LARTIK LETID 6
“Enn Mari Limem Sef So Fam”
“Enn mari limem sef so fam.”—1 KOR. 11:3.
KANTIK 13 Kris, Nou Model
REZIME *
1. Kan enn ser selibater pe desid pou marye, ki kestion li bizin poz limem?
TOU bann Kretien anba lotorite Zezi Kris, ki enn sef parfe. Selman, kan enn fam desid pou marye, li bizin aksepte ki se enn zom inparfe ki pou vinn so sef. Sa sitiasion-la kapav bien difisil. Alor, kan enn ser selibater pe pans pou marye ar enn frer, li bizin demann limem: ‘Ki kitsoz montre mwa ki sa frer-la pou enn bon sef fami? Eski servi Zeova se enn priorite pou li? Si mo reponn non pou sa de kestion-la, kifer mo panse ki li pou vinn enn bon sef fami apre nou maryaz ek ki li pou pran nou swin lor plan spiritiel?’ Biensir, enn ser bizin osi demann limem: ‘Eski mo ena bann kalite ki pou fer nou maryaz reisi? Eski mo ena pasians ek mo zenere? Eski mo ena enn bon relasion avek Zeova?’ (Ekle. 4:9, 12) Si enn ser pran bann bon desizion avan li marye, so lavi maryaz pou ere.
2. Ki nou pou examine dan sa lartik-la?
2 Bann milyon ser Kretien dan lemond antie pe soumet ar zot mari ek zot bann bon lexanp dan sa domenn-la. Nou vremem felisit zot pou sa! Nou kontan pou servi Zeova ansam avek sa bann ser fidel la! Dan sa lartik-la, nou pou reponn sa trwa kestion-la: (1) Ki difikilte bann madam marye kapav gagne? (2) Kifer enn madam swazir pou soumet ar so mari? (3) Ki kitsoz bann mari ek bann fam Kretien kapav aprann lor soumision gras-a lexanp Zezi, Abigail, ek Mari, mama Zezi?
KI DIFIKILTE BANN MADAM KRETIEN KAPAV GAGNE?
3. Kifer tou bann koup marye gagn bann problem?
3 Maryaz se enn kado parfe ki Bondie inn fer nou, selman bann dimounn zot inparfe. (1 Zan 1:8) Akoz sa, Labib dir ki bann koup marye pou gagn “enn kantite difikilte.” (1 Kor. 7:28) Anou get sertin difikilte ki enn madam kapav gagne.
4. Kifer enn madam kapav panse ki li rabesan pou soumet ar so mari?
4 Parfwa, akoz lanvironnman kot li’nn grandi, enn madam kapav panse ki li rabesan pou soumet ar so mari. Marisol, ki res Letazini, dir: “Kot mo’nn grandi, finn touletan ansegn bann madam ki zot bizin egal ar bann zom dan tou domenn. Mo kone ki Zeova inn donn bann mari lotorite. Li’nn deside ki bann fam bizin obeir zot mari, me ki bann fam merit respe zot mari. Me parfwa, mo trouv sa difisil pou respekte lotorite mo mari parski lemond ankouraz bann fam pou pa fer sa.”
5. Ki fos lide sertin zom ena lor bann fam?
5 Li kapav arive osi ki enn madam marye ar enn misie ki panse ki bann madam zot inferyer. Enn ser ki apel Ivon ek ki res Lamerik Disid, dir: “Dan nou landrwa, bann misie manz avan bann madam, ek bann tifi bizin kwi ek netwaye. Bann ti garson se zot mama ek zot ser ki bizin servi zot. Anplis, souvan ansegn bann garson ki zotmem ki ‘lerwa dan lakaz.’” Enn ser ki apel Yingling ek ki res Lazi, dir: “Dan mo lang, ena enn lexpresion ki dir ki li pa neseser ki bann madam zot intelizan ouswa zot ena bann kapasite. Zot responsabilite se pou netway lakaz, ek zot pa gagn drwa exprim zot lopinion ar zot mari.” Enn mari ki ena sa kalite latitid-la ek ki pa met an pratik bann prinsip Biblik, pou rann lavi so madam bien difisil. Anplis, li pa pou imit Zezi ek li pa pou fer Zeova plezir.—Efe. 5:28, 29, NW; 1 Pier 3:7.
