Kifer sa zom ki ti apel “Intel” la, ti dir ki li ti pou “perdi” so leritaz si li ti marye ar Rit? (Rit 4:1, 6)

Dan lepok Biblik, si enn zom marye ki pena zanfan ti mor, ki ti pou ariv so bann later? Eski so nom fami ti pou disparet net? Lalwa Moiz ti reponn sa bann kestion-la.

Si enn zom ti vinn mizer ek ki li ti vann so later, ouswa si zom-la ti mor, ki ti pou ariv so later? So frer ouswa enn fami pros ti kapav reaste later-la. Lerla, later-la ti pou res dan fami.​—Lev. 25:23-28; Nonb 27:8-11.

Kouma sa zom ki’nn mor la so nom fami pa ti pou disparet? Gras-a enn maryaz leviratik, parey kouma Rit ti fer. Frer sa dimounn ki’nn mor-la, ti pou marye ar vev-la, ek ti pou donn li enn zanfan. Lerla, zanfan-la ti pou gagn nom ek leritaz sa dimounn ki’nn mor la. Gras-a sa dispozision ranpli ar lamour la, vev-la osi ti pou gagn seki li bizin.​—Det. 25:5-7; Mat. 22:23-28.

Anou pran lexanp Noemi. Li ti marye ar enn zom ki ti apel Elimelek. Kan Noemi so mari ek so de garson ti mor, pa ti ena okenn zom dan lafami pou pran li swin. (Rit 1:1-5) Kan Noemi ti retourn dan Zida avek so belfi Rit, li ti dir Rit demann Boaz pou aste zot later. Boaz ti enn fami pros ar Elimelek. (Rit 2:1, 19, 20; 3:1-4) Me Boaz ti kone ki ti ena enn lot zom, ki Labib apel “Intel,” ki ti enn fami pli pros ar Elimelek. Alor, sa zom-la ti ena priorite lor Boaz.​—Rit 3:9, 12, 13.

O-koumansman, “Intel” ti anvi ede. (Rit 4:1-4) Li ti kone ki li ti pou bizin depans inpe kas pou aste later-la. Me li ti kone osi ki Noemi ti tro vie pou gagn enn zanfan, ki ti pou vinn zeritie bann later Elimelek. Lerla, Intel ti pou gagn bann later Elimelek, ek sa ti paret enn bon linvestisman.

Me Intel ti sanz so desizion kan li ti aprann ki li ti pou bizin marye ar Rit. Li ti dir: “Mo pa kapav reaste li, parski mo riske perdi mo prop leritaz.” (Rit 4:5, 6) Kifer li ti sanz so desizion?

Si Intel, ouswa enn lot dimounn, ti marye ar Rit ek ki Rit ti gagn enn garson, sa garson-la ti pou gagn bann later Elimelek. Me dan ki fason Intel ti pou “perdi” so “leritaz”? Labib pa dir nanye lor la. Me anou get sertin rezon ki kitfwa ti pous Intel pou sanz so desizion.

• Premierman, sa larzan ki li ti pou depanse la ti pou dan vid, parski li pa ti pou gagn later Elimelek. Se garson Rit ki ti pou gagn sa later-la.

• Deziemman, li ti pou bizin pran swin Noemi ek Rit, ek donn zot seki zot bizin pou viv.

• Trwaziemman, si Rit ti gagn lezot zanfan ar Intel, zot ti pou vinn bann zeritie Intel, parey kouma bann lezot zanfan Intel.

• Katriemman, si Intel pa ti ena lezot zanfan, sa garson ki li ti pou gagne ar Rit la, ti pou gagn bann later Elimelek ek bann later Intel toule-de. Lerla, Intel ti pou perdi so bann later akoz enn zanfan ki port nom Elimelek. Zanfan-la pa ti pou port so nom. Intel pa ti anvi riske so leritaz pou ed Noemi. Li’nn prefer les Boaz aste later Elimelek. Ek Boaz ti fer sa pou ki ‘sa kikenn ki’nn mor la, pa perdi so leritaz.’​—Rit 4:1.

Intel ti gagn plis traka so prop leritaz ek so nom. Li ti bien egois. Me mem si Intel ti fer boukou zefor pou ki so nom pa disparet, azordi nou pa kone kouma li apele. Intel inn rat gran privilez ki Boaz inn gagne, setadir pou form parti bann desandan Lemesi, Zezi Kris. Intel ti telman egois ki li pa ti anvi ed enn kikenn ki ti bizin led. Sa bien tris, pa vre!​—Mat. 1:5; Lik 3:23, 32.