Jack ek Marie-Line dan servis aplintan depi 1988. Zot adapte bien vit ar bann teritwar kot zot servi ek zot inn aksepte boukou lafektasion dan Guadeloupe ek Guyane. Asterla, sa de pei-la anba direksion Biro Nasional la France. Anou poz Jack ek Marie-Line de-trwa kestion.

Ki finn motiv zot pou rant dan servis aplintan?

Marie-Line: Mo’nn grandi dan Guadeloupe, ek kan mo ti tipti souvan mo ti fer bann long zourne predikasion avek mo mama, ki ti enn ser bien zele. Mo bien kontan bann dimounn, alor kouma mo’nn fini lekol an 1985 mo ti koumans fer pionie.

Jack: Kan mo ti zenn, mo ti antoure ar bann frer ek ser ki ti dan servis aplintan ek ki ti kontan predikasion. Pandan mo bann konze lekol, mo ti abitie fer pionie tanporer. Parfwa dan wikenn, mwa avek mo mama ouswa avek enn lot frer, nou ti pran bis pou al zwenn bann pionie dan zot teritwar. Nou ti pres enn lazourne ek apre nou ti al lamer. Mo ti bien kontan sa lepok-la!

Inpe letan apre mo maryaz avek Marie-Line an 1988, mo’nn dir ar momem: ‘Nou pena okenn lobligasion, alor kifer nou pa fer plis dan predikasion?’ Lerla, mo ti koumans fer pionie ansam avek Marie-Line. Enn an plitar, apre ki nou ti gagn Lekol Pionie, nou ti nome pionie spesial. Nou ti al servi dan plizir landrwa dan Guadeloupe ek apre nou ti al servi dan Guyane.

Pandan tou sa bann lane-la, zot finn gagn plizir lafektasion. Ki finn ed zot pou reisi adapte ar sa bann sanzman-la?

Marie-Line: Bann frer dan Betel Guyane ti kone ki nou verse prefere se Izai 6:8. Alor, kan zot ti sonn nou, souvan zot ti dir nou: “Zot rapel zot verse prefere?” Nou ti fini kone ki nou lafektasion ti pou sanze, alor nou ti dir zot: “Ala nou la! Avoy nou!”

Zame nou konpar enn nouvo afektasion avek enn ansien afektasion, parski sa kapav  anpes nou pou kontan kot nou ete. Nou osi pran letan pou aprann konn nou bann frer ek ser.

Jack: Dan lepase, sertin frer ek ser ki ti ena bann bon lintansion pa ti anvi ki nou sanz teritwar, alor zot ti esey konvink nou pou reste. Me kan nou ti kit Guadeloupe, enn frer ti rapel nou seki Zezi ti dir dan Matie 13:38: ‘Karo-la se lemond.’ Alor, kan nou gagn enn nouvo lafektasion, nou rapel ki nou ankor pe servi dan mem karo ninport kotsa nou ete. Apre tou, se teritwar-la ek bann dimounn ki inportan!

Kan nou ariv dan enn nouvo teritwar, nou rann nou kont ki bann dimounn ki res laba zot viv bien ek zot ere. Alor, nou esey viv parey kouma zot. Manze-la kapav diferan, me nou manz seki zot manze ek nou bwar seki zot bwar, me kanmem sa nou pran bann prekosion. Nou fer zefor pou koz dan enn fason pozitif lor sak afektasion ki nou gagne.

Marie-Line: Nou’nn aprann boukou ar bann frer ek ser ki res dan sa bann teritwar-la. Mo ankor rapel kan mo ti fek ariv Guyane. Ti ena enn gro lapli ek nou ti panse ki nou ti bizin atann ki lapli-la pase pou nou al prese. Me enn ser ti dir mwa, “Nou al prese?” Mo ti etone ek mo ti dir li, “Kouma nou pou ale?” Li ti dir mwa, “Pran to parapli. Nou pou al lor bisiklet.” Sa zour-la, mo ti aprann roul enn bisiklet ek tini enn parapli anmemtan. Si mo pa ti aprann sa, mo pa ti pou kapav prese pandan sezon lapli!

Zot inn demenaze 15 fwa anviron. Eski zot ena bann konsey pou bann ki anvi al servi dan lezot plas?

Marie-Line: Demenaze vremem pa fasil. Me li inportan ki to ena enn plas kot to pou santi twa bien kan to rantre apre predikasion.

