1. Ki santiman sertin serviter Zeova ena?

 SA BIEN rasir nou kan nou kone ki pep Zeova ena so faver, pa vre! Labib dir: “Zeova kontan so pep.” (Ps. 149:4) Selman, parfwa sertin telman dekouraze ki zot demann zotmem, ‘Eski mwa osi mo ena faver Zeova?’ Dan Labib, ena lexanp boukou fidel serviter Zeova ki ti ena sa santiman-la.—1 Sam. 1:6-10; Zob 29:2, 4; Ps. 51:11.

2. Kouma nou kapav gagn faver Zeova?

² Labib montre ki bann dimounn inparfe kapav gagn faver Zeova. Pou nou gagn faver Zeova, nou bizin ena lafwa dan Zezi ek pran batem. (Zan 3:16) Kan nou fer sa, nou montre ki nou’nn repanti ek ki nou’nn promet Zeova ki nou pou fer so volonte. (Zist. 2:38; 3:19) Zeova bien kontan kan nou fer sa bann kitsoz-la, parski sa montre ki nou anvi vinn pros ar Li. Tanki nou fer tou seki nou kapav pou tini promes ki nou’nn fer Li, nou pou gagn so faver ek Li pou konsider nou kouma so kamarad.—Ps. 25:14.

3. Ki kestion nou pou reponn dan sa lartik-la?

³ Selman, parfwa sertin panse ki zot pena faver Zeova. Kifer zot pans koumsa? Kouma Zeova montre nou ki nou ena so faver? Ek kouma nou kapav sir ki nou ena faver Zeova?

KIFER SERTIN PANSE KI ZOT PENA FAVER ZEOVA?

4-5. Si to santi ki to pa vo nanye, ki kitsoz to kapav sir?

⁴ Sertin panse ki zot pa vo nanye. Zot ena sa santiman-la depi ki zot tipti. (Ps. 88:15) Enn frer ki apel Adrián, dir: “Mo’nn touletan panse ki mo pa vo nanye. Kan mo ti zenn, mo rapel ki mo ti priye Zeova pou ki mo fami rant dan Paradi. Selman, mwa mo ti sir ki mo pa ti ena mo plas dan Paradi.” Tony, ki pa’nn grandi dan enn fami Temwin, dir: “Mo bann paran zame pa’nn dir mwa ki zot kontan  mwa, ouswa ki mo rann zot fier. Akoz sa, mo ti panse ki zame mo pa ti fer zot plezir.”

⁵ Si parfwa to santi ki to pa vo nanye, pa bliye ki se Zeova Limem ki’nn atir twa ver Li. (Zan 6:44) Li trouv to leker ek to bann zoli kalite, mem si twa to pa trouve. (1 Sam. 16:7; 2 Kro. 6:30) Alor, kan Li dir ki to ena boukou valer pou Li, to kapav sir ki se samem ki Li resanti.—1 Zan 3:19, 20.

6. Ki lapot Pol ti resanti kan li ti mazinn bann pese ki li ti fer dan lepase?

⁶ Avan ki zot konn laverite, sertin ti fer bann move kitsoz. Akoz sa, kitfwa zot ankor santi zot koupab. (1 Pier 4:3) Mem bann fidel serviter Zeova ki pe servi Li depi plizir lane, kitfwa ankor pe lit kont sa santiman-la. Eski to dan sa sitiasion-la? Eski parfwa to panse ki Zeova pa’nn pardonn twa? Si to dan sitiasion-la, kan to reflesi lor bann serviter Zeova ki ti ena mem santiman ki twa, sa pou bien rekonfort twa. Par exanp, kan lapot Pol ti mazinn bann pese ki li ti fer dan lepase, sa ti bien dekouraz li. (Rom. 7:24) Ek mem si li ti repanti ek pran batem, li ti panse ki limem “pli tipti parmi bann zapot,” ek parmi “bann ki fer pese,” li ti dir ki limem “premie.”—1 Kor. 15:9; 1 Tim. 1:15.

7. Ki kitsoz Zeova inn promet nou?

⁷ Zeova inn promet ki Li pou pardonn bann ki repanti. (Ps. 86:5) Alor, si nou’nn vremem repanti pou nou bann pese, nou kapav sir ki Zeova inn tini so promes, setadir Li’nn fini pardonn nou.—Kol. 2:13.

8-9. Kouma nou kapav lit kont santiman ki nou pa pe fer ase pou gagn faver Zeova?

⁸ Nou tou nou anvi fer nou maximum pou servi Zeova. Selman, kitfwa sertin panse ki zot pa pe fer ase pou gagn faver Zeova. Enn ser ki apel Amanda, dir: “Mo ti panse ki, fer mo maximum pou Zeova vedir ki mo touletan bizin fer plis. Akoz sa, souvan mo ti esey fer plis ki seki mo kapav fer. Ek kan mo pa ti reisi, sa ti bien desevwar mwa, ek mo ti panse ki sa ti desevwar Zeova osi.”

⁹ Eski twa osi to panse ki to pa pe fer ase pou gagn faver Zeova? Kouma to kapav lit kont sa santiman-la? Pa bliye ki Zeova Li enn Bondie ki rezonab. Zame Li pa pou demann twa fer plis ki seki to kapav fer. Li apresie tou seki to fer pou Li, tanki to fer to maximum. To pou osi gagn bann bienfe kan to reflesi lor lexanp bann serviter Zeova ki’nn servi Li ar tou zot leker. Par exanp, lapot Pol ti bien aktif dan so servis pou Zeova pandan plizir lane. Li ti vwayaz boukou ek li ti etabli boukou lasanble. Selman, kan so sitiasion ti sanze, li ti nepli kapav fer otan pou Zeova. Eski sa vedir ki li ti perdi faver Zeova? Non. Li ti kontign fer seki li kapav, ek Zeova ti beni li. (Zist. 28:30, 31) Dan mem fason, nou osi nou sitiasion kapav sanze, ek kitfwa nou nepli kapav fer otan ki avan. Me seki pli inportan pou Zeova, se rezon pou kifer nou pe servi Li. Aster-la, anou gete kouma Zeova montre nou ki nou ena so faver.

