1. Sit bann sitiasion kot nou bizin konsey, ek kifer nou tou nou bizin ekout bann konsey?

DETANZANTAN, nou tou nou bizin konsey. Dan sertin sitiasion, se nou ki pran linisiativ pou al rod konsey avek enn kikenn ki nou respekte. Dan lezot sitiasion, kitfwa enn frer pou vinn dir nou ki nou pre pou “tom dan pese,” setadir pou fer enn kitsoz ki nou kapav regrete apre. (Gal. 6:1) Ouswa, nou kapav gagn enn konsey apre ki nou’nn fer enn pese grav. Me dan ninport ki sitiasion kot nou gagn bann konsey, nou bizin ekout zot. Si nou fer sa, nou pou gagn bann bienfe, ek nou kapav mem gagn lavi sov!​—Prov. 6:23.

2. Dapre Proverb 12:15, kifer nou bizin ekout bann konsey?

² Text tem pou sa lartik-la ankouraz nou pou ekout “parol bann dimounn ki saz.” (Prov. 22:17) Personn pa konn tou kitsoz, ek pou touletan ena enn kikenn ki pou ena plis konesans ouswa lexperyans ki nou. (Lir Proverb 12:15. *) Alor, kan nou ekout bann konsey, sa montre ki nou ena limilite. Sa montre osi ki nou konn nou bann limit, ek ki nou aksepte ki nou bizin led pou realiz nou bann lobzektif. Zeova ti fer Salomon, enn lerwa ki ti ena boukou sazes, ekrir: “Bann plan . . . reisi kan ena enn kantite konseye.”​—Prov. 15:22.

3. Kouma nou kapav gagn bann konsey?

³ Nou kapav gagn bann konsey dan enn fason direk ouswa indirek. Ki savedir gagn bann konsey indirek? Kan nou lir Labib ek bann piblikasion, nou kapav trouv bann konsey ki pou motiv nou pou sanz nou fason panse ek nou bann aksion. (Ebre 4:12) Nou kapav apel sa bann konsey-la, bann konsey indirek. Ki savedir gagn bann konsey direk?  Enn ansien, ouswa enn lot frer ki ena lexperyans, kapav atir nou latansion lor enn kitsoz ki nou bizin ameliore. Nou kapav apel sa, bann konsey direk. Si enn kikenn donn nou enn konsey ki sorti dan Labib, sa montre ki li kontan nou, ek nou montre nou rekonesan kan nou ekout so konsey ek nou met li an pratik.

4. Dapre Ekleziast 7:9, ki kitsoz fode pa nou fer kan nou gagn bann konsey?

⁴ Kitfwa nou kapav trouv sa difisil pou aksepte enn konsey ki direk. Kitfwa nou kapav ofanse osi. Kifer? Mem si nou aksepte ki nou inparfe, nou kapav trouv sa difisil pou aksepte enn konsey kan kikenn dir nou ki nou’nn fer enn erer. (Lir Ekleziast 7:9. *) Kitfwa nou pou tir bann pretext, ouswa nou kapav panse ki sa dimounn-la pena bann bon lintansion. Nou kapav ofanse osi akoz fason ki li’nn donn nou sa konsey-la. Nou kapav osi kritik li ek panse ki li pena drwa donn nou bann konsey parski li osi li fer bann erer. Ek si nou pa kontan konsey ki nou’nn gagne, kitfwa nou pa pou pran li kont, ouswa nou pou al rod konsey ar bann dimounn ki pou dir nou seki nou anvi tande.

5. Ki nou pou examine dan sa lartik-la?

⁵ Dan sa lartik-la, nou pou koz lor sertin personaz Biblik ki ti rezet bann konsey, ek lor lezot ki ti aksepte bann konsey. Nou pou gete osi ki bienfe nou gagne kan nou aksepte bann konsey.