6. Ki bann madam bizin fer pou ranforsi zot relasion avek Zeova?
6 Parey kouma nou ti trouve dan lartik avan, Zeova atann ki bann mari Kretien pran swin zot fami lor plan materyel ek spiritiel. (1 Tim. 5:8) Selman, mem si bann madam marye zot bien okipe, zot bizin pran letan toulezour pou lir Labib, pou medit lor la, ek pou priye Zeova. Kitfwa zot kapav trouv sa difisil. Zot kapav panse ki zot pena ase letan ek lenerzi pou fer sa bann kitsoz-la. Me li bien inportan ki zot pran letan pou fer sa bann kitsoz-la. Kifer? Parski Zeova anvi ki sakenn parmi nou devlop ek ena enn lamitie personel avek Li.—Zist. 17:27.
7. Ki kitsoz kapav ed enn madam pou obeir ek respekte so mari?
7 Li normal ki enn madam bizin fer boukou zefor pou soumet ar so mari ki inparfe. Selman, li pou pli fasil pou li obeir ek respekte so mari, si li konpran ek aksepte bann rezon Biblik ki explike kifer li bizin fer sa.
KIFER ENN MADAM SWAZIR POU SOUMET AR SO MARI?
8. Dapre Efezien 5:22-24, kifer enn fam Kretien swazir pou soumet ar so mari?
8 Enn fam Kretien swazir pou soumet ar so mari parski se Zeova ki demann li pou fer sa. (Lir Efezien 5:22-24, NW. *) Li ena konfians an so Papa ki dan lesiel. Li kone ki Zeova kontan li. Ek li kone ki Zeova zame pa pou demann li pou fer enn kitsoz ki pa bon pou li.—Det. 6:24; 1 Zan 5:3.
9. Ki arive kan enn madam respekte lotorite so mari?
9 Lemond Satan ankouraz bann madam pou pa swiv bann prinsip Zeova ek pou konsider soumision kouma enn kitsoz ki rabesan. Biensir, bann dimounn ki fann sa bann lide-la, zot pa konn nou Bondie ki ena lamour. Zeova zame pa pou demann so bann tifi ki Li bien kontan pou fer enn kitsoz ki pou rabes zot. Enn ser ki fer zefor pou obeir Zeova kan li respekte lotorite so mari, li ede pou ki ena lape dan so fami. (Ps. 119:165) Li pou gagn bann bienfe, so mari pou gagn bann bienfe, ek zot bann zanfan osi pou gagn bann bienfe.
10. Ki leson nou kapav aprann ar lexanp Carol?
10 Enn madam ki soumet ar so mari, ki inparfe, montre ki li kontan ek respekte Zeova, sa Kikenn ki’nn etabli lotorite-la. Carol, enn ser ki res Lamerik Disid, dir: “Mo kone ki mo mari pou fer bann erer. Mo kone osi ki fason ki mo reazir kan li fer bann erer montre ki kantite mo kontan Zeova. Alor, mo fer zefor pou soumet ar mo mari parski mo anvi fer plezir mo Papa ki dan lesiel.”
11. Ki kitsoz ti ed Aneese pou pardone, ek ki nou kapav aprann ar so lexanp?
11 Enn madam kapav trouv sa difisil pou respekte ek soumet ar so misie, si li santi ki so misie pa pran kont so bann santiman. Anou gete seki enn ser, ki apel Aneese, fer kan enn kitsoz koumsa ariv li. Li dir: “Mo fer zefor pou pa ankoler. Mo rapel ki nou tou nou fer erer. Mo lobzektif se pou pardone, parey kouma Zeova. Kan mo pardone, mo re-gagn lape lespri.” (Ps. 86:5) Enn madam ki dispoze pou pardone pou trouv sa pli fasil pou soumet ar so misie.
