1. Ki kitsoz boukou dimounn panse lor lavi pou touletan?

 BOUKOU dimounn fer bien atansion ar seki zot manze ek zot fer lexersis regilierman. Zot fer sa pou ki zot res an bonn sante, pou ki zot viv inpe pli lontan. Selman, mem si zot fer tousala, zot kone ki zot pou vinn vie ek ki zot pou mor. Kitfwa zot panse ki li inposib ki zot viv pou touletan. Selman, Zezi ti dir ki bann dimounn kapav gagn “lavi pou touletan.” Nou trouv sa dan Zan 3:16 ek 5:24.

2. Dan Zan sapit 6, ki Zezi ti dir lor lavi pou touletan? (Zan 6:39, 40)

² Enn fwa, Zezi ti fer enn mirak ar sink dipin ek de pwason, ek li ti nouri enn lafoul dimounn. a Sa ti enn kitsoz extraordiner! Selman, seki li ti dir so landemin ti pli extraordiner ankor. Sa lafoul dimounn la ti swiv Zezi ziska Kafarnaom, ki pre ar lakot Galile, ek laba, Zezi ti dir zot ki li pou resisit bann mor ek ki zot pou kapav viv pou touletan. (Lir Zan 6:39, 40.) Mazine seki sa vedir pou bann dimounn ki to kontan, me ki’nn mor! Bann parol Zezi montre ki zot pou kapav resisite, ek ki twa ansam avek zot, zot pou kapav viv pou touletan! Selman, boukou dimounn pa ti konpran seki Zezi ti dir apre ki li ti  koz lor rezireksion. Ek ena ankor boukou dimounn ki pa konpran sa azordi. Anou gete seki Zezi ti dir.

3. Dapre Zan 6:51, ki Zezi ti dir lor limem?

³ Apre ki Zezi ti fer enn mirak ar dipin pou nouri sa lafoul dimounn la, kitfwa sa ti fer zot pans lamann ki Bondie ti donn zot bann anset kan zot ti dan dezer. Zot ti kone ki bann Lekritir apel lamann, “dipin ki sorti dan lesiel.” (Ps. 105:40; Zan 6:31) Selman, Zezi ti explik zot gran diferans ki ena ant li ek lamann. Li ti dir zot: “Momem dipin ki donn lavi ki’nn desann depi lesiel. Si kikenn manz sa dipin-la li pou viv pou touletan.” (Lir Zan 6:51.) Mem si lamann ti enn mirak ki Bondie ti fer pou nouri bann Izraelit, bann ki ti manz sa ti mor avek letan. (Zan 6:49) Parkont, Zezi dir ki li, li “vre dipin ki sorti dan lesiel,” “dipin ki Bondie done,” ek “dipin ki donn lavi.” (Zan 6:32, 33, 35) Kan bann Zwif ti tann sa, zot ti etone. Zot pa ti konpran kouma Zezi ti kapav dir ki li “dipin” ki sorti dan lesiel, ek ki sa dipin-la pli bon ki lamann ki Bondie ti donn zot bann anset. Me apre sa, Zezi ti dir zot: “Dipin ki mo pou done . . . se mo lekor.” Ki li ti pe rod dir? Li bien inportan ki nou konpran sa, parski sa kapav ed nou pou konpran kouma nou ek bann dimounn ki nou kontan me ki’nn mor, kapav gagn lavi pou touletan. Alor, anou gete seki Zezi ti pe rod dir.

“DIPIN KI DONN LAVI” EK LEKOR ZEZI

4. Kifer sertin Zwif ti gagn sok ar seki Zezi ti dir?

⁴ Sertin Zwif ti gagn sok kan zot ti tann Zezi dir ki so lekor ti “dipin ki [li ti] pou done pou ki lemond gagn lavi.” Eski zot ti pe panse ki Zezi ti anvi ki zot manz so laser? (Zan 6:52) Seki Zezi ti dir zot apre, ti plis etonn zot ankor. Li ti dir zot: “Si zot pa manz lekor Garson limanite ek zot pa bwar so disan, zot pena lavi dan zotmem.”—Zan 6:53.

