Eski to finn lir bann nimero Latour Degard pou sa lane-la? Alor, gete si to kapav reponn sa bann kestion-la:

Ki nou kapav aprann ar fason ki Zeova tret bann madam?

Bondie pa fer diskriminasion ant zom ek fam, ek Li pa’nn fer enn pli siperyer ki lot. Li ekout bann madam, Li pran kont zot santiman ek seki pe trakas zot. Li fer zot konfians kan Li donn zot bann responsabilite dan so lorganizasion.—w24.01, p. 15-16.

Kouma nou kapav swiv konsey ki ena dan Efezien 5:7, ki dir: “Pa asosie zot ar sa bann dimounn-la”?

Lapot Pol ankouraz nou pou pa frekant bann dimounn ki pou ena enn move linflians lor nou, parski lerla nou kapav trouv sa difisil pou swiv bann prinsip Zeova. Sa konsern bann dimounn avek ki nou pas letan ek osi bann dimounn avek ki nou koze lor bann rezo sosio.—w24.03, p. 22-23.

Ki nou bizin fer kan nou tann bann fos zistwar?

Si enn kamarad rakont nou enn zistwar, me ki li pa’nn verifie si zistwar-la li vre, fode pa nou ekout li. Fode pa nou lir bann mail ki bann dimounn ki nou pa kone avoy nou, ek nou bizin fer atansion ar bann aposta ki anvi fer nou krwar ki zot interese ar Labib.—w24.04, p. 12.

Ki nou kone ek ki nou pa kone konsernan fason ki Zeova pou ziz Lerwa Salomon, bann dimounn ki’nn mor dan Sodom ek Gomor, ek bann ki’nn mor pandan Deliz?

Nou pa kone si Zeova inn detrir zot pou touletan. Selman, nou kone ki Li ena tou linformasion ki bizin pou ziz enn kikenn ek ki Li ena enn gran mizerikord.—w24.05, p. 3-4.

Kifer sa rasir nou kan nou kone ki Zeova Li nou “Gran Ros”? (Det. 32:4)

Zeova Li enn fortres; Li kapav protez nou. Nou kapav kont lor Li, ek Li touletan tini so bann promes. Li stab, setadir so personalite ek so volonte zame pa sanze.—w24.06, p. 26-28.

Ki kitsoz kapav ed twa pou adapte dan to nouvo lasanble?

Kont lor Zeova, Li pou ed twa parey kouma Li’nn ed so bann serviter dan lepase. Pa konpar to nouvo lasanble ar to ansien lasanble. Res bien okipe dan to nouvo lasanble, ek fer zefor pou fer bann nouvo kamarad.—w24.07, p. 26-28.

Ki leson nou kapav aprann ar trwa lexanp ki Zezi ti servi ek ki trouv dan Matie sapit 25?

Lexanp bann mouton ek bann kabri montre nou linportans pou ena lafwa ek pou res fidel. Lexanp bann vierz ki ena sazes ek bann vierz ki bet montre nou linportans pou prepar nou bien ek pou kontign veye. Ek lexanp bann talan montre nou linportans pou kontign travay bien dir.—w24.09, p. 20-24.

Ki oter lantre tanp Salomon ti ete?

Dan sertin ansien maniskri, 2 Kronik 3:4 dir ki oter lantre tanp ti “120 koude,” setadir 53 met. Me lezot maniskri ki fiab dir ki lantre-la ti “20 koude,” setadir nef met oter, ek sa paret pli lozik akoz lepeser miray tanp la.—w24.10, p. 31.

Kan Labib dir ki bann serviter lasanble “bizin mari enn sel fam,” ki li pe rod dir? (1 Tim. 3:12)

Savedir ki li bizin marye ar enn sel fam ek ki li bizin pa komet limoralite sexiel. Li bizin osi pa fer so lagreab ar bann lezot fam.—w24.11, p. 19.

Kifer seki Zezi ti dir dan Zan 6:53 ek seki li ti dir pandan Repa Lesegner, se de kitsoz diferan?

Zan 6:53 dir ki bizin manz lekor ek bwar disan Zezi. Zezi ti dir sa kan li ti dan Galile lane 32 Nou Lepok. Li ti dir sa ar bann Zwif ki ti bizin ena lafwa dan li. Selman, enn an plitar, kan li ti selebre Repa Lesegner dan Zerizalem, li ti koz zis ar bann ki ti pou regne ansam avek li dan lesiel.—w24.12, p. 10-11.