1-2. Ki kitsoz kapav fer nou plore?

 NOU tou nou’nn deza plore, pa vre! Parfwa, nou plore parski nou extra kontan. Eski to’nn deza plore kan enn kitsoz spesial inn arive? Par exanp, kitfwa to’nn plore kan to ti-baba inn ne, kan to’nn rapel enn zoli souvenir, ouswa kan to’nn retrouv enn bon kamarad apre plizir lane.

² Selman, bien souvan nou plore parski nou tris ouswa parski nou pe soufer. Par exanp, kitfwa nou plore kan enn kikenn bien desevwar nou. Kitfwa nou plore osi parski nou malad ek nou pe soufer depi lontan, ouswa parski enn kikenn ki nou kontan inn mor. Dan sa bann moman-la, nou kapav ena mem santiman ki profet Zeremi. Kan bann Babilonien ti detrir Zerizalem, Zeremi ti dir: “Delo pe koule dan mo lizie kouma larivier . . . Larm pe kontign koule dan mo lizie, san ki li arete.”—Lam. 3:48, 49.

3. Ki Zeova resanti kan Li trouv so bann serviter soufer? (Izai 63:9)

³ Zeova kone komie fwa nou’nn plore akoz bann sitiasion bien difisil. Labib dir nou ki Zeova kone sak fwa ki so bann serviter soufer, ek ki Li tande kan nou sipliy Li pou ed nou. (Ps. 34:15) Me Zeova pa zis trouv nou ek tann nou. Li nou Papa ek Li bien kontan nou. Alor, kan Li trouv nou plore, sa fer so leker fermal, ek Li bien anvi ed nou.—Lir Izai 63:9.

4. Ki lexanp Biblik nou pou gete, ek ki sa pou aprann nou lor Zeova?

⁴ Dan Labib, Zeova dir nou seki Li resanti kan Li trouv so bann serviter plore. Labib dir nou osi seki Zeova inn  fer pou ed zot. Nou kapav trouv sa dan lexanp Ann, David, ek Lerwa Ezekias. Dan sa lartik-la, nou pou trouve kifer zot ti plore. Nou pou trouve osi kouma Zeova ti ed zot. Ek nou pou trouve kouma Zeova rekonfort nou kan nou sagrin, kan enn kikenn trayir nou, ouswa kan nou dezespere.

NOU PLORE PARSKI NOU SAGRIN

5. Ki Ann ti resanti akoz bann difikilte ki li ti gagne?

⁵ Ann ti bien sagrin ek li ti bien plore akoz bann difikilte ki li ti gagne. So misie ti ena enn lot madam ki ti apel Penina, ek Penina ti deteste Ann. Anplis, Ann pa ti kapav gagn zanfan, alor ki Penina ti ena boukou zanfan. (1 Sam. 1:1, 2) Akoz sa, Penina ti kontign manz lavi Ann. Ki to ti pou resanti dan sa sitiasion-la? Ann ti telman sagrin ki “li ti plore ek li pa ti manze.” Labib dir ki li ti vinn “amer” dan so leker.—1 Sam. 1:6, 7, 10.

6. Ki kitsoz Ann ti fer pou li gagn rekonfor?

⁶ Ki kitsoz Ann ti fer pou ki li gagn rekonfor? Li ti al tabernak pou ador Zeova. Laba, kitfwa pre ar lakour tabernak, “li ti koumans priye Zeova ek plore boukou.” Li ti sipliy Zeova ek li ti dir: “Pran kont soufrans to esklav ek . . . rapel mwa.” (1 Sam. 1:10b, 11) Ann ti devid so leker ar Zeova. Kan Zeova ti trouve kouma Ann ti pe plore, sa ti fer So leker fermal ek Li ti anvi rekonfort so tifi ki Li bien kontan.

7. Apre ki Ann ti ouver so leker ar Zeova, ki li ti resanti?

⁷ Apre ki Ann ti dir Zeova seki li ti resanti, Gran Pret Eli ti rasir li ki Zeova ti pou reponn so lapriyer. Ki Ann ti resanti apre sa? Labib dir: “Madam-la ti ale, li ti manze ek so figir ti nepli paret trakase.” (1 Sam. 1:17, 18) Mem si Ann so sitiasion pa ti sanze, li ti santi li soulaze. Li ti sir ki Zeova ti konn so bann problem ek ki Li ti konpran so santiman. Li ti sir osi ki Zeova ti pou ed li. Ek se samem ki Zeova ti fer! Zeova ti konpran Ann so lapenn ek Li ti ekout so lapriyer. Apre sa, Zeova ti beni li ek li ti gagn bann zanfan.—1 Sam. 1:19, 20; 2:21.