KI NOU KAPAV APRANN AR BANN LEXANP BIBLIK?
12. Ki bann lexanp konsernan soumision ena dan Labib?
12 Sertin dimounn panse ki, kan enn kikenn li soumet, savedir ki li feb. Me sa li fos. Dan Labib, ena lexanp boukou dimounn ki ti ena boukou kouraz me ki ti osi soumet ar lezot. Anou gete seki nou kapav aprann ar lexanp Zezi, Abigail, ek Mari.
13. Kifer Zezi soumet ar Zeova? Explike.
13 Zezi soumet ar Zeova, me sa pa vedir ki Zezi li bet. Zezi ti ansegn dan enn fason kler ek sinp, ek se zis enn dimounn intelizan ki kapav ansegn koumsa. (Zan 7:45, 46) Zeova ti kone ki Zezi ti ena bann kapasite. Alor, kan Zeova ti kree tou kitsoz, Li ti permet ki Zezi travay ansam avek Li. (Prov. 8:30; Ebre 1:2-4) Apre ki Zeova inn resisit Zezi, Zeova inn donn li “tou pouvwar dan lesiel ek lor later.” (Mat. 28:18) Mem si Zezi ena boukou kapasite, li kontign kont lor Zeova pou gid li. Kifer? Parski li kontan so Papa.—Zan 14:31.
14. Ki bann mari kapav aprann ar (a) fason ki Zeova trouv bann madam? (b) bann parol ki ena dan Proverb 31?
14 Leson pou bann mari. Zeova pa’nn demann bann madam pou soumet ar zot mari parski Li konsider bann madam kouma inferyer. Zeova finn montre sa kan Li’nn swazir bann madam ek bann misie toulede pou dirize ansam avek Zezi. (Gal. 3:26-29) Zeova inn montre ki Li fer Zezi konfians kan Li’nn donn li lotorite. Dan mem fason, enn mari ki ena sazes pou donn so madam enn sertenn lotorite. Labib fer enn zoli deskripsion enn madam ki kapab. Li dir ki madam-la diriz bann travay ki fer dan lakaz, li fer biznes, ek li aste ek vann bann terin. (Lir Proverb 31:15, 16, 18. *) Li pa enn esklav ki pena drwa exprim seki li panse. Okontrer, so mari fer li konfians ek li pran kont so lopinion. (Lir Proverb 31:11, 26, 27. *) Kan enn mari respekte so madam koumsa, madam-la pou kontan pou soumet ar li.
Ki kitsoz bann madam kapav aprann ar fason ki Zezi ti soumet ar Zeova? (Get paragraf 15)
15. Ki bann madam kapav aprann ar lexanp Zezi?
15 Leson pou bann fam. Mem si Zezi ti fer bann kitsoz ki extraordiner, li pa ti panse ki sa ti rabesan pou soumet ar Zeova. (1 Kor. 15:28; Fil. 2:5, 6) Dan mem fason, enn madam ki swiv lexanp Zezi, li pa pou santi li rabese kan li soumet ar so mari. Li pou soutenir so mari parski li kontan li, me sirtou parski li kontan ek respekte Zeova.
Apre ki li’nn avoy manze pou David ek so bann zom, Abigail al get David. Li azenou ek li sipliy David pou pa tir vanzans (Get paragraf 16)
16. Dapre 1 Samiel 25:3, 23-28, ki difikilte Abigail ti gagne ? (Get zimaz lor kouvertir.)
16 Abigail so mari ti apel Nabal. Nabal ti egois, li ti fier, ek li ti ingra. Me kanmem sa, Abigail ti res ar so mari. Si Abigail ti anvi kas so maryaz, li ti kapav les David ek so bann zom touy Nabal. Me li pa ti fer sa. Okontrer, li ti fer seki li ti kapav pou protez Nabal ek tou bann dimounn ki ti dan so lakaz. Mazinn kouraz ki Abigail ti bizin ena kan li ti al koz ar David ki ti avek so 400 zom! Li ti mem demann exkiz pou seki so mari ti fer. (Lir 1 Samiel 25:3, 23-28. *) David ti realize ki Zeova ti servi Abigail pou konsey li ek anpes li fer enn erer bien grav.