Jack: Kan nou gagn enn lakaz, souvan mo repenn li. Bann frer dan biro nasional ti kone ki kitfwa nou pa pou res lontan kot nou ete. Alor, parfwa zot ti dir mwa, “Jack, pa bizin pintire sann fwa-la!”

Marie-Line enn fwet dan demenazman! Li met tou kitsoz dan bann bwat ek lor bann bwat-la li ekrir “saldebin,” “lasam,” “lakwizinn.” Alor, kan nou rant dan nou  nouvo lakaz, li pli fasil pou nou met sak bwat dan pies kot li bizin ale. Anplis, li fer enn lalis bann kitsoz ki ena dan sak bwat. Koumsa, nou kapav trouv seki nou bizin bien vit.

Marie-Line: Nou’nn aprann pou bien organiz nou, akoz sa nou kapav repran nou bann laktivite bien vit.

Kouma zot organiz zot pou “akonpli zot minister afon”?​—2 Tim. 4:5, NW.

Marie-Line: Dan Lindi, nou repoze ek nou prepar nou bann renion. Lerla nou koumans prese apartir Mardi.

Jack: Nou bizin gagn nou ler sak mwa, me nou pa res konsantre lor la. Predikasion samem pli inportan pou nou. Depi ki nou sorti lakaz ziska ki nou rantre, nou fer zefor pou koz avek sak dimounn ki nou zwenn.

Marie-Line: Par exanp, kan nou al fer enn piknik, mo touletan ena bann trak avek mwa. Sertin dimounn vinn demann nou bann piblikasion, mem si nou pa’nn dir zot ki nou bann Temwin Zeova. Akoz sa, nou fer bien atansion lor nou labiyman ek nou konportman. Bann dimounn remark sa bann kitsoz-la.

Jack: Nou osi donn enn bon temwaniaz kan nou zanti avek nou bann vwazin. Par exanp, mo ramas bann papie, mo met bann poubel deor, ek mo ramas bann fey ki dan zardin otour nou lakaz. Nou bann vwazin remarke seki nou fer ek parfwa zot demann nou: “Eski zot ena enn Labib pou mwa?”

Souvan zot inn al prese dan bann teritwar ki bien-bien lwin. Eski zot ena bann lexperyans ki zot anvi partaz avek nou?

Jack: Dan Guyane, nou’nn gagn boukou difikilte pou al dan sertin teritwar. Souvan, sak semenn, nou ti bizin fer plis ki 600 kilomet lor bann sime ki bien kas-kase. Zame nou pa pou bliye kan nou ti al dan enn ti vilaz ki apel St. Élie dan lafore Amazone. Pou al laba, nou ti bizin vwayaz pandan plizir lertan dan enn katkat ek enn pirog. Laplipar bann dimounn ki ti res laba ti travay dan bann laminn lor. Bannla ti telman kontan nou bann piblikasion ki zot ti donn nou bann ti pepit lor kouma kontribision! Aswar, nou ti montre zot enn parmi bann video lorganizasion ek boukou dimounn ti vinn gete.

Marie-Line: Pa tro lontan, Jack ti bizin fer enn diskour Memoryal dan Camopi. Pou al laba, nou ti bizin vwayaz pandan kat-r-er-d-tan dan enn bato lor larivier Oyapock. Sa ti enn extra zoli lexperyans!

Jack: Kot delo larivier-la ti ba, ti ena boukou kouran ek bann gro-gro ros. Sa ti bien danzere! Mo kapav dir zot ki li bien inpresionan pou trouv sa. Skiper-la bizin bien konn diriz so bato. Me sa ti enn zoli lexperyans. Mem si ti ena zis sis Temwin, anviron 50 dimounn ti vinn asiste Memoryal, ek parmi zot ti ena bann Inka.

Marie-Line: Bann zenn kapav viv bann zoli lexperyans koumsa si zot anvi fer plis pou Zeova. Dan sa bann moman-la, to bizin kont lor Zeova ek sa ranforsi to lafwa. Nou’nn trouv lame Zeova souvan dan nou servis.

Zot inn aprann koz plizir lang. Eski sa ti fasil pou zot?

