1, 2. Kouma David ti montre ki li fidel ar Zeova? (Get zimaz dan koumansman lartik.)

SAIL ek so 3,000 solda pe rod David dan dezer Zida pou touy li. Me enn lanwit, David ek so bann zom trouv landrwa kot Sail ek so bann solda pe kanpe. Zot tou pe dormi. Lerla David ek Abishay pas trankil-trankil ant bann solda ek zot trouv Sail. Abishay dir David: “Les mwa koulout li dan later avek mo lans, zis enn sel fwa; mo pa pou bizin fer sa de fwa.” Me David pa les li touy Sail. David dir Abishay: “Pa touy li, parski enn dimounn ki avans so lame kont enn kikenn ki Bondie finn swazir, eski li pou res inosan?” Apre sa David ti dir: “Zame sa pa pou vinn dan mo lespri, devan Zeova, pou lev lame lor enn kikenn ki Zeova finn swazir!”​—1 Samiel 26:8-12.

² David ti kone ki li ti bizin fer pou res fidel ar Zeova. David ti kone ki li bizin respekte Sail, ek li pa finn mem pans  pou fer Sail ditor. Kifer? Parski Zeova finn swazir Sail pou vinn lerwa Izrael. Zordi, parey kouma dan lepase, Zeova anvi ki tou so bann serviter res fidel ar Li ek ki zot respekte bann zom ki Li’nn etabli lor zot.​—Lir Mika 6:8. *

3. Dan ki fason Abishay ti res fidel ar David?

³ Abishay ti respekte David parski li ti kone ki Zeova finn swazir David pou vinn lerwa. Me plitar, kan David ti vinn lerwa, li ti fer bann pese bien grav. Li ti gagn relasion sexiel avek madam Ouriya. Anplis, li’nn demann Yoab pou fer enn manier ki Ouriya mor dan lager. (2 Samiel 11:2-4, 14, 15; 1 Kronik 2:16) Abishay, frer Yoab, sirman ti’nn fini kone seki David ti fer. Me selman, li ti kontign respekte David. Anplis Abishay ti enn sef dan larme. Li ti kapav servi so lotorite pou vinn lerwa. Pourtan, zame li pa’nn esey fer sa. Okontrer, li ti res enn serviter David ek li ti protez David kont so bann lennmi.​—2 Samiel 10:10; 20:6; 21:15-17.

4. (a) Kouma David inn les nou enn bon lexanp kan li’nn res fidel ar Zeova? (b) Ki lezot lexanp nou pou examine?

⁴ David ti fidel ar Zeova toutlong so lavi. Kan li ti zenn, li ti touy enn zean ki apel Goliat, ki ti insilte Zeova ek bann Izraelit. (1 Samiel 17:23, 26, 48-51) Kan David ti lerwa, Natann, enn profet Zeova, ti bizin disiplinn li pou bann pese ki li ti fer. Deswit, David ti rekonet ki li’nn fer pese, ek li finn repanti. (2 Samiel 12:1-5, 13) Plitar, kan li’nn vinn vie, li ti donn boukou kitsoz ki ena valer pou konstrir tanp Zeova. (1 Kronik 29:1-5) Nou trouve ki mem si David finn fer bann fot grav dan so lavi, zame li pa finn aret montre so fidelite anver Zeova. (Psom 51:4, 10; 86:2) Dan sa lartik-la, nou pou examinn lexanp David ek lexanp lezot dimounn ki ti viv dan so lepok. Nou pou aprann kouma nou bizin res fidel ar Zeova, plis ki ar ninport kisannla. Nou pou aprann osi lor bann lezot kalite ki pou ed nou pou res fidel.