8-9. Dapre Ebre 10:24, 25, kifer nou bizin fer tou seki nou kapav pou asiste bann renion? (Get zimaz osi.)

⁸ Ki leson nou aprann? Eski to pe pas par enn sitiasion difisil ki fer twa bien plore ek sagrin? Kitfwa enn kamarad ouswa enn manb to fami inn mor. Dan bann moman koumsa, li normal ki to anvi res tousel. Selman, rapel lexanp Ann. Li ti gagn lankourazman ek rekonfor kan li ti al tabernak. Alor, mem si to pa santi twa tro bien, to pou gagn rekonfor ek lankourazman ki to bizin kan to asiste bann renion. (Lir Ebre 10:24, 25.) Dan renion,  nou tann bann verse Labib ek sa ed nou pou pans bann bon kitsoz. Se koumsa ki Zeova ed nou pou aret pans bann kitsoz ki fer nou sagrin. Lerla, mem si nou sitiasion pankor sanze, nou santi nou pli bien.

⁹ Dan renion, nou bann frer ek ser ankouraz nou, ek zot montre nou ki zot kontan nou. Nou santi nou pli bien kan nou avek zot, pa vre! (1 Tes. 5:11, 14) Anou get lexanp enn pionie spesial. Sa fer inpe letan aster-la ki so madam inn mor. Li dir: “Ziska ler, mo ankor plore. Parfwa, mo zis anvi res dan mo kwin ek plore. Selman, kan mo al renion, mo gagn lankourazman ki mo bizin. Bann parol zanti ki bann frer ek ser dir mwa, ek zot bann komanter dan renion, vremem rekonfort mwa. Mem si mo trakase ouswa angwase avan ki mo al renion, mo touletan santi mwa pli bien kan mo dan renion.” Kan nou asiste nou bann renion, Zeova kapav servi nou bann frer ek ser pou rekonfort nou.

10. Kan nou bien sagrin, kouma nou kapav swiv lexanp Ann?

¹⁰ Ann ti gagn rekonfor osi kan li ti devid so leker ar Zeova. Twa osi, ‘zet tou to traka lor Zeova,’ to kapav sir ki Li pou ekout twa. (1 Pier 5:7) Enn fwa, kan bann voler ti vinn kokin, zot ti touy enn ser so mari. Ser-la dir: “Mo ti telman sagrin ki mo ti panse zame mo pa pou zwaye ankor. Selman, sak fwa ki mo ti priye mo Papa Zeova, mo ti santi mwa soulaze. Parfwa, mo pa ti kone kouma pou explik seki mo ti resanti, me Zeova ti konpran mwa. Kan mo ti bien sagrin ek angwase, mo ti demann Li pou donn mwa lape. Lerla, mo ti resanti enn lape dan mo leker ek dan mo lespri, ek sa ti redonn mwa lafors pou kontign mo lazourne.” Kan to plore ar Zeova ek to dir Li seki fer twa sagrin, Li osi Li sagrin ek Li konpran to lapenn. Mem si to problem ankor la, Zeova pou rekonfort twa ek Li pou ed twa pou ki to santi twa anpe. (Ps. 94:19; Fil. 4:6, 7) Li remark tou bann zefor ki to fer pou res fidel anver Li, ek Li pou rekonpans twa pou sa.—Ebre 11:6.

NOU PLORE PARSKI ENN KIKENN INN TRAYIR NOU

11. Ki David ti resanti kan lezot ti tret li dan enn move fason?

¹¹ Dan so lavi, David ti bizin andir bann sitiasion difisil ki ti fer li bien plore. Boukou dimounn ti deteste li, ek mem sertin parmi so bann kamarad ek so fami ti trayir li ek ti fer li ditor. (1 Sam. 19:10, 11; 2 Sam. 15:10-14, 30) Dan enn moman bien difisil dan so lavi, David ti dir: “Mo’nn fatige plengne; Mo lili tranpe parski toutlong lanwit mo plore; Mo fotey mouye akoz mo bann larm.” Kifer David ti santi li koumsa? Li dir: “Akoz tou bann dimounn ki pe arsel mwa.” (Ps. 6:6, 7) Kan lezot ti tret David dan enn move fason, sa ti fer li telman lapenn ki li pa ti kapav aret plore.

