1. Ki kitsoz bann dimounn remarke kan zot asiste renion pou premie fwa? (Get zimaz osi.)

 MAZINN enn koup ki pe asiste renion pou premie fwa. Zot vremem inpresione par lakey ki zot inn gagne ek par lamour ki bann frer ek ser montre pou zot kamarad. Kan zot retourn lakaz apre renion, madam-la dir so misie: ‘Bann Temwin Zeova bien diferan ar bann lezot dimounn ki nou’nn zwenn. Mo’nn vremem apresie sa moman ki mo’nn pase ar zot la.’

2. Kifer sertin inn aret servi Zeova?

² Lamour ki ena ant bann serviter Zeova, li bien spesial. Selman, bann Temwin Zeova zot pa parfe. (1 Zan 1:8) Alor, plis nou aprann konn nou bann frer ek ser, plis nou remark bann defo ki zot ena. (Rom. 3:23) Ek malerezman, sertin inn aret servi Zeova akoz sa.

3. Kouma nou kapav rekonet bann vre disip Zezi? (Zan 13:34, 35)

³ Reget text prinsipal sa lartik-la. (Lir Zan 13:34, 35.) Kouma bann dimounn kapav rekonet bann vre Kretien? Gras-a lamour ki zot ena pou zot kamarad. Labib pa dir ki zot pou parfe. Remarke osi ki Zezi pa ti dir: ‘Zot pou kone ki zot mo bann disip.’ Li ti dir: “Tou dimounn pou kone ki zot mo bann disip.” Alor, Zezi pa ti dir ki se zis so bann disip ki ti pou rekonet bann vre Kretien gras-a lamour ki zot ena ant zot. Bann dimounn ki andeor lasanble osi ti pou rekonet sa.

4. Ki kestion sertin dimounn kapav poz zotmem konsernan bann vre disip Zezi?

⁴ Sertin dimounn ki pa Temwin Zeova kitfwa kapav demann zotmem: ‘Kouma lamour kapav ed nou pou rekonet bann vre disip Zezi? Kouma Zezi ti montre lamour anver so bann zapot? Ek kouma nou kapav swiv lexanp Zezi azordi?’ Bann Temwin osi bizin reflesi lor repons sa bann kestion-la. Kan nou fer sa, sa pou ed nou pou montre plis lamour pou nou kamarad, sirtou kan zot fer bann erer.​—Efe. 5:2.

5. Ki Zezi ti pe rod dir dan Zan 15:12, 13?

⁵ Zezi ti explike ki so bann disip ti pou kontan zot kamarad dan enn fason bien spesial. (Lir Zan 15:12, 13.) Li ti donn zot sa lord-la: “Kontan sakenn zot kamarad parey kouma mo’nn kontan zot.” Ki li ti pe rod dir? Zezi ti pe rod dir ki zot ti bizin kontan zot kamarad plis ki zot kontan zotmem, ek ki zot ti bizin pre pou donn zot lavi pou zot kamarad. b

6. Kouma Labib ansegn nou ki lamour bien inportan?

⁶ Labib ansegn nou ki lamour bien inportan. Se pou sa rezon-la ki boukou dimounn kontan bann verse kouma: “Bondie li lamour.” (1 Zan 4:8) “To bizin kontan to prosin kouma tomem.” (Mat. 22:39) “Lamour kouver enn kantite pese.” (1 Pier 4:8) “Lamour pa pou disparet zame.” (1 Kor. 13:8) Sa bann verse-la, ek lezot ankor, montre ki li bien inportan ki nou ena sa zoli kalite-la.

7. Kifer Satan pa kapav ansegn bann dimounn pou ena lamour ek pou viv dan linite?

 ⁷ Boukou dimounn demann zotmem: ‘Me kouma mo kapav rekonet vre relizion? Tou relizion dir ki zot ansegn laverite, me sakenn ansegn enn kitsoz diferan lor Bondie.’ Satan inn kree boukou fos relizion. Akoz sa, bann dimounn gagn difikilte pou rekonet vre relizion. Selman, Satan pa kapav fer bann dimounn dan lemond antie kontan zot kamarad ek viv dan linite. Zis Zeova kapav fer sa, parski lamour sorti kot Zeova. Se zis bann dimounn ki ena lespri sin ek benediksion Zeova ki kapav ena vre lamour pou zot kamarad. (1 Zan 4:7) Alor, nou konpran kifer Zezi ti dir ki se zis so bann disip ki ti pou ena vre lamour pou zot kamarad.

8-9. Kouma boukou dimounn inn inpresione ar lamour ki bann Temwin ena ant zot?

