1. Explike kifer nou bizin ki Zeova gid nou.

 FER koumadir to’nn perdi dan enn lafore. Dan sa lafore-la, ena bann zanimo sovaz, ena bann plant ek bann insekt ki bien danzere, ek dan sertin landrwa ena osi bann gro-gro ros. Sirman to bien kontan ki to ena enn gid avek twa, ki konn sa lafore-la bien, pa vre! Li konn bien sa bann danze-la ek li kapav ed twa pou evit zot. Dan mem fason, lemond ki nou pe viv azordi, li koumadir sa lafore-la. Li ranpli ar bann kitsoz bien danzere ki kapav gat nou lamitie avek Zeova. Me erezman ki nou ena enn Gid parfe, Zeova Limem. Li protez nou kont sa bann danze-la ek Li gid nou ver nou destinasion, setadir lavi eternel dan lemond nouvo.

2. Kouma Zeova gid nou?

² Kouma Zeova gid nou? Premie kitsoz ki Li servi pou gid nou, se so Parol, Labib. Me Li osi servi bann dimounn pou gid nou. Par exanp, Li servi “esklav fidel ek saz” ki donn nou nou manze spiritiel pou ki nou kapav pran bann bon desizion. (Mat. 24:45) Li osi servi bann responsab sirkonskripsion ek bann ansien ki ankouraz nou ek donn nou bann konsey pou ki nou kapav fer fas ar bann difikilte. Nou pe viv lepok lafin! Alor, nou bien rekonesan ki Zeova gid nou dan sa moman bien difisil la. Gras-a direksion ki Li donn nou, nou kapav gagn so faver ek nou kapav kontign res lor sime lavi.

3. Ki nou pou examine dan sa lartik-la?

³ Selman, parfwa nou kapav trouv sa difisil pou swiv bann instriksion Zeova, sirtou kan se bann zom inparfe ki donn nou sa. Kifer? Parski parfwa seki zot dir nou, pa fer nou plezir. Ouswa parfwa nou panse ki sa bann instriksion-la pa lozik, lerla nou panse ki sa bann konsey-la  pa sorti kot Zeova. Dan sa bann moman-la, nou bizin ena konfians ki se Zeova ki pe gid so pep ek ki nou gagn bann benediksion kan nou swiv so direksion. Pou ki nou ena plis konfians dan Zeova, dan sa lartik-la nou pou trouve: (1) kouma Zeova ti gid so pep dan lepase, (2) kouma Li pe gid nou azordi, ek (3) kouma nou gagn bann bienfe kan nou kontign swiv so direksion.

KOUMA ZEOVA TI GID PEP IZRAEL?

4-5. Kouma Zeova ti montre ki Li ti pe servi Moiz pou gid bann Izraelit? (Get zimaz lor kouvertir.)

⁴ Zeova ti swazir Moiz pou gid bann Izraelit ek pou fer zot sorti dan Lezip. Li ti osi donn bann Izraelit bann prev pou montre ki Li ti pe servi Moiz pou gid zot. Par exanp, ti ena enn kolonn niaz pandan lizour ek enn kolonn dife aswar. (Ex. 13:21) Moiz ti swiv sa bann kolonn-la ziska ki lepep ariv kot Lamer Rouz. Selman, bann Ezipsien ti pe swiv bann Izraelit. Bann Izraelit ti panse ki zot ti tom dan enn piez, parski devan zot ti ena Lamer Rouz ek deryer zot ti ena bann Ezipsien. Alor, zot ti dir Moiz ki li’nn fer enn erer parski li’nn amenn zot ziska Lamer Rouz. Me sa pa ti enn erer, parski Zeova ti pe servi Moiz pou gid so pep. (Ex. 14:2) Sa zour-la, Zeova ti fer enn mirak pou sov so pep!—Ex. 14:​26-28.

