Mo papa ek mo mama ti bann Katolik pratikan. Selman, kan zot ti aprann ki dan Labib nom Bondie se Zeova, zot ti vinn bann Temwin Zeova bien devwe. Mo papa ti travay dibwa. Kan li ti vinn enn Temwin Zeova, li ti aret fer bann skilptir Zezi lor dibwa. Olie sa, li ti fer premie nivo nou lakaz vinn premie Lasal Renion dan San Juan del Monte, ki trouv dan Manille, kapital Filipinn.

Apre mo nesans an 1952, mo bann paran ti koumans ansegn mwa lor Zeova, parey kouma zot ti fer avek mo kat gran frer ek mo trwa gran ser. Amezir ki mo ti pe grandi, mo papa ti ankouraz mwa pou lir enn sapit Labib toulezour, ek li ti etidie bann diferan piblikasion ar mwa. Parfwa, mo bann paran ti invit bann responsab sirkonskripsion ek bann reprezantan biro nasional pou vinn res kot nou. Sa ti fer nou fami gagn boukou lazwa. Kan sa bann frer-la ti pe rakont nou zot bann lexperyans, sa ti bien ankouraz nou. Sa ti motiv nou osi pou met Zeova an premie dan nou lavi.

Mo bann paran ti fidel ar Zeova ek mo’nn aprann boukou ar zot. Apre ki mo mama ti mor akoz enn maladi, mo papa ek mwa ti koumans fer pionie an 1971. Me an 1973, kan mo ti ena 20 an, mo papa ti mor. Kan mo’nn perdi mo de paran, mo ti santi mwa vid ek tousel. Me lesperans ki“sir ek ferm” ki trouv dan Labib, ti ed mwa pou res pozitif, pou pa deprime, ek pou res pros ar Zeova. (Ebre 6:19) Inpe apre lamor mo papa, mo ti gagn lafektasion pou al servi kouma pionie spesial dan Coron, enn lil retire dan Palawan.

Mo ti ena 21 an kan mo ti al Coron. Mo’nn touletan res dan lavil, akoz sa mo ti etone kan mo ti aprann ki dan sertin plas lor sa lil-la, pa ti ena kouran ek ki ti bizin al sers delo pou servi. Pa ti ena boukou loto ek motosiklet osi laba. Mem si ti ena de-trwa frer ek ser laba, pa ti ena personn pou akonpagn mwa dan mo servis pionie ek parfwa mo ti pres tousel. Pandan premie mwa ki mo  ti laba, mo ti get bann zetwal dan lesiel ek mo ti plore parski mo fami ek mo bann kamarad ti mank mwa boukou. Mo ti anvi kit mo lafektasion ek retourn mo lakaz.

Pandan sa bann moman kot mo ti tousel la, mo ti devid mo leker ar Zeova. Mo ti rapel bann panse ankourazan ki mo ti lir dan Labib ek dan nou bann piblikasion. Souvan mo ti pans lor seki’nn ekrir dan Psom 19:14. Mo ti rann mwa kont ki Zeova ti pou vinn “mo Gran Ros ek mo Sover” si mo ti reflesi lor bann kitsoz ki fer Li plezir, kouma par exanp lor seki Li fer ek lor so bann zoli kalite. Ti ena enn lartik Latour Degard ki ti bien ed mwa. So tit se « Vous n’êtes jamais seul ». a Mo ti lir sa lartik-la plizir fwa. Se koumadir mo ti tousel ar Zeova pandan sa bann moman-la, ek sa ti donn mwa lokazion pou priye, pou etidie, ek pou reflesi lor seki mo ti aprann.

Inpe apre ki mo ti ariv Coron, mo ti vinn ansien. Mo tousel ti ansien, akoz sa toule semenn mo ti diriz Lekol Minister Teokratik, Renion Servis, Letid-de-liv, ek Letid Latour Degard. Mo ti osi fer diskour piblik sak semenn. Mo kapav dir ki, mo ti nepli gagn letan pou santi mwa tousel.

