Kanmem sa, Zeova demann nou pou atann Li avek pasians parski Li pou azir dan ler ki bizin. Kifer Li demann nou sa? Ki kitsoz pou ed nou pou res zwaye pandan ki nou pe atann Li?

KIFER ZEOVA DEMANN NOU POU ATANN AVEK PASIANS?

Labib dir: “Zeova pe atann avek pasians pou montre twa so faver. Ek Li pou leve pou montre twa so mizerikord. Parski Zeova Li enn Bondie lazistis. Tou bann ki kontign atann Li zot dan lazwa.” (Iza. 30:18) Izai ti ekrir sa bann parol-la pou bann Zwif ki ti ena “latet dir.” (Iza. 30:1) Selman, ti ena sertin Zwif ki ti fidel, ek sa bann parol Izai la ti donn zot enn lespwar. Sa bann parol-la kapav donn nou osi enn lespwar azordi.

Nou bizin atann avek pasians parski Zeova osi pe atann avek pasians. Li’nn fini fixe enn moman kot Li pou detrir sa lemond-la, ek Li pe atann sa zour-la arive. (Mat. 24:36) Kan sa pou arive, tou dimounn pou kone ki seki Satan inn dir lor Zeova ek so bann serviter ti fos. Lerla, Zeova pou detrir Satan ek tou bann ki soutenir li, me Li pou “montre [nou] so mizerikord.”

Ziska ki sa arive, kitfwa Zeova pa pou tir nou bann problem, me Li promet nou ki nou kapav zwaye pandan ki nou pe atann Li. Parey kouma Izai ti dir, nou kapav zwaye pandan ki nou pe atann ki enn bon kitsoz arive. (Iza. 30:18) Kouma nou kapav gagn sa lazwa-la? Anou get kat kitsoz ki nou kapav fer.

KOUMA NOU KAPAV ZWAYE PANDAN KI NOU PE ATANN?

Reflesi lor bann bon kitsoz ki pe arive dan to lavi. Lerwa David inn gagn boukou maler dan so lavi. (Ps. 37:35) Pourtan, li ti ekrir: “Gard silans divan LESEGNER, atann avek pasians; pa fatig to lespri ar sikse bann move dimoun ki paret pe reysi ar zot move plan.” (Ps. 37:7) David ti swiv sa konsey-la kan li ti res konsantre lor bann promes Zeova. Li ti rekonesan pou tou bann bon  kitsoz ki Zeova ti fer pou li. (Ps. 40:5) Si nou osi nou konsantre nou lor bann bon kitsoz ki pe ariv nou, olie ki nou konsantre nou lor nou bann problem, li pou pli fasil pou nou atann Zeova.

Rod tou lokazion pou loue Zeova. Kitfwa se David ki ti ekrir Psom 71. Li ti dir Zeova: “Mo pou kontign atann; mo pou loue twa ankor plis.” (Ps. 71:​14, NW) Kouma li ti loue Zeova? Li ti fer sa kan li ti koz lor Zeova ar lezot ek kan li ti sant bann kantik pou Zeova. (Ps. 71:​16, 23) Parey kouma David, nou kapav ena lazwa kan nou pe atann Zeova. Nou loue Zeova kan nou pres avek lezot, kan nou koz lor Li avek nou bann kamarad ek nou fami, ek kan nou sant bann kantik. Prosenn fwa ki to pou sant enn kantik, reflesi lor so bann parol ek gete kouma sa kapav rann twa zwaye.

Les to bann frer ek ser ankouraz twa. Kan David ti dan problem, li ti dir Zeova: “Dan lasanble bann fidel mo proklam to grander.” (Ps. 52:9) Nou osi nou kapav gagn bann lankourazman ar nou bann frer ek ser, pa zis dan renion ek predikasion, me osi kan nou pas letan ansam dan bann ti program.—Rom. 1:​11, 12.

Fer to lesperans vinn pli for. Psom 62:5 dir: “Zis kot Bondie ki mo trouv trankilite; li tousel kapav donn mwa mo lespwar.” Li bien inportan ki nou lesperans for, sirtou si nou panse ki lafin pe tarde pou arive. Nou bizin sir ki bann promes Zeova pou realize, mem si sa pe pran boukou letan. Nou kapav fer nou lesperans vinn pli for kan nou etidie Parol Bondie. Par exanp, nou kapav reflesi lor bann kitsoz ki’nn predir dan Labib ek ki’nn realize, lor kouma bann ekrivin Labib pa’nn kontredir zot kamarad, ek lor bann detay ki Zeova dir lor Limem. (Ps. 1:​2, 3) Nou bizin osi kontign “priye” ek demann Zeova so lespri sin. Sa pou ed nou pou ena enn bon lamitie avek Li, pandan ki nou pe atann ki Li fer nou “gagn lavi pou touletan.”—Zid 20, 21.

Parey kouma Lerwa David, nou bizin ena konfians ki Zeova vey lor bann ki pe atann Li ek ki Li montre zot so lamour fidel. (Ps. 33:​18, 22) Alor, kontign atann Zeova avek pasians kan to reflesi lor bann bon kitsoz ki pe arive dan to lavi, kan to rod tou lokazion pou loue Zeova, kan to les to bann frer ek ser ankouraz twa, ek kan to fer to lesperans vinn pli for.