Mary ek so misie, John, a res dan enn pei kot boukou dimounn ki sorti Filipinn vini pou travay, ek zot bien kontan pres bon nouvel ar sa bann dimounn-la. Pandan pandemi COVID-19, Mary inn koumans plizir letid Labib pa zis ar bann dimounn ki res dan so pei, me osi ar bann dimounn ki res dan lezot pei. Kouma li’nn fer sa?

Mary abitie demann so bann etidian Labib: “Eski to konn enn lot dimounn ki ti pou kontan etidie Labib?” Ek si zot dir wi, li demann zot si li kapav fer zot konesans. Nou kapav gagn bann bon rezilta kan nou poz sa kestion bien sinp la. Kifer? Parski bien souvan, bann ki kontan Parol Bondie anvi partaz seki zot aprann ar zot fami ek ar zot bann kamarad. Ki bon rezilta Mary inn gagne kan li’nn poz sa kestion-la?

Jasmin, ki ti pe etidie Labib ar Mary, ti fer li gagn kat nouvo etidian Labib. Enn parmi zot, Kristine, ti telman kontan so letid, ki li ti demann Mary pou etidie de fwa par semenn. Kan Mary ti demann li si li ti konn enn lot dimounn ki ti pou kontan etidie Labib, Kristine ti dir: “Wi, mo pou fer twa zwenn mo bann kamarad.” De-trwa semenn apre, Kristine ti fini prezant Mary kat parmi so bann kamarad ki ti anvi etidie. Apre sa, Kristine ti osi prezant li bann lezot kamarad, ek bann-la osi ti prezant Mary bann lezot dimounn ki ti anvi etidie Labib.

Kristine ti anvi osi ki so fami dan Filipinn aprann plis lor Labib. Alor, li ti koz sa ar so tifi, Andrea. O-koumansman, Andrea ti dir ar limem, ‘Bann Temwin Zeova zot enn sekt, zot pa krwar dan Zezi, ek zot servi zis Ansien Testaman.’ Selman, apre so premie letid, li ti konpran ki seki li ti panse lor bann Temwin Zeova ti fos. Ek sak fwa ki li ti pe aprann bann nouvo kitsoz dan Labib, li ti dir: “Si Labib pe dir sa, sa bizin vre!”

Inpe letan apre, Andrea ti prezant Mary de kamarad ek enn koleg travay, ek zot ti koumans etidie Labib. Andrea ti ena osi enn matant ki aveg ek ki apel Angela. Souvan li ti pe ekoute kan Mary ti pe fer letid Andrea. Selman, Mary pa ti konn sa. Lerla, enn zour, Angela ti demann Andrea si Mary ti kapav etidie Labib avek li. Angela ti bien kontan seki li ti pe aprann. Dan zis enn mwa, li ti aprann boukou verse Labib par-ker, ek li ti anvi etidie Labib kat fwa par semenn! Avek led Andrea, Angela ti osi koumans asiste bann renion regilierman par video-konferans.

 Kan Mary ti aprann ki Kristine so mari, Joshua, ti touletan pe ekout zot kan zot ti pe etidie Labib, Mary ti demann li si li ti pou kontan etidie Labib li osi. Joshua ti dir li: “Mo pou zis ekoute, me pa poz mwa okenn kestion. Si to fer sa, mo pou ale.” Selman, zis sink minit apre ki Mary ti koumans letid Kristine, Joshua ti poz pli boukou kestion ki Kristine ek li ti anvi gagn enn letid Labib.

Gras-a sa kestion bien sinp la, Mary inn gagn boukou letid Labib. Akoz sa, li’nn bizin demann bann lezot frer ek ser pou etidie avek sertin parmi sa bann dimounn-la. Antou, Mary ti koumans 28 letid Labib ar bann dimounn ki dan kat diferan pei.

Ki rezilta sa finn ena? Jasmin inn pran batem an Avril 2021. Kristine inn pran batem an Me 2022 ek li’nn retourn kot li dan Filipinn, pou ki li kapav ansam ar so fami. De parmi bann etidian Labib ki Kristine ti prezant Mary inn osi pran batem. De-trwa mwa apre, Angela inn pran batem ek aster-la li enn pionie permanan. Joshua, Kristine so mari, ek zot tifi, Andrea, ek osi plizir lezot etidian Labib, pe kontign fer bann bon progre.

Dan premie siek, boukou dimounn ti rakont zot fami ek zot bann kamarad seki zot ti aprann lor Zezi. (Zan 1:41, 42a; Zist. 10:24, 27, 48; 16:25-33) Alor, twa osi to kapav demann to bann etidian Labib ek bann dimounn ki interese pou konn plis, “Eski to konn enn lot dimounn ki ti pou kontan etidie Labib?” Si to poz sa kestion bien sinp la, kitfwa twa osi to pou zwenn boukou plis dimounn ki anvi etidie Labib.