Mo ti gagn bann bon rezilta kan mo ti prese dan Coron. Avek letan, sertin parmi mo bann letid Labib ti pran batem. Selman, mo ti osi gagn boukou difikilte. Parfwa, mo ti bizin mars enn demi zourne pou ariv dan teritwar, ek mo pa ti kone kotsa mo ti pou dormi kan mo ti pou ariv laba. Dan teritwar nou lasanble, ti ena boukou ti zil. Ek kan lamer ti move, souvan mo ti vwayaz par bato pou al lor sa bann zil-la, mem si mo pa ti konn naze. Me dan tou sa bann difikilte-la, Zeova ti protez mwa ek ti pran mwa swin. Avek letan, mo ti konpran ki Zeova ti pe prepar mwa pou bann pli gran difikilte ki mo ti pou gagne dan mo prosin lafektasion.

An 1978, ti avoy mwa Papwazi-Nouvel-Gine, dan lenor Lostrali. Papwazi-Nouvel-Gine preske mem grander ar Lespagn ek ena boukou montagn laba. Mo ti inpresione kan mo ti aprann ki sa trwa milyon dimounn ki res laba la, ti koz plis ki 800 lang. Erezman, laplipar dimounn ti koz Pidgin Melanezien, ki osi apel Tok Pisin.

Ti avoy mwa dan enn lasanble Angle dan Port Moresby, ki kapital sa pei-la. Me apre, mo ti al dan enn lasanble Tok Pisin ek mo ti pran enn kour pou aprann sa lang-la. Mo ti servi seki mo ti aprann dan mo kour pou prese. Sa ti ed mwa pou aprann lang-la pli vit. Inpe apre, mo ti reisi fer enn diskour piblik an Tok Pisin. Mo ti etone kan, mwins ki enn an apre ki mo ti vinn Papwazi-Nouvel-Gine, mo ti gagn lafektasion pou servi kouma responsab sirkonskripsion pou bann lasanble Tok Pisin, ki trouv dan plizir rezion.

Parski bann lasanble-la ti lwin-lwin, mo ti bizin organiz plizir lasanble sirkonskripsion ek mo ti bizin vwayaz boukou. O-koumansman, mo ti santi mwa tousel parski mo ti dan enn nouvo pei. Bann dimounn laba ti koz enn lot langaz ek zot ti ena bann lezot tradision ek bann lezot kiltir. Akoz bann montagn ek bann semin ki ti difisil pou traverse, preske toule semenn mo ti bizin pran  avion pou al dan diferan lasanble. Parfwa, mo ti vwayaz tousel dan enn ti avion ki ti dan enn move leta. Sa ti fer mwa angwase, parey kouma mo ti angwase kan mo ti vwayaz par bato.

Boukou dimounn pa ti ena telefonn, alor mo ti ekrir bann let pou kominik avek bann lasanble. Selman, bien souvan, mo ti ariv dan teritwar sa bann lasanble-la avan ki mo bann let arive. Lerla, mo ti bizin demann bann dimounn dan landrwa-la kotsa bann Temwin Zeova ete. Me sak fwa ki mo ti zwenn mo bann frer ek ser, zot ti telman kontan ek rekonesan pou trouv mwa, ki sa ti fer mwa rapel kifer mo ti fer tou sa bann zefor-la. Mo ti santi ki Zeova ti pe soutenir mwa dan plizir fason, ek akoz sa, mo ti vinn boukou pli pros ar Li.

Pou mo premie renion lor lil Bougainville, enn koup ti vinn get mwa avek enn sourir ek zot ti demann mwa: “Eski to rapel nou?” Mo rapel ki mo ti pres avek zot kan mo ti fek ariv Port Moresby. Mo ti koumans fer zot letid, ek apre mo ti dir enn frer dan landrwa kontign fer zot letid. Aster-la, zot ti fini batize! Sa ti enn parmi bann benediksion ki mo ti gagne pandan sa trwa-z-an ki mo ti dan Papwazi-Nouvel-Gine la.