5. Kifer nou kapav sir ki Zezi pa ti pe rod dir bann dimounn bwar disan ki ena dan so lavenn?

⁵ Depi lepok Noe, Zeova inn defann bann dimounn manz disan. (Zen. 9:3, 4) Apre sa, Li ti donn mem lalwa bann Izraelit. Li ti dir zot ki si enn kikenn manz disan, “pou bizin touy li.” (Lev. 7:27) Zezi ti ankouraz bann Zwif pou obeir tou bann lalwa ki Bondie ti donn zot. (Mat. 5:17-19) Alor, zame li pa ti pou dir zot manz so laser ek bwar disan ki ena dan so lavenn. Avredir, kan Zezi ti dir sa bann parol ki paret bizar la, li ti anvi ansegn zot kouma zot kapav gagn “lavi pou touletan.”—Zan 6:54.

6. Kifer nou kapav dir ki Zezi ti pe koz dan enn fason sinbolik ar sa lafoul dimounn la?

⁶ Ki Zezi ti pe rod dir? Li kler ki Zezi ti pe koz dan enn fason sinbolik, parey kouma li ti fer kan li ti koz ar enn Samaritenn. Li ti dir sa Samaritenn-la: “Ninport kisann-la ki bwar delo ki mo pou donn li, zame pa pou gagn swaf ankor, me sa delo ki mo pou donn li la pou vinn enn lasours delo dan li, ki kontign koule pou donn lavi pou touletan.” (Zan 4:7, 14) b Zezi pa ti pe dir sa Samaritenn-la ki li ti bizin bwar enn delo ki sorti dan enn pwi spesial pou ki li gagn lavi pou touletan. Alor, dan mem fason, Zezi pa ti pe dir sa lafoul dimounn la ki zot ti  bizin manz so laser ek bwar disan ki ena dan so lavenn, pou ki zot kapav viv pou touletan.

DE SITIASION BIEN DIFERAN

7. Ki sertin dimounn dir lor Zan 6:53?

⁷ Sertin dimounn dir ki, kan Zezi ti dir ki bann dimounn bizin manz so lekor ek bwar so disan dan Zan 6:53, an realite li ti pe explike seki bann dimounn bizin fer pandan Repa Lesegner. Zot dir sa parski dan toule-de lokazion Zezi ti dir preske mem kitsoz. (Mat. 26:26-28) Zot dir ki tou dimounn ki asiste Repa Lesegner bizin manz dipin ek bwar divin ki pase pandan sa levennman-la. Eski sa li vre? Li bien inportan ki nou gagn repons sa kestion-la parski toule lane bann milyon dimounn lor later asiste sa levennman-la ansam ar nou. Alor, anou gete ki diferans ena ant seki Zezi ti dir dan Zan 6:53 ek seki li ti dir pandan Repa Lesegner.

8. Sit sertin diferans ki ena ant sa de sitasion-la. (Get zimaz osi.)

⁸ Anou get de diferans ki ena ant sa de sitiasion-la. Premierman, kan eski Zezi ti dir bann parol ki trouv dan Zan 6:53-56, ek kotsa li ti ete kan li ti dir sa? Li ti dir sa bann parol-la kan li ti dan Galile lane 32 Nou Lepok. Sa ti arive apepre enn an avan ki li selebre Repa Lesegner  dan Zerizalem. Deziemman, ar kisann-la Zezi ti pe koze? Li ti pe koz ar bann dimounn ki ti plis interese pou gagn manze ar li, olie ki zot aprann plis lor Zeova ek lor So Rwayom. (Zan 6:26) Se pou sa rezon-la ki, kan Zezi ti dir zot enn kitsoz ki zot pa ti tro konpran, zot ti aret ekout li. Mem sertin parmi so bann disip ti aret ekout li. (Zan 6:14, 36, 42, 60, 64, 66) Sa bann dimounn-la ti bien diferan ar sa 11 zapot ki ti ansam ar Zezi kan li ti selebre Repa Lesegner apepre enn an plitar, lane 33 Nou Lepok. Sa zour-la, sa 11 zapot fidel la ti res avek Zezi mem si zot pa ti konpran tou seki li ti ansegn zot. Zot ti bien diferan ar sa lafoul dimounn ki ti dan Galile la. Kifer? Parski zot, zot ti sir ki Zezi ti Garson Bondie. (Mat. 16:16) Ek Zezi ti felisit zot pou sa. Li ti dir zot: “Zot, zot finn touletan res ar mwa dan mo bann leprev.” (Lik 22:28) Bann diferans ki ena ant sa de sitiasion-la montre ki dan Zan 6:53 Zezi pa ti pe explike seki ti pou arive pandan Repa Lesegner. Aster-la, anou get bann lezot diferans ki ena ant sa de sitiasion-la.

