Mo’nn ne dan Québec, enn lavil dan Canada kot koz Franse ek ki trouv dan rezion Québec. Mo bann paran, Louis ek Zélia, inn elve mwa avek boukou lamour. Mo papa ti timid ek li ti kontan lir. Mwa mo ti kontan ekrir ek plitar mo ti anvi vinn enn zournalis.

Kan mo ti ena 12 an, Rodolphe Soucy, enn koleg travay mo papa, ti vinn lakaz avek enn so kamarad. Zot ti bann Temwin Zeova. Mo pa ti konn preske nanye lor bann Temwin ek mo pa ti tro interese ar zot relizion. Parkont, mo ti inpresione ki zot ti reponn nou bann kestion dan enn fason lozik ek avek boukou bonte gras-a Labib. Mo bann paran osi ti inpresione. Alor, nou ti aksepte pou etidie Labib.

Sa lepok-la, mo ti pe al enn lekol Katolik. Parfwa, mo ti explik mo bann kamarad lekol seki mo ti pe aprann dan mo letid Labib. Me enn zour, bann profeser, ki ti bann pret, ti aprann sa. Olie ki zot ti servi Labib pou montre ki seki mo ti dir li fos, enn parmi zot ti akiz mwa devan bann zelev ek ti dir ki mo ti enn rebel! Sa sitiasion-la ti bien stresan, me sa ti ouver mo lizie ek ti ed mwa pou trouve ki lansegnman relizie mo lekol pa ti an-akor avek Labib. Mo ti konpran ki mo ti bizin aret al sa lekol-la. Alor, avek permision mo bann paran, mo ti sanz lekol.

Mo ti kontign etidie Labib, me mo pa ti pe fer boukou progre parski mo ti per pou prese lakaz-lakaz. Sa lepok-la, Legliz Katolik ti ena enn gran linflians ek ti bien opoze ar  nou predikasion. Maurice Duplessis, premie minis Québec, ti mars ansam ar Legliz Katolik. Li ti soutenir bann dimounn ki ti arsel ek persekit bann Temwin Zeova. Alor, nou ti bizin ena boukou kouraz pou prese.

John Rae, enn frer ki ti fer neviem klas Lekol Galaad, ti ed mwa pou sirmont mo laper. John ti ena boukou lexperyans, li ti ena limilite ek li ti bien abordab. Bien rar li ti konsey mwa, me mo ti aprann boukou ar so bon lexanp. John ti gagn difikilte pou koz Franse, alor souvan mo ti akonpagn li dan predikasion ek mo ti ed li. Tou sa letan ki mo’nn pase avek John la inn ed mwa pou ena kouraz pou defann laverite. Mo ti pran batem le 26 Me 1951, di-z-an apre ki mo ti zwenn bann Temwin Zeova.

Dan nou ti lasanble dan lavil Québec, laplipar bann frer ek ser ti pionie. Zot bon lexanp ti motiv mwa pou vinn pionie. Sa lepok-la, nou ti prese lakaz-lakaz zis avek nou Labib. Nou ti bizin konn bien servi Labib parski nou pa ti servi bann piblikasion kan nou ti prese. Alor, mo ti aprann bann verse ki ti ed mwa pou defann laverite. Selman, boukou dimounn ti refiz pou lir bann Labib ki pa ti aprouve par Legliz Katolik.

An 1952, mo ti marye ar Simone Patry, enn ser fidel ki ti dan mem lasanble ki mwa. Nou ti al res Montréal, ek dan lespas enn an nou ti gagn enn tifi, Lise. Mem si mo ti aret fer pionie inpe avan nou maryaz, Simone ek mwa nou ti esey amenn enn lavi sinp pou ki nou fami kapav partisip afon dan bann aktivite nou lasanble.

Di-z-an plitar, mo ti koumans reflesi lor posibilite pou repran mo servis pionie. An 1962, mo ti al asiste Lekol pou Bann Frer Nome pandan enn mwa dan Betel Canada ek mo ti dan mem lasam ki frer Camille Ouellette. Camille ti bien zele pou predikasion ek sa ti inpresionn mwa, sirtou ki Camille ti ena enn fami. Sa lepok-la dan Québec, li ti bien rar ki enn paran fer pionie ek anmemtan elve so zanfan. Pourtan, se seki Camille ti pe esey fer. Pandan sa moman ki nou ti ansam la, Camille ti ankouraz mwa pou reflesi lor mo sitiasion. De-trwa mwa apre, mo’nn rann mwa kont ki mo ti kapav rekoumans mo servis pionie. Sertin dimounn ti panse ki sa pa  ti enn bon desizion. Me kanmem sa, mo ti rekoumans mo servis parski mo ti sir ki Zeova ti pou beni mo bann zefor.