17. Ki kitsoz bann mari kapav aprann ar lexanp David ek Abigail?
17 Leson pou bann mari. Abigail ti enn madam ki ena sazes. David ti ekout so konsey, ek li pa ti touy bann dimounn inosan. Dan mem fason, enn mari ki ena sazes pou pran kont lopinion so madam avan ki li pran enn desizion inportan. Lopinion so madam kapav anpes li pou pran enn move desizion.
18. Ki kitsoz bann madam kapav aprann ar lexanp Abigail?
18 Leson pou bann fam. Enn madam ki kontan ek respekte Zeova kapav ena enn bon lefe lor so fami, mem si so mari pa servi Zeova ouswa li pa swiv bann prinsip Labib. Madam-la pa pou rod enn fason pou kas so maryaz. Okontrer, kan li respekte ek soumet ar so mari, sa kapav motiv so mari pou aprann plis lor Zeova. (1 Pier 3:1, 2) Ek mem si so mari pa vinn enn Temwin, Zeova pou kontan parski madam-la pe soumet ar so mari ek li pe res fidel anver Zeova.
19. Kan eski enn fam pa pou soumet ar so mari?
19 Parkont, enn madam Kretien pa pou soumet ar so mari si li demann li pou dezobeir bann lalwa ouswa bann prinsip Biblik. Par exanp, si ser-la so mari demann li pou koz manti, pou kokin, ouswa pou fer enn lot kitsoz ki Zeova pa kontan, ser-la pa pou fer li. Tou bann Kretien, parmi ena bann ser ki marye, bizin obeir Zeova an premie. Si enn mari demann so madam pou dezobeir bann prinsip Biblik, madam-la bizin refize ek li bizin explik so mari dan enn fason ferm me avek zantiyes, kifer li pa pou fer sa.—Zist. 5:29.
Get paragraf 20 *
20. Kouma nou kone ki Mari ti ena enn bon lamitie avek Zeova?
20 Mari, mama Zezi, ti ena enn bon lamitie avek Zeova. Pena dout ki li ti konn bien bann Lekritir. Kan li ti pe koz avek Elizabet, mama Zan Batis, Mari ti sit bann Lekritir Ebre plis ki 20 fwa. (Lik 1:46-55) Reflesi lor la: Mem si Mari ti fianse ar Zozef, anz Zeova pa ti aparet ar Zozef an premie. Anz-la ti koz an premie avek Mari ek li ti dir Mari ki li pou ansint Garson Bondie. (Lik 1:26-33) Zeova ti bien konn Mari, ek Li ti kone ki Mari ti pou kontan So Garson ek pran li swin. Nou kapav sir ki Mari ti kontign ena enn bon lamitie avek Zeova, mem apre lamor ek rezireksion Zezi.—Zist. 1:14.
21. Ki bann mari kapav aprann ar seki Labib dir lor Mari?
21 Leson pou bann mari. Enn mari ki ena sazes pou ere si so fam konn bien Labib. Li pa pou agase ar so madam ek panse ki so madam pe anvi vinn sef fami. Li pou konpran ki, si so madam ena enn bon konesans lor Labib ek ki li swiv bann prinsip Biblik, li pou kapav ed so fami pli bien. Biensir, mem si enn madam ena plis ledikasion ki so mari, se mari-la so responsabilite pou okip so fami lor plan spiritiel, par exanp, kan li diriz zot ladorasion an fami.—Efe. 6:4.
