1. Ki kantite valer nou lavi ena pou Zeova?

 FER koumadir enn kamarad inn donn twa enn tablo ki bien vie, me ki ena boukou valer. Mem si tablo la inn perdi kouler, li ena bann tas, ek ki so lapintir inpe fele, li vo plizir milyon dolar. Sirman to pou bien kontan sa kado-la ek to pou gard li bien, pa vre! Dan mem fason, Zeova inn montre ki kantite nou lavi ena valer pou Li, kan Li’nn donn so Garson kouma enn ranson pou nou.​—Zan 3:16.

2. Dapre 2 Korintien 7:1, ki kitsoz Zeova anvi nou fer?

² Zeova Li Lasours lavi. (Ps. 36:9) Pol ti dakor ar sa verite-la. Akoz sa, li ti dir: “Gras-a li nou ena lavi, nou bouze ek nou existe.” (Zist. 17:25, 28) Alor, nou kapav dir ki nou lavi se enn kado ki Bondie inn donn nou. Anplis, Li donn nou tou seki nou bizin pou ki nou pa mor. (Zist. 14:15-17) Me Zeova pa fer bann mirak azordi pou ki nou kontign viv. Selman, Li anvi ki nou fer tou seki nou kapav pou nou res an bonn sante, pou ki nou kontign servi Li. (Lir 2 Korintien 7:1.) Kifer nou bizin fer tou seki nou kapav pou ki nou res vivan ek an bonn sante, ek kouma nou kapav fer sa?

3. Sit enn rezon kifer nou bizin fer zefor pou res an bonn sante.

³ Enn rezon kifer nou bizin fer zefor pou nou res an bonn sante, se pou ki nou kapav kontign fer nou best  pou servi Zeova. (Mark 12:30) Nou anvi ofer Zeova nou “lekor kouma enn sakrifis vivan, sin ek akseptab.” Akoz sa, nou evit fer bann kitsoz ki kapav gat nou lasante. (Rom. 12:1) Li vre ki ena boukou kitsoz ki nou kapav fer pou nou res an bonn sante. Selman, nou fer seki nou kapav, ek nou fer sa parski nou anvi montre Zeova ki nou kontan lavi ki Li’nn donn nou.

4. Ki kitsoz Lerwa David ti anvi?

⁴ Lerwa David ti explike kifer so lavi ena valer pou li. Li ti dir: “Ki lavantaz ena dan mo lamor, si mo desann dan lafos lamor? Eski lapousier pou sant to laglwar? Eski zot kapav proklam to fidelite?” (Ps. 30:9) Kitfwa David ti ekrir sa bann parol-la kan li ti pre pou mor. Kanmem sa, li ti anvi viv pli lontan posib pou ki li kapav kontign donn Zeova laglwar. Sirman nou osi nou ena mem santiman ki David!

5. Mem si nou vie ouswa nou malad, ki kitsoz nou ankor kapav fer?

⁵ Kan nou vie ouswa nou malad, kitfwa nou nepli kapav fer boukou kitsoz ki nou ti pe fer avan. Ek akoz sa, kitfwa nou ankoler ouswa nou sagrin. Selman, fode pa nou negliz nou lasante akoz sa. Kifer? Parski mem si nou vie ouswa nou malad, nou ankor kapav donn Zeova laglwar, parey kouma David. Mem si nou vie ouswa nou malad, sa bien rekonfort nou kan nou kone ki nou ena valer pou nou Bondie! (Mat. 10:29-31) Ek mem si nou mor, nou kone ki Li pou bien anvi resisit nou. (Zob 14:14, 15) Alor, tanki nou ankor vivan, nou anvi fer tou seki nou kapav pou kontign pran kont nou lasante.

6. Konsernan manze ek bwar, ki kitsoz Zeova anvi nou fer?

⁶ Mem si Labib li pa enn liv ki donn konsey bann exper lor lasante ouswa lor manze, kanmem sa li dir nou seki Zeova panse dan sa bann domenn-la. Par exanp, li ankouraz nou pou “elwagn ar [nou] lekor bann kitsoz ki kapav fer [nou] ditor.” (Ekle. 11:10) Labib dir ki fode pa nou manz tro boukou ouswa bwar tro boukou lalkol. Sa bann kitsoz-la kapav gat nou lasante. Zot kapav mem touy nou! (Prov. 23:20) Zeova anvi ki nou kontrol noumem kan nou manze ek nou bwar.​—1 Kor. 6:12; 9:25.