6. Ki nou kapav aprann ar fason ki Lerwa Roboam ti reazir kan li ti gagn bann konsey?

⁶ Anou get lexanp Roboam. Kan li ti vinn lerwa, lepep ti vinn get li ek ti demann li pou diminie travay ki so papa Salomon ti inpoz lor zot. Roboam ti azir avek sazes kan li ti al rod konsey ar bann ansien dan Izrael, pou li kone seki li bizin dir lepep. Bann ansien ti dir li ki, si li ti fer seki lepep ti demann li, lepep ti pou touletan soutenir li. (1 Ler. 12:3-7) Me Roboam pa ti kontan konsey ki zot ti donn li. Alor, li ti al rod konsey ar bann zom ki ti grandi ansam avek li. Sa bann zom-la ti ena apepre 40 an, alor zot ti ena enn sertenn lexperyans. (2 Kro. 12:13) Me sa’nn fwa-la, zot ti donn Roboam enn move konsey. Zot ti konsey li pou donn lepep plis travay. (1 Ler. 12:8-11) Roboam ti gagn de konsey bien diferan. Alor, li ti kapav priye Zeova pou kone ki konsey li bizin swiv. Me olie sa, li ti swiv konsey ki ti fer li plezir, ek li ti fer seki so bann kamarad ti dir li. Akoz so desizion, Roboam ek lepep ti gagn boukou problem. Ki leson nou aprann? Kitfwa nou pa pou touletan gagn bann konsey ki nou anvi tande. Selman, si sa bann konsey-la sorti dan Labib, nou bizin aksepte zot.

7. Ki nou kapav aprann ar lexanp Lerwa Ozias?

⁷Lerwa Ozias ti rezet konsey ki li ti gagne. Li ti rant dan enn parti tanp kot zis bann pret ti kapav rantre, ek li ti esey bril lansan. Bann pret ti dir li: “Li pa bon ki twa, Ozias, to bril lansan pou Zeova! Se zis bann pret ki bizin bril lansan.” Kouma Ozias ti reazir? Si li ti aksepte konsey bann pret ek si li ti sorti dan tanp, kitfwa Zeova ti pou pardonn li. Me olie sa, Ozias ti bien ankoler. Kifer li ti rezet konsey ki li ti gagne? Li ti panse ki, antan ki lerwa, li ti kapav fer tou seki li anvi. Me Zeova pa ti pans koumsa. Parski li ti azir avek lorgey, Ozias ti gagn lalep ek li ti “res avek sa lalep-la ziska so lamor.” (2 Kro. 26:16-21) Ki leson nou aprann? Lexanp Ozias montre  nou ki, ninport kisannla nou ete, si nou rezet enn konsey Biblik, nou pou perdi faver Zeova.

8. Kouma Zob ti reazir kan li ti gagn bann konsey?

⁸ Labib koz osi lor bann dimounn ki ti aksepte bann konsey ek ki ti gagn bann bienfe. Anou pran lexanp Zob. Mem si li ti kontan Bondie ek ki li ti anvi fer Li plezir, Zob ti inparfe. Kan li ti gagn bann difikilte, li ti ena enn move fason panse ek li ti koze san reflesi. Ek akoz sa, Eliou ek Zeova ti donn li bann konsey bien fran. Kouma Zob ti reazir? Avek limilite, li ti aksepte bann konsey ek li ti dir: “Mo ti koze, me mo pa ti konpran . . . mo retir seki mo’nn dir, ek mo repanti dan lapousier ek dan lasann.” Lerla, Zeova ti beni Zob parski li ti ena limilite.​—Zob 42:3-6, 12-17.

9. Kouma Moiz ti reazir kan li ti gagn bann konsey, ek kifer li enn bon lexanp pou nou?

⁹Moiz enn bon lexanp pou nou, parski apre ki li ti fer enn erer bien grav, li ti aksepte bann konsey ki li ti gagne. Enn zour, Moiz ti bien ankoler ek li pa ti donn laglwar Zeova. Akoz sa, Zeova pa ti les li rant dan Later Promiz. (Nonb 20:1-13) Kan Moiz ti demann Zeova pou sanz So desizion, Zeova ti dir li: “Mo pa’le to re-koz sa koze-la ar mwa ankor.” (Det. 3:23-27) Moiz pa ti ankoler ar Zeova. Okontrer, li ti aksepte desizion Zeova, ek Zeova ti kontign servi li pou gid pep Izrael. (Det. 4:1) Zob ek Moiz ti aksepte bann konsey, ek zot bann bon lexanp ki nou bizin imite. Kan Zob ti gagn bann konsey, li pa ti tir bann pretext. Okontrer, li ti sanz so fason panse. Ek Moiz ti montre ki li ti aksepte konsey Zeova kan li ti res fidel anver Li, mem si li ti perdi enn privilez ki li ti bien kontan.

