1-2. Dapre Matie 5:11, kouma nou bizin konsider bann leprev?

ZEZI ti promet so bann disip ki zot ti pou vremem ere. Me li ti osi dir ki zot ti pou gagn bann leprev. (Mat. 10:22, 23; Lik 6:20-23) Nou kontan ki nou bann disip Zezi Kris. Me ki nou pou resanti si nou fami esey anpes nou servi Zeova, si bann gouvernman persekit nou, ouswa si nou bann kamarad lekol ouswa nou bann koleg travay esey fer nou fer bann move kitsoz? Kitfwa nou trakase kan nou reflesi lor sa bann kitsoz-la.

² An zeneral, bann dimounn pa zwaye kan zot gagn persekision. Pourtan, Labib dir nou ki nou bizin zwaye kan nou gagn persekision. Par exanp, disip Zak ti ekrir ki fode pa nou dekouraze kan nou gagn bann leprev, okontrer nou bizin zwaye. (Zak 1:2, 12) Ek Zezi ti dir ki nou bizin ere kan nou gagn persekision. (Lir Matie 5:11.) Kouma nou kapav gard nou lazwa malgre bann leprev? Pou reponn sa kestion-la, nou pou examinn seki Zak ti dir bann Kretien dan premie siek. Me pou koumanse, anou koz lor sertin difikilte ki bann Kretien bizin fer fas.

3. Ki ti arive inpe letan apre ki Zak ti vinn enn disip Zezi?

³ Inpe letan apre ki Zak, demi frer Zezi, ti vinn enn disip, bann Kretien dan Zerizalem ti gagn enn gran persekision. (Zist. 1:14; 5:17, 18) Ek kan ti touy disip Etienn, bann Kretien ti kit Zerizalem ek zot ti “disperse” partou dan Zide ek Samari. Zot ti mem al bien lwin, ziska Sip ek Antios. (Zist. 7:58–8:1, 11:19) Bann disip ti gagn boukou difikilte. Kanmem sa, zot ti kontign pres bonn nouvel partou kot zot ti ale, ek plizir lasanble ti forme dan Lanpir Romin. (1 Pier 1:1) Me apre sa, bann Kretien ti gagn plis difikilte ankor.

4. Ki lezot difikilte bann Kretien dan premie siek ti gagne?

 ⁴ Bann Kretien dan premie siek ti gagn boukou difikilte. Par exanp, ver lane 50 Nou Lepok, Lanperer Romin Klod ti donn tou bann Zwif lord pou kit Rom. Alor, bann Zwif ki ti vinn Kretien ti bizin kit zot lakaz pou al res dan lezot landrwa. (Zist. 18:1-3) Ver 61 Nou Lepok, lapot Pol ti ekrir ki bann dimounn ti insilte so bann konpagnon Kretien an piblik, ti met zot dan prizon, ek ti kokin zot bann dibien. (Ebre 10:32-34) Anplis, parey kouma tou dimounn, sertin Kretien ti mizer ek zot ti malad.​—Rom. 15:26; Fil. 2:25-27.

5. Ki kestion nou pou reponn dan sa lartik-la?

⁵ Kan Zak ti ekrir so let an 62 Nou Lepok, li ti kone ki so bann frer ek ser ti pe gagn boukou difikilte. Zeova ti servi Zak pou donn sa bann Kretien-la bann konsey pratik pou ki zot kapav res zwaye malgre bann difikilte. Anou examinn let Zak ek anou reponn sa bann kestion-la: Lor ki kalite lazwa Zak ti pe koze? Ki kitsoz kapav fer enn Kretien perdi so lazwa? Ek kouma sazes, lafwa, ek kouraz kapav ed nou pou gard nou lazwa malgre bann difikilte?

6. Dapre Lik 6:22, 23, kifer enn Kretien kapav zwaye kan li gagn bann difikilte?

⁶ Boukou dimounn panse ki zot pou ere si zot ena enn bon lasante, boukou larzan, ek enn bon relasion avek zot fami. Me lazwa lor ki Zak ti koze, li pa depann lor sitiasion enn dimounn. Sa lazwa-la li  enn laspe frwi lespri Bondie. (Gal. 5:22) Enn Kretien zwaye, ouswa vremem ere, kan li kone ki li pe fer Zeova plezir ek ki li pe swiv lexanp Zezi. (Lir Lik 6:22, 23; Kol. 1:10, 11) Nou kapav konpar nou lazwa ar enn laflam ki proteze par enn lalanp. Mem si ena divan ek lapli, laflam-la kontign brile. Dan mem fason, mem si nou tom malad, nou pena boukou larzan, bann dimounn boufonn nou, ouswa nou fami ek lezot dimounn persekit nou, nou res zwaye. Okontrer, sak fwa ki enn kikenn rod fer nou perdi nou lazwa, nou lazwa kontign ogmante. Kan nou gagn bann difikilte akoz nou lafwa, sa montre ki nou bann vre disip Zezi Kris. (Mat. 10:22; 24:9; Zan 15:20) Se pou sa rezon-la ki Zak ti ekrir: “Mo bann kamarad, konsider li kouma enn lazwa letan zot fer fas avek bann moman eprev.”​—Zak 1:2.

