1. Ki kitsoz kapav inflians fason ki enn zom tret so madam ek so zanfan?

DAPRE twa, ki savedir ena “lotorite,” kouma par exanp, lotorite ki enn sef fami ena? Sertin mari les bann tradision, zot kiltir, ouswa lanvironnman kot zot inn grandi, inflians fason ki zot tret zot madam ek zot zanfan. Enn ser ki apel Yanita ek ki res dan Lerop, dir: “Kot mo reste, bann dimounn panse ki bann madam zot inferyer konpare ar bann zom ek ki bizin tret zot kouma bann servant.” Enn frer ki apel Luke ek ki res Letazini, dir: “Sertin papa ansegn zot garson ki seki bann madam dir li pa inportan. Alor, bann zom panse ki fode pa zot pran kont seki bann madam dir.” Selman, Zeova pa anvi ki bann misie tret zot madam dan sa fason-la. (Konpar avek Mark 7:13.) Alor, kouma enn zom kapav aprann pou vinn enn bon sef fami?

2. Ki enn sef fami bizin kone, ek kifer?

² Pou ki enn zom vinn enn bon sef fami, li bizin konpran seki Zeova anvi li fer. Li bizin kone osi kifer Zeova finn donn sertin dimounn lotorite lor lezot, ek kouma li kapav imit lexanp Zeova ek Zezi. Kifer li inportan ki enn zom konn sa bann kitsoz-la? Parski Zeova inn donn bann sef fami enn sertenn lotorite, ek Li atann ki zot servi sa lotorite-la bien.​—Lik 12:48b.

3. Ki nou aprann konsernan lotorite dan 1 Korintien 11:3?

³ Lir 1 Korintien 11:3, NW. * Sa verse-la dekrir fason ki Zeova inn organiz so fami dan lesiel ek lor later. Zeova Limem ki Sef, savedir Limem ki ena pli gran lotorite ki ena. Li’nn osi pran bann dispozision konsernan lotorite,  ek Li’nn donn lezot sertin lotorite. Selman, zot ena bann kont pou rann Li dan fason ki zot servi zot lotorite. (Rom. 14:10; Efe. 3:14, 15) Zeova inn donn Zezi lotorite lor bann lasanble, me Zezi ena bann kont pou rann Zeova konsernan fason ki li tret nou. (1 Kor. 15:27) Zeova inn osi donn bann mari lotorite lor zot madam ek zot zanfan, me bann mari ena bann kont pou rann Zeova ek Zezi konsernan fason ki zot tret zot fami.​—1 Pier 3:7.

4. Ki lotorite Zeova ek Zezi ena?

⁴ Zeova Limem ki Sef tou bann fami. Alor, Li ena lotorite pou etabli bann reg konsernan fason ki so bann zanfan bizin konport zot, ek Li kapav fer sir ki zot obeir sa bann reg-la. (Iza. 33:22) Zezi li sef lasanble Kretien, alor li ena drwa pou etabli bann reg ek pou fer sir ki nou obeir zot.​—Gal. 6:2; Kol. 1:18-20, NW.

5. Ki lotorite enn sef fami Kretien ena, ek ki bann limit li ena?

⁵ Parey kouma Zeova ek Zezi, enn sef fami Kretien ena lotorite pou pran bann desizion pou so fami. (Rom. 7:2, NW; Efe. 6:4) Selman, so lotorite ena bann limit. Par exanp, so bann reg bizin baze lor bann prinsip ki ena dan Parol Bondie. (Prov. 3:5, 6) Me enn sef fami pena lotorite pou etabli bann reg pou bann dimounn ki pa form parti so fami. (Rom. 14:4) Anplis, kan enn sef fami so bann zanfan grandi ek kit lakaz, zot kontign respekte li, me zot nepli anba so lotorite.​—Mat. 19:5.

6. Kifer Zeova finn etabli lotorite?

⁶ Zeova finn etabli lotorite parski Li kontan so fami. Se enn kado Zeova. Gras-a sa dispozision-la, ena lape ek lord dan fami Zeova. (1 Kor. 14:33, 40) Si li pa ti kler kisannla ki ena lotorite, pa ti pou ena lord dan fami Zeova ek zot tou ti pou bien malere. Par exanp, personn pa ti pou kone kisannla ki bizin pran bann desizion final ek kisannla ki bizin aplik sa bann desizion-la.

