1-2. Kifer nou sitiasion parey kouma sitiasion sa zenn zom ki mansione dan paragraf 1 la?

 MAZINN sa senn-la: Enn zenn zom ki’nn grandi dan enn fami bien ris, aprann ki so bann paran inn mor dan enn aksidan. Kan li gagn sa nouvel-la, li abat net. Me apre sa, li gagn enn lot move nouvel ankor! So bann paran inn fini tou zot kas, ek zot inn fer bann gro det. Olie ki sa zenn zom-la gagn larzan kouma leritaz, so leritaz se bann gro det, ek bann dimounn ki so bann paran ti dwa pe vinn rod zot kas. Anplis, zame li pa pou kapav ranbours tou sa bann det-la.

² Nou sitiasion inpe parey kouma sa zenn zom-la. Nou bann premie paran, Adan ek Ev, ti parfe ek zot ti res dan enn zoli paradi. (Zen. 1:27; 2:7-9) Zot ti osi ena posibilite pou viv pou touletan. Me malerezman, zot inn fer pese. Akoz sa, inn met zot deor dan Paradi ek zot inn perdi posibilite pou viv pou touletan. Ki leritaz zot inn kit pou zot bann zanfan? Labib dir: “Par enn sel zom [Adan], pese finn rant dan lemond, ek pese finn amenn lamor, ek lerla lamor finn fane parmi tou bann dimounn, parski zot tou finn fer pese.” (Rom. 5:12) Leritaz ki Adan inn kit pou nou, se pese, ek akoz pese nou mor. Sa pese ki nou’nn erite ar Adan la, li koumadir enn gro det, ek personn parmi nou pa kapav pey sa det-la!—Ps. 49:8.

 3. Kifer nou kapav konpar nou bann pese ar bann det?

³ Labib konpar nou bann pese ar bann det. (Mat. 18:32-35) Kan nou fer pese, se koumadir nou ena enn det  anver Zeova. Par nou-mem, nou pa kapav pey sa det-la, ek se zis kan nou mor ki li kennsel.—Rom. 6:7, 23.

 4. (a) Ki ti pou ariv nou si nou pa ti gagn led? (Psom 49:7-9) (b) Kouma Labib servi mo “pese”? (Get lankadre “ Pese.”)

⁴ Eski nou kapav regagn tou seki Adan ek Ev inn perdi? Wi, me pa par nou-mem; nou bizin led. (Lir Psom 49:7-9.) Si personn pa ti ed nou, nou pa ti pou ena okenn lesperans; ni lesperans rezireksion, ni lesperans pou viv pou touletan. An realite, nou ti pou parey kouma bann zanimo ki, kan zot mor, pena okenn lespwar ki zot reviv.—Ekle. 3:19; 2 Pier 2:12.

 5. Kouma nou Papa Zeova inn ed nou pou pey nou det? (Get lor kouvertir.)

⁵ Anou revinn lor lexanp sa zom ki nou ti mansione dan koumansman lartik-la. Si enn kikenn ki bien ris ti propoz li pou pey tou so bann det, ki li ti pou resanti? Sirman li ti pou bien rekonesan anver sa dimounn-la ek li ti pou aksepte sa zoli kado-la, pa vre! Dan mem fason, Zeova, nou Papa ki bien kontan nou, inn donn nou enn zoli kado: Li’nn pey nou det, setadir pese ki nou’nn erite ar Adan. Kouma Li’nn fer sa? Zezi dir: “Bondie inn telman kontan lemond ki li’nn donn so sel Garson, pou ki tou dimounn ki ena lafwa dan li pa detrir me gagn lavi pou touletan.” (Zan 3:16) Anplis, gras-a sa zoli kado-la, nou gagn osi posibilite pou ena enn bon lamitie ar Zeova.

 6. Ki nou pou examine dan sa lartik-la, ek kifer?

⁶ Kouma nou kapav profit sa zoli kado-la ek gagn pardon nou bann pese? Pou reponn sa kestion-la, nou pou examinn plizir lexpresion ki ena dan Labib. Ek kan nou pou konpran tou seki Zeova inn fer pou pardonn nou, sa pou ogmant nou rekonesans pou Li.

ZEOVA ANVI KI NOU VINN SO KAMARAD

 7. (a) Ki ti arive apre ki Adan ek Ev ti fer pese? (b) Ki kitsoz bann desandan Adan ek Ev bien bizin fer? (Romin 5:10, 11)

⁷ Adan ek Ev pa’nn zis perdi posibilite pou viv pou touletan, me zot inn osi vinn bann lennmi Zeova. O-koumansman, Adan ek Ev ti form parti dan fami Zeova. (Lik 3:38) Me kan zot inn dezobeir Zeova, Li’nn met zot deor dan so fami, ek sa finn arive  avan ki zot gagn bann zanfan. (Zen. 3:23, 24; 4:1) Akoz sa, nou, ki bann desandan Adan ek Ev, nou bizin rekonsilie ar Zeova. (Lir Romin 5:10, 11.) Savedir ki nou bizin devlop enn bon lamitie avek Li. Dapre enn liv referans, mo Grek ki’nn servi pou “rekonsilie” vedir “fer enn lennmi vinn enn kamarad.” Mem si nou bann lennmi Zeova, se Zeova ki’nn fer premie pa pou ki nou kapav vinn so kamarad. Sa li vremem extraordiner, pa vre! Me ki bann dispozision Zeova inn pran pou Li fer sa?

