1-2. Ki kitsoz souvan arive kan enn kikenn pran batem, ek ki nou pou gete dan sa lartik-la?

 ESKI to’nn deza trouv bann dimounn pran batem? Kan zot inn reponn sa de kestion ki’nn poz zot avan zot batem la, sirman to’nn tann konviksion ki ti ena dan zot lavwa. Sirman to’nn trouve osi kouma zot fami ek zot bann kamarad ti bien fier. Apre zot batem, kan zot inn sorti dan delo, sirman to’nn trouv lazwa lor zot figir, ek to’nn tann enn lafoul dimounn tap lame. An realite, sak semenn, bann milye dimounn donn zot lavi Zeova ek zot pran batem pou vinn bann Temwin Zeova.

² Eski to’nn fini pran batem? Si to pe pans pou pran batem, to enn kikenn bien spesial dan sa move lemond-la, parski to pe “rod ador Bondie.” (Ps. 14:1, 2) Ki to vie ouswa zenn, sa lartik-la inn ekrir pou twa! Me bann ki’nn fini pran batem osi anvi fer zot best pou kontign servi Zeova. Alor, anou get trwa rezon kifer nou anvi servi Zeova.

3. Kifer bann serviter Zeova kontan laverite ek lazistis? (Psom 119:128, 163)

³ Zeova ti donn so bann serviter lord pou “kontan laverite.” (Zaka. 8:19) Ek Zezi ti ankouraz so bann disip pou rod lazistis. (Mat. 5:6) Sa montre ki nou bizin ena enn gran dezir pou fer seki zis ek bon devan lizie Zeova. Nou sir ki twa osi to kontan laverite ek lazistis! To deteste bann mansonz ek to deteste lemal. (Lir Psom 119:128, 163.) Bann dimounn ki koz manti, zot swiv lexanp Satan, sa kikenn ki pe diriz sa lemond-la. (Zan 8:44; 12:31) Enn parmi bann lobzektif Satan se pou gat repitasion nom Zeova. Depi ki Adan ek Ev inn rebel kont Zeova dan zardin Edenn, Satan pe fann bann foste lor Bondie.  Li anvi ki bann dimounn panse ki Zeova Li egois ek ki Li enn move Dirizan, ki pa donn bann imin bann bon kitsoz. (Zen. 3:1, 4, 5) Bann foste ki Satan inn fane pe kontign fer bann dimounn pans bann move kitsoz lor Zeova. Kan bann dimounn swazir pou pa “kontan laverite,” Satan kapav inflians zot pou fer tou sort kalite move kitsoz.​—Rom. 1:25-31.

4. Kouma Zeova inn montre ki Li “Bondie laverite”? (Get zimaz osi.)

⁴ Zeova Li “Bondie laverite,” ek Li ansegn laverite bann dimounn ki kontan Li. (Ps. 31:5, NW) Kan Li fer sa, Li liber zot ar bann foste ki Satan fane. Zeova ansegn so bann serviter pou vinn bann dimounn ki drwat ek ki onet. Lerla, zot ena plis respe pou zotmem ek zot santi zot anpe. (Prov. 13:5, 6) Eski Zeova inn fer sa pou twa kan to ti pe etidie Labib? To’nn aprann ki Zeova touletan fer seki bon pou bann imin, ek Li fer sa pou twa osi. (Ps. 77:13) Akoz sa, to anvi fer seki Zeova demann twa. (Mat. 6:33) To anvi fer bann dimounn konn laverite, ek to anvi montre ki Satan inn dir bann foste lor Zeova. Kouma to kapav fer sa?

5. Kouma to kapav montre ki to kontan laverite ek lazistis?

⁵ To kapav viv dan enn fason ki montre ki to rezet tou bann foste Satan ek ki to soutenir laverite. To kapav montre ki to anvi fer seki Zeova demann twa ek ki to anvi ki Li diriz to lavi. Kouma to kapav fer sa? To kapav fer sa kan, dan enn lapriyer, to promet Zeova ki to pou servi Li pou touletan, ek apre sa to pran batem. Kan enn kikenn kontan laverite ek lazistis, sa pous li pou pran batem.