12. Dapre Psom 56:8, ki kitsoz David ti sir?

¹² Malgre bann difikilte ki li ti gagne, David ti sir ki Zeova ti kontan li. Li ti dir: “Zeova pou tande kan mo plore.” (Ps. 6:8) Enn zour, David ti dir bann zoli parol ki trouv dan Psom 56:8. (Lir.) Kan nou lir sa bann parol-la, nou konpran ki Zeova bien kontan nou ek ki nou bann santiman ena valer pou Li. Pou David, sa ti koumadir Zeova ti pe ramas so bann larm dan enn boutey, ouswa ti pe ekrir zot dan enn liv. David ti sir ki Zeova ti  trouv so lapenn ek ki Li pa ti bliye li. Li ti sir ki so Papa Zeova ti trouv so bann problem ek ti konn lefe ki sa ti ena lor li.

13. Kan lezot desevwar nou ouswa trayir nou, ki nou bizin rapel? (Get zimaz osi.)

¹³ Ki leson nou aprann? Eski to leker fermal parski enn kikenn ki to fer konfians, inn desevwar twa ouswa inn trayir twa? Kitfwa to pe soufer parski sa kikenn ar ki to ti pou marye la inn kit twa. Ouswa kitfwa to pe soufer parski to konzwin inn abandonn twa, ouswa enn kikenn ki to kontan inn aret servi Zeova. Enn frer so madam ti komet ladilter ek ti kit li. Frer-la dir: “Mo ti gagn sok. Mo pa ti krwar ki enn kitsoz koumsa ti ariv mwa. Mo ti santi mwa initil, mo ti tris, ek mo ti bien ankoler.” Si enn kikenn inn trayir twa ouswa inn desevwar twa, pa bliye ki Zeova Li, zame Li pa pou abandonn twa. Frer-la dir: “Mo’nn rann mwa kont ki bann dimounn kitfwa pa pou res fidel ar twa, me Zeova Li, Li pou touletan fidel. Ninport ki arive, Zeova pou touletan la. Zame Li pa pou kit so bann fidel serviter.” (Ps. 37:28) Pa bliye osi ki lamour ki Zeova ena pou twa, li boukou pli for ki lamour ki ninport kisann-la ena pou twa. Kan enn kikenn ki to kontan trayir twa, sa vremem fer dimal. Selman, santiman ki Zeova ena pou twa, zame pa pou sanze. To ena boukou valer pou Li. (Rom. 8:38, 39) Alor, zame pa bliye sa: Mem si bann dimounn tret twa dan enn move fason, to Papa Zeova Li, Li kontan twa.

14. Dapre Psom 34:18, ki kitsoz nou kapav sir?

¹⁴ Si enn kikenn inn trayir twa, bann parol ki David dir dan Psom 34:18 (Lir.) kapav rekonfort twa. Konsernan “bann ki dekouraze,” enn liv dir ki zot kapav santi zot kouma bann lamone zete. Kouma Zeova ed sa bann dimounn-la? Zeova “pre” ar nou; Li koumadir enn paran ki’nn pran so zanfan ki pe plore dan so lebra ek ki pe rekonfort li. Kan nou soufer parski enn kikenn inn trayir nou ouswa inn abandonn nou, Zeova konpran nou soufrans ek Li “pre” pou ed nou. Li anvi rekonfort nou ek soulaz nou. Anplis, kan nou reflesi lor bann kitsoz ki Li’nn promet nou, sa kapav ed nou pou andir ninport ki difikilte ki nou gagne azordi.—Iza. 65:17.

NOU PLORE PARSKI NOU DEZESPERE

15. Kifer Ezekias ti dezespere?

¹⁵ Kan li ti ena 39 an, Lerwa Ezekias ti aprann ki li ti ena enn maladi bien grav.  Zeova ti servi profet Izai pou dir Ezekias ki li ti pou mor ar sa maladi-la. (2 Ler. 20:1) Kan Ezekias ti aprann sa, li ti dezespere, li ti bien plore, ek li ti sipliy Zeova pou ed li.—2 Ler. 20:2, 3.