KOUMA BANN PAROL ZEZI KONSERN NOU?

9. Bann parol ki Zezi ti dir pandan Repa Lesegner, konsern kisann-la?

⁹ Pandan Repa Lesegner, Zezi ti pas dipin san levin ar so bann zapot ek li ti dir zot ki sa reprezant so lekor. Apre sa, li ti pas enn koup divin ek li ti dir zot ki sa reprezant “disan lalians.” (Mark 14:22-25; Lik 22:20; 1 Kor. 11:24) Seki Zezi ti dir lor sa lalians-la, li bien inportan. Li ti apel sa lalians-la, “nouvo lalians,” ek sa lalians-la li ant Zeova ek “lakaz Izrael [spiritiel]” setadir zis bann ki pou regn ansam ar Zezi “dan Rwayom Bondie.” (Ebre 8:6, 10; 9:15) Sa lepok-la, bann zapot pa ti tro konpran seki Zezi ti dir zot. Selman, inpe letan apre, lespri sin ti vinn lor zot ek zot ti form parti sa nouvo lalians-la.—Zan 14:2, 3.

10. Ki lot diferans ena ant seki Zezi ti dir pandan Repa Lesegner ek seki li ti dir dan Zan 6:53? (Get zimaz osi.)

¹⁰ Seki Zezi ti dir pandan Repa Lesegner konsern zis sa ti group ki Labib apel “ti troupo” la. Bann zapot ki ti fidel, ti bann premie pou form parti dan sa group-la. (Lik 12:32) Kan Zezi ti selebre Repa Lesegner, se ar zot ki li ti dir manz sa dipin ek bwar sa divin la. Me plitar, bann lezot ki ti pou form parti dan sa group-la, zot osi zot ti pou bizin manz dipin ek bwar divin sak fwa ki zot ti pou selebre Repa Lesegner. Se sa ti group-la ki pou al regne ansam ar Zezi dan lesiel. Sa se enn lot diferans ki ena ant seki Zezi ti dir pandan Repa Lesegner ek seki li ti dir dan Zan 6:53. Seki Zezi ti dir pandan Repa Lesegner ti konsern zis enn ti group dimounn, alor ki seki li ti dir ar sa lafoul ki ti dan Galile la, ti konsern boukou dimounn.

11. Seki Zezi ti dir dan Galile, eski sa ti konsern zis enn ti group dimounn? Explike.

¹¹ Lane 32 Nou Lepok, kan Zezi ti dan Galile, laplipar bann dimounn ki ti ekout li koze ti zis anvi gagn manze ar li. Selman, Zezi ti anvi fer zot konpran ki ena enn kitsoz ki pli inportan ki manze. Sa kitsoz-la ti kapav fer zot gagn lavi pou touletan. Zezi ti dir zot osi ki bann mor pou kapav resisite dan dernie zour ek ki zot pou kapav viv pou touletan. Dan sa ler-la, Zezi pa ti pe koz lor benediksion ki zis enn ti group dimounn  ti pou gagne, parey kouma li ti fer pandan Repa Lesegner. Okontrer, dan Galile, Zezi ti pe koz lor enn benediksion ki tou dimounn ti kapav gagne. Se akoz sa ki li ti dir: “Si kikenn manz sa dipin-la li pou viv pou touletan; . . . Dipin ki mo pou done pou ki lemond gagn lavi, se mo lekor.”—Zan 6:51.