6. Dapre Psom 45:4, ki rezon nou ena pou kontan Zezi?

⁶ Kifer to kontan Zezi Kris? Nou trouv sertin rezon dan Psom 45:4. (Lir.) Zezi kontan laverite, limilite, ek lazistis. Si to kontan laverite ek lazistis, to pou kontan Zezi osi. Rapel kouma Zezi ti defann laverite ek lazistis avek kouraz! (Zan 18:37) Me kouma eski Zezi ansegn nou pou ena limilite?

7. Ki to panse lor limilite ki Zezi ena?

⁷ Zezi ansegn nou pou ena limilite  gras-a so lexanp. Enn fason ki li ti fer sa, se kan li ti donn tou laglwar so Papa ek ki li pa ti atir latansion lor limem. (Mark 10:17, 18; Zan 5:19) Ki to resanti kan to reflesi lor limilite ki Zezi ena? Sirman sa motiv twa pou kontan li ek pou swiv so lexanp, pa vre! Kifer Zezi ena limilite? Li ena limilite parski li kontan so Papa. Li anvi osi imit lexanp so Papa, ki ena limilite. (Ps. 18:35; Ebre 1:3) Zezi imit bann kalite Zeova dan enn fason parfe, ek sa fer nou anvi vinn pros ar li.

8. Kifer nou kontan ki Zezi li nou Lerwa?

⁸ Nou kontan ki Zezi li nou Lerwa, parski limem meyer Dirizan ki ena. Se Zeova Limem ki’nn form Zezi ek Li’nn etabli li kouma nou Dirizan. (Iza. 50:4, 5) Reflesi osi lor sakrifis ki Zezi inn fer parski li ti kontan nou. (Zan 13:1) Wi, parski Zezi li nou Lerwa, li merite ki nou kontan li. Zezi konsider bann dimounn ki vremem kontan li kouma so bann kamarad. Ek so bann kamarad montre ki zot kontan li kan zot obeir so bann komannman. (Zan 14:15; 15:14, 15) Se vremem enn gran loner pou vinn enn kamarad ar Garson Bondie!

9. Ki pwin komin ena ant batem bann Kretien ek batem Zezi?

⁹ Enn parmi bann lord ki Zezi inn donn so bann disip, se ki zot bizin pran batem. (Mat. 28:19, 20) Zezi limem inn donn lexanp dan sa domenn-la. Dan enn sertenn fason, so batem diferan ar batem so bann disip. (Get lankadre “ Ki Diferans Ena ant Batem Zezi ek Batem So Bann Disip?”) Me zot ena osi bann pwin komin. Par exanp, kan Zezi ti pran batem, li ti donn so lavi Zeova pou fer So volonte. (Ebre 10:7) Dan mem fason, kan bann disip Zezi pran batem, zot montre ki zot inn donn Zeova zot lavi. Lerla, zot priorite se fer volonte Zeova, ek pa fer seki zot zot anvi. Alor, kan bann disip Zezi pran batem, zot pe swiv lexanp zot Met.

10. Kan to kontan Zezi, kifer sa bizin motiv twa pou pran batem?

¹⁰ To aksepte ki Zezi li Garson Bondie, ek to bien kontan ki Zeova inn swazir Zezi kouma Lerwa pou gid nou. To kone ki Zezi ena limilite ek ki li imit so Papa. To’nn aprann kouma li’nn nouri bann dimounn ki ti fin, kouma li’nn rekonfort bann ki ti dekouraze, ek kouma li’nn geri bann ki ti malad. (Mat. 14:14-21) To pe trouve kouma li pe diriz lasanble Kretien azordi. (Mat. 23:10) Ek to kone kouma Zezi, antan-ki Lerwa dan Rwayom Bondie, pou fer bann kitsoz extraordiner dan lavenir. Alor, kouma to kapav montre ki to kontan li? To fer sa kan to swiv so lexanp. (Zan 14:21) Enn parmi bann premie kitsoz ki to kapav fer pou swiv so lexanp, se kan to donn to lavi Zeova ek to pran batem.