16. Ki Zeova ti fer pou Ezekias?

¹⁶ Kan Zeova ti tann lapriyer Ezekias ek ti trouv so bann larm, So leker ti fermal. Lerla, Li ti dir Ezekias: “Mo’nn tann to lapriyer. Mo’nn trouv to bann larm. Akoz sa mo pou geri twa.” Zeova ti ena pitie pou Ezekias, ek Li ti servi profet Izai pou dir Ezekias ki Li ti pou sap Zerizalem dan lame bann Asirien, ek ki Ezekias pa ti pou mor.—2 Ler. 20:4-6.

17. Kan nou gagn bann problem lasante, kouma Zeova ed nou? (Psom 41:3) (Get zimaz osi.)

¹⁷ Ki leson nou aprann? Eski to ena enn problem lasante ek pena okenn tretman pou sa? Dir Zeova seki to resanti. Li pou ekout twa, mem si to pe plore kan to pe koz avek Li. Labib rasir nou ki nou “Papa ki ena boukou mizerikord ek Bondie ki konsol bann dimounn dan tou kalite sitiasion,” pou rekonfort nou dan nou bann leprev. (2 Kor. 1:3, 4) Nou kone ki Zeova pa pou tir tou bann problem ki nou gagne azordi. Selman, nou kapav sir ki Li pou touletan soutenir nou. (Lir Psom 41:3.) Gras-a so lespri sin, Li kapav donn nou lafors ek sazes pou andir nou sitiasion, ek pou gard nou kalm. (Prov. 18:14; Fil. 4:13) Li osi promet nou ki dan lavenir, maladi pou nepli existe, ek sa vremem rekonfort nou.—Iza. 33:24.

18. Ki verse inn bien rekonfort twa kan to’nn pas par enn sitiasion bien difisil? (Get lankadre “ Bann Parol ki Kapav Rekonfort Nou kan Nou Plore.”)

¹⁸ Bann parol ki Zeova ti dir Ezekias ti bien rekonfort li. Nou osi, nou pou gagn rekonfor si nou ekout seki Zeova dir nou dan so Parol, Labib. Kan nou pe pas par bann sitiasion difisil, seki Zeova dir nou dan Labib kapav rekonfort nou ek ed nou pou res kalm. (Rom. 15:4) Kan enn ser ki res dan Lwes Lafrik ti aprann ki li ti ena enn kanser, li ti bien plore. Li ti dir: “Enn verse ki ti bien rekonfort mwa, se Izai 26:3. Mem si nou pa kapav tir tou nou bann problem, sa verse-la rasir mwa ki Zeova kapav ed nou pou res kalm, ek ki Li kapav ed nou pou andir ninport ki problem.” Eski to’nn deza pas par enn sitiasion bien difisil ek to’nn panse ki to pa ti ena okenn solision? Dan sa ler-la, ki verse inn rekonfort twa?

19. Ki pou arive biento?

¹⁹ Lafin bien pre, ek pli ale, pou ena pli boukou sitiasion ki pou fer bann  dimounn soufer ek plore. Selman, kouma nou’nn trouve ar lexanp Ann, David, ek Lerwa Ezekias, Zeova trouve kan nou plore ek sa fer so leker fermal. Li kontan nou parski nou pe res fidel anver Li malgre nou bann difikilte. Nou bann larm ena boukou valer pou Li. Alor, kan nou pe pas par bann sitiasion difisil, nou bizin devid nou leker ar Zeova. Fode pa nou res dan nou kwin; nou bizin res pros ar nou bann frer ek ser dan lasanble. Nou kapav osi gagn rekonfor gras-a bann parol ki Zeova inn fer ekrir dan Labib. Nou kapav sir ki kan nou kontign andire avek fidelite, Zeova pou rekonpans nou. Biento, nou pou nepli plore parski nou sagrin, parski enn kikenn inn trayir nou, ouswa parski nou dezespere. Labib dir ki Zeova ‘pou souy tou larm dan nou lizie.’ (Rev. 21:4) Sa lepok-la, nou pou plore zis parski nou zwaye!