ESKI to’nn deza gagn enn problem ek ki to pa ti ena personn pou ed twa dan sa moman-la? Nou pe viv “bann lepok kritik, difisil pou siporte,” ek akoz sa nou kapav santi nou tousel ek nou dekouraze. (2 Tim. 3:1) Selman, kan nou ena bann problem, ena bann dimounn ki kapav ed nou. Labib dir ki li bien inportan ki nou ena bann vre kamarad kan nou pas par “bann moman difisil.”—Prov. 17:17.

Dan so bann vwayaz misioner, Pol ti vwayaz ar bann kamarad ki ti ed li dan diferan fason. (Kol. 4:7-11) Kan Pol ti dan prizon dan Rom, so bann kamarad ti fer bann travay ki li ti nepli kapav fer. Par exanp, Epafrodit ti amenn bann kitsoz ki bann frer ek ser lasanble Filip ti ofer Pol. (Fil. 4:18) Ek Tisik ti fer bann lasanble gagn bann let ki Pol ti ekrir. (Kol. 4:7) Gras-a led so bann kamarad, Pol ti kapav kontign ankouraz bann lasanble mem kan li ti konfine dan so lakaz ouswa kan li ti dan prizon. Me twa, kouma to kapav vinn enn vre kamarad?

Azordi, ena boukou frer ek ser ki bann vre kamarad ek zot enn zoli lexanp pou nou. Par exanp, Elisabet, enn pionie dan Lespagn, explike kouma enn ser inn ed li kan li ti pas par bann moman bien difisil. Kan ser-la ti aprann ki Elisabet so mama ti ena enn kanser, li ti avoy Elisabet bann ti mesaz avek bann verse ankourazan. Elisabet dir: “Sa bann mesaz-la ti donn mwa lafors sak zour ek lerla mo pa ti santi mwa tousel.”—Prov. 18:24.

Nou kapav fer nou lamitie ar nou bann frer ek ser vinn pli for kan nou ed zot pou al prese ouswa pou al renion. Par exanp, eski to kapav donn enn frer ouswa enn ser aze enn lift pou al renion ouswa pou al predikasion? Si to fer sa, zot pou kapav ankouraz sakenn zot kamarad. (Rom. 1:12) Selman, ena osi bann frer ek ser ki pa kapav kit zot lakaz. Kouma nou kapav vinn enn vre kamarad pou zot?

Sertin frer ek ser ena bann problem lasante ouswa zot bizin fer fas ar bann lezot sitiasion ki anpes zot asiste renion an prezansiel. Anou get lexanp David, ki ti ena enn kanser. Pandan plis ki sis mwa, li ti fer simioterapi, ek pandan sa letan-la, li ek so madam, Lidia, ti asiste bann renion par video-konferans.

Kouma bann frer ek ser zot lasanble ti ankouraz zot? Apre sak renion, sertin frer ek ser ki  ti Lasal ti fer zefor pou koz ar David ek Lidia par video-konferans. Ek kan David ek Lidia ti donn bann komanter dan renion, bann frer ek ser ti avoy zot bann ti mesaz pou felisit zot ek ankouraz zot. Gras-a sa, David ek Lidia ti santi ki bann frer ek ser ti kontan zot.

Eski nou kapav pres ansam ar bann frer ek ser ki pa kapav kit zot lakaz? Wi, nou kapav fer sa si nou fer bann sanzman dan nou program. Kan nou fer sa, nou montre ki nou pa bliye zot. (Prov. 3:27) Nou kapav organize pou ekrir bann let ouswa pou prese par telefonn ansam avek zot. Detanzantan, nou kapav osi organiz ar enn frer ouswa enn ser ki pa kapav kit so lakaz, pou amenn nou etidian Labib kot li pou ki nou fer so letid. Bann ansien kapav osi organiz bann renion predikasion par video-konferans pou ki bann-la kapav profite. David ek Lidia ti bien rekonesan ki zot lasanble ti fer sa. David dir: “Pandan renion predikasion, sa ti moman ki nou ti pase ar nou bann frer ek ser la, bann pwin ki nou ti examine, ek lapriyer ti bien ankouraz nou.”

Kan nou pas letan ar nou bann frer ek ser ki pa kapav kit zot lakaz, nou pou aprann konn zot, nou pou trouv zot bann zoli kalite, ek nou pou vinn pli pros ar zot. Par exanp, kan to pres avek zot ek ki to trouve kouma zot servi bien Parol Bondie pou tous leker bann dimounn, to pou ena plis respe pou zot. Anplis, kan to ed to bann frer ek ser pou fer bann kitsoz spiritiel, to pou gagn bann nouvo kamarad.—2 Kor. 6:13.

Kan Pol ti pas par bann moman difisil, so kamarad Tit ti al get li ek sa ti rekonfort Pol. (2 Kor. 7:5-7) Lexanp Tit montre nou ki nou kapav rekonfort nou bann frer ek ser, pa zis kan nou dir zot bann kitsoz ki ankourazan, me osi kan nou pas letan avek zot ek kan nou fer bann kitsoz pou zot.—1 Zan 3:18.

Nou bann frer ek ser ki res Larisi, zot bann zoli lexanp pou nou parski zot pe ed sakenn zot kamarad. Anou get lexanp Sergey ek so madam, Tatyana. Apre ki lapolis ti fer enn lafouy kot zot, bann-la ti amenn zot stasion pou kestionn zot. Apre sa, bann-la ti les Tatyana ale an premie ek li ti retourn kot li. Sergey rakonte: “Deswit kouma [Tatyana] ti rant lakaz, enn ser ki ti ena boukou kouraz ti vinn kot nou. Ek apre li, boukou lezot frer ek ser ti vini pou remet nou lakaz an-ord.”

Sergey dir: “Mo’nn touletan kontan Proverb 17:17, ki dir: ‘Enn vre kamarad montre so lamour touletan, ek li enn frer ki’nn ne pou bann moman difisil.’ Kan nou ti gagn persekision, mo’nn vremem trouv sa verse-la realize parski mo bann kamarad ti la kan mo ti bien bizin zot. Gras-a Zeova, mo ena bann kamarad ki ena boukou kouraz ek ki’nn bien ed mwa.” a

Avek letan, nou lavi pou vinn pli difisil ek nou pou vremem bizin led nou bann kamarad. Nou pou plis bizin zot ankor pandan gran soufrans. Alor, depi aster-la mem, anou kontign fer zefor pou vinn bann vre kamarad!—1 Pier 4:7, 8.