1, 2. (a) Kifer sa kapav ankouraz nou kan nou examinn lexanp Noe, Daniel, ek Zob? (b) Kan Ezekiel ti ekrir bann parol ki trouv dan Ezekiel 14:14, kouma sitiasion ti ete?

ESKI to pe pas par bann sitiasion difisil parski to malad, to ena bann problem larzan, ouswa to pe gagn persekision? Eski parfwa to gagn difikilte pou gard to lazwa dan to servis pou Zeova? Si to ena sa santiman-la, kan to examinn lexanp Noe, Daniel, ek Zob sa kapav ankouraz twa. Sa bann zom-la ti inparfe, ek zot ti bizin fer fas ar bann mem difikilte ki nou gagne azordi. Parfwa, mem zot lavi ti an danze. Me zot ti res fidel ar Zeova, ek Zeova ti konsider zot kouma bann bon lexanp konsernan lafwa ek lobeisans.​—Lir Ezekiel 14:12-14. *

 ² Ezekiel ti ekrir bann parol dan nou verse tem kan li ti dan Babilonn ver lane 612 avan Zezi Kris. * (Get not.) (Ezekiel 1:1; 8:1) Li ti ekrir sa enn tigit letan avan ki Zerizalem detrir an 607. Zis enn ti group dimounn dan Zerizalem ki ti fidel ek obeisan parey kouma Noe, Daniel, ek Zob, ek zot ti gagn lavi sov. (Ezekiel 9:1-5) Parmi zot, ti ena Zeremi, Baruk, Ebed-melek, ek bann Rekabit.

3. Ki nou pou examine dan sa lartik-la?

³ Azordi osi parey, se zis bann ki Zeova konsider kouma bann dimounn zis, setadir bann ki parey kouma Noe, Daniel, ek Zob, ki pou sape kan pou ena lafin sa move lemond-la. (Revelasion 7:9, 14) Alor, anou gete kifer Zeova ti konsider sa trwa zom-la kouma bann dimounn zis ek bann bon lexanp. Nou pou examinn (1) bann difikilte ki zot inn bizin fer fas ek (2) kouma nou kapav imit zot lafwa ek zot lobeisans.

4, 5. Ki difikilte Noe ti gagne, me kifer li enn lexanp extraordiner?

⁴ Ki difikilte Noe ti gagne? Dan lepok Enok, aryer-granper Noe, bann dimounn ti deza extra move. Zot ti dir “bann zafer terib” lor Zeova. (Zid 14, 15) Bann dimounn ti pe vinn deplizanpli violan. Dan lepok Noe, later “ti ranpli ar violans.” Bann move anz ti desann lor later, ti pran lekor imin, ek ti marye avek bann madam. Zot bann garson ti dominer ek violan. (Zenez 6:2-4, 11, 12) Me tou dimounn ti kapav trouve ki Noe ti diferan. Labib dir ki “Noe ti gagn faver Zeova.” Noe pa ti parey kouma bann dimounn dan so lepok. Li ti fer seki zis. “Noe ti mars avek vre Bondie.”​—Zenez 6:8, 9.

⁵ Ki sa aprann nou lor Noe? Premierman, reflesi lor kantite letan ki Noe ti servi Zeova avek fidelite avan ki Deliz vini. Li pa ti fer sa zis pandan 70 ouswa 80 an, me li ti servi Zeova pandan preske 600 an dan sa move lemond-la! (Zenez 7:11) Deziemman, pa bliye ki li pa ti ena enn kongregasion pou ed li ek ankouraz li, parey kouma nou ena azordi. Li paret ki mem so bann frer ek ser pa ti soutenir li. *​—Get not.

6. Kouma Noe ti montre enn gran kouraz?

⁶ Noe pa ti panse ki li ti bizin zis enn bon dimounn. Avek kouraz, li ti koz lor so lafwa avek lezot. Labib apel li “enn predikater lazistis.” (2 Pier 2:5) Lapot Pol ti dir konsernan Noe: “Par sa lafwa-la, li ti kondann lemond.” (Ebre 11:7, NW.) Pena dout ki bann dimounn ti boufonn li ek ti esey aret so travay. Kitfwa zot ti mem menas pou fer li ditor. Me Noe pa ti per bann dimounn. (Proverb 29:25) Okontrer, li ti ena lafwa ek Zeova ti donn li kouraz. Se samem kouraz ki Zeova donn tou so bann serviter fidel azordi.