⁵ Apre sa, pandan 40 an, Moiz ti kontign swiv kolonn niaz la pou gid bann Izraelit dan dezer. a Pandan enn tan, Zeova ti met kolonn niaz la lor latant Moiz pou ki tou bann Izraelit trouv li. (Ex. 33:​7, 9, 10) Depi sa kolonn-la, Zeova ti donn bann instriksion Moiz, ek lerla, Moiz ti donn lepep sa bann instriksion-la. (Ps. 99:7) Bann Izraelit ti ena boukou prev ki Zeova ti pe servi Moiz pou gid zot.

6. Eski bann Izraelit ti aksepte direksion Zeova? Explike. (Nonb 14:​2, 10, 11)

⁶ Malerezman, laplipar bann Izraelit pa ti dakor ki Zeova ti pe servi Moiz pou gid zot. (Lir Nonb 14:​2, 10, 11.) Plizir fwa, zot ti rezet Moiz! Akoz sa, Zeova pa ti les sa zenerasion Izraelit la rant dan Later Promiz.—Nonb 14:30.

7. Kisann-la ti swiv direksion Zeova? (Nonb 14:24) (Get zimaz osi.)

⁷ Selman, sertin Izraelit ti swiv direksion Zeova. Par exanp, Zeova ti trouve ki ‘Kaleb ti kontign swiv Li ar tou so leker.’ (Lir Nonb 14:24.) Akoz sa, Zeova ti rekonpans Kaleb, ek Li ti mem donn li later ki li ti pe rode dan pei Kanaan. (Zozwe 14:​12-14) Prosin zenerasion Izraelit ki ti leve apre, zot osi zot ti swiv direksion Zeova. Kan Zozwe ti ranplas Moiz pou gid lepep, “zot ti ena enn gran respe pou Zozwe toutlong so lavi.” (Zozwe 4:14) Akoz sa, Zeova ti beni zot ek Li ti fer zot rant dan Later Promiz.—Zozwe 21:​43, 44.

8. Explike kouma Zeova ti gid so pep dan lepok bann lerwa. (Get zimaz osi.)

⁸ Plizir lane apre, Zeova ti servi bann ziz pou gid so pep. Apre sa, dan lepok bann lerwa, Li ti servi bann profet pou gid so pep. Bann lerwa ki ti fidel ti swiv konsey bann profet. Par exanp, Lerwa David ti aksepte kan profet Natan ti konsey li. (2 Sam. 12:​7, 13; 1 Kro. 17:​3, 4) Lerwa Zozafat ti kont lor profet Zaaziel pou gid li, ek li ti ankouraz bann abitan Zida pou ena lafwa dan bann profet  Zeova. (2 Kro. 20:​14, 15, 20) Kan bann lennmi ti menas lepep, Lerwa Ezekias ti rod konsey ar profet Izai. (Iza. 37:​1-6) Sak fwa ki bann lerwa ti rod direksion Zeova, Zeova ti beni zot ek Li ti protez so pep. (2 Kro. 20:​29, 30; 32:22) Sa lepok-la, tou dimounn ti kapav trouve ki Zeova ti pe servi bann profet pou gid so pep. Me malerezman, lepep ek laplipar bann lerwa ti rezet bann profet Zeova.—Zer. 35:​12-15.

KOUMA ZEOVA TI GID BANN KRETIEN DAN PREMIE SIEK?

9. Dan premie siek, kisann-la Zeova ti servi pou gid bann Kretien? (Get zimaz osi.)

⁹ Zeova ti etabli lasanble Kretien dan premie siek nou lepok. Kouma Li ti gid sa bann Kretien-la? Li ti fer Zezi vinn sef lasanble. (Efe. 5:23) Me Zezi pa ti koz ar sak Kretien pou dir zot seki zot ti bizin fer. Li ti servi bann zapot ek bann ansien dan Zerizalem pou diriz lasanble Kretien. (Zist. 15:​1, 2) Dan sak lasanble, ti osi etabli bann ansien pou pran swin bann frer ek ser.—1 Tes. 5:12; Tit 1:5.

10. (a) Kouma bann Kretien dan premie siek ti reazir kan zot ti gagn bann instriksion? (Zistwar Bann Zapot 15:​30, 31) (b) Dan lepase, kifer sertin ti rezet bann dimounn ki Zeova ti servi pou gid so pep? (Get lankadre “ Kifer Sertin Ti Rezet Direksion Zeova?”)

