1. Ki kitsoz bann paran anvi pou zot zanfan?

 PARAN, nou kone ki to anvi ed to zanfan pou aprann konn Zeova pou ki li kontan Li. Me Bondie Li invizib. Alor, kouma to kapav ed to zanfan pou konsider Zeova kouma enn Kikenn ki reel, pou ki li kapav vinn pros ar Li?​—Zak 4:8.

2. Kouma bann paran kapav ansegn zot zanfan bann kalite ki Zeova ena?

² Premie fason ki to kapav ed to zanfan pou vinn pros ar Zeova, se kan to etidie Labib ar li. (2 Tim. 3:14-17) Selman, Labib koz lor enn lot fason ki bann zenn kapav aprann konn Zeova. Dan liv Proverb, enn papa rapel so garson kouma li kapav kontign reflesi lor bann kalite ki Zeova ena. Li kapav fer sa kan li examinn kreasion. (Prov. 3:19-21) Anou get de-trwa fason kouma bann paran kapav servi kreasion pou ed zot zanfan pou aprann plis lor bann kalite ki Zeova ena.

3. Kouma bann paran kapav ed zot zanfan?

³ Labib dir ki “bann kalite invizib . . . Bondie, kapav trouv sa bien depi kreasion lemond, parski kapav trouv sa atraver bann kitsoz ki li’nn fer.” (Rom. 1:20) Paran, sirman to kontan fer bann sorti ar to bann zanfan. Alor, servi sa letan-la pou ed to zanfan pou trouv bann kalite Zeova gras-a bann kitsoz ki Li’nn kree. Anou gete seki bann paran kapav aprann ar Zezi dan sa domenn-la.

4. Kouma Zezi ti servi kreasion pou ansegn so bann disip? (Lik 12:24, 27-30)

 ⁴ Anou gete kouma Zezi ti servi kreasion pou ansegn bann dimounn. Enn fwa, li ti fer so bann disip reflesi lor lexanp bann korbo ek bann lis. (Lir Lik 12:24, 27-30.) Zezi ti kapav servi ninport ki zanimo ouswa ninport ki plant. Selman, li ti swazir enn zwazo ek enn fler ki so bann disip ti konn bien. Sirman so bann disip ti deza trouv bann korbo anvole ek bann fler lis pouse dan karo. Nou kapav sey mazinn Zezi pe montre sa bann kitsoz-la ar so lame kan li pe ansegn zot. Ki li ti fer apre ki li ti servi sa bann lexanp-la? Li ti ansegn so bann disip enn leson bien inportan lor so Papa: Zeova bon ek zenere, ek si Li nouri ek abiy bann korbo ek bann fler ki dan karo, nou kapav sir ki Li pou fer parey pou so bann serviter ki fidel.

5. Ki kitsoz dan kreasion bann paran kapav servi pou ansegn zot zanfan?

⁵ Paran, kouma to kapav swiv lexanp Zezi kan to ansegn to bann zanfan? To kapav koz lor enn kitsoz dan kreasion ki tomem to bien kontan, kouma par exanp to zanimo prefere ouswa enn plant. Ek kan to fer sa, explik to zanfan seki sa kitsoz-la aprann nou lor Zeova. Apre sa, to kapav demann to zanfan ki so zanimo prefere ete, ouswa ki kitsoz dan kreasion li kontan. Si to koz lor enn kitsoz ki li kontan, to zanfan pou plis interese ar seki to pou dir li ek ar seki to pou ansegn li lor Zeova.

