MO’NN ne an 1926 dan Crooksville, Ohio, dan l’États-Unis. Mo ti ena 7 frer ek ser. Mo papa ek mo mama pa ti relizie, me zot ti demann nou pou al legliz. Mo ti al Legliz méthodiste. Kan mo ti ena 14 an, paster-la ti donn mwa enn pri parski mo ti al legliz toule Dimans pandan enn an.

Pandan sa letan-la, enn vwazinn ki apel Margaret Walker, ki ti enn Temwin Zeova, ti koumans vizit mo mama pou koz lor Labib avek li. Enn zour, mo ti desid pou asiz ansam avek zot pou ekoute. Mo mama ti panse ki mo pou deranz so letid, alor li ti demann mwa pou sorti dan lakaz. Me kanmem sa, mo ti kontign esey ekout zot konversasion. Apre plizir vizit, Margaret ti demann mwa: “Eski to kone kouma Bondie apele?” Mo ti dir: “Tou dimounn kone sa​—Li apel Bondie.” Lerla li ti dir mwa: “Amenn to Labib ek get dan Psom 83:18.” Se seki mo ti fer, ek mo’nn al kone ki nom Bondie se Zeova. Mo ti galoupe mo ti al get mo bann kamarad ek mo ti dir zot: “Kan zot al lakaz tanto, pran zot Labib, ouver li Psom 83:18 ek zot pou trouve kouma Bondie apele.” Dan enn sertin fason, mo ti koumans prese apartir sa moman-la.

Mo’nn etidie Labib ek mo’nn batize an 1941. Enn tipe apre, mo ti gagn privilez pou kondir l’étude de livre. Mo ti ankouraz mo mama ek mo bann frer ek ser pou vini. Zot tou ti koumans asiste l’étude de livre ki mo ti pe kondir. Parkont, mo papa pa ti interese.

Mo ti gagn plis responsabilite dan kongregasion. Mo ti ena boukou liv ki bann Temwin Zeova ti pibliye. Enn zour, mo papa ti montre mwa bann liv-la ek ti dir mwa: “To’nn trouv tou sa bann liv-la la? Mo’le to tir tousala dan lakaz, ek to’si to kapav al ansam.” Alor, mo ti kit lakaz ek mo ti al res Zanesville, enn lavil pa tro lwin. Me souvan mo ti ale-vini kot mo fami pou ankouraz zot.

Mo papa ti esey anpes mo mama pou asiste bann renion. Parfwa, kan mo mama ti lor semin pou al renion, mo papa ti galoup deryer li ek ti ris li pou re-amenn  li lakaz. Me mo mama ti pas par lot laport ek ti reisi al renion. Mo ti dir mo mama: “Pa gagn traka. Enn zour li pou fatige galoup deryer twa.” Avek letan, mo papa ti nepli anpes mo mama al renion, ek li ti lib pou asiste bann renion.

Kan ti koumans ena Lekol Minister Teokratik an 1943, mo ti koumans gagn devwar pou fer dan kongregasion. Apre sak devwar, mo ti gagn bann konsey ki’nn ed mwa pou vinn enn pli bon orater.

An 1944, pandan Deziem Lager Mondial, mo ti gagn lord pou rant dan larme. Mo ti al Fort Hayes dan Columbus, Ohio, pou fer enn check up fizik, ek mo ti ranpli bann papie. Mo ti osi dir bann sef militer-la ki mo pa pou vinn enn solda. Zot ti les mwa retourn kot mwa. Me de-trwa zour apre, enn sef militer ti vinn devan mo laport ek ti dir mwa: “Corwin Robison, mo’nn gagn enn warant pou aret ou.”

De semenn plitar, dan lakour, ziz-la ti dir mwa: “Si sa ti depann zis lor mwa, mo ti pou kondann twa a-mor. Eski to ena kitsoz pou dir?” Mo ti dir li: “Votre Honneur, zot ti bizin konsider mwa kouma enn predikater. Mo lestrad ti lantre lakaz tou dimounn, ek mo ti pres bon nouvel lor Rwayom Bondie ar boukou dimounn.” Ziz-la ti dir bann ziri: “Zot pa la pou deside si sa zenn garson-la enn predikater ouswa non. Zot la pou deside si li’nn obeir lord pou rant dan larme ouswa non.” Dan mwins ki trant minit, bann ziri ti deside ki mo ti koupab. Ziz-la ti kondann mwa pou fer sink an dan prizon Ashland, Kentucky.

