PANDAN plizir lane, sertin dimounn ki kritik Labib ti pretann ki Lerwa Baltazar, ki mansione dan liv Daniel, zame pa’nn existe. (Dan. 5:1) Zot ti pans koumsa parski bann arkeolog pa ti trouv okenn prev ki li ti vremem existe. Selman, sa ti sanze an 1854. Kouma?

Sa lane-la, enn fonksioner angle ki apel John Taylor, ti al examinn bann rwinn ki dan ansien lavil Our, ki azordi trouv dan lesid Iraq. Laba, dan enn gran latour, li ti trouv plizir silenn an arzil. Sak silenn ti mezir anviron dis santimet longer ek ti ena bann ansien lekritir lor la. Lor enn parmi sa bann silenn-la ti ena enn lapriyer pou Lerwa Babilonn ki ti apel Nabonid ek pou so pli gran garson, Baltazar. Mem bann kritik Labib ti bizin aksepte ki sa dekouvert-la ti prouve ki Baltazar ti vremem existe.

Selman, Labib pa zis dir ki Baltazar ti existe, me li dir osi ki li ti enn lerwa. Me la osi bann kritik pa ti dakor. Par exanp, dan 19^em siek, enn siantis angle ki apel William Talbot ti ekrir ki sertin ti dir ki “Bel-sar-oussour [Baltazar] ti regn anmemtan ki so papa Nabonid. Me pena okenn prev.”

Selman, ti nepli ena okenn dout lor sa kestion-la kan bann lekritir lor bann lezot silenn ti montre ki Baltazar so papa, Lerwa Nabonid, pa ti dan Babilonn pandan plizir lane aswiv. Ki ti arive pandan sa moman-la? Encyclopaedia Britannica dir ki “kan Nabonid ti ale, li ti donn Baltazar so tronn ek enn bon parti so larme.” Alor, pandan sa moman-la, Baltazar ti regne dan plas so papa dan Babilonn. Akoz sa, Alan Millard, enn arkeolog ek spesialis dan bann lang, ti dir ki li exakt ki “liv Daniel apel Baltazar ‘lerwa.’”

Biensir, pou bann serviter Bondie, pli gran prev ki liv Daniel exakt ek inspire par Bondie, se parski li form parti dan Labib ek ki plizir lezot liv Labib koz lor profet Daniel.​—2 Tim. 3:16.