11. Ki rezon pli inportan bizin pous enn kikenn pou pran batem, ek kifer?

¹¹ Ki rezon pli inportan bizin pous enn kikenn pou pran batem? Zezi ti explik sa kan li ti koz lor pli gran komannman ki ena dan lalwa Bondie. Li ti dir: “To bizin kontan Zeova to Bondie avek tou to leker, avek tou to lavi, avek tou to lespri ek avek tou to lafors.” (Mark 12:30) Eski to kontan Zeova dan sa fason-la?

12. Kifer to kontan Zeova? (Get zimaz osi.)

¹² Nou ena plizir rezon pou kontan nou Papa Zeova. Par exanp, to’nn aprann ki  Li “lasours lavi,” ek ki se Limem ki donn “tou zoli don ek tou kado parfe.” (Ps. 36:9; Zak 1:17) Alor, tou bann bon kitsoz ki to ena dan to lavi, to ena sa gras-a nou Papa ki bien zenere.

13. Kifer laranson se enn kado extraordiner?

¹³ Laranson se enn kado extraordiner ki Zeova inn donn nou. Kifer nou dir sa? Mazinn lamitie bien for ki ena ant Zeova ek so Garson. Zezi ti dir: “Mo Papa kontan mwa,” ek “Mo kontan mo Papa.” (Zan 10:17; 14:31) Sa lamitie-la bien for parski zot inn pas plizir milyar lane ansam. (Prov. 8:22, 23, 30) Alor, sey mazine seki Zeova inn resanti kan Li’nn les so Garson soufer ek mor! Zeova bien kontan bann imin, ek Li kontan twa osi. Akoz sa, Li’nn donn lavi so Garson an sakrifis, pou ki twa ek lezot dimounn kapav viv pou touletan. (Zan 3:16; Gal. 2:20) Samem premie rezon nou ena pou kontan Bondie.

14. Ki pli bon lobzektif to kapav ena dan to lavi?

¹⁴ Plis to’nn aprann konn Zeova, plis to lamour pou Li inn grandi. Alor, sirman to anvi vinn pros ar Li depi aster-la mem, ek to anvi res pros ar Li pou touletan. To kapav fer sa! Zeova anvi ki to fer so leker kontan. (Prov. 23:15, 16) To kapav fer sa par to bann parol ek to  bann aksion. Ek fason ki to viv to lavi pou montre si to vremem kontan Zeova. (1 Zan 5:3) Samem pli bon lobzektif to kapav ena dan to lavi!

15. Kouma to kapav montre ki to kontan Zeova?

¹⁵ Kouma to kapav montre ki to kontan to Papa Zeova? Pou koumanse, fer enn lapriyer spesial ek dir Zeova ki to donn Li to lavi. (Ps. 40:8) Apre sa, montre ki to’nn donn Li to lavi kan to pran batem. Kouma nou’nn trouve dan koumansman sa lartik-la, kan to pran batem se enn moman ki bien zwaye ek ki bien inportan dan to lavi. To koumans enn nouvo lavi; to aret viv pou twa ek to koumans viv pou Zeova. (Rom. 14:8; 1 Pier 4:1, 2) Kitfwa se enn gran desizion, me sa desizion-la pou fer twa ena pli zoli lavi ki ena. Kifer nou dir sa?