Mo finn pas de premie semenn dan enn prizon dan Columbus, dan Ohio, ek premie zour, mo ti res dan mo selil. Mo ti priye Zeova: “Mo pa kapav res dan enn selil pandan sink an. Mo pa kone ki mo pou fer.”

Landemin, bann gard-prizon ti les mwa sorti. Mo ti zwenn enn prizonie ki ti gran ek ki ti ena bann zepol bien larz. Nou ti res laba ek ti pe get par enn lafnet. Li ti demann mwa: “Kifer to dan prizon twa, Tipti?” Mo ti dir li: “Mo enn Temwin Zeova.” Li ti dir: “Abon? Alor kifer to isi?” Mo ti dir li: “Bann Temwin Zeova pa partisip dan bann lager ek zot pa touy dimounn.” Li ti dir: “Zot inn met twa dan prizon parski to refiz pou touy dimounn. Zot inn met lezot dan prizon parski zot finn touy dimounn. Li pa lozik!” Mo ti dir li: “Ou ena rezon.”

Apre sa li ti dir: “Pandan 15 an mo ti dan enn lot prizon, ek laba mo finn lir sertin parmi zot bann magazinn.” Kan mo’nn tann sa, mo ti priye: “Zeova ed mwa pou gagn sa misie-la dan mo kote.” Sa moman-la, prizonie-la, ki ti apel Paul, ti dir mwa: “Si ninport kisannla tous twa, zis kriye twa. Mo pou pran zot enn kont.” Alor tanki mo ti laba, mo pa finn gagn  okenn problem avek sa 50 prizonie ki ti dan sa seksion-la.

Apre, kan bann sef militer ti met mwa dan enn prizon dan Ashland, mo ti zwenn bann frer ki ti deza laba. Sa bann frer-la ti ena matirite. Zot finn ed mwa ek lezot ankor pou res pros ar Zeova. Zot ti donn nou bann porsion Labib pou lir toulezour, ek nou ti prepar bann kestion-repons pou bann renion ki nou ti apel « tournois bibliques. » Nou ti dan bann gran selil kot ti ena bann lili toutlong bann miray. Ti ena enn frer ki ti organiz nou teritwar pou prese. Li ti dir mwa: “Robison, to responsab tel tel lili. Tou bann prizonie ki servi sa lili-la se to teritwar. Fer sir ki to pres avek li avan li ale.” Se koumsa ki nou ti prese dan enn fason organize.

Deziem Lager Mondial ti termine an 1945, me mo finn res dan prizon inpe letan ankor. Mo ti pe gagn traka mo fami parski mo papa ti dir mwa: “Si mo reisi debaras twa, mo pou kapav inflians lezot.” Kan mo ti sorti dan prizon, mo ti gagn enn zoli sirpriz. Malgre bann persekision mo papa, 7 manb dan mo fami ti pe asiste bann renion, ek enn parmi mo bann ser ti pran batem.

Kan Lager dan Corée ti koumanse an 1950, fer deziem fwa ki mo ti gagn lord pou rant dan larme. Ti re-apel mwa dan Fort Hayes. Apre ki ti teste mo bann kapasite, enn ofisie ti dir mwa: “Ou enn parmi bann ki finn gagn bann pli bon rezilta dan ou group.” Mo ti dir li: “Ok, me mo pa pou rant dan larme.” Mo ti sit 2 Timote 2:3 ek mo ti dir li: “Mo deza enn solda Kris.” Apre enn gran silans li ti dir mwa: “Ou kapav ale.”

Enn tipe apre, mo ti asiste enn renion pou servis Béthel, dan enn lasanble dan Cincinnati, Ohio. Frer Milton Henschel ti dir nou ki, dan Béthel ti bizin bann frer ki anvi travay dir pou Rwayom Bondie. Mo ti ranpli form pou rant Béthel ek ti aksepte mwa. Mo ti koumans servi dan Béthel Brooklyn an Out 1954, ek depi sa mo’nn res laba mem.

Touletan mo finn ena boukou travay dan Béthel. Pandan plizir lane, mo ti pe kontrol bann masinn ki ti servi dan linprimri, ek dan bann biro, mo ti travay kouma mekanisien, ek mo ti repar bann serir. Mo ti osi travay dan bann Lasal Lasanble dan lavil New York.