5. Ki leson nou aprann ar erer ki Abishay inn fer?

⁵ Kan Abishay ti rod touy Sail, li ti pe anvi montre ki li fidel ar David. Me David ti kone ki li pa bon nou fer ditor enn “kikenn ki Zeova finn swazir.” Akoz sa, li pa finn les Abishay touy Sail. (1 Samiel 26:8-11) Sa aprann nou enn leson inportan: Kan nou bizin deside ar kisannla nou pou fidel an premie, nou bizin reflesi lor bann prinsip Labib ki pou ed nou dan nou sitiasion.

6. Mem si li normal ki nou anvi res fidel ar enn kamarad ouswa enn manb nou fami, kifer nou bizin fer bien atansion?

⁶ Li normal ki nou anvi res fidel ar enn dimounn ki nou kontan, par exanp, enn kamarad, ouswa enn manb nou fami. Me  parski nou inparfe, nou bann santiman kapav met nou dan lerer. (Zeremi 17:9) Alor, si enn kikenn ki nou kontan fer enn kitsoz ki pa bon ek kit laverite, nou bizin rapel ki seki pli inportan, se ki nou res fidel ar Zeova plis ki ar ninport kisannla.​—Lir Matie 22:37, NW.

7. Kouma Anne finn res fidel ar Zeova dan enn sitiasion difisil?

⁷ Si enn dimounn dan to fami exkli, setadir nepli enn Temwin Zeova, to kapav montre Zeova ki to fidel ar Li. Samem ki finn ariv Anne. ^[1] (Get not alafin lartik.) Enn zour, so mama ki ti exkli, ti telefonn li pou dir li ki li ti anvi vinn get li. So mama ti dir ki li bien sagrin parski so fami pa koz ar li. Akoz sa, Anne ti bien tris ek li ti promet so mama ki li pou ekrir li pou reponn li. Avan li ekrir so let, li ti medit lor sertin prinsip Labib. (1 Korintien 5:11; 2 Zan 9-11) Lerla, dan so let, li ti dir so mama dan enn fason bien zanti: “Se tomem ki finn kit to fami kan to finn fer pese ek to pa finn repanti. Sel fason ki to kapav regagn to lazwa, se si to retourn ar Zeova.”​—Zak 4:8.

8. Ki bann kalite pou ed nou res fidel ar Zeova?

⁸ Bann fidel serviter Zeova dan lepok David finn osi montre limilite, bonte ek kouraz. Anou gete kouma sa bann kalite-la kapav ed nou pou res fidel ar Zeova.

9. Kifer Abner ti rod touy David?

⁹ Yonatann, garson Sail, ek Abner, sef larme bann Izraelit, finn trouv David amenn latet Goliat ar Lerwa Sail. Yonatann ti vinn kamarad David, ek ti res fidel ar li. (1 Samiel 17:57–18:3) Me Abner pa ti fer parey. Plitar, li ti mem ed Sail pou esey touy David. (1 Samiel 26:1-5; Psom 54:3) Yonatann et Abner toule-de ti kone ki Zeova ti swazir David pou vinn prosin lerwa an Izrael. Me apre lamor Sail, Abner pa ti soutenir David. Li ti rod plito fer Ish-Boshet, enn lot garson Sail, vinn lerwa. Li posib ki plitar, Abner osi ti anvi vinn lerwa, ek kitfwa se akoz sa ki li ti gagn bann relasion sexiel ar enn parmi bann fam Lerwa Sail. (2 Samiel 2:8-10; 3:6-11) Kifer Yonatann ek  Abner pa ti ena mem santiman pou David? Parski Yonatann ti ena limilite ek ti res fidel ar Zeova, me pa Abner.

10. Kifer Absalom pa ti fidel ar Zeova?

¹⁰ Absalom ti enn parmi bann garson Lerwa David. Li pa ti fidel ar Zeova, parski li pa ti ena limilite. Li ti anvi vinn lerwa, alor Absalom inn fer bann dimounn fer “enn kales pou li ek bann seval ek sinkant zom galoup devan li.” (2 Samiel 15:1) Li ti osi konvink boukou Izraelit pou res fidel ar li. Li ti mem rod touy so papa, mem si li ti kone ki se Zeova ki ti fer David vinn lerwa lor Izrael.​—2 Samuel 15:13, 14; 17:1-4.