Jack: Non. Mo’nn aprann sa bann lang-la pou mo kapav prese ek ede dan lasanble. Avan mem ki mo ti gagn enn lektir Labib pou fer, mo ti bizin fer letid Latour Degard an Sranan tongo *! Mo ti demann enn frer si zot ti konpran. Li ti reponn: “Parfwa, nou pa ti konpran twa, me to’nn bien fer.” Bann zanfan ti bien ed mwa. Kan mo ti fer bann erer, zot ti dir mwa, alor ki bann gran pa ti dir nanye. Mo’nn aprann boukou ar bann zenn.

Marie-Line: Dan enn teritwar, mo ti ena bann letid Labib an Franse, Portige, ek Sranan tongo. Enn ser ti konsey mwa pou fer an premie bann letid dan bann lang ki ti pli difisil pou mwa ek pou terminn avek lang ki mo ti pli alez. Bien vit mo’nn rann mwa kont ki so konsey ti bien itil.

 Enn zour, mo ti bizin fer de letid Labib, enn an Sranan tongo ek deziem-la an Portige. Kan mo ti koumans deziem letid-la, ser-la ti dir mwa: “Marie-Line, mo krwar ena enn problem!” Olie ki mo ti koz Portige avek enn madam ki sorti Brésil, mo ti pe koz Sranan tongo avek li!

Bann dimounn ki’nn travay ansam avek zot bien kontan zot. Kouma zot inn reisi ena sa kalite lamitie-la avek zot bann frer ek ser?

Jack: Proverb 11:25 dir: “Enn dimounn ki zenere pou prospere.” Nou pas boukou letan avek lezot ek nou esey ed zot. Kan ti bizin fer mintenans dan nou lasal, sertin frer ti dir mwa: “Les bann proklamater fer sa.” Me mo ti reponn zot: “Be, mwa osi mo enn proklamater. Alor, si ena kitsoz pou fer, mo anvi ede mwa osi.” Nou tou nou bizin inpe letan pou noumem. Selman, souvan nou ti rapel noumem ki fode pa ki nou les sa anpes nou fer bann bon kitsoz pou lezot.

Marie-Line: Nou fer zefor pou interes nou personelman ar nou bann frer ek ser. Koumsa, nou kone kan zot bizin enn kikenn pou vey zot zanfan ouswa pou al pran zot lekol. Lerla, nou re-organiz nou pou nou kapav ed zot. Nou ed lezot kan zot bizin led ek sa fer nou lamitie avek zot vinn pli for.

Ki benediksion zot inn gagne kan zot inn al servi kot bizin plis proklamater?

Jack: Nou lavi pli ere parski nou dan servis aplintan. Souvan nou antoure ar lanatir ek sa donn nou lokazion pou admir kreasion Zeova. Mem si nou finn pas par bann difikilte, nou ena lape lespri parski nou kone ki nou ena soutien pep Bondie ninport kotsa nou ete.

Kan mo ti zenn, mo ti al dan prizon dan Guyane akoz mo lafwa. Zame mo pa ti panse ki mo ti pou retourn laba kouma misioner ek ki mo ti pou al pres dan bann prizon. Vremem, Zeova bien zenere kan Li beni nou!

Marie-Line: Mo pli gran lazwa se donn mo lenerzi pou lezot. Nou bien ere dan nou servis pou Zeova. Sa finn fer nou maryaz vinn pli solid. Parfwa, Jack demann mwa si nou kapav invit enn koup ki bizin lankourazman pou vinn manze kot nou. Bien souvan, mo reponn li: “Mo ti pe pans samem la!” Li arive ki nou pans mem zafer bien souvan.

Jack: Pa tro lontan, bann dokter inn trouve ki mo ena enn kanser laprostat. Marie-Line pa kontan kan mo dir li sa, me mo’nn dir li kanmem: “Gate, mo pa sa vie-la, me si mo bizin mor demin, mo kone ki mo’nn servi mo lavi pou fer bann kitsoz ki ena valer, pou servi Zeova. Ek sa rann mwa bien zwaye.”​—Zen. 25:8.

Marie-Line: Zeova inn donn nou plizir afektasion ki nou pa ti atann ek Li’nn permet nou fer bann kitsoz ki zame nou ti panse nou ti pou kapav fer. Nou finn konn boukou bon kitsoz dan nou lavi. Nou ena foul konfians an Zeova, ek ninport kotsa so lorganizasion dir nou ale, nou pou ale!