7. Ki bann difikilte Noe ti gagne kan li ti konstrir lars?

⁷ Noe ti deza fidel anver Zeova pandan plis ki 500 an kan Zeova ti demann li pou  konstrir enn gran lars. Gras-a sa lars-la, bann dimounn ek bann zanimo ti pou kapav gagn lavi sov pandan Deliz. (Zenez 5:32; 6:14) Sirman Noe ti trouv sa bien difisil pou aranz enn gran lars koumsa. Ek kitfwa li ti kone ki bann dimounn ti pou plis boufonn li ankor ek rann so lavi difisil. Me Noe ti ena lafwa ek li ti obeir Zeova. “Li ti fer exakteman seki ti’nn dir li fer.”​—Zenez 6:22.

8. Kouma Noe ti kont lor Zeova pou pran swin so fami?

⁸ Noe ti gagn enn lot difikilte ankor. Li ti bizin pran swin so madam ek so bann zanfan. Avan Deliz, bann dimounn ti bizin travay extra dir pou kiltiv later. Ek Noe osi ti dan sa sitiasion-la. (Zenez 5:28, 29) Selman, so priorite pa ti bann kitsoz ki so fami ti bizin lor plan materyel. Kitsoz ki ti touletan pli inportan dan so lavi, se so servis pou Zeova. Mem si Noe ti bien okipe ar konstriksion lars pandan anviron 40 ouswa 50 an, li ti touletan kont lor Zeova. Ek li’nn fer sa pandan ankor 350 an apre Deliz. (Zenez 9:28) Noe enn bon lexanp lafwa ek lobeisans!

9, 10. (a) Kouma nou kapav imit lafwa ek lobeisans Noe? (b) Si to bien deside pou obeir lalwa Bondie, ki kitsoz to kapav sir?

⁹ Kouma nou kapav imit lafwa ek lobeisans Noe? Nou fer sa kan nou fer seki zis, kan nou pa fer parti dan lemond Satan, ek kan nou met Zeova an premie dan nou lavi. (Matie 6:33; Zan 15:19) Ek se akoz samem ki lemond pa kontan nou. Par exanp, nou bien deside pou obeir lalwa Bondie konsernan sexialite ek maryaz. Ek akoz sa, sertin dimounn donn bann fos linformasion lor nou dan bann media. (Lir Malaki 3:17, 18. *) Parey kouma Noe, nou pa per bann dimounn. Nou ena lakrint pou Zeova, setadir, nou ena enn gran respe pou Li ek nou pa anvi desevwar Li. Nou kone ki se zis Li tousel ki kapav donn nou lavi pou touletan.​—Lik 12:4, 5.

¹⁰ Demann tomem: ‘Eski mo pou kontign fer seki zis devan lizie Bondie, mem kan lezot boufonn mwa ek kritik mwa? Eski mo ena konfians ki Zeova kapav pran swin mo fami, mem kan li difisil pou zwenn le-de-bout?’ Si to ena konfians an Zeova ek to obeir Li parey kouma Noe, to kapav sir ki Zeova pou pran twa swin.​—Filipien 4:6, 7.

11. Ar ki gran difikilte Daniel ek so trwa kamarad ti bizin fer fas dan Babilonn? (Get zimaz dan koumansman lartik.)

¹¹ Ki difikilte Daniel ti gagne? Bann dimounn ti fors Daniel pou viv dan Babilonn, enn lavil etranze kot ti ena boukou fos bondie ek bann pratik ki ena enn rapor avek bann demon. Bann dimounn laba ti deteste bann Zwif ek ti boufonn zot ek zot Bondie, Zeova. (Psom 137:1, 3) Sirman Daniel ek bann lezot Zwif ki ti kontan Zeova ti gagn boukou lapenn akoz sa! Boukou dimounn ti pe vey Daniel, ek so trwa kamarad, Anania, Mishael, ek Azaria, parski zot ti pou gagn enn formasion pou travay pou lerwa  Babilonn. Zot ti sipoze manz bann manze ki lerwa ti manze, ek parmi ti ena bann kitsoz ki Zeova ti interdi so pep. Me Daniel pa ti “les bann manze rafine ki lerwa manze . . . fer li vinn inpir.”​—Daniel 1:5-8, 14-17.

12. (a) Ki kalite dimounn Daniel ti ete? (b) Kouma Zeova ti konsider Daniel?

