:28, 29) Sa bann dimounn-la pou bizin konpran seki Zezi ti pe rod dir, kan li ti dir: “Momem dipin ki donn lavi. Seki swiv mwa pa pou gagn fin ditou.” Savedir ki zot pou bizin ena lafwa dan sakrifis Zezi; lafwa dan lavi ki li’nn done pou zot. Sa lepok-la, tou bann ki pou resisite ek tou bann zanfan ki pou ne dan lemond nouvo, pou bizin aprann laverite lor Zeova ek lor so proze. Ek nou, nou pou ena lazwa pou ansegn zot sa bann zoli kitsoz-la. Kan nou pou ed bann dimounn pou vinn bann kamarad Zeova, sa pou donn nou boukou plis lazwa ki ninport ki manze ki nou pou manze dan lemond nouvo!

16. Ki nou pou examine dan prosin lartik?

¹⁶ Dan sa lartik-la, nou’nn examinn enn parti dan Zan sapit 6. Me Zezi ena ankor boukou kitsoz pou ansegn nou lor “lavi pou touletan.” Bann Zwif ki ti tann seki Zezi ti dir, ti bizin pran kont so bann parol, ek nou osi nou bizin fer parey azordi. Se pou sa rezon-la ki nou pou kontign examinn Zan sapit 6 dan prosin lartik.