6. Ki nou kapav aprann ar lexanp Christopher so mama?

⁶ Me eski bann paran bizin fer boukou resers lor enn zanimo ouswa enn plant, pou zot kapav explik zot zanfan seki sa aprann zot lor Zeova? Non. Zezi pa ti donn enn ta explikasion lor bann kitsoz ki bann korbo manze, ouswa lor kouma bann fler lis grandi. Mem si to zanfan kitfwa kontan konn bann ti detay lor bann kitsoz ki Zeova inn kree, parfwa zis enn ti komanter ouswa enn kestion, kapav ed to zanfan pou aprann enn kitsoz lor Zeova. Christopher rapel seki so mama ti dir li kan li ti tipti. Li dir: “Mo mama ti dir bann kitsoz bien sinp, ek sa ti ed mwa pou apresie bann kitsoz ki ena otour mwa. Par exanp, si nou ti pre ar bann montagn, li ti kapav dir: ‘Get kouma sa montagn-la li gran ek li bien zoli! Zeova extraordiner, pa vre?’ Ouswa si nou ti pre ar lamer, li ti kapav dir: ‘Get lafors ki sa bann vag-la ena! Zeova bien pwisan, pa vre?’” Christopher dir: “Bann ti komanter koumsa, ti fer nou reflesi, ek sa ti ena enn gran lefe lor nou.”

7. Kouma to kapav ed to zanfan pou reflesi lor kreasion?

⁷ Amezir ki to zanfan grandi, to kapav ed li pou reflesi plis lor kreasion, pou ki li kapav aprann pli boukou kitsoz lor Zeova so personalite. To kapav koz lor enn kitsoz ki Zeova inn kree, ek to demann li, “Ki sa ansegn twa lor Zeova?” Kitfwa to pou etone kan to pou tann so repons.​—Mat. 21:16.

8. Ki kitsoz bann paran Izraelit ti fer kan zot ti marse lor semin?

⁸ Bann paran Izraelit ti bizin ansegn zot zanfan bann lalwa Zeova kan zot ti pe marse “lor semin.” (Det. 11:19) Lor bann semin dan lakanpagn dan Izrael, zot ti kapav trouv boukou zanimo, zwazo, ek fler. Kan bann fami Izraelit ti pe marse lor semin, bann paran ti ena boukou lokazion pou koz lor kreasion Zeova ar zot bann zanfan. Azordi osi, sirman  bann paran gagn boukou lokazion pou servi kreasion pou ansegn zot zanfan. Anou gete kouma sertin paran inn fer sa.

9. Ki to kapav aprann ar lexanp Punitha ek Katya?

⁹ Enn ser ki apel Punitha ek ki res dan enn gran lavil dan Lenn, dir: “Kan nou al kot nou fami dan lakanpagn, nou profit sa lokazion-la pou ed nou bann zanfan pou reflesi lor kreasion Zeova. Mo’nn remarke ki mo bann zanfan apresie pli bien bann kitsoz ki Zeova inn kree, kan zot lwin ar lavil.” Paran, to bann zanfan kitfwa zame pa pou bliye moman ki zot inn pase avek twa kan zot ti dan enn zoli landrwa. Katya, enn ser ki res Moldavi, dir: “Pli zoli souvenir ki mo ena, se moman ki mwa ek mo bann paran nou ti pase dan lakanpagn. Mo bien rekonesan anver zot ki zot inn aprann mwa depi tipti pou pran letan pou examinn bann kitsoz ki Zeova inn kree. Zot inn ed mwa pou trouv Zeova atraver so kreasion.”

10. Ki bann paran kapav fer si zot pa reisi profit zoli lanatir ki ena dan lakanpagn? (Get lankadre “ Led pou Bann Paran.”)

¹⁰ Me ki to kapav fer si to pa reisi profit zoli lanatir ki ena dan lakanpagn? Amol, enn frer ki res Lenn, dir: “Kot mo reste, bann paran bizin travay ziska bien tar, ek sa kout bien ser pou al dan lakanpagn. Selman, mem dan enn ti zardin ouswa lor enn balkon, nou kapav trouv bann kitsoz ki Zeova inn kree ek koz lor so bann kalite.” Si to get bien, kitfwa to kapav trouv boukou kitsoz pre ar to lakaz, ki to kapav servi pou ansegn to zanfan. (Ps. 104:24) Kitfwa to kapav trouv bann zwazo, bann insekt, bann plant, ek lezot kitsoz ankor. Karina, enn ser ki res Lalmagn, dir: “Mo mama bien kontan bann fler. Kan mo ti tipti, ninport kan nou ti  pe marse ansam, li ti montre mwa bann zoli fler.” Paran, to kapav servi osi bann video ek bann piblikasion nou lorganizasion ki koz lor kreasion, pou to ansegn to zanfan. Wi, ninport kotsa to reste, to kapav ed to zanfan pou examinn bann kitsoz ki Zeova inn kree. Aster-la, anou get sertin kalite ki Zeova ena, lor ki to kapav atir latansion to bann zanfan.