¹⁰ Kouma bann Kretien dan premie siek ti reazir kan zot ti gagn bann instriksion? Laplipar parmi zot ti swiv sa bann instriksion-la. Labib dir ki “sa ti ankouraz zot ek zot ti bien kontan.” (Lir Zistwar Bann Zapot 15:​30, 31.) Me kouma Zeova inn gid so bann serviter dan nou lepok?

KOUMA ZEOVA GID NOU AZORDI?

11. Donn enn lexanp pou montre kouma Zeova ti pe gid bann Etidian Labib.

¹¹ Zeova pe kontign gid so pep azordi. Li fer sa gras-a so Parol, Labib, ek gras-a so Garson, Zezi, ki sef lasanble. Eski nou ena bann prev ki Bondie ankor pe servi bann dimounn pou gid so bann serviter azordi? Wi. Par exanp, anou gete seki ti arive apre lane 1870. Charles Taze Russell ek enn ti group etidian Labib ti koumans konpran ki lane 1914 ti pou enn lane bien inportan. (Dan. 4:​25, 26) Se  gras-a bann resers ki zot ti fer dan Labib ki zot ti konpran sa, ek zot ti sir ki zot ti pou trouv sa profesi-la realize. Eski Zeova ti pe gid zot? Seki ti arive an 1914 montre ki Zeova ti pe gid zot. Sa lane-la, Rwayom Bondie ti koumans dirize, Premie Lager Mondial ti koumanse, ek apre sa ti ena bann lepidemi, bann tranbleman-de-ter, ek lafaminn inpe partou dan lemond antie. (Lik 21:​10, 11) Li kler ki Zeova ti pe servi sa bann Etidian Labib la pou ed so pep.

12-13. Ki bann frer responsab biro mondial ti fer pandan Deziem Lager Mondial?

¹² Anou gete osi seki ti arive pandan Deziem Lager Mondial. Bann frer responsab dan biro mondial ti etidie Revelasion 17:​8, ek zot ti konpran ki apre Deziem Lager Mondial, pa ti pou ena Armagedon. Okontrer, ti pou ena enn peryod lape. Sa ti pou donn bann Temwin Zeova lokazion pou pres ar pli boukou dimounn. Alor, mem si sa pa ti paret lozik dan sa moman-la, bann frer responsab ti etabli Lekol Galaad. Sa lekol-la ti pou form bann misioner, pou ki zot prese ek ansegn bann dimounn partou lor later. Sertin misioner ti mem koumans zot servis pandan Deziem Lager Mondial. Esklav fidel ek saz ti osi etabli Formasion Minister Teokratik b dan tou bann lasanble, pou form bann proklamater pou zot pres pli bien ek zot vinn bann pli bon ansegnan. Koumsa, bann serviter Zeova ti pou pre pou gran travay predikasion ki ti pe atann zot apre.

¹³ Li kler ki Zeova ti pe gid so bann serviter dan sa moman bien difisil la! Depi Deziem Lager Mondial, bann Temwin Zeova inn kapav pres dan pli boukou pei. Gras-a sa, boukou dimounn inn aprann konn Zeova, ek bann serviter Zeova pe kontign prese partou lor later.

14. Kifer nou kapav ena konfians dan bann ansien ek bann instriksion lorganizasion Zeova? (Revelasion 2:1) (Get zimaz osi.)

¹⁴ Azordi, bann frer Komite Santral kontign kont lor Zezi pou gid zot. Zot anvi donn bann frer ek ser bann instriksion kot ena fason panse Zeova. Ek zot servi bann responsab sirkonskripsion ek bann ansien pou donn sa bann instriksion-la dan bann lasanble. c Bann ansien, zot dan Zezi “so lame drwat.” (Lir Revelasion 2:1.) Li vre ki bann ansien zot inparfe ek ki zot fer bann erer. Moiz, Zozwe, ek bann zapot osi ti fer bann erer. (Nonb 20:12; Zozwe 9:​14, 15; Rom. 3:23) Selman, Zezi pe servi esklav fidel ek saz ek bann ansien pou gid bann serviter Zeova. Ek li pou kontign fer sa “toulezour ziska peryod lafin sa lemond-la.” (Mat. 28:20) Alor, nou bizin fer li konfians ek swiv bann instriksion ki li donn nou atraver sa bann zom-la.