ZEOVA PRAN BANN DISPOZISION POU KI NOU VINN SO KAMARAD

 8. Ki dispozision Zeova inn pran, ek ki nou gagne gras-a sa?

⁸ Zeova inn trouv enn fason pou ki bann dimounn inparfe kapav ena enn bon lamitie avek Li. Li’nn pran bann dispozision pou ki nou kapav gagn seki Adan inn perdi. Ek pou fer sa, Li’nn donn enn kitsoz ki ena mem valer. Romin 3:25 dir ki “Bondie ti ofer . . . enn ofrand pou bann dimounn rekonsilie avek li.” Gras-a sa, nou tou nou kapav anpe ar Bondie ek ena enn bon lamitie avek Li.

 9. Ki dispozision tanporer Zeova ti pran pou ki Li kapav pardonn pese bann Izraelit?

⁹ Dan lepase, Zeova ti pran bann dispozision tanporer pou ki Li kapav pardonn pese bann Izraelit ek ki zot kapav ena enn bon lamitie avek Li. Toule lane, pandan Zour Rekonsiliasion, gran pret ti bizin ofer bann sakrifis zanimo pou lepep. Biensir, bann sakrifis zanimo pa ti kapav “efas bann pese” net, parski bann zanimo pena mem valer ki bann dimounn. Me tanki bann Izraelit ti repanti ek ki zot ti ofer bann sakrifis ki Zeova ti demann zot, Zeova ti dispoze pou pardonn zot bann pese. (Ebre 10:1-4) Bann sakrifis ki bann Izraelit ti ofer sa zour-la ek dan bann lezot lokazion, ti osi rapel zot ki zot ti inparfe ek ki zot ti bizin enn lot kitsoz pou ki zot kapav gagn pardon zot bann pese dan enn fason permanan.

10. Ki Zeova inn fer pou ki Li kapav pardonn pese bann dimounn?

¹⁰ Ki Zeova inn fer pou ki Li kapav pardonn pese bann dimounn? Li’nn avoy so Garson ki Li bien kontan lor later pou ki li donn so lavi “enn fwa pou tou pou sarye pese boukou dimounn.” (Ebre 9:28) Zezi inn donn “so lavi kouma enn ranson pou liber boukou dimounn.” (Mat. 20:28) Ki ete laranson?

LARANSON

11. (a) Ki ete laranson? (b) Ki bann kondision enn dimounn ti bizin ranpli pou ki li kapav pey sa ranson-la?

¹¹ Labib dir ki Zeova inn deside ki bizin pey enn ranson, setadir pey enn pri pou ki Li kapav pardonn nou bann pese ek ki nou revinn so kamarad. a Ki pri ti bizin peye pou ki bann dimounn kapav regagn seki Adan ti perdi? Adan ek Ev ti perdi zot lavi parfe ek posibilite pou viv pou touletan. Laranson ti bizin ena  mem valer ki seki Adan ti perdi. (1 Tim. 2:6) Alor, pou pey sa ranson-la, ti bizin enn zom ki ranpli sa bann kondision-la: Li ti pou bizin (1) parfe, (2) ena posibilite pou viv pou touletan lor later, ek (3) dispoze pou donn so lavi an sakrifis pou nou. Gras-a lavi sa dimounn-la, nou ti pou kapav regagn seki Adan ti perdi.

12. Kifer Zezi inn kapav pey laranson?

¹² Anou get trwa rezon kifer Zezi inn kapav pey laranson. (1) Li ti parfe; “li pa ti komet okenn pese.” (1 Pier 2:22) (2) Akoz li ti parfe, li ti kapav viv pou touletan lor later. (3) Li ti dispoze pou donn so lavi pou nou. (Ebre 10:9, 10) Zezi ti enn zom parfe; so lavi ti ena mem valer ki lavi Adan, avan ki Adan fer pese. (1 Kor. 15:45) Alor, parski li’nn mor pou nou, Zezi inn kapav pey pri ki ti bizin, pou ki nou kapav gagn tou seki Adan ti perdi. (Rom. 5:19) Se koumsa ki Zezi inn vinn “dernie Adan.” Alor, ti nepli bizin ki enn lot dimounn parfe donn so lavi pou ki nou regagn seki Adan ti perdi. Kifer? Parski Zezi inn mor “enn fwa pou tou.”—Ebre 7:27; 10:12.