An 1964, Simone ek mwa nou ti al servi kouma pionie spesial pandan plizir lane dan lavil Québec, landrwa kot nou ti grandi. Mem si persekision ti’nn diminie, ti ankor ena sertin ki ti pe persekit bann Temwin Zeova laba.

Enn Samdi apremidi, mo ti dan enn ti lavil ki apel Sainte-Marie, pa tro lwin ar lavil Québec, kan lapolis ti vinn aret mwa. Enn lapolis ti amenn mwa stasion ek ti met mwa dan prizon parski mo ti pe prese lakaz-lakaz alor ki mo pa ti ena okenn permi pou fer sa. Plitar, mo ti pas devan enn ziz ki ti apel Baillargeon. Boukou dimounn ti per li. Kan li ti demann mwa kisannla ti pou mo avoka, mo ti dir li ki li apel Glen How. * Kan li ti tann sa, li ti strese ek ti dir: “Ayo! Pa li!” Glen How ti enn avoka Temwin Zeova ki boukou dimounn ti kone. Li ti defann bann Temwin Zeova ek li ti gagn boukou case. Bien vit, lakour ti inform mwa ki ti nepli ena okenn lakizasion kont mwa.

Akoz lopozision ki bann Temwin ti gagne dan Québec, sa ti bien difisil pou lwe bann plas ki konvenab pou fer renion. Nou lasanble ti reini dan enn vie garaz ki pa ti ena sofaz. Pandan bann liver kot ti fer bien fre, bann frer ti servi enn ti masinn ki bril delwil pou sof pies-la. Souvan, avan ki renion koumanse, zot ti rasanble otour masinn-la ek zot ti rakont bann lexperyans bien ankourazan.

Li extraordiner pou trouv bann bon rezilta ki predikasion finn ena pandan sa bann dernie lane-la. Dan bann lane 1960, ti ena zis de-trwa ti lasanble dan rezion Québec, Côte-Nord, ek Gaspésie. Asterla, ena plis ki de sirkonskripsion dan sa bann rezion-la, ek bann frer ek ser reini dan bann zoli Lasal.

Simone ek mwa nou ti koumans servis sirkonskripsion an 1970. Plitar, an 1973, nou ti koumans servis distrik. Pandan sa bann lane-la, mo ti aprann boukou ar bann frer ki ena lexperyans, kouma Frer Laurier Saumur * ek David Splane. * Toulede ti pe servi kouma sirveyan. Apre sak lasanble, David ek mwa nou ti konsey sakenn nou kamarad pou amelior fason ki nou ansegne. Mo rapel ki enn fwa David ti dir mwa: “Léonce, mo’nn bien kontan to dernie diskour. Li ti bon, me mo ti kapav fer trwa diskour ar tou sa bann pwin ki to’nn koze la!” Mo ti ena labitid met tro boukou linformasion dan mo bann diskour. Mo ti bizin aprann fer bann diskour pli sinp.

 Bann sirveyan distrik ti gagn responsabilite pou ankouraz bann sirveyan sirkonskripsion. Selman, boukou proklamater dan Québec ti bien konn mwa. Alor, souvan zot ti demann mwa pou pres ansam avek zot kan mo ti vizit zot sirkonskripsion. Mo ti bien kontan pas letan avek zot dan predikasion. Enn fwa, enn sirveyan bien zanti ti dir mwa: “Li bon ki to pas letan avek bann frer ek ser, me pa bliye ki se mo semenn. Mo bizin lankourazman mwa osi!” Sa bon konsey-la ti ed mwa pou gard mo lekilib.

An 1976, ti ariv enn kitsoz bien tris ki mo pa ti atann. Mo madam, Simone, ti tom bien malad ek li’nn mor. Li ti enn madam extraordiner parski li ti ena enn gran lespri sakrifis ek li ti bien kontan Zeova. Mo ti res bien okipe dan mo servis ek sa ti ed mwa pou sirmont mo sagrin. Mo remersie Zeova parski Li’nn bien soutenir mwa dan sa moman difisil la. Inpe plitar, mo’nn marye ar Carolyn Elliott, enn ser bien zele. Carolyn ti enn pionie ki ti koz Angle ek li ti vinn servi dan Québec parski ti bizin led dan sa teritwar-la. Carolyn enn kikenn bien abordab ek li vremem interes li ar lezot, sirtou ar bann dimounn ki timid ouswa ki santi zot tousel. Li ti bien ed mwa kan nou’nn fer servis distrik ansam.