Avan ki mo kit Coron an 1978, mo ti zwenn enn ser ki apel Adel. Li ti ena enn zoli personalite ek li ti enn kikenn ki ti fer boukou sakrifis. Li ti pe elve so de zanfan, Samuel ek Shirley, li ti pe pran swin so mama ki ti dan laz, ek anmemtan li ti pe fer pionie permanan. An Me 1981, mo ti retourn Filipinn pou marye avek Adel. Apre nou maryaz, nou ti fer pionie ek nou ti pran swin nou fami ansam.

Mem si mo ti ena enn fami, an 1983 mo ti revinn pionie spesial ek mo ti gagn lafektasion pou al servi lor lil Linapacan, ki trouv dan Palawan. Mo fami ek mwa ti demenaze pou al lor sa lil retire la, kot pa ti ena okenn Temwin Zeova. Malerezman, Adel so mama ti mor enn an apre. Selman, parski nou ti bien okipe dan predikasion, sa ti ed nou pou fer fas ar so lamor. Nou’nn koumans boukou letid Labib dan Linapacan, ek akoz sa, enn tigit letan apre, nou ti bizin enn ti Lasal Renion. Alor, nou ti konstrir li nou-mem. Ek trwa-z-an apre, nou ti bien kontan kan nou ti trouv 110 dimounn asiste Komemorasion Lamor Zezi, ek boukou parmi zot ti batize apre ki nou ti kit lil-la.

An 1986, mo ti gagn lafektasion pou al lor enn lil ki apel Culion. Adel osi ti vinn pionie spesial apre sa. Lor sa lil-la, ti ena enn group dimounn ki ti ena lalep. O-koumansman, nou ti gagn traka pou al pres ar bann dimounn ki ti defigire akoz lalep, me bann frer ek ser ti rasir nou ki sa bann dimounn-la ti gagn tretman ki bizin ek ki ti ena bien tigit risk ki nou kontamine. Sertin parmi sa bann malad-la ti asiste renion dan lakaz enn ser. Avek letan, nou ti pli alez pou pres ar sa bann dimounn-la, ek sa ti extraordiner pou partaz lespwar ki Labib done avek bann dimounn ki ti santi zot rezete par lezot ek par Bondie.  Kan zot ti aprann ki enn zour zot pou kapav gagn enn lasante parfe, zot ti extra zwaye, ek sa ti rann nou ere.—Lik 5:12, 13.

Pou ki nou bann zanfan adapte dan Culion, Adel ek mwa nou ti invit de zenn ser ki sorti Coron pou vinn kot nou. Koumsa, nou bann zanfan ti pou kapav ena bann bon frekantasion. Samuel ek Shirley, ek sa de zenn ser-la, ti kontan ed lezot pou konn laverite. Pandan enn moman, nou ti pe etidie Labib avek 11 fami. Nou ti pe fer letid ar bann paran, alor ki nou bann zanfan ek sa de ser-la ti pe etidie Labib ar zot bann zanfan. Bien vit, nou ti reisi form enn nouvo lasanble parski boukou parmi nou bann letid ti pe progrese.

O-koumansman, mo tousel ti ansien dan sa landrwa-la. Alor, biro nasional ti demann mwa pou diriz bann renion sak semenn pou sa wit proklamater dan Culion-la. Mo ti bizin osi vwayaz trwa-z-er tan par bato pou al dan enn vilaz ki apel Marily, pou fer renion ar sa nef proklamater ki ti laba la. Apre bann renion dan Marily, pandan plizir lertan mo fami ek mwa ti bizin travers bann rezion kot ti ena boukou montagn, pou fer bann letid Labib dan enn vilaz ki ti apel Halsey.

Avek letan, nou ti bizin konstrir bann Lasal Renion dan Marily ek dan Halsey, parski boukou dimounn ti pe vinn dan laverite. Parey kouma lor lil Linapacan, se bann frer ek ser, ek bann dimounn ki ti interese ar laverite, ki ti donn bann materyo ek ki ti fer laplipar travay konstriksion. Ti kapav met 200 dimounn dan lasal ki ti trouv dan Marily, ek ti kapav agrandi li pou fer bann lasanble osi.