11. Kouma nou kapav tir profi ar seki finn ekrir dan Labib lor Abner, Absalom ek Barouk?

¹¹ Kan enn dimounn pena limilite ek rod gagn plis lotorite, li bien difisil pou li res fidel ar Zeova. Biensir, nou kontan Zeova ek nou pa anvi vinn egois ek move kouma Abner ek Absalom. Me nou bizin fer atansion pangar nou koumans ena lamour pou larzan, ouswa nou rod enn travay ki fer nou santi ki nou enn dimounn inportan. Sa pou gat nou relasion avek Zeova. Samem ki ti ariv Barouk, sekreter Zeremi. Pandan enn tan, li ti nepli ena lazwa pou servi Zeova, parski li ti anvi gagn enn kitsoz ki li pa ti ena. Lerla Zeova ti dir li: “Gete! Seki mo’nn konstrir, mo pe kraze, seki mo’nn plante, mo pe derasine, setadir pei-la antie. Me twa, to pe rod bann gran kitsoz pou tomem. Aret rod sa bann kitsoz-la.” (Zeremi 45:4, 5) Barouk ti ekout konsey Zeova. Nou osi nou bizin ekout Zeova, parski biento Li pou detrir sa move lemond-la.

12. Kifer si nou egois, nou pa pou kapav res fidel ar Zeova?

¹² Dan Mexique, enn frer ki apel Daniel, ti bizin deside ar kisannla li ti pou res fidel. Li ti anvi marye avek enn tifi ki pa ti ador Zeova. Daniel dir: “Mo ti kontign ekrir tifi-la mem apre ki mo ti nome pionie.” Me apre, Daniel ti realize ki li ti pe fer zis seki li anvi, ek ki li pa ti fidel ar Zeova. Li’nn rekonet ki li ti bizin limilite. Alor, li ti al koz lor sa size-la avek enn ansien ki ena lexperyans. Daniel dir: “Sa ansien-la ti fer mwa konpran ki, pou mo  res fidel ar Zeova, mo ti bizin aret ekrir sa tifi-la. Apre ki mo finn bien priye ek bien plore, se samem ki mo finn fer. Ek bien vit, mo lazwa dan predikasion ti ogmante.” Zordi, li ena enn madam ki kontan Zeova, ek Daniel pe servi kouma sirveyan sirkonskripsion.

13. Kan David ti fer pese, kouma Natann ti res fidel ar Zeova ek osi ar David?

¹³ Si nou res fidel ar Zeova, nou pou res fidel ar lezot dimounn osi, ek nou pou ed zot dan pli bon fason posib. Profet Natann ti res fidel ar Zeova ek ar David osi. Par exanp, David ti gagn relasion sexiel avek madam enn lot zom ek li’nn fer touy zom-la. Lerla, Zeova finn avoy Natann pou disiplinn David. Natann ti ena kouraz ek ti obeir Zeova. Me li finn osi azir avek sazes ek li finn koz avek bonte ar David. Li ti anvi ed David pou konpran ki kantite so bann pese ti grav. Natann ti rakont li zistwar enn misie ki ti bien ris ek ki finn kokin sel mouton ki enn pov ti ena. Kan David ti tann seki sa zom ris la ti fer, li ti bien ankoler. Lerla Natann ti dir li: “Tomem sa zom-la!” Se lerla ki David inn realize ki li’nn fer pese kont Zeova.​—2 Samiel 12:1-7, 13.