An Zanvie 1978, ti demann mwa pou servi kouma formater pou premie Lekol Pionie dan Québec. Mo ti extra strese parski zame mo pa ti asiste sa lekol-la ek mo pa ti mem kone ki ena dan liv-la. Alor tou ti nouvo pou mwa, parey kouma pou bann zelev osi. Erezman, ti ena boukou pionie ki ti ena lexperyans dan sa klas-la. Mem si mo ti zot formater, mo’nn aprann boukou ar bann zelev-la!

Plitar sa lane-la, ti ena Lasanble Internasional « La foi victorieuse » dan stad olinpik Montréal. Sa ti pli gran lasanble ki ti  organize dan Québec, ek ti ena plis ki 80,000 asistan. Dan sa lasanble-la, mo ti gagn responsabilite pou travay dan Servis Lapres. Mo ti koz avek plizir zournalis ek mo ti bien kontan pou trouv tou bann kitsoz pozitif ki zot ti dir lor nou. Zot ti ekrir plizir santenn lartik, ek radio ek televizion ti pas plis ki 20 er-d-tan interview lor nou. Sa ti donn enn extra gran temwaniaz lor nou!

An 1996, mo’nn konn enn gran sanzman. Depi mo batem, mo ti servi dan enn teritwar franse dan Québec, me asterla mo ti pou bizin al servi dan enn teritwar angle dan Toronto. Mo pa ti santi mwa kalifie ditou ek mo ti gagn per pou fer bann diskour parski mo pa ti tro konn koz Angle. Mo ti bizin priye Zeova pli souvan ek kont plis lor Li.

Mo ti bien strese avan ki mo koumans servi dan Toronto, me asterla mo kapav dir ki mo’nn bien kontan sa de zoli lane ki mo’nn servi laba la. Avek boukou pasians, Carolyn ti ed mwa pou amelior mo Angle. Anplis, bann frer ti bien ankouraz mwa ek soutenir mwa. Bien vit, Carolyn ek mwa nou finn fer boukou kamarad.

Mo ti ena boukou preparasion pou fer pou bann lasanble dan wikenn. Me kanmem sa, souvan mo ti prese lakaz-lakaz enn-er-d-tan dan Vandredi apremidi. Kitfwa zot anvi kone kifer mo sorti predikasion zis avan enn wikenn lasanble. An verite, sa ti bien ankouraz mwa kan mo ti gagn bann bon konversasion dan predikasion. Azordi osi, sa fer mwa dibien kan mo sorti predikasion.

An 1998, Carolyn ek mwa nou ti al servi kouma pionie spesial dan Montréal. Pandan plizir lane, mo ti ena responsabilite pou organiz bann temwaniaz piblik spesial ek pou travay ansam avek bann media pou tir bann prezize ki bann dimounn ena lor bann Temwin Zeova. Asterla, Carolyn ek mwa nou bien kontan pou pres avek bann imigre ki vinn Canada ek ki anvi konn plis lor Labib.

Ler mo mazinn mo 68 lane ki mo’nn pase dan servis Zeova, mo rann mwa kont ki Zeova inn extra beni mwa. Aprann pou kontan predikasion ek ed bann dimounn pou konn laverite finn donn mwa boukou lazwa. Apre ki so bann zanfan inn grandi, mo tifi, Lise, ek so mari inn koumans servi kouma pionie permanan. Kan mo trouve ki kantite li zele pou predikasion, sa vremem rann mwa ere. Mo ena boukou rekonesans anver mo bann konpagnon Kretien pou zot bon lexanp ek zot bann bon konsey. Sa finn ed mwa pou grandi lor plan spiritiel ek pou servi Zeova dan plizir fason. Mo’nn konpran ki ena enn sel fason pou kontign fer seki lorganizasion Zeova demann nou: Se kont lor lespri sin Zeova. (Ps. 51:11) Mo kontign remersie Zeova pou privilez ki Li donn mwa pou loue so nom!​—Ps. 54:6.