7. Kouma Proverb 2:11 kapav ed nou pou pran bann bon desizion konsernan nou lasante?

⁷ Kan nou servi nou bon zizman pou pran bann desizion, nou montre ki lavi ena valer pou nou. (Ps. 119:99, 100; lir Proverb 2:11.) Par exanp, nou montre ki nou ena bon zizman kan nou reflesi bien lor bann kitsoz ki nou manze. Si nou kontan manz enn manze, me nou kone ki li pou rann nou malad, bon zizman pou pous nou pou pa manz sa manze-la. Nou montre osi ki nou ena bon zizman kan nou dormi kantite letan ki bizin, kan nou fer lexersis regilierman, ek kan nou gard nou lekor ek nou lakaz prop.

8. Kouma Labib montre ki Zeova anvi ki nou evit bann aksidan?

⁸ Dan Lalwa ki Zeova ti donn bann Izraelit, Li ti donn zot bann instriksion pou ki zot kapav evit bann aksidan grav kan zot dan lakaz ouswa dan travay.  (Ex. 21:28, 29; Det. 22:8) Par exanp, si enn dimounn ti touy enn lot dimounn par aksidan, li ti pou bizin pey bann konsekans. (Det. 19:4, 5) Li parey osi si enn dimounn, san fer expre, ti touy enn zanfan ki pankor ne. (Ex. 21:22, 23) Labib montre dan enn fason bien kler, ki Zeova anvi ki nou fer nou maximum pou nou evit bann aksidan.

9. Ki prekosion nou pou pran pou nou evit bann aksidan? (Get bann zimaz osi.)

⁹ Nou montre ki lavi ena valer pou nou, kan nou pran bann prekosion pou evit bann aksidan kan nou dan lakaz ouswa dan travay. Par exanp, si nou bizin zet bann medsinn, ouswa bann kitsoz ki pwint, ki fite, ouswa ki toxik, nou pou fer an-sort ki sa pa fer personn ditor. Nou pou osi fer an-sort ki nou bann zanfan pa gagn kontak ar sa bann kitsoz-la. Nou pou pran osi bann prekosion kan nou alim dife, bwi delo, ouswa servi enn zouti. Ek nou pou veye ki sa bann kitsoz-la pa enn danze pou lezot. Si nou’nn pran enn medsinn, ouswa si nou’nn bwar lalkol, ek ki nou santi ki sa  pe fer enn lefe lor nou, fode pa nou roul nou loto. Fode pa osi nou roul nou loto si nou mank somey. Ek fode pa ki nou tini nou portab dan nou lame kan nou pe kondir.

10. Ki nou kapav fer avan ek pandan enn katastrof?

¹⁰ Parfwa, nou pa kapav evite ki enn katastrof arive, kouma par exanp enn katastrof natirel, enn lepidemi, ouswa bann lager. Selman, kan bann katastrof koumsa arive, nou kapav res an sekirite ek gagn lavi sov si nou obeir bann lotorite. Par exanp, nou obeir zot si zot met enn konfinnman ouswa si zot demann nou pou kit nou lakaz. (Rom. 13:1, 5-7) Nou kapav osi prepar nou pou sertin katastrof ki kapav arive. Pou nou fer sa, nou bizin ekout bann instriksion ki bann lotorite donn nou. Par exanp, nou kapav stok inpe delo ek bann manze ki pa pou gate, ek osi bann materyel premie sekour.

11. Ki nou bizin fer kan ena enn lepidemi dan nou landrwa?

¹¹ Ki nou bizin fer si ena enn lepidemi dan nou landrwa? Nou bizin ekout bann linstriksion ki bann lotorite done, kouma par exanp lav nou lame, gard distans sosial, met enn mask, ouswa res an karantenn. Kan nou fer sa bann kitsoz-la, nou montre ki nou lavi ena boukou valer pou nou.

12. Kan ena enn katastrof, kouma Proverb 14:15 kapav ed nou pou deside ki linformasion nou pou ekoute?

¹² Kan ena enn katastrof, bann zournalis, bann kamarad, ouswa bann vwazin kapav fann bann fos linformasion. Me olie ki nou ekout “tou seki [nou] tande,” nou bizin ekout bann linformasion ki gouvernman ek bann lotorite medikal done. (Lir Proverb 14:15.) Komite Santral ek bann biro nasional fer zot maximum pou gagn bann linformasion ki fiab, avan ki zot donn nou bann instriksion konsernan renion ek predikasion. (Ebre 13:17) Kan nou swiv sa bann instriksion-la, nou protez noumem, nou protez lezot, ek nou ede pou ki bann dimounn ena enn bon lopinion lor bann Temwin Zeova.​—1 Pier 2:12.