16. Dapre Psom 41:12, kouma Zeova rekonpans bann dimounn ki donn Li zot lavi ek ki servi Li?

¹⁶ Pena personn ki pli zenere ki Zeova. Ninport ki kitsoz to donn Li, Li pou touletan donn twa boukou plis an retour. (Mark 10:29, 30) Mem si nou pe viv dan enn move lemond, Li pou beni twa ek Li pou donn twa pli zoli lavi ki ena. Ek sa, se zis enn koumansman! Kan to pran batem, enn nouvo lavi koumanse pou twa, ek to pou kapav kontign servi Zeova pou touletan. Lamour ki ena ant twa ek to Papa Zeova pou kontign grandi. Ek parey kouma Zeova viv pou touletan, twa osi to pou kapav viv pou touletan.​—Lir Psom 41:12.

17. Ki kitsoz to kapav donn Zeova, ki Li pena?

¹⁷ Kan to pran batem, to donn Zeova enn kitsoz ki ena boukou valer pou Li. Tou bann bon kitsoz ek tou bann moman zwaye ki to’nn viv dan to lavi, se gras-a Zeova ki to’nn gagn tousala. An retour, to kapav donn to Kreater enn kitsoz ki Li pena, setadir to dezir pou servi Li ek to fidelite. (Zob 1:8; 41:11; Prov. 27:11) Samem pli bon kitsoz to kapav fer ar to  lavi! Alor, premie rezon ki bizin pous twa pou pran batem, se to lamour pou Zeova.

18. Ki kestion to kapav poz tomem?

¹⁸ Alor, kouma to pou reponn sa kestion-la: “Eski to pou pran batem?” Zis to tousel ena repons pou sa kestion-la. Me kitfwa sa kapav ed twa si to demann tomem, ‘Ki mo pe atann?’ (Zist. 8:36) Reflesi lor sa trwa rezon ki nou’nn examine dan sa lartik-la. Premierman, to kontan laverite ek lazistis. Alor, demann tomem, ‘Eski mo anvi viv lepok kot tou dimounn pou koz laverite ek pou fer seki bon?’ Deziemman, to kontan Zezi Kris. Alor, demann tomem, ‘Eski mo anvi ki Garson Bondie vinn mo Lerwa, ek eski mo anvi swiv so lexanp?’ Trwaziemman, pli inportan, to kontan Zeova. Alor, demann tomem, ‘Eski mo anvi fer leker Zeova kontan kan mo aksepte Li kouma mo Bondie ek mo servi Li?’ Si to reponn wi pou sa bann kestion-la, alor kifer to pa pran batem? Ki to pe atann?​—Zist. 16:33.

19. Kifer fode pa to ezite pou pran batem? Servi enn lexanp pou explike. (Zan 4:34)

¹⁹ Si to pe ezite pou pran batem, reflesi lor enn lexanp ki Zezi ti servi. (Lir Zan 4:34.) Zezi ti konpar volonte so Papa ar manze. Kifer? Manze bon pou nou. Zezi ti kone ki tou seki so Papa demann nou, sa bon pou nou. Zeova zame pa pou demann nou fer enn kitsoz ki pou fer nou ditor. Eski Zeova anvi ki to pran batem? Wi. (Zist. 2:38) Alor, to kapav sir ki to pou gagn bann bienfe kan to pran batem. Si to pa pou ezite pou manz pli bon manze ki kapav ena, alor kifer to pe ezite pou pran batem!

20. Ki nou pou examine dan prosin lartik?

²⁰ Ki to pe atann? Sertin kapav dir, “Mo pa santi mwa pre.” Li vre ki desizion pou donn to lavi Zeova ek pou pran batem, se desizion pli inportan ki to pou pran dan to lavi. Akoz sa, to bizin pran letan, reflesi bien lor sa desizion-la, ek fer bann zefor pou ranpli bann kondision ki bizin. Me si to vremem anvi pran batem, ki to kapav fer depi aster-la mem pou prepar twa? Nou pou reponn sa kestion-la dan prosin lartik.