7. Dapre Efezien 5:25, 28, kouma Zeova anvi ki bann mari tret zot fam?

⁷ Si bann dispozision ki Zeova inn pran konsernan lotorite dan lafami se enn bon kitsoz, kifer eski boukou madam ena linpresion ki zot misie rod kontrol zot ek tret zot dan enn move fason? Se parski boukou misie pa swiv bann prinsip Zeova konsernan lafami. Olie sa, zot swazir pou swiv zot bann koutim ek tradision. Kitfwa osi zot tret zot madam dan enn move fason parski sa fer zot santi zot bien. Par exanp, kitfwa enn misie fer dominer ar so madam, parski sa fer li santi ki li inportan ouswa ki li enn “vre zom.” Kitfwa li panse ki li pa kapav fors so madam pou kontan li, me li kapav fer so madam per li. Lerla, li servi sa laper-la pou kontrol so madam. * Bann zom ki pans ek ki azir dan sa fason-la, li kler ki zot dan lerer. Zot pa donn bann madam respe ki zot merite, ek zot al kont volonte Zeova.​—Lir Efezien 5:25, 28, NW. *

8. Kouma enn misie kapav aprann pou vinn enn bon sef fami?

⁸ Enn misie kapav aprann pou vinn enn bon sef fami, kan li imit fason ki Zeova ek  Zezi servi zot lotorite. Anou get de kalite ki Zeova ek Zezi manifeste, ek anou gete kouma enn sef fami kapav manifeste sa de kalite-la anver so madam ek so bann zanfan.

9. Kouma Zeova montre limilite?

⁹ Limilite. Zeova ena pli boukou sazes ki ninport kisannla, pourtan Li ekout seki so bann serviter dir Li. (Zen. 18:23, 24, 32) Li permet bann ki anba so lotorite pou donn Li bann sigzesion. (1 Ler. 22:19-22) Mem si Zeova Li parfe, Li pa atann ki nou nou parfe. Okontrer, Li ed so bann serviter inparfe pou ki zot reisi zot lavi. (Ps. 113:6, 7) An realite, Labib dir: “Se Zeova ki ed mwa.” (Ps. 27:9; Ebre 13:6, NW) Lerwa David ti rekonet ki li ti reisi akonpli bann gran travay gras-a limilite Zeova.​—2 Sam. 22:36.

10. Kouma Zezi inn montre limilite?

¹⁰ Anou get lexanp Zezi. Mem si li ti zot Met ek zot Segner, Zezi ti lav lipie so bann disip. Enn rezon kifer Zeova inn fer ekrir sa zistwar-la dan Labib, se pou donn tou dimounn, me sirtou bann sef fami, enn lexanp pou zot swiv. Zezi ti dir: “Mo finn donn zot sa lexanp la pouki zot fer parey kouma mo finn fer ar zot.” (Zan 13:12-17) Mem si li ti ena enn gran lotorite, Zezi zame pa’nn atann ki lezot servi li. Okontrer, se li ki’nn servi lezot.​—Mat. 20:28.

11. Kouma enn sef fami kapav aprann pou ena limilite gras-a lexanp Zeova ek Zezi?

¹¹ Ki leson nou aprann? Enn sef fami kapav montre limilite dan plizir fason. Par exanp, li pa pou atann ki so madam ek so bann zanfan azir dan enn fason parfe. Li pou ekout lopinion bann manb so fami, mem si zot pa dakor ar li. Marley, enn ser ki res Letazini, dir: “Parfwa, mwa ek mo misie nou pa dakor. Me mo santi ki li apresie mwa ek ki li respekte mwa parski li demann mwa mo lopinion ek li pran kont mo lopinion avan ki li pran enn desizion.” Enn mari ki ena limilite pou osi fer bann louvraz lakaz, mem si dan so kiltir bann dimounn panse ki se bann madam ki fer sa bann travay-la. Kifer sa kapav bien difisil? Enn ser ki apel Rachel dir: “Landrwa kot mo sorti, si enn mari ed so madam pou lav  lasiet ouswa netway lakaz, bann fami ek bann vwazin pou panse ki li pa enn ‘vre zom.’ Zot pou panse ki li pena kontrol lor so fam.” Si bann dimounn pans koumsa dan to landrwa, pa bliye ki Zezi ti lav lipie so bann disip, mem si sa ti travay enn esklav. Enn bon sef fami pa pou anvi pas pou bon devan lizie lezot. Okontrer, seki pli inportan pou li se ki so madam ek so bann zanfan ere. Apart limilite, ki lot kalite bien inportan enn sef fami bizin ena?

