Boukou dimounn ki’nn lir sa bann verse-la, kitfwa finn poz zotmem sa kestion-la. Me sa bann verse-la koz lor de zom ki ti apel Mefiboshet. Anou gete ki leson nou kapav aprann ar sa bann verse-la.

Lerwa Sail ti ena set garson ek de tifi. So premie garson ti apel Zonatan. Apre sa, Sail ti gagn enn garson avek so konkibinn Rizpa, ek li ti apel garson-la Mefiboshet. Zonatan osi ti ena enn garson ki ti apel Mefiboshet. Alor, Lerwa Sail ti ena enn garson ek enn ti-zanfan ki ti ena mem nom, Mefiboshet.

Pandan so regn, Lerwa Sail ti koumans ena laenn pou bann Gabaonit ek li ti esey fer touy zot. Li posib ki li ti reisi touy boukou parmi zot, ek sa pa ti bon ditou, parski dan lepok Zozwe, bann sef dan Izrael ti fer enn lalians avek bann Gabaonit, pou ki ena lape ant zot.​—Zozwe 9:3-27.

Lepok Lerwa Sail, sa lalians-la ti ankor valid. Kan Sail ti esey fer touy bann Gabaonit, li pa ti respekte sa lalians-la. Akoz sa, Sail ek so fami ti koupab, parski zot ti vers disan bann Gabaonit. (2 Sam. 21:1) Finalman, David ti vinn lerwa, ek bann Gabaonit ki ti ankor vivan, ti explik li ditor ki Sail ti fer. Lerla, David ti demann zot seki li ti kapav fer pou repar ditor ki Sail ti fer, pou ki zot pei regagn benediksion Zeova. Bann Gabaonit pa ti rod larzan. Zot ti demann lamor set garson Sail, sa zom ki ti esey detrir zot la. (Nonb 35:30, 31) David ti fer seki zot ti demann li.​—2 Sam. 21:2-6.

Sa lepok-la, Sail ek Zonatan ti fini mor, me Mefiboshet, garson Zonatan, ti ankor vivan. Li ti andikape akoz enn aksidan ki ti arive kan li ti zanfan, ek li pa ti partisip dan latak ki so granper ti fer kont bann Gabaonit. David ti fer enn lalians avek so bon kamarad Zonatan, ek sa lalians-la ti inplik osi bann zanfan Zonatan, parmi ti ena Mefiboshet. (1 Sam. 18:1; 20:42) Labib dir: “Me lerwa [David] ti ena pitie pou Mefiboshet, garson Zonatan, ti-zanfan Sail, akoz serman ki David ek Zonatan, garson Sail, ti fer devan Zeova.”​—2 Sam. 21:7.

Kanmem sa, David ti fer seki bann Gabaonit ti demann li. Li ti donn zot sink ti-zanfan Sail. Li ti osi donn zot de garson Sail, ek enn parmi zot ti apel Mefiboshet. (2 Sam. 21:8, 9) Kan David ti fer sa, Zeova ti rekoumans beni pei Izrael.

Lalwa Bondie ti bien kler. Labib dir: “Fode pa touy enn zanfan akoz seki so papa inn fer.” (Det. 24:16) Zeova pa ti pou dakor ki touy Sail so de garson ek so sink ti-zanfan, si zot ti inosan. Sa lalwa-la ti dir osi: “Pou touy enn dimounn akoz pese ki limem li’nn fer.” Li paret ki Sail so de garson ek so sink ti-zanfan ti partisip dan latak kont bann Gabaonit. Alor, zot ti mor akoz seki zot ti fer.

Sa zistwar-la aprann nou enn leson bien inportan: Mem si enn kikenn fer enn move kitsoz parski li’nn swiv bann instriksion ki li’nn gagne, fode pa li panse ki li pena okenn tor. Labib donn sa konsey bien saz la: “Reflesi bien lor ki semin to pou marse, ek pa pou ena okenn danze lor to bann semin.”​—Prov. 4:24-27; Efe. 5:15.