13. Kan nou obeir lalwa Zeova konsernan disan, kouma sa montre ki lavi ena valer pou nou?

¹³ Boukou dimounn kone ki disan li sakre pou bann Temwin Zeova. Nou obeir lalwa Zeova konsernan disan kan nou refiz met disan, mem kan ena enn irzans medikal. (Zist. 15:28, 29) Selman, sa pa vedir ki nou anvi mor. Okontrer, nou kontan lavi. Akoz sa, nou pou rod led bann dokter pou ki nou gagn bann pli bon tretman ki ena, me san ki nou met disan.

14. Kouma nou kapav evit bann irzans medikal?

¹⁴ Si nou pran kont nou lasante ek ki nou fer bann kitsoz ki nou’nn gete dan sa lartik-la, kitfwa nou pou kapav evit bann irzans medikal, kouma par exanp enn loperasion. Ek si nou fer enn loperasion, nou pou geri pli vit si nou ena enn bon lasante. Nou pou osi evit bann irzans medikal, si nou pran bann prekosion kan nou lakaz ouswa dan travay, ek si nou swiv kod de-larout.

15. (a) Kifer li inportan ki nou ena enn kart DPA ki azour ek ki nou amenn li ar nou partou kot nou ale? (Get zimaz osi.) (b) Kouma nou’nn trouve dan sa video-la, kouma nou kapav pran bann bon desizion konsernan disan?

¹⁵ Lavi ena boukou valer pou nou. Akoz sa, nou ranpli enn kart DPA (kart No Blood) ek nou amenn li ar nou partou kot nou ale. Lor sa kart-la, nou dir ki nou refiz met disan, ek nou dir ki bann tretman medikal nou aksepte ouswa refize. Eski to kart DPA azour? Si li pa azour, ranpli enn deswit. Kan nou ekrir ki tretman nou aksepte ouswa refize, nou pa pou perdi letan pou diskit ar nou dokter ek nou pou gagn nou tretman pli vit. Sa pou osi evit fer nou gagn bann tretman ouswa bann medsinn ki kapav fer nou ditor. b

16. Ki nou bizin fer si nou pa tro konpran kouma pou ranpli enn kart DPA?

¹⁶ Mem si nou zenn ek ki nou ena enn bon lasante, nou tou nou kapav fer enn aksidan ouswa tom malad. (Ekle. 9:11) Akoz sa, li bien inportan ki nou ranpli enn kart DPA. Si to pa tro kone kouma pou ranpli sa kart-la, demann enn ansien  to lasanble pou ed twa. Bann ansien fer boukou zefor pou konpran kouma pou ranpli sa kart-la. Selman, zot pa pou pran bann desizion dan to plas. Se to responsabilite. (Gal. 6:4, 5) Parkont, zot kapav ed twa pou konpran bann swa ki to ena ek pou ranpli sa kart-la.

17. Kouma nou kapav montre ki nou enn kikenn ki rezonab?

¹⁷ Kan nou bizin pran bann desizion konsernan nou lasante ek bann tretman medikal, nou servi nou konsians ki forme par Labib pou pran sa bann desizion-la. (Zist. 24:16; 1 Tim. 3:9) Kan nou pran bann desizion ek ki nou koz sa ar lezot, nou bizin swiv prinsip ki ena dan Filipien 4:5, ki dir: “Ki tou dimounn kone ki zot rezonab.” Kan enn kikenn rezonab, li pa trakas plis ki bizin konsernan so lasante. Li pa pou osi met presion lor lezot, pou ki zot aksepte so lopinion. Nou kontan nou bann frer ek ser, ek nou respekte zot, mem si nou bann desizion pa parey kouma zot desizion.​—Rom. 14:10-12.

18. Kouma nou kapav montre ki nou rekonesan pou lavi ki Zeova inn donn nou?

¹⁸ Nou montre nou rekonesans anver Zeova, Lasours lavi, kan nou pran kont nou lasante ek ki nou fer nou best pou servi Li. (Rev. 4:11) Li vre ki azordi nou tom malad ek nou bizin fer fas ar bann katastrof. Me se pa koumsa ki nou Kreater ti anvi nou viv. Biento, Li pou donn nou lavi eternel, kot nou pa pou soufer ek mor. (Rev. 21:4) Me an-atandan, nou bien kontan ki nou vivan ek ki nou pe kapav servi nou Papa ki dan lesiel, Zeova!