12. Lamour finn motiv Zeova ek Zezi pou fer ki kitsoz?

¹² Lamour. Tou seki Zeova fer li motive par lamour. (1 Zan 4:7, 8) Li’nn donn nou so Parol ek so lorganizasion parski Li kontan nou ek Li anvi ki nou vinn so kamarad. Li montre ki Li gagn nou traka kan Li rasir nou ki Li kontan nou. Zeova pran nou swin osi lor plan materyel kan Li “donn nou tou seki nou bizin dan labondans.” (1 Tim. 6:17) Kan nou fer bann erer, Li disiplinn nou, me Li pa aret kontan nou. Zeova telman kontan nou ki Li’nn donn nou laranson. Ek Zezi telman kontan nou ki li’nn donn so lavi pou nou. (Zan 3:16; 15:13) Nanye pa kapav anpes Zeova ek Zezi pou kontan bann dimounn ki fidel anver zot.​—Zan 13:1; Rom. 8:35, 38, 39.

13. Kifer li inportan ki enn sef fami montre lamour anver so fami? (Get osi lankadre “ Kouma enn Misie Ki Fek Marye Kapav Gagn Respe So Madam?”)

¹³ Ki leson nou aprann? Tou seki enn sef fami fer bizin motive par lamour. Kifer sa inportan? Lapot Zan ti dir: “Si [enn kikenn] pa kontan so frer oubien so ser [ouswa so fami] ki li trouve ar so lizie, li pa kapav kontan Bondie ki li pa trouve.” (1 Zan 4:11, 20) Enn misie ki kontan so fami ek ki anvi imit Zeova ek Zezi, li pou pran swin so fami lor plan spiritiel, li pou montre zot ki li kontan zot, ek li pou pran zot swin lor plan materyel. (1 Tim. 5:8) Li pou form ek disiplinn so bann zanfan. Li pou kontign fer zefor pou pran bann desizion ki pou donn loner Zeova ek ki pou fer so fami  gagn bann bienfe. Asterla, anou get plis an detay seki nou finn examine dan sa paragraf-la, ek anou gete kouma enn sef fami kapav imit Zeova ek Zezi dan sa bann domenn-la.

14. Kouma enn sef fami kapav pran swin so fami lor plan spiritiel?

¹⁴ Li pran swin so fami lor plan spiritiel. Parey kouma so Papa, Zezi ti anvi ed so bann disip pou ena enn lafwa for. (Mat. 5:3, 6, NW; Mark 6:34) Dan mem fason, kitsoz pli inportan pou enn sef fami se ed so fami vinn pros ar Zeova. (Det. 6:6-9) Kouma eski li fer sa? Li fer sir ki li ek so fami zot lir ek etidie Labib, zot asiste renion, zot pres bonn nouvel, ek zot devlop ek gard enn bon relasion avek Zeova.

15. Kouma enn sef fami kapav montre so fami ki li kontan zot?

¹⁵ Li montre so fami ki li kontan zot. Zeova pa ti ezite pou dir devan lezot ki Li kontan Zezi. (Mat. 3:17) Zezi osi ti montre so bann disip, par so bann parol ek so bann aksion, ki li kontan zot. An retour, so bann disip osi ti dir li ki zot kontan li. (Zan 15:9, 12, 13; 21:16) Par so bann aksion, enn sef fami kapav montre ki li kontan so madam ek so bann zanfan, par exanp, kan li etidie Labib avek zot. Li bizin osi dir zot ki li kontan zot ek ki zot ena boukou valer pou li. Fode pa osi ki li ezite pou felisit so fami devan lezot.​—Prov. 31:28, 29.