NOU GAGN BANN BIENFE KAN NOU KONTIGN SWIV DIREKSION ZEOVA

15-16. Ki nou kapav aprann ar lexanp bann frer ek ser ki’nn swiv direksion Zeova?

¹⁵ Kan nou kontign swiv direksion Zeova, nou gagn bann bienfe depi aster-la mem. Anou get lexanp Andy ek Robyn. Zot inn swiv konsey esklav fidel ek saz, ek zot inn sinplifie zot lavi. (Get not pou letid pou Matie 6:22.) Sa finn permet zot pou servi kouma volonter lor bann proze konstriksion. Robyn dir: “Nou’nn res dan bann ti apartman, ek parfwa lakwizinn mem pa ti ena ladan. Mo ti vann mo bann laparey foto, mem si mo ti bien kontan tir foto. Sa ti rann mwa bien tris. Me parey kouma Sara, Abraam so madam, mo ti bien deside pou pa get par deryer, me pou get pli devan.” (Ebre 11:15) Ki bienfe Andy ek Robyn inn gagne? Robyn dir: “Nou ti bien zwaye parski nou ti kone ki nou pe donn Zeova tou seki nou ena. Kan nou travay pou Zeova, nou gagn enn avangou lavi dan lemond nouvo.” Andy dir: “Nou ere parski nou pe donn tou nou lenerzi ek tou nou letan pou soutenir Rwayom Bondie.”

¹⁶ Ki bienfe osi nou gagne kan nou kontign swiv direksion Zeova? Apre lekol, Marcia ti bien deside pou fer plis pou Zeova. (Mat. 6:33; Rom. 12:11) Li dir: “Mo ti gagn enn labours pou fer kat-r-an liniversite. Me mo ti anvi fer plis  pou Zeova. Alor, olie ki mo ti aksepte labours-la, mo ti aprann enn metie ki ti pou ed mwa gagn ase kas pou ki mo kapav fer pionie. Se enn parmi bann pli bon desizion ki mo’nn pran dan mo lavi. Azordi, mo pe servi kouma pionie permanan, ek mo travay permet mwa pou servi osi dan Betel ek pou aksepte bann lezot responsabilite.”

17. Ki lezot bienfe nou gagne kan nou kontign swiv direksion Zeova? (Izai 48:​17, 18)

¹⁷ Zeova servi so lorganizasion pou donn nou bann konsey ki protez nou. Par exanp, li konsey nou pou pa kontan kas ek pou pa fer bann kitsoz ki kapav gat nou lamitie avek Li. Nou gagn boukou bienfe kan nou swiv sa bann konsey-la. Sa fer nou ena enn konsians kler ek nou evit boukou problem. (1 Tim. 6:​9, 10) Sa permet nou osi pou kontign servi Zeova avek tou nou leker. Gras-a sa, nou zwaye, nou anpe, ek nou ere.—Lir Izai 48:​17, 18.

18. Kifer nou bien deside pou kontign swiv direksion Zeova?

¹⁸ Pandan gran soufrans ek Regn Mil An Zezi Kris, Zeova pou kontign servi bann dimounn pou gid nou. (Ps. 45:16) Eski nou pou kontign swiv bann instriksion ki zot donn nou, mem si parfwa sa pa fer nou plezir? Li pou pli fasil pou nou fer sa, si depi aster-la mem nou kontign swiv bann instriksion Zeova. Alor, anou kontign swiv bann instriksion Zeova, ki Li donn nou atraver bann zom ki Li’nn etabli lor nou pou pran nou swin. (Iza. 32:​1, 2; Ebre 13:17) Anou kontign swiv nou Gid, Zeova, ek anou fer Li foul konfians. Li pou touletan protez nou kont bann kitsoz ki kapav gat nou lamitie avek Li, ek Li pou gid nou ver nou destinasion, setadir lavi eternel dan lemond nouvo.