¹² Daniel ti bizin fer fas ar enn lot sitiasion, ki kitfwa pa ti paret sa kantite difisil-la o-koumansman. Li ti ena bann gran kapasite, ek akoz sa, lerwa ti donn li bann privilez spesial. (Daniel 1:19, 20) Malgre sa, Daniel pa ti vinn fier, ni panse ki li ti touletan ena rezon. Li ti gard so limilite ek li ti rekonet so limit. Touletan li ti dir ki se Zeova ki ti fer li reisi. (Daniel 2:30) Reflesi lor la: Zeova ti mansionn Daniel ansam avek Noe ek Zob, ek Li ti dir ki zot ti bann bon lexanp. Sa lepok-la, Noe ek Zob ti’nn fini servi Zeova avek fidelite ziska zot lamor. Me Daniel ti ankor enn zenom. Zeova ti vremem ena konfians an Daniel! Ek Li ti ena rezon, parski Daniel ti res fidel ek obeisan ar Bondie toutlong so lavi. Kan Daniel ti ena preske 100 an, anz Bondie ti dir li sa bann parol-la: “O Daniel, to enn dimounn ki ena enn gran valer.”​—Daniel 10:11.

13. Kifer kitfwa Zeova ti ed Daniel pou gagn enn gran pozision?

¹³ Gras-a soutien Zeova, Daniel ti vinn enn fonksioner bien inportan dan Lanpir Babilonien ek apre, dan Lanpir Medo-Pers. (Daniel 1:21; 6:1, 2) Kitfwa Zeova ti fer Daniel gagn sa gran pozision-la pou ki li kapav ed so pep, parey kouma Zozef ti fer dan Lezip, ek Ester ek Mardoshe ti fer dan Pers. * (Get not.) (Daniel 2:48) Esey mazine seki Ezekiel ek bann lezot Zwif ki ti prizonie ti resanti, kan zot ti trouve kouma Zeova ti servi Daniel pou ed zot. Sirman sa ti bien ankouraz zot!

14, 15. (a) Kifer nou sitiasion parey kouma pou Daniel? (b) Ki leson bann paran azordi kapav aprann ar bann paran Daniel?

¹⁴ Kouma nou kapav imit lafwa ek lobeisans Daniel? Lemond kot nou pe viv azordi, li ranpli ar limoralite ek fos ladorasion. Bann dimounn finn inflianse  par Gran Babilonn, lanpir mondial bann fos relizion, ki Labib apel “enn lakaz pou bann demon.” (Revelasion 18:2) Me nou, nou kouma bann etranze dan sa lemond-la. Akoz sa, bann dimounn kapav trouve ki nou bien diferan, ek kitfwa zot boufonn nou. (Mark 13:13) Alor, parey kouma Daniel, anou kontign vinn pros ar nou Bondie, Zeova. Kan nou ena limilite, kan nou fer Zeova konfians, ek kan nou obeir Li, Li pou trouv nou osi kouma bann dimounn ki ena valer.​—Aze 2:7.

¹⁵ Bann paran kapav tir bann leson inportan ar bann paran Daniel. Kan Daniel ti enn ti garson dan Zida, laplipar bann dimounn ki ti laba ti bien move. Pourtan, li ti aprann kontan Zeova. Eski sa ti arive par azar? Non. Pena dout ki so bann paran finn bizin ansegn li lor Zeova. (Proverb 22:6) Mem Daniel so nom, ki vedir “Se Bondie ki Mo Ziz,” montre ki so bann paran ti kontan Zeova. (Daniel 1:6, not) Alor paran, ena pasians kan zot ansegn zot zanfan lor Zeova. Pa bes lebra. (Efezien 6:4) Priye avek zot. Priye pou zot. Fer tou seki zot kapav pou ansegn zot zanfan pou kontan bann prinsip Zeova, ek Li pou donn zot boukou benediksion.​—Psom 37:5.

16, 17. Dan diferan moman so lavi, ar ki difikilte Zob inn bizin fer fas?

¹⁶ Ki difikilte Zob ti gagne? Zob ti konn bann gran sanzman dan so lavi. O-koumansman, Zob ti “dimounn pli inportan parmi tou bann dimounn ki ti viv dan Les.” (Zob 1:3) Li ti bien ris, ek boukou dimounn ti konn li ek ti bien respekte li. (Zob 29:7-16) Malgre sa, Zob pa ti panse ki li ti pli bon ki lezot ouswa ki li pa ti bizin Bondie. Nou konn sa parski Zeova ti apel li “mo serviter,” ek Li ti dir konsernan Zob: “Li enn dimounn drwat ki personn pa kapav fer okenn repros. Li ena lakrint pou Bondie ek li res lwin ar lemal.”​—Zob 1:8.

¹⁷ Me, enn sel kout, Zob so lavi ti sanze net. Li ti perdi tou seki li ti ena, ek li ti telman dezespere ki li ti anvi mor. Azordi, nou kone ki se Satan ki ti fer Zob gagn tou sa bann problem-la. Satan ti dir ki Zob ti pe servi Zeova par lintere. (Lir Zob 1:9, 10. *) Zeova ti konsider sa fos lakizasion-la kouma enn kitsoz bien serye, parski sa ti konsern Li osi. Ki Li ti pou fer pou montre ki Satan enn move manter? Zeova ti donn Zob lokazion pou prouve ki li fidel ar Bondie ek ki li pe servi Bondie par amour.