14. Kouma to kapav montre to fidelite anmemtan anver Zeova ek anver to kamarad ouswa to kamarad?

¹⁴ Twa osi to kapav res fidel ar Zeova an premie, ek apre res fidel ar bann dimounn kan to manifeste bonte. Par exanp, fer koumadir to ena prev ki enn frer inn fer enn pese grav. Kitfwa to pou panse ki to bizin kasiet sa pese-la pou res fidel ar li, sirtou si se enn kamarad pros ouswa enn manb to fami. Me to kone osi ki seki pli inportan, se to fidelite anver Zeova. Alor, parey kouma Natann, to bizin obeir Zeova ek al koz avek frer-la, me azir avek bonte anver li. Dir li ki li bizin demann led bann ansien ek ki li bizin fer sa bien vit. Si li pa fer sa, lerla tomem ki pou bizin al get bann ansien. Kan to fer sa, to pou res fidel ar Zeova. Anmemtan, to pe manifeste bonte anver to frer, parski bann ansien pou kapav ed li pou rekoumans ena bann bon relasion avek Zeova. Bann ansien pou disiplinn li dan enn fason kalm ek zanti.​—Lir Levitik 5:1 *; Galat 6:1, NW.

15, 16. Kifer Oushay ti bizin kouraz pou res fidel ar Bondie?

¹⁵ Houshay ti enn parmi bann kamarad fidel David. Kan lepep ti anvi fer Absalom vinn lerwa, Oushay ti bizin ena kouraz pou res fidel ar David ek ar Bondie.  Li ti kone ki Absalom ti vinn Zerizalem avek so bann solda ek ki David ti’nn sove. (2 Samiel 15:13; 16:15) Me ki Oushay ti fer? Eski li ti abandonn David ek ti soutenir Absalom? Non. David ti vie ek boukou dimounn ti anvi touy li. Me kanmem sa, Oushay ti res fidel ar David parski Zeova ti fer David vinn lerwa. Alor, Oushay ti al zwenn David lor Mont des Oliviers.​—2 Samiel 15:30, 32.

¹⁶ David ti dir Oushay: “Retourn Zerizalem ek fer sanblan ki to kamarad ar Absalom. Konvink Absalom pou ekout to konsey olie ki li ekout konsey Aitofel.” Oushay ti ena kouraz ek ti riske so lavi pou obeir David ek pou res fidel ar Zeova. David ti priye Zeova pou ed Oushay, ek Zeova ti ed li. Finalman, Absalom ti ekout Oushay olie Aitofel.​—2 Samiel 15:31; 17:14.

17. Kifer nou bizin kouraz pou res fidel?

¹⁷ Nou bizin ena kouraz pou res fidel ar Zeova ek pou obeir Li olie ki nou fer seki nou fami, nou bann koleg travay, ouswa bann gouvernman anvi nou fer. Anou get lexanp Taro ki res Japon. Depi ki li ti tipti, li ti fer tou seki li kapav pou fer so bann paran plezir. Li ti obeir zot ek li ti fidel ar zot, pa parski li ti oblize, me parski li ti kontan zot. Kan li finn koumans etidie avek bann Temwin Zeova, so bann paran ti dir li arete. Li ti bien sagrin, ek li ti gagn difikilte pou explik so bann paran ki li ti deside pou al renion. Taro rakonte: “Mo bann paran ti telman ankoler, ki pandan boukou lane, zot finn anpes mwa vinn get zot. Mo ti priye Zeova pou mo gagn kouraz pou ki mo pa sanz mo desizion. Azordi, zot nepli ankoler, ek mo kapav al rann zot vizit souvan.”​—Lir Proverb 29:25. *

18. Kouma to’nn tir profi ar sa lartik-la?

¹⁸ Nou osi, parey kouma David, Yonatann, Natann ek Oushay, anou trouv lazwa ek satisfaksion kan nou res fidel ar Zeova. Zame nou pa pou anvi vinn kouma Abner ek Absalom, ki pa ti fidel. Li vre ki nou bann dimounn inparfe ek nou fer bann erer. Me anou montre Zeova ki seki pli inportan dan nou lavi, se ki nou res fidel ar Li.