16. Ki kitsoz ankor enn sef fami bizin fer, ek ki kitsoz fode pa li fer?

¹⁶ Li pran swin so fami lor plan materyel. Mem kan Zeova ti disiplinn bann Izraelit kan zot ti dezobeir Li, Li ti fer sir ki zot ti gagn seki zot bizin lor plan materyel. (Det. 2:7; 29:5) Azordi osi, Zeova donn nou seki nou bizin. (Mat. 6:31-33; 7:11) Zezi osi ti nouri bann dimounn ki ti pe swiv li. (Mat. 14:17-20) Li ti osi geri boukou dimounn ki ti malad. (Mat. 4:24) Dan mem fason, enn sef fami ki anvi fer plezir Zeova, li bizin pran swin so fami lor plan materyel. Selman, ena enn kitsoz ki fode pa li fer. Fode pa li pas telman letan dan travay ki li nepli gagn ase letan pou pran swin so fami lor plan spiritiel ek montre zot ki li kontan zot.

17. Kouma Zeova ek Zezi finn donn nou lexanp dan fason ki zot form nou ek disiplinn nou?

¹⁷ Li form so fami. Zeova form nou ek disiplinn nou parski Li anvi ed nou. (Ebre 12:7-9) Parey kouma so Papa, Zezi form bann ki anba so lotorite avek boukou lamour. (Zan 15:14, 15) Li donn bann konsey ki ferm, me li fer sa avek bonte. (Mat. 20:24-28) Li konpran ki nou inparfe ek ki souvan nou fer bann erer.​—Mat. 26:41.

18. Ki kitsoz enn bon sef fami pou rapel?

¹⁸ Enn sef fami ki imit Zeova ek Zezi pou rapel ki so madam ek so bann zanfan zot  inparfe. Li pa pou “maltret” so madam ek so bann zanfan. (Kol. 3:19) Okontrer, li pou swiv prinsip ki trouv dan Galat 6:1 ek li pou ed zot “avek douser.” Li pou rapel ki li osi li inparfe. Parey kouma Zezi, li kone ki meyer fason li kapav ansegn so fami se par so lexanp.​—1 Pier 2:21.

19-20. Kouma enn sef fami kapav imit Zeova ek Zezi kan li ena pou pran bann desizion?

¹⁹ Li pran bann desizion ki donn Zeova loner ek ki fer so fami gagn bann bienfe. Zeova pran bann desizion ki fer lezot gagn bann bienfe. Par exanp, Li’nn pran desizion pou kree lavi. Li pa’nn fer sa pou fer Limem plezir. Li ti anvi ki nou profit lavi. Personn pa’nn fors Li pou donn lavi so Garson pou nou bann pese. Li’nn deside pou fer sa sakrifis-la parski Li ti anvi ed nou. Zezi osi ti pran bann desizion pou ki lezot gagn bann bienfe. (Rom. 15:3) Par exanp, mem kan li ti bien fatige, li ti ansegn enn lafoul dimounn olie ki li repoze.​—Mark 6:31-34.

²⁰ Enn bon sef fami kone ki enn parmi bann kitsoz ki pli difisil pou fer, se pran bann bon desizion pou so fami. Alor, sa responsabilite-la bien inportan pou li. Li pa pou pran enn desizion san enn bon rezon, ek li pa pou les so lemosion inflians so bann desizion. Okontrer, li pou les Zeova ansegn li kouma pou pran bann bon desizion. * (Prov. 2:6, 7) Kan li fer sa, li pou rod lintere lezot avan so prop lintere.​—Fil. 2:4.

21. Ki nou pou examine dan prosin lartik?

²¹ Zeova finn donn bann sef fami enn responsabilite bien inportan ek difisil, ek Li atann ki zot asim zot responsabilite dan enn bon fason. Si enn mari fer zefor pou swiv lexanp Zeova ek Zezi, li pou vinn enn bon sef fami. Ek si so madam asim bien so responsabilite antan ki madam, zot maryaz pou ere. Kouma enn madam bizin konsider lotorite, ek ki bann difikilte li kapav gagne? Nou pou reponn sa bann kestion-la dan prosin lartik.