10. (a) Dapre Proverb 4:10-13, ki bienfe nou gagne kan nou aksepte bann konsey? (b) Kan sertin Kretien inn gagn bann konsey, kouma zot inn montre ki zot ti ena enn bon latitid?

¹⁰ Nou gagn bann bienfe kan nou swiv lexanp bann zom fidel kouma Zob ek Moiz. (Lir Proverb 4:10-13. *) Boukou frer ek ser inn swiv zot lexanp, ek zot inn aksepte bann konsey. Apre ki Emmanuel, enn frer ki res Kongo, ti gagn enn konsey, li ti dir: “Bann frer ki ena lexperyans ti trouve ki mo ti pre pou perdi mo lamitie ar Zeova, ek zot ti ed mwa. Kan mo ti swiv zot bann konsey, mo ti evit boukou problem.” * Enn pionie ki apel Megan ek ki res Kanada, dir: “Bann konsey ki mo ti gagne, pa ti touletan seki mo ti anvi tande. Me zot ti seki mo ti bizin tande.” Marko, enn frer ki res Kroasi, dir: “Mo ti perdi enn privilez. Me avek letan, mo’nn konpran ki bann konsey ki mo ti gagne finn ed mwa pou regagn enn bon lamitie avek Zeova.”

11. Apre ki li ti gagn enn konsey, ki kitsoz Frer Klein ti dir?

¹¹ Anou get lexanp Frer Karl Klein, ki ti enn manb Komite Santral. Li ti gagn bann bienfe kan li ti aksepte enn konsey. Dan so biografi, Frer Klein rakonte kouma li ti gagn enn konsey bien for avek so bon kamarad, Frer Rutherford. Frer Klein dir ki sa konsey-la ti bien bles li o-koumansman. Li dir: “Apre sa, prosenn fwa ki mo ti zwenn [Frer Rutherford], li ti bien kontan pou trouv mwa, ek li ti dir mwa, ‘Bonzour Karl!’ Me parski mo ti ankor santi mwa blese, mo ti reponn li sek-sek. Lerla, li ti dir mwa, ‘Karl, fer atansion! Lediab pe  esey may twa!’ Mo ti bien anbarase, ek mo ti dir li, ‘Non Frer Rutherford, korek sa.’ Me li ti kone ki mo ti ankoler ar li, ek li ti dir mwa, ‘Mo konpran. Me fer atansion kanmem. Lediab pe esey may twa.’ Ek li ti ena rezon! Kan nou res ankoler avek enn frer, sirtou parski li’nn dir nou enn kitsoz ki li ena drwa dir nou . . . , nou pe rant dan zwe Satan.” * (Efe. 4:25-27) Frer Klein ti aksepte konsey ki Frer Rutherford ti donn li, ek zot ti res bon kamarad.

12. Kouma limilite kapav ed nou pou aksepte bann konsey? (Psom 141:5)

¹² Ki kitsoz kapav ed nou pou aksepte bann konsey? Nou bizin ena limilite ek rapel ki nou inparfe, ek ki parfwa nou kapav bien bet. Kouma nou ti trouve taler-la, Zob ti ena enn move fason panse. Me apre, li ti sanz so fason panse, ek Zeova ti beni li. Kifer? Parski Zob ti ena limilite. Zob ti montre ki li ti ena limilite kan li ti aksepte konsey ki Eliou ti donn li, mem si Eliou ti pli zenn ki li. (Zob 32:6, 7) Limilite pou ed nou pou aksepte enn konsey, mem si nou panse ki nou pa bizin li. Limilite pou osi ed nou pou aksepte konsey enn kikenn ki pli zenn ki nou. Enn ansien ki res Kanada, dir: “Li pou bien difisil pou nou fer bann progre si personn pa konsey nou.” Wi, nou tou nou bizin kontign fer bann progre. Par exanp, nou bizin kontign fer zefor pou devlop bann kalite ki form parti frwi lespri, ek vinn pli efikas dan nou minister.​—Lir Psom 141:5, NW. *