⁸ Parey kouma Zezi ti predir, boukou dimounn inn rekonet bann vre Kretien gras-a vre lamour ki zot ena pou zot kamarad. Par exanp, enn frer ki apel Ian rapel premie lasanble ki li ti asiste dan enn stad pre ar so lakaz. De-trwa mwa avan, Ian ti al get enn match dan sa stad-la. Li dir: “Bann dimounn ki ti asiste sa lasanble-la ti bien diferan ar bann dimounn ki ti vinn get match-la. Zot ti zanti, zot ti abiy zot bien, ek zot bann zanfan ti ena bon manier. . . . Sa bann dimounn-la ti paret ere ek anpe. Samem mo ti pe rode! Mo pa rapel okenn diskour ki ti ena sa zour-la. Selman, mo ankor rapel bon konportman bann Temwin Zeova.” c Se gras-a lamour ki nou ena pou nou kamarad, ki nou ena sa bon konportman-la. Nou kontan nou bann frer ek ser. Akoz sa, nou bon anver zot ek nou respekte zot.

⁹ Enn frer ki apel John, ti ena mem santiman ki Ian kan li ti koumans asiste bann renion. Li dir: “Mo ti vremem inpresione par lamour ki zot ti ena pou zot kamarad. Zot ti telman zanti ar mwa ki mo ti panse ki zot parfe. Lamour ki zot ti ena ant zot, ti konvink mwa ki mo ti trouv vre relizion.” d Bann lexperyans koumsa, ek lezot ankor, montre ki bann serviter Zeova zot bann vre Kretien.

10. Kan eski nou plis bizin montre lamour anver nou bann frer ek ser? (Get not osi.)

¹⁰ Kouma nou’nn dir dan koumansman sa lartik-la, okenn Temwin Zeova pa parfe. Parfwa, sertin frer ek ser pou dir ouswa fer bann kitsoz ki pou desevwar nou. e (Zak 3:2) Kan sa arive, nou kapav montre ki nou vremem kontan zot par fason ki nou reazir. Anou gete seki nou kapav aprann ar lexanp Zezi dan sa domenn-la.​—Zan 13:15.

11. Ki defo Zak ek Zan ti ena? (Get zimaz osi.)

¹¹ Zezi pa ti atann ki so bann disip parfe. Okontrer, avek boukou lamour, li ti ed zot pou sanz zot personalite, pou zot kapav gagn faver Zeova. Enn fwa, de parmi so bann zapot, Zak ek Zan, ti anvi gagn enn plas inportan dan Rwayom Bondie, ek zot ti avoy zot mama demann sa Zezi. (Mat. 20:20, 21) Seki Zak ek Zan ti fer, ti montre ki zot ena lorgey ek lanbision.​—Prov. 16:18.

12. Eski se zis Zak ek Zan ki ti montre ki zot ti ena bann defo? Explike.

¹² Selman, sa zour-la, pa zis Zak ek Zan ki ti montre ki zot ti ena bann defo. Gete kouma bann lezot zapot ti reazir: “Kan sa dis lezot-la ti tann sa, zot ti ankoler ar sa de frer-la.” (Mat. 20:24) Nou kapav sey mazinn Zak, Zan, ek bann lezot zapot pe diskite ant zot. Kitfwa lezot inn dir Zak ek Zan: ‘Pou ki zot pran zot, pou ki zot rod enn plas inportan dan Rwayom Bondie! Pa zis zot tousel ki’nn travay dir ansam ar Zezi. Nou’si nou merit bann plas inportan, parey kouma zot!’ Nou pa kone seki zot ti dir ek seki zot ti panse exakteman sa zour-la. Selman, nou kone ki sa zour-la, zot pa ti montre lamour ek bonte anver zot kamarad.

13. Kouma Zezi ti reazir kan so bann zapot ti fer bann erer? (Matie 20:25-28)

¹³ Kouma Zezi ti reazir? Li pa ti ankoler ar zot. Li pa ti dir zot ki li ti pou al rod bann pli bon zapot, bann zom ki ti pou ena pli boukou limilite ek ki ti pou vremem kontan zot kamarad. Okontrer, avek pasians, Zezi ti koz ar zot, parski li ti kone ki zot ti anvi fer seki bon. (Lir Matie 20:25-28.) Zezi ti touletan bon anver so bann zapot, mem si plizir fwa bann-la ti diskite ant zot pou kone kisann-la pli gran parmi zot.​—Mark 9:34; Lik 22:24.

14. Kouma kiltir bann zapot ti ena enn linflians lor zot?

¹⁴ Zezi ti kone ki so bann zapot ti inflianse par zot kiltir. (Zan 2:24, 25) Bann Farizien ek bann exper Lalwa ti ansegn lepep ki enn kikenn li inportan zis si li ena enn gran pozision. (Mat. 23:6) Bann sef relizie ti panse osi ki zot ti meyer ki lezot. f (Lik 18:9-12) Zezi ti kone ki sa fason panse-la ti kapav inflians lopinion ki so bann zapot ti ena lor zotmem ek lor lezot. (Prov. 19:11) Li ti kone ki so bann disip ti pou fer bann erer. Ek kan sa ti arive, li ti ena pasians anver zot. Li ti kone ki zot ti anvi fer seki bon. Alor, avek pasians, li ti ansegn zot pou ki zot ena plis lamour pou zot kamarad ek ki zot rezet lorgey ek lanbision.