18. (a) Ki kitsoz inpresionn twa ar Zob? (b) Ki nou aprann lor Zeova ar fason ki Li ti tret Zob?

¹⁸ Satan ti atak Zob plizir fwa ek ti fer li bien soufer. Satan ti fer Zob panse ki se Bondie ki ti deryer sa. (Zob 1:13-21) Apre sa, trwa zom ki ti pretann ki zot bann kamarad Zob, ti dir li bann parol bien blesan. Zot ti dir ki li ti move ek ki Bondie ti pe pini li. (Zob 2:11; 22:1, 5-10) Malgre tousala, Zob ti res fidel ar Zeova. Li vre ki parfwa Zob ti koze san reflesi. (Zob 6:1-3) Me Zeova ti konpran ki Zob ti dir sa bann kitsoz-la parski li ti pe bien soufer. Zeova ti trouve ki Zob zame ti  abandonn Li, mem si Satan ti pe kontign atak li ek insilte li. Alafin sa leprev bien difisil la, Zeova ti donn Zob de fwa plis ki seki li ti ena avan, ek Li ti fer li viv ankor 140 an. (Zak 5:11) Pandan sa lepok-la, Zob ti kontign servi Zeova avek tou so leker. Kouma nou konn sa? Parski Ezekiel 14:14, nou verse tem, ti ekrir plizir santenn lane apre lamor Zob.

19, 20. (a) Kouma nou kapav imit lafwa ek lobeisans Zob? (b) Kouma nou kapav montre konpasion anver lezot parey kouma Zeova?

¹⁹ Kouma nou kapav imit lafwa ek lobeisans Zob? Dan ninport ki sitiasion nou ete, nou anvi fer tou pou ki Zeova kontign res sa Kikenn ki pli inportan dan nou lavi la. Nou anvi fer Li san poursan konfians ek nou anvi obeir Li avek tou nou leker. An realite, nou ena plis rezon ki Zob pou fer sa. Reflesi lor la: Azordi, nou konn boukou kitsoz lor Satan ek lor so bann metod. (2 Korintien 2:11) Gras-a Labib, sirtou liv Zob, nou kone kifer Bondie pe permet lasoufrans. Nou kone ki Rwayom Bondie, li enn gouvernman ki vremem existe ek ki li dirize par Zezi Kris. (Daniel 7:13, 14) Ek nou kone ki biento sa Rwayom-la pou dirize lor later antie ek pou tir tou soufrans.

²⁰ Seki’nn ariv Zob aprann nou osi pou montre konpasion kan nou bann frer pe soufer. Parey kouma Zob, zot kapav koze san reflesi. (Ekleziast 7:7) Me fode pa nou ziz zot, ouswa akiz zot. Okontrer, nou bizin esey konpran zot. Lerla, nou pou imit nou Papa, Zeova, ki ena lamour ek mizerikord.​—Psom 103:8.

21. Kouma bann parol ki ena dan 1 Pier 5:10 fer nou rapel seki Noe, Daniel, ek Zob ti viv?

²¹ Noe, Daniel, ek Zob pa ti viv dan mem lepok, ek zot sitiasion pa ti parey. Pourtan, toule trwa ti ena landirans dan zot bann difikilte. Seki zot finn viv fer nou rapel seki lapot Pier ti dir: “Apre ki zot finn soufer pandan enn tipe letan, Bondie ki donn faver ki nou pa merite . . . pou fini zot formasion. Li pou fer zot vinn solid, Li pou fer zot vinn for, Li pou met zot lor enn fondasion ki solid.”​—1 Pier 5:10, NW.

22. Ki nou pou examine dan prosin lartik?

²² Bann parol ki ena dan 1 Pier 5:10 aplik osi ar pep Bondie azordi. Zeova ena konfians ki so bann serviter pou solid ek for. Nou tou nou anvi ki Zeova fer nou vinn for, ek nou anvi res solid ek res fidel anver Li. Se pou sa rezon-la ki nou anvi imit lafwa ek lobeisans Noe, Daniel, ek Zob. Dan prosin lartik, nou pou trouve ki sa bann zom-la inn reisi res fidel ar Bondie parski zot ti vremem konn Li. An realite, zot ti “konpran tou” seki Zeova ti anvi zot fer. (Proverb 28:5) Ek nou osi nou kapav fer parey.