Ki kitsoz bann madam kapav aprann ar lexanp Mari konsernan zot letid Labib personel? (Get paragraf 22) *
22. Ki bann madam kapav aprann ar lexanp Mari?
22 Leson pou bann fam. Mem si enn madam bizin soumet ar so mari, li bizin osi okip so prop spiritialite. (Gal. 6:5) Alor, li bizin pran letan pou fer so letid personel ek pou medite. Sa pou ed li pou kontign kontan ek respekte Zeova, ek pou kontign soumet ar so mari avek lazwa.
23. Kouma bann madam ki soumet ar zot mari fer zotmem, zot fami, ek lasanble gagn bann bienfe?
23 Bann madam ki soumet ar zot mari parski zot kontan Zeova, pou pli zwaye ki bann madam ki rezet lotorite ki Zeova inn etabli. Zot pou enn bon lexanp pou bann zenn. Anplis, zot pou ede pou ki ena lamour ek lape dan zot fami ek dan lasanble. (Tit 2:3-5) Azordi, mazorite bann serviter Zeova se bann fam ki fidel. (Ps. 68:11) Selman, ki nou enn zom ouswa enn fam, nou tou nou ena enn rol inportan dan lasanble. Dan prosin lartik, nou pou koz lor sa rol inportan la.
KANTIK 131 Seki Bondie Inn Ini
^ par. 5 Zeova inn deside ki enn madam marye bizin soumet ar so mari ek respekte li. Me ki savedir? Bann mari ek bann fam Kretien kapav aprann boukou lor soumision gras-a lexanp Zezi ek bann madam ki mansione dan Labib.
^ par. 8 Efezien 5:22-24: “22 Fode ki bann fam soumet ar zot mari parey kouma zot soumet ar Lesegner, 23 parski enn mari li sef so fam parey kouma Lekris limem sef lasanble, so lekor, ek limem sover sa lekor-la. 24 Wi, parey kouma lasanble soumet ar Lekris, fode ki bann fam osi soumet ar zot mari dan tou kitsoz.”
^ par. 14 Proverb 31:15, 16, 18: “15 Anplis, li leve kan ankor fer nwar, li nouri so fami ek li donn so bann servant zot par. 16 Li pe pans pou aste enn karo ek li aste li. Gras-a so travay, li’nn plant enn karo rezin. 18 Li trouve ki so biznes pe marse, so lalanp pa tengn aswar.”
^ par. 14 Proverb 31:11, 26, 27: “11 So mari fer li konfians avek tou so leker, ek mari-la pa mank nanye. 26 Kan li ouver so labous, bann parol ranpli ar sazes ki sorti ek touletan li koz avek bonte. 27 Li vey bien tou seki pase dan so lakaz, ek li pa pares.”
^ par. 16 1 Samiel 25:3, 23-28: “3 Ek misie-la ti apel Nabal, so madam ti apel Abigail. Madam-la ti ena bon zizman ek li ti bien zoli, me so mari ti enn brit ek li pa ti ena enn bon fason azir. Li ti enn desandan Kaleb. 23 Kan Abigail ti trouv David, li degaze desann lor so bourik, li tom azenou ek li prostern devan David. 24 Lerla, li tom dan so lipie ek li dir: ‘Mo segner, fer koumadir mwa ki an-tor. Silteple, permet mwa koz ar twa ek ekout bann parol to servant. 25 Silteple mo segner, pa pran kont Nabal, sa zom ki pa vo nanye la. Parey kouma so nom montre, li enn kikenn ki bet. Me mwa, to servant, mo pa finn trouv bann zennzan ki to finn avoye. 26 Asterla mo segner, mo fer serman par Zeova, Bondie vivan, ek par twa ki vivan, ki se Zeova ki’nn anpes twa vinn koupab enn krim ek tir vanzans ar to prop lame. Ki to bann lennmi ek bann ki rod fer twa dimal vinn kouma Nabal. 27 Asterla mo segner, donn bann zennzan ki avek twa sa kado ki mo finn amenn pou twa la. 28 Silteple, pardonn erer to servant. Zeova pou fer sir ki bann desandan mo segner regne pandan lontan, parski to pe lager pou Zeova, ek to pa finn fer nanye demal depi to nesans.’”