15. Ki nou kapav aprann ar seki ti ariv Zak, Zan, ek bann lezot zapot?

¹⁵ Ki nou kapav aprann ar seki ti ariv Zak, Zan, ek bann lezot zapot? Zak ek Zan ti ena tor pou demann Zezi enn plas inportan dan Rwayom Bondie. Selman, bann lezot zapot osi ti ena tor, parski zot pa ti fer zefor pou gard linite. Me Zezi ti montre lamour ek li ti bon anver toule 12 zapot. Ki leson nou aprann? Seki inportan, se pa zis seki lezot fer, me se osi kouma nou nou reazir kan lezot fer bann erer. Ki kitsoz kapav ed nou? Kan enn frer ouswa enn ser fer nou ankoler, nou kapav demann noumem: ‘Kifer seki li’nn fer la, fer mwa ankoler sa kantite-la? Eski sa montre ki mo ena enn defo ki mo bizin fer zefor pou rezete? Eski li posib ki sa dimounn-la pe pas par enn difikilte? Mem si mo panse ki mo ena drwa ankoler, eski mo kapav montre lamour ek zis pardonn sa dimounn-la?’ Kan nou montre lamour anver lezot, nou montre ki nou bann vre disip Zezi.

16. Ki kitsoz ankor nou kapav aprann ar lexanp Zezi?

¹⁶ Lexanp Zezi ansegn nou osi ki nou bizin fer zefor pou konpran nou bann frer ek ser. (Prov. 20:5) Li vre ki Zezi kapav lir dan leker, ek ki nou nou pa kapav. Selman, nou kapav ena pasians anver nou bann frer ek ser kan zot fer nou ankoler. (Efe. 4:1, 2; 1 Pier 3:8) Li pou pli fasil nou fer sa si nou aprann konn zot bien. Anou get enn lexanp.

17. Ki bienfe enn responsab sirkonskripsion inn gagne kan li’nn aprann konn enn frer pli bien?

¹⁷ Enn responsab sirkonskripsion ti pe servi dan les Lafrik, ek li rapel enn frer ki ti dan enn sa bann lasanble-la. O-koumansman, responsab sirkonskripsion-la ti panse ki frer-la inpe sovaz. Ki li ti fer? Li dir: “Olie ki mo evit frer-la, mo’nn desid pou aprann konn li pli bien.” Kan li’nn fer sa, responsab sirkonskripsion-la inn aprann kouma nou frer inn grandi ek kouma sa finn ena enn linflians lor fason ki li tret lezot. Li dir: “Kan mo’nn aprann bann difikilte ki li’nn gagne pou fer bann sanzman pou adapte ar bann dimounn, ek ki kantite sanzman li’nn fini fer, mo finn ena plis  respe pou li. Alafin, nou’nn vinn bann bon kamarad.” Wi, kan nou fer zefor pou konpran nou bann frer ek ser, bien souvan li pli fasil pou nou montre lamour anver zot.

18. Ki kestion nou kapav poz noumem si enn kikenn inn fer nou ditor? (Proverb 26:20)

¹⁸ Parfwa, kitfwa nou santi ki nou bizin al koz ar enn kikenn ki’nn fer nou ditor. Selman, avan nou al get li, li bon ki nou poz noumem bann kestion kouma: ‘Eski mo vremem konpran seki’nn arive?’ (Prov. 18:13) ‘Eski li posib ki li pa’nn fer sa par expre?’ (Ekle. 7:20) ‘Eski mo’nn deza fer mem erer?’ (Ekle. 7:21, 22) ‘Si mo al koz ar sa dimounn-la, eski problem-la pou vinn pli grav?’ (Lir Proverb 26:20.) Kan nou pran letan pou reflesi lor bann kestion koumsa, kitfwa nou pou trouve ki nou lamour pou nou frer pou motiv nou pou bliye seki’nn arive.

19. Ki nou bien deside pou fer?

¹⁹ Bann Temwin Zeova montre ki zot bann vre disip Zezi kan zot montre lamour pou zot kamarad. Sakenn parmi nou kapav montre ki nou bann vre disip Zezi kan nou pa pans zis noumem, ek ki nou montre lamour anver nou bann frer ek ser, mem kan zot fer bann erer. Kan nou fer sa, nou kapav ed lezot pou trouve ki nou dan vre relizion. Lerla, zot kapav vinn ador Zeova, nou Bondie lamour, ansam ar nou. Alor, anou bien deside pou kontign montre vre lamour anver sakenn nou kamarad.