11. Kouma bann paran kapav ed zot zanfan pou trouv lamour Zeova?

¹¹ To kapav ed to zanfan pou trouv lamour Zeova kan to atir so latansion lor fason ki bann zanimo pran swin zot bann tipti. (Mat. 23:37) To kapav osi koz lor kouma dan kreasion, enn kitsoz kapav ena plizir varyete. Karina, ki nou ti mansione avan, dir: “Kan nou ti pe marse, mo mama ti ankouraz mwa pou arete, pou pran letan pou gete kouma sak fler li zoli ek inik, ek pou trouve kouma sa montre ki Zeova kontan nou. Plizir lane apre, mo ankor pran letan pou examinn bann fler, zot varyete, zot form, ek zot kouler. Ek zot ankor rapel mwa ki kantite Zeova kontan nou.”

12. Kouma bann paran kapav ed zot zanfan pou trouv sazes Bondie? (Psom 139:14) (Get zimaz osi.)

¹² Ed to zanfan pou trouv sazes Bondie. Zeova ena boukou plis sazes ki nou. (Rom. 11:33) Par exanp, to kapav explik to zanfan kouma delo evapore pou vinn bann niaz, ek kouma sa bann niaz-la sarye delo depi enn landrwa ziska enn lot landrwa. (Zob 38:36, 37) To kapav osi koz lor fason extraordiner ki Zeova inn kree nou lekor. (Lir Psom 139:14.) Anou gete kouma Vladimir ti fer sa. Li dir: “Enn zour, nou garson ti tom depi so bisiklet ek li ti gagn dimal. Apre de-trwa zour, so dimal ti geri. Mo madam ek mwa nou ti explik li ki Zeova inn kree nou bann selil avek kapasite pou geri, setadir ki zot kapav aranz zotmem. Nou ti explik li ki nou pa trouv sa dan okenn kitsoz ki bann imin inn fabrike. Par exanp, apre enn aksidan, enn loto pa pou aranz li par limem. Sa lexanp-la inn ed nou garson pou konpran ki Zeova ena boukou sazes.”

13. Kouma bann paran kapav ed zot zanfan pou trouv pwisans Bondie? (Izai 40:26)

¹³ Zeova invit nou pou get lesiel ek pou reflesi lor kouma so pwisans fer tou bann zetwal res dan zot plas. (Lir Izai 40:26.) To kapav ankouraz to zanfan pou get lesiel ek pou reflesi lor la. Enn ser ki apel Tingting ek ki res Taywann, rapel enn kitsoz ki ti ariv li kan li ti zenn. Li dir: “Enn fwa, mo mama ti amenn mwa kanpe. Aswar, nou ti trouv boukou zetwal dan lesiel parski nou ti lwin ar bann lalimier lavil. Sa lepok-la, mo ti per tansion mo pa reisi res fidel ar Zeova, parski mo bann kamarad lekol ti pe met boukou presion lor mwa. Mo mama ti fer mwa reflesi lor pwisans ki Zeova ti servi pou kree tou sa bann zetwal-la, ek li ti fer mwa rapel ki Zeova pou servi so pwisans pou ed mwa pou sirmont ninport ki leprev. Apre ki mo ti examinn kreasion Zeova sa swar-la, mo ti plis anvi konn Zeova, ek mo ti bien deside pou kontign servi Li.”