7-8. Kifer nou lafwa vinn pli for kan nou gagn bann leprev?

⁷ Zak koz lor enn lot rezon kifer lafwa bann Kretien vinn pli for kan zot gagn bann leprev. Li dir: “Kan zot lafwa pas par leprev, sa fer zot gagn landirans.” (Zak 1:3) Nou kapav konpar bann leprev ar dife ki bann forzron servi pou travay enn metal. Kan sof metal-la ek refrwadi li, li vinn pli solid. Dan mem fason, kan nou andir bann leprev, nou lafwa vinn pli solid. Se pou sa rezon-la ki Zak ti ekrir: “Zot landirans bizin kontigne mem pouki zot vinn parfe ek san okenn defo.” (Zak 1:4) Kan nou kone ki bann leprev fer nou lafwa vinn pli for, nou pou andir zot avek lazwa.

⁸ Dan so let, Zak koz osi lor bann difikilte ki kapav fer nou perdi nou lazwa. Ki sa bann difikilte-la sa, ek kouma nou kapav sirmont zot?

9. Kifer nou bizin ena sazes?

⁹ Difikilte: Nou pa kone ki nou bizin fer. Kan nou gagn bann difikilte, nou anvi rod led Zeova pou nou pran bann desizion ki fer Li plezir. Nou anvi osi ki nou bann desizion ed nou pou res fidel anver Zeova ek ki zot fer nou bann frer ek ser dibien. (Zer. 10:23) Nou bizin ena sazes pou nou kone ki nou bizin fer ek kouma nou bizin reponn bann dimounn ki opoz zot ar nou. Si nou pa kone ki nou bizin fer, sa kapav dekouraz nou ek fer nou perdi nou lazwa.

10. Dapre Zak 1:5. ki kitsoz nou bizin fer pou ki nou gagn sazes?

¹⁰ Solision: Demann Zeova so sazes. Si nou anvi andir nou bann difikilte avek lazwa, dabor nou bizin priye Zeova pou ki  Li donn nou sazes ki nou bizin pou nou pran bann bon desizion. (Lir Zak 1:5, NW. *) Kouma nou bizin reazir si nou ena linpresion ki Zeova pa pe reponn nou bann lapriyer deswit? Disip Zak ankouraz nou pou “kontign demann Bondie.” Zeova Li pa agase kan nou kontign demann Li so sazes. Ek Li pa pou fer nou okenn repros. Kan nou priye nou Papa ki dan lesiel ek ki zenere, se avek enn “leker kontan” ki Li pou donn nou sazes pou nou andir nou bann leprev. (Ps. 25:12, 13) Li trouv nou bann problem, Li soufer ansam avek nou, ek Li ena enn gran dezir pou ed nou. Kan nou konn sa, sa vremem rann nou zwaye, pa vre! Me kouma eski Zeova donn nou so sazes?

11. Ki kitsoz ankor nou bizin fer pou gagn sazes?

¹¹ Zeova donn nou so sazes gras-a so Parol, Labib. (Prov. 2:6) Alor, pou nou gagn sazes, nou bizin etidie Labib ek nou bann piblikasion. Me fode pa nou etidie Labib zis pou gagn enn konesans. Nou bizin met an pratik seki nou pe aprann. Zak ti ekrir: “Fodre pa ki zot . . . zis ekout so parol me zot pa met li anpratik.” (Zak 1:22) Kan nou aplik bann konsey ki sorti kot Bondie, nou pou vinn pli ‘pasifik, rezonab, ek ranpli ar mizerikord.’ (Zak 3:17, NW) Sa bann kalite-la pou ed nou pou fer fas ar ninport ki difikilte ek pou gard nou lazwa.

12. Kifer eski li inportan ki nou konn bien Labib?

¹² Labib li kouma enn laglas. Li kapav ed nou pou trouve ki kitsoz nou kapav fer pli bien ek kouma nou kapav fer sa. (Zak 1:23-25) Par exanp, apre ki nou’nn etidie  Labib, kitfwa nou’nn rann nou kont ki nou bizin ena plis metriz lor noumem. Avek led Zeova, nou kapav ena plis douser kan bann dimounn ouswa bann problem fer nou ankoler. Douser kapav ed nou pou tini presion. Lerla, nou pou kapav reflesi pli bien ek pran bann pli bon desizion. (Zak 3:13) Sa lexanp-la montre nou ki li inportan ki nou konn bien Labib!

13. Kifer nou bizin etidie lexanp bann personaz Biblik?

¹³ Parfwa, se atraver nou bann erer ki nou tir bann leson. Me kan nou aprann bann kitsoz dan sa fason-la, souvan nou bien soufer! Parkont, enn pli bon fason pou gagn sazes, se kan nou tir bann leson ar seki lezot fer, mem ar zot bann erer. Se pou sa rezon-la ki Zak ankouraz nou pou reflesi lor lexanp bann personaz Biblik kouma Abraam, Raab, Zob, ek Eli. (Zak 2:21-26; 5:10, 11, 17, 18) Sa bann fidel serviter Zeova la ti reisi andir bann difikilte ek gard zot lazwa. Zot lexanp montre nou ki, avek led Zeova, nou osi nou kapav andir bann difikilte.