Mo kontan bann aktivite spiritiel ki fer dan Béthel kouma ladorasion dan gramatin, letid Latour Degard an fami, ek osi pres avek mo kongregasion. Kan nou reflesi bien, ofet se bann kitsoz ki ninport ki fami Temwin Zeova bizin fer regilierman. Kan bann paran ek bann zanfan examinn brosir Anou Examinn Labib  Toulezour ansam, kan zot fer Ladorasion an Fami regilierman, zot partisipe dan bann renion, ek zot zele pou pres bonn nouvel, lafami an-antie pou res pros ar Zeova.

Mo finn fer boukou kamarad dan Béthel ek dan kongregasion. Sertin ti ena lesperans pou al dan lesiel ek inn fini gagn zot rekonpans. Alor ki lezot ti ena lesperans pou viv lor later. Me tou bann serviter Zeova zot inparfe, mem bann Betelit. Si mo gagn enn diskision avek enn frer, touletan mo esey fer lape. Mo reflesi lor Matie 5:23, 24 ek kouma nou bizin regle nou bann dezakor. Li pa fasil pou dir: “Pardonn mwa,” me laplipar dezakor regle dan sa fason-la.

Asterla mo gagn difikilte pou prese lakaz-lakaz akoz mo laz, me mo pa bes lebra. Mo finn aprann enn tipe Mandarin ek mo kontan pres avek bann Sinwa ki mo zwenn lor semin. Ena zour, dan gramatin mo plas 30 ouswa 40 magazinn avek bann ki interese.

Mo’nn mem gagn enn vizit dan la Chine! Enn zour, enn zoli zennfi ti riy ar mwa kan li ti pe partaz bann ti panfle pou fer piblisite enn stenn frwi. Mo ti fer enn sourir avek li ek mo ti donn li Latour Degard ek Réveillez-vous ! an Sinwa. Li ti pran bann piblikasion-la ek li ti dir mwa ki li apel Katie. Apre sa, sak fwa ki Katie ti trouv mwa, li ti vinn koz ar mwa. Mo ti montre li nom bann frwi ek bann legim an Angle, ek li ti repet apre mwa. Mo ti osi explik li bann verse Labib, ek li ti aksepte liv Ki la Bible enseigné? Me, apre de-trwa semenn, mo pa’nn retrouv li.

Apre plizir mwa, mo ti ofer bann magazinn enn lot tifi ki ti pe partaz bann panfle pou fer piblisite, ek li ti aksepte bann magazinn-la. Semenn apre, li ti donn mwa so portab ek ti dir: “Enn dimounn depi la Chine anvi koz ar ou.” Mo ti dir li: “Mo pa konn personn dan la Chine mwa.” Me li ti insiste, alor mo ti pran so portab ek ti dir: “Alo, isi Robison.” Enn kikenn ti reponn: “Robby, Katie sa. Mo’nn retourn la Chine.” Mo ti dir: “La Chine?” Katie ti reponn: “Wi. Robby, eski to konn sa tifi ki’nn donn twa portab-la? Mo ser sa. To’nn ansegn mwa enn ta bon kitsoz. Silteple, ansegn li mem fason ki to’nn ansegn mwa.” Mo ti dir li: “Katie, mo pou fer tou seki mo kapav. Mersi to’nn fer mwa kone kot to ete aster.” Enn tipe apre, se dernie fwa ki mo ti koz avek Katie so ser. Ninport kotsa sa de tifi-la ete asterla, mo swete ki zot aprann pli boukou kitsoz ankor lor Zeova.

Mo’nn servi Zeova pandan 73 an, ek mo kontan ki Li’nn ed mwa pou gard mo netralite ek pou res fidel dan prizon. Anplis, mo bann frer ek ser dir mwa ki sa ti ankouraz zot kan zot ti trouve ki mo pa’nn bes lebra mem si mo papa ti persekit mwa. Apre sa, mo mama ek sis parmi mo bann frer ek ser ti batize. Mem mo papa ti sanz so latitid inpe, ek li ti asiste sertin renion avan ki li mor.

Si se volonte Bondie, bann manb mo fami ek bann kamarad ki’nn mor pou regagn lavi dan lemond nouvo. Esey mazine ki kantite lazwa nou pou gagne pou servi Zeova pou touletan ansam avek bann ki nou kontan! *​—Get not.