12. Pou ki enn kikenn gagn lavi pou touletan, ki li bizin fer?

¹² Eski Zezi ti pe rod dir ki sak dimounn ki’nn viv lor later pou gagn lavi pou touletan? Non. Se zis bann ki “manz sa dipin-la,” setadir bann ki ena lafwa dan Zezi, ki pou kapav gagn sa benediksion-la. Azordi, boukou dimounn dir ki zot “krwar dan [Zezi]” ek zot dir ki Zezi zot sover. (Zan 6:29) Selman, sa li pa ase! Dan Galile, o-koumansman boukou dimounn ti krwar dan Zezi, selman apre zot ti aret swiv li. Kifer?

13. Ki savedir ena lafwa dan Zezi?

¹³ Dan sa lafoul dimounn ki ti dan Galile la, laplipar parmi zot ti pe swiv Zezi parski li ti donn zot seki zot bizin. Li ti geri zot, li ti donn zot manze, ek li ti dir zot bann kitsoz ki ti fer zot plezir. Selman, Zezi ti fer zot konpran ki li pa ti vinn lor later pou donn zot seki zot anvi. Li ti vinn lor later pou ansegn zot seki zot bizin fer pou ki zot kapav vinn so disip. Zot ti bizin ena lafwa dan li, setadir obeir ek aksepte tou seki li ti ansegn zot.—Zan 5:40; 6:44.

14. Pou ki nou kapav gagn bann benediksion gras-a lekor ek disan Zezi, ki nou bizin fer?

¹⁴ Zezi ti anvi ki sa lafoul dimounn la  konpran ki zot bizin ena lafwa. Lafwa dan ki kitsoz? Lafwa dan pouvwar ki so lekor ek so disan ena. Samem lekor ek disan ki li ti pou done plitar kouma enn sakrifis. Bann Zwif ti bizin ena lafwa dan sa lansegnman-la, ek sa lansegnman-la bien inportan pou nou osi azordi. (Zan 6:40) Alor, dan Zan 6:53, Zezi ti pe rod dir ki nou bizin ena lafwa dan laranson pou ki nou kapav viv pou touletan. Sa benediksion-la, li pa zis pou enn tigit dimounn, me pou boukou dimounn.—Efe. 1:7.

15-16. Ki nou’nn aprann dan Zan sapit 6?

¹⁵ Dan Zan sapit 6, nou’nn aprann boukou kitsoz ki bien inportan ek ki bien ankourazan pou sakenn parmi nou. Nou’nn trouve ki Zezi bien kontan bann dimounn. Li ti geri bann ki malad, li ti ansegn bann dimounn lor Rwayom Bondie, ek li ti donn zot manze kan zot ti bizin. (Lik 9:11; Zan 6:2, 11, 12) Me pli inportan, li ti ansegn zot ki limem “dipin ki donn lavi.”—Zan 6:35, 48.

¹⁶ Li vre ki bann “lezot mouton” pa manz dipin ek pa bwar divin kan selebre Repa Lesegner sak lane. (Zan 10:16) Selman, zot osi zot gagn bann benediksion gras-a lekor ek disan Zezi. Ek pou zot gagn sa bann benediksion-la, zot bizin montre ki zot ena lafwa dan laranson, setadir dan sakrifis Zezi. (Zan 6:53) Parkont, bann ki manz dipin ek bwar divin pandan Repa Lesegner, zot montre ki zot form parti dan nouvo lalians ek ki zot ena lespwar pou regne ansam ar Zezi dan Rwayom Bondie. Alor, mem si nou form parti bann ki ena lesperans pou al dan lesiel ouswa si nou form parti bann lezot mouton, seki nou aprann dan Zan sapit 6 bien inportan pou sakenn parmi nou. Sa sapit-la montre nou ki nou bizin ena enn lafwa for dan laranson pou ki nou kapav viv pou touletan.