14-15. Kifer nou bizin sirmont nou bann dout?

¹⁴ Difikilte: Kan nou ena bann dout. Parfwa, nou kapav trouv sa difisil pou konpran sertin lansegnman Biblik. Li kapav arive osi ki Zeova pa reponn nou bann lapriyer dan fason ki nou nou ti pe atann. Bann kitsoz koumsa kapav fer nou koumans ena bann dout. Si nou pa sirmont sa bann dout-la, zot kapav afebli nou lafwa ek gat nou relasion avek Zeova. (Zak 1:7, 8) Zot kapav mem fer nou perdi nou lesperans konsernan lavenir.

¹⁵ Lapot Pol ti konpar nou lesperans ar lank enn bato. (Ebre 6:19) Kan ena enn siklonn, enn lank li tini enn bato ek li anpes li derive. Me pou ki lank-la li itil, lasenn ki relie li ar bato-la bizin pa kase. Larouy kapav afebli lasenn enn bato. Dan mem fason, bann dout kapav afebli nou lafwa. Kan enn kikenn fer fas ar lopozision ek ki li ena bann dout, li kapav perdi konfians dan bann promes Zeova. Si nou perdi nou lafwa, nou perdi nou lesperans. Zak ti explike ki enn kikenn ki ena bann dout, li “parey kouma vag lamer dirize par divan” ki al dan tou direksion. (Zak 1:6) Enn kikenn ki koumsa kitfwa zame li pa pou ere!

16. Ki nou bizin fer si nou ena bann dout?

¹⁶ Solision: Sirmont nou bann dout; ranforsi nou lafwa. Pa tarde pou azir. Dan lepok profet Eli, bann serviter Zeova ti ena bann dout konsernan zot krwayans ek zot ti tarde pou azir. Akoz sa, Eli ti dir zot: “Ziska kan zot pou bwate lor de lopinion diferan? Si Zeova Limem vre Bondie, swiv Li; me si se Baal, swiv Baal!” (1 Ler. 18:21) Azordi osi nou bizin pa tarde pou azir. Si nou ena bann dout, nou bizin fer bann resers pou fer sir ki Bondie se Zeova, ki Labib se So Parol, ek ki bann Temwin Zeova se So pep. (1 Tes. 5:21) Kan nou fer sa, nou pou tir nou bann dout ek nou pou ranforsi nou lafwa. Nou kapav demann bann ansien pou ed nou pou sirmont nou bann dout. Nou bizin pa tarde pou azir si nou anvi gard nou lazwa dan nou servis pou Zeova!

17. Ki pou arive si nou dekouraze?

¹⁷ Difikilte: Dekourazman. Labib dir: “Si to dekouraze zour ki maler vinn lor twa, to pou ena enn tigit lafors mem.” (Prov. 24:10) Mo Ebre ki’nn servi pou tradir “dekouraze” vedir “perdi kouraz.”  Si nou perdi kouraz, bien vit nou pou perdi nou lazwa.

18. Ki savedir andire?

¹⁸ Solision: Kont lor Zeova, Li pou donn twa kouraz pou andire. Pou ki nou kapav andir bann difikilte, nou bizin ena kouraz. (Zak 5:11) Mo ki Zak ti servi pou “landirans” vedir tini ferm. Kitfwa sa fer nou pans enn solda ki ena boukou kouraz ek ki tini ferm kan bann lennmi atake.

19. Ki nou kapav aprann ar lexanp lapot Pol?

¹⁹ Lapot Pol inn donn nou enn zoli lexanp konsernan kouraz ek landirans. Parfwa, Pol ti santi li feb. Me li ti reisi andire parski li ti kont lor Zeova pou donn li lafors ki li bizin. (2 Kor. 12:8-10; Fil. 4:13, NW) Si nou ena limilite ek nou rekonet ki nou bizin led Zeova, nou osi nou pou gagn sa kalite lafors ek kouraz la.​—Zak 4:10.

20-21. Ki kitsoz nou kapav sir?

²⁰ Nou kapav sir ki Zeova pa servi bann difikilte pou pini nou. Zak rapel nou: “Si dimoun tante par leprev, fode pa ki li dir, ‘Bondie ki tant mwa.’ Bondie pa kapav tante par lemal, e limem li pa tant personn.” (Zak 1:13) Kan nou sir ki sa bann parol-la zot vre, nou pou vinn pli pros ar nou Papa ki kontan nou.​—Zak 4:8.

²¹ Zeova “pa sanze.” (Zak 1:17) Li ti soutenir bann Kretien dan premie siek kan zot ti dan difikilte, ek Li pou ed nou osi azordi. Priye Zeova ek demann Li pou donn twa sazes, lafwa, ek kouraz. Li pou reponn to bann lapriyer. Alor, to kapav sir ki Zeova pou ed twa pou gard to lazwa malgre bann difikilte!