14. Kouma bann paran kapav servi kreasion pou montre zot zanfan ki Zeova Li enn Bondie ki ere?

¹⁴ Bann kitsoz ki Zeova inn kree montre ki Li enn Bondie ki ere, ek ki Li anvi ki nou osi nou ere. Bann siantis inn dekouver ki laplipar bann zanimo kontan zwe, parmi ena bann zwazo ek bann pwason. (Zob 40:20) Eski to’nn deza trouv to zanfan riye kan li’nn trouv enn zanimo zwe? Kitfwa li’nn trouv enn ti sat galoup deryer enn boul, ouswa bann ti lisien lager ant zot. Prosenn fwa ki to trouv to zanfan riye kan li trouv enn zanimo fer enn kitsoz ki drol, to kapav rapel li ki nou servi enn Bondie ki ere.​—1 Tim. 1:11.

15. Ki kitsoz kapav ed bann paran pou zot fer zot zanfan koze? (Proverb 20:5) (Get zimaz osi.)

¹⁵ Parfwa, bann paran kapav gagn difikilte pou fer zot zanfan koz lor bann problem ki zot pe gagne. Si to dan sa sitiasion-la, kitfwa to bizin esey kone seki pe pase dan latet to zanfan. (Lir Proverb  20:5.) Sertin paran inn trouve ki li pli fasil pou zot zanfan koze, kan zot pe pas enn bon moman ansam dan lanatir. Kifer? Enn parmi bann rezon se parski zot ansam ek ki zot pena lezot kitsoz pou fer. Enn frer ki apel Masahiko ek ki res Taywann, koz lor enn lot rezon. Li dir: “Kan nou pe fer enn laktivite ansam, kouma par exanp enn randone lor montagn ouswa marse lor laplaz, souvan bann zanfan pli rilax. Lerla, li pli fasil pou nou fer zot koze.” Katya, ki nou’nn mansione avan, dir: “Apre lekol, mo mama ti abitie amenn mwa dan enn zoli zardin. Laba, mo ti pli rilax, ek li ti pli fasil pou mo dir li seki ti pe trakas mwa ek seki ti pe pase dan lekol.”

16. Kouma bann fami kapav profit kreasion Zeova pou rilax ek pas enn bon moman ansam?

¹⁶ Kan bann fami profit bann kitsoz ki Zeova inn kree, sa ed zot pou rilax ek pou pas enn bon moman ansam. Lerla, lamour ki zot ena pou zot kamarad grandi. Labib dir ki ena “enn ler pou riye” ek “enn ler pou danse.” (Ekle. 3:1, 4) Lor later, Zeova inn kree bann zoli landrwa kot nou kapav fer bann kitsoz ki nou kontan. Boukou fami al dan bann park, lor montagn, ouswa al lamer pou pas bann bon moman ansam. Bann zanfan kontan galoupe, zwe dan bann park, get bann zanimo, ouswa naze dan larivier, dan bann lak, ouswa dan lamer. Nou ena boukou lokazion pou profit lanatir ek tou bann kitsoz ki Zeova inn kree!

17. Kifer bann paran bizin ed zot zanfan pou apresie kreasion Zeova?

¹⁷ Dan lemond nouvo, bann paran ek bann zanfan pou kapav profit kreasion Zeova san poursan. Sa lepok-la, nou pa pou bizin per bann zanimo, ek zot osi zot pa pou per nou. (Iza. 11:6-9) Nou pou ena lavi eternel pou profit bann kitsoz ki Zeova inn kree. (Ps. 22:26) Selman, fode pa nou atann ki nou dan lemond nouvo pou nou ed nou zanfan pou apresie kreasion Zeova. Paran, kan to servi kreasion pou ansegn to zanfan lor Zeova, kitfwa to zanfan pou ena mem santiman ki Lerwa David, ki ti dir: “Segner; peyna lot ki kapav fer seki to finn fer.”​—Ps. 86:8.