An 1993, kan bann zanfan ti vinn gran, Adel ek mwa ti koumans fer servis sirkonskripsion dan Filipinn. Apre sa, an lan 2000, mo ti fer Lekol Formasion Ministeryel pou mo vinn enn formater sa lekol-la. Mo pa ti santi mwa kalifie pou vinn enn formater, me Adel ti touletan ankouraz mwa. Li ti rapel mwa ki Zeova ti pou donn mwa lafors pou mo kapav fer mo maximum dan sa nouvo servis-la. (Fil. 4:13) Adel ti kapav dir sa,  parski limem li ti pe kontign so servis mem si li ti gagn bann problem lasante.

An 2006, pandan ki mo ti pe fer formater pou enn lekol, nou ti aprann ki Adel ti gagn maladi Parkinson. Nou ti gagn sok! Mo ti dir Adel ki nou bizin aret nou servis pou ki mo kapav pran li swin. Me Adel ti dir mwa: “Silteple, rod enn dokter pou ed mwa avek mo maladi. Mo kone ki Zeova pou ed nou pou kontign nou servis.” Pandan si-z-an, Adel ti kontign so servis san ki li plengne. Kan li ti nepli kapav marse, li ti prese lor so fotey roulant. Kan li pa ti pe kapav koz bien, li ti reponn zis de-trwa mo dan renion. Boukou frer ek ser ti avoy Adel bann mesaz pou dir li ki kantite zot ti apresie so zoli lexanp ek so landirans. Zot ti kontign fer sa ziska so lamor an 2013. Mo’nn viv plis ki 30 an avek mo madam, ki ti fidel ek ki ti ena boukou lamour. Alor, apre so lamor, mo ti rekoumans santi mwa tousel ek mo ti bien tris.

Adel ti anvi ki mo kontign mo servis, alor se seki mo ti fer. Mo ti res bien okipe pou ki mo pa santi mwa tousel. Depi 2014 ziska 2017, mo ti vizit bann lasanble Tagalog dan bann pei kot ti ena linterdiksion. Apre sa, mo ti vizit bann lasanble Tagalog dan Taywann, dan Lamerik, ek dan Kanada. An 2019, mo ti fer formater pou Lekol pou Bann Evanzelizater Rwayom Bondie an Angle, dan Lenn ek dan Tayland. Mo’nn gagn boukou lazwa dan sa bann servis-la. Mo vremem ere kan mo konsantre mwa lor mo servis pou Zeova.

Dan sak nouvo lafektasion ki mo’nn gagne, mo’nn vinn pros avek bann frer ek ser ki mo ti zwenn. Alor, sa pa ti fasil kan mo ti bizin kit zot. Pandan sa bann moman-la, mo’nn aprann pou fer Zeova konfians avek tou mo leker. Souvan mo’nn santi ki Li ti pe soutenir mwa ek sa inn ed mwa pou aksepte tou bann sanzman ki’nn arive dan mo lavi san ezite. Azordi, mo enn pionie spesial dan Filipinn. Mo santi mwa alez dan mo nouvo lasanble. Mo bann frer ek ser soutenir mwa ek pran mwa bien swin; zot inn vinn mo fami. Mo fier osi kan mo trouv Samuel ek Shirley imit lafwa zot mama.—3 Zan 4.

Wi, mo’nn gagn boukou difikilte dan mo lavi. Parmi sa bann difikilte-la, mo’nn trouv mo madam ki mo bien kontan, soufer ek mor akoz enn maladi grav. Mo ti bizin osi adapte ar bann sanzman. Selman, mo’nn touletan trouve ki Zeova“li pa lwin ar sakenn parmi nou.” (Zist. 17:27) Zeova so lame “zame tro kourt” pou soutenir so bann serviter ek pou donn zot lafors, mem si zot res dan bann plas ki bien retire. (Iza. 59:1) Vremem, Zeova Li “mo Gran Ros,” ek Li’nn avek mwa toutlong mo lavi. Mo bien rekonesan anver Li. Wi, zame mo ti tousel!