13. Kouma nou bizin konsider bann konsey ki nou gagne?

¹³Bann konsey ki nou gagne se enn fason ki Zeova montre nou so lamour. Zeova anvi seki pli bon pou nou. (Prov. 4:20-22) Kan Li donn nou bann konsey atraver Labib, bann piblikasion, ek bann Kretien ki ena lexperyans, Li montre ki Li kontan nou. Ebre 12:9, 10 dir ki Li fer sa “pou nou prop bien.”

14. Kan nou gagn bann konsey, lor ki kitsoz nou bizin konsantre nou?

¹⁴Konsantre twa lor konsey-la, pa lor fason ki’nn donn twa konsey-la. Parfwa, kan nou gagn enn konsey, kitfwa nou kapav panse ki nou pa’nn gagn konsey-la dan enn bon fason. Biensir, kan nou donn enn kikenn enn konsey, nou bizin fer li dan enn fason ki dimounn-la aksepte konsey-la fasilman. * (Gal. 6:1) Me si  se nou ki’nn gagn enn konsey, nou bizin konsantre nou lor konsey-la, mem si nou panse ki dimounn-la ti kapav fer sa dan enn pli bon fason. Nou kapav demann noumem: ‘Mem si mo pa kontan fason ki’nn donn mwa sa konsey-la, eski mo kapav aprann kitsoz ar li? Eski mo kapav gagn bann bienfe ar konsey-la, olie ki mo konsantre mwa lor bann defo sa dimounn ki’nn konsey mwa la?’ Nou pou montre ki nou ena sazes si nou aksepte bann konsey ki nou gagne.​—Prov. 15:31.

15. Kifer nou bizin rod bann konsey?

¹⁵ Labib ankouraz nou pou rod bann konsey. Proverb 13:10 dir: “Lasazes li avek bann ki rod konsey.” Enn kikenn ki rod konsey ar lezot ek ki pa atann ki lezot vinn ver li, bien souvan li pou progres pli vit ki bann dimounn ki pa rod konsey ar lezot. Alor, pran linisiativ pou rod konsey ar lezot.

16. Sit bann sitiasion kot nou kapav rod konsey ar lezot.

¹⁶ Kan eski nou kapav rod konsey ar lezot? Anou get trwa sitiasion. (1) Enn ser demann enn proklamater ki ena lexperyans pou akonpagn li dan enn letid, ek apre sa, li demann proklamater-la bann konsey pou ki li kapav vinn enn pli bon ansegnan. (2) Enn ser selibater anvi aste de-trwa linz. Apre ki li fini rod bann model ki li anvi aste, li rod bann konsey avek enn ser ki ena matirite. (3) Enn frer inn gagn so premie diskour pou fer. Li demann enn frer ki ena lexperyans pou ekout li, ek pou donn li bann konsey pou li kapav amelior so diskour. Mem si sa fer plizir lane ki enn frer fer bann diskour, li ankor kapav rod bann konsey ar enn bon orater.

17. Ki bienfe nou gagne kan nou aksepte bann konsey?

¹⁷ Toulezour, nou tou nou gagn bann konsey, ki li direk ouswa indirek. Kan sa arive, rapel bann leson ki nou’nn aprann dan sa lartik-la. Ena limilite. Konsantre twa lor konsey-la, pa lor fason ki’nn donn twa konsey-la. Ek met an pratik konsey ki to’nn gagne. Nou pa ne avek sazes, me si nou “ekout bann konsey ek aksepte disiplinn,” Labib promet nou ki nou pou “gagn sazes.”​—Prov. 19:20.