KAN nou lir Labib, nou remarke ki parfwa bann ekrivin inn repet bann mem fraz mo pou mo. Anou get trwa rezon kifer kitfwa zot inn fer sa:

Lepok ki’nn ekrir sa. Dan lepase, laplipar dimounn dan Izrael pa ti ena enn kopi Lalwa. Se sirtou kan zot ti rasanble ansam dan tabernak ki zot ti tann lektir Lalwa. (Det. 31:​10-12) Dan sa bann moman-la, zot ti bizin debout pandan plizir lertan dan enn lafoul dimounn, ek sirman ti ena boukou kitsoz ki ti anpes zot res konsantre. (Ne. 8:​2, 3, 7) Alor, kan ti repet plizir fwa bann fraz ki inportan, li ti pli fasil pou zot rapel sa bann lide-la ek pou zot met sa an pratik. Kan ti repet bann mem mo plizir fwa, sa ti ed lepep pou rapel bann detay ki ena dan Lalwa Zeova.—Lev. 18:​4-22; Det. 5:1.

Manier ki’nn ekrir sa. Dan Labib, ena boukou sante. Avredir, 10 poursan seki’nn ekrir dan Labib se bann sante. Par exanp, ena bann liv Psom, Kantik Salomon, ek Lamantasion. An zeneral, dan enn sante ena enn refrin, ek refrin-la met laksan lor lide prinsipal sante-la. Sa ed bann dimounn pou rapel bann parol sante-la. Par exanp, get bann parol ki ena dan Psom 115:​9-11: “Twa pep Izrael, met to konfians dan LESEGNER. Limem to protekter ek to sekour. Zot, bann pret dan tanp Lesegner, met zot konfians dan lame LESEGNER. Limem zot protekter ek zot sekour. Zot tou ki respekte LESEGNER, met zot konfians dan LESEGNER. Limem zot protekter ek zot sekour.” Kan bann dimounn ti sant sa sante-la, zot ti repet sa bann parol-la. Sa ti ed zot pou rapel bann lide inportan sa sante-la ek sa ti desann dan zot leker.

Rezon kifer inn ekrir sa. Bann ekrivin Labib souvan ti repet bann fraz ki inportan pou met laksan lor la. Par exanp, kan Zeova ti donn lord bann Izraelit pou pa manz disan, plizir fwa Li ti fer Moiz dir bann Izraelit kifer fode pa zot fer sa. Zeova ti anvi fer zot konpran ki “lavi enn kreatir li dan disan” ek ki disan li reprezant lavi. (Lev. 17:​11, 14) Kan bann zapot ek bann ansien dan Izrael ti dres enn lalis bann kitsoz ki pa fer Zeova plezir, zot osi zot ti dir ki fode “pa servi disan.”—Zist. 15:​20, 29.

Mem si souvan repet bann mem kitsoz dan Labib, Zeova pa anvi ki nou repet bann kitsoz koumadir bann peroke. Par exanp, Zezi ti dir: “Kan zot priye, pa repet touletan mem zafer.” (Mat. 6:7) Apre sa, Zezi ti explike pou ki kitsoz nou kapav priye Bondie. (Mat. 6:​9-13) Alor, kan nou priye Zeova, nou kapav koz lor mem size plizir fwa, me fode pa ki nou repet bann mem mo.—Mat. 7:​7-11.

Alor, nou konpran kifer dan Labib, Zeova inn fer an-sort ki souvan repet bann mem kitsoz. Se enn fason ki nou Gran Instrikter ‘ansegn nou pou nou profi.’—Iza. 48:​17, 18.