13. Gras-a ki kitsoz nou kapav ena enn bon lamitie ar Zeova?

¹³ Alor, gras-a ki kitsoz nou kapav ena enn bon lamitie ar Zeova? Premierman, Zeova inn pran bann dispozision pou ki nou kapav vinn so kamarad. Ek deziemman, Zezi inn pey pri ki ti bizin, setadir li’nn donn so lavi parfe, pou ki nou kapav gagn pardon nou bann pese.—Efe. 1:7; Ebre 9:14.

ZEOVA LIBER NOU EK LI KONSIDER NOU KOUMA BANN DIMOUNN KI DRWAT

14. Ki nou pou examine aster-la, ek kifer?

¹⁴ Ki bienfe nou gagne gras-a seki Zeova inn fer pou nou? Pou reponn sa kestion-la, nou pou examinn de lexpresion ki ena dan Labib, ki pou montre nou kouma nou kapav gagn bann bienfe gras-a Zeova so pardon.

15-16. (a) Dapre Labib, ki’nn arive gras-a laranson? (b) Ki lefe sa bizin ena lor nou?

¹⁵ Labib dir ki nou’nn libere gras-a laranson. Lapot Pier ti dir: “Kris limem inn donn so lavi pou nou, pou liber nou ar tou sort kalite move kitsoz.”—Tit 2:14a.

¹⁶ Laranson inn liber nou ar de kitsoz ki fer nou bien soufer: pese ek lamor. (Rom. 5:21) Nou bien rekonesan anver Zeova ek Zezi, parski gras-a sakrifis Zezi nou kapav gagn boukou bienfe.—1 Kor. 15:22.

17-18. (a) Ki savedir Zeova konsider nou kouma bann dimounn ki drwat? (b) Ki bienfe nou gagne gras-a sa?

¹⁷ Labib dir ki Zeova konsider so bann serviter kouma bann dimounn ki drwat. Se koumadir nou lardwaz inn prop devan Zeova; Li’nn efas nou det. Me eski sa li kont bann prinsip Zeova? Non. Kifer? Parski nou pa merite ki Zeova konsider nou kouma bann dimounn ki drwat akoz nou fer pese, ek Zeova deteste pese. Selman, parski nou ena lafwa dan bann dispozision ki Li’nn pran ek dan sakrifis Zezi, Zeova dispoze pou pardonn nou bann pese, setadir pou kennsel nou det.—Rom. 3:24; Gal. 2:16.

¹⁸ Ki bienfe nou gagne parski Zeova  konsider nou kouma bann dimounn ki drwat? Labib dir ki Zeova inn swazir sertin pou al dirize dan lesiel ansam ar Zezi ek ki Li konsider zot kouma So bann zanfan. (Tit 3:7; 1 Zan 3:1) Zeova inn pardonn zot bann pese. Se koumadir zame zot pa’nn fer okenn pese, ek gras-a sa zot kapav servi dan Rwayom Bondie. (Rom. 8:1, 2, 30) Bann ki ena lesperans pou viv lor later, Zeova konsider zot kouma so bann kamarad, ek Li’nn pardonn zot bann pese. (Zak 2:21-23) Bann ki form parti dan gran lafoul, setadir bann ki pou reisi travers Armagedon, kitfwa zame pou pa konn lamor. (Zan 11:26) “Bann dimounn ki drwat” ek “bann dimounn ki inzis” pou resisite. (Zist. 24:15; Zan 5:28, 29) Avek letan, tou bann fidel serviter Zeova ki lor later pou “gagn liberte extraordiner bann zanfan Bondie.” (Rom. 8:21) Nou vremem inpasian pou trouv tou sa bann bienfe-la ek pou gagn enn lamitie parfe ar nou Papa Zeova, pa vre!

19. Kouma nou sitiasion inn sanze gras-a seki Zeova ek Zezi inn fer pou nou? (Get osi lankadre “ Zeova So Pardon.”)

¹⁹ Wi, nou sitiasion ti parey kouma sa zenn zom ki nou ti mansione avan la; li ti perdi tou seki li ti ena ek li ti gagn enn gro det kouma leritaz. Me gras-a bann dispozision ki Zeova inn pran ek gras-a laranson, nou sitiasion inn sanze. Ek parski nou ena lafwa dan Zezi, nou libere ar pese ek lamor. Anplis, kan Zeova pardonn nou bann pese, se koumadir zame nou pa’nn fer pese. Me pli inportan, gras-a seki Zeova ek Zezi inn fer pou nou, aster-la nou kapav ena enn bon lamitie ar nou Papa Zeova.

20. Ki nou pou examine dan prosin lartik?

²⁰ Nou leker ranpli ar rekonesans kan nou reflesi lor tou seki Zeova ek Zezi inn fer pou nou! (2 Kor. 5:15) San zot, nou pa ti pou ena okenn lespwar! Me kouma nou kapav ogmant nou rekonesans pou Zeova so pardon? Se seki nou pou examine dan prosin lartik.