KOUMA ZEOVA MONTRE NOU KI NOU ENA SO FAVER?

10. Kouma nou kapav “tann” Zeova dir nou ki nou ena so faver? (Zan 16:27)

¹⁰ Gras-a Labib. Kan Zeova kontan enn kikenn, Li dir sa dimounn-la ki li ena so faver. Se seki Li ti fer kan Zezi ti lor later.  Labib montre ki de fwa Li ti dir Zezi: “Limem mo Garson ki mo bien kontan, li’nn gagn mo faver.” (Mat. 3:17; 17:5) Eski to ti pou kontan “tann” Zeova dir twa ki to ena so faver? Li vre ki Zeova pa koz ar nou direk azordi, me Li servi Labib pou koz ar nou. Par exanp, kan nou lir seki Zezi ti dir so bann disip, se koumadir nou pe “tann” Zeova dir nou sa bann parol-la. (Lir Zan 16:27.) Zezi ena mem santiman ki so Papa. Alor, kan nou lir dan Labib kouma Zezi ti dir so bann disip ki li kontan zot ek ki zot ena so faver, se koumadir nou pe “tann” Zeova dir nou sa bann parol-la.—Zan 15:9, 15.

11. Kan nou gagn bann difikilte, kifer sa pa vedir ki nou’nn perdi faver Zeova? (Zak 1:12)

¹¹ Gras-a so bann aksion. Zeova bien kontan ed nou. Li fer sa par exanp, kan Li donn nou bann kitsoz materyel ki nou bizin. Selman, parfwa Zeova les nou gagn bann difikilte, parey kouma Li ti fer ar Zob. (Zob 1:8-11) Me kan nou gagn bann difikilte, sa pa vedir ki nou’nn perdi so faver. Okontrer, sa donn nou lokazion pou montre ki kantite nou kontan Li ek nou fer Li konfians. (Lir Zak 1:12.) Sa donn nou osi lokazion pou trouve ki kantite Li kontan nou, ek kouma Li ed nou pou andir sa bann difikilte-la.

12. Ki nou kapav aprann ar lexanp Dmitrii?

¹² Anou get lexanp enn frer ki res Lazi ek ki apel Dmitrii. Li ti perdi so travay, ek pandan plizir mwa li pa ti reisi gagn enn travay. Alor, li ti desid pou fer plis dan predikasion, pou montre ki li ena konfians an Zeova. Me plizir mwa ti pase ek li pa ti reisi gagn travay mem. Anplis, li ti tom bien malad ek li ti bizin res lor lili. Akoz sa, li ti koumans panse ki li nepli enn bon papa ek enn bon mari, ek li ti pe demann limem si li pa ti perdi faver Zeova. Me enn tanto, so tifi ti inprim Izai 30:15 lor enn papie. Sa verse-la dir: “Kan zot res kalm ek fer mwa konfians, se samem ki pou zot lafors.” Apre sa, li ti donn sa so papa, ek li ti dir: “Pa, kan to santi twa mal, rapel sa verse-la.” Lerla, Dmitrii ti rann li kont ki, gras-a Zeova, so fami ti ankor ena manze, linz, ek enn plas pou reste. Li dir:  “Mo ti vremem bizin res kalm ek kontign fer Zeova konfians.” Si twa osi to pe viv enn sitiasion difisil, to kapav sir ki Zeova gagn to traka ek ki Li pou ed twa pou andire.

13. Kisann-la Zeova servi pou montre nou ki nou ena so faver, ek kouma Li fer sa?

¹³ Gras-a nou bann frer ek ser. Zeova servi nou bann frer ek ser pou montre nou ki nou ena so faver. Par exanp, Li kapav servi zot pou dir nou enn kitsoz ankourazan dan moman ki bizin. Se seki ti ariv enn ser ki res Lazi. Li ti perdi so travay ek li ti tom bien malad. Apre sa, so misie ti fer enn pese grav, ek li ti nepli servi kouma ansien. Nou ser dir: “Mo pa ti konpran kifer tousala ti pe ariv mwa. Mo ti panse ki mo’nn fer enn move kitsoz ek ki mo’nn perdi faver Zeova.” Nou ser ti sipliy Zeova pou montre li ki li ti ankor ena So faver. Kouma Zeova ti reponn li? Nou ser dir: “Bann ansien ti koz ar mwa ek zot ti fer mwa konpran ki Zeova bien kontan mwa.” Me apre sa, nou ser ti re-priye Zeova pou demann Li so led. Li dir: “Sa zour-la mem, mo ti gagn enn let ki bann frer ek ser nou lasanble ti ekrir mwa. Zot bann parol ti bien ankouraz mwa. Mo ti santi ki Zeova ti tann mo lapriyer.” Wi, Zeova bien souvan montre nou ki nou ena so faver kan Li servi nou bann frer ek ser pou dir nou bann kitsoz ki ankourazan.—Ps. 10:17.

14. Dan ki fason ankor Zeova montre nou ki nou ena so faver?

¹⁴ Zeova kapav servi nou bann frer ek ser osi pou donn nou enn konsey kan nou bizin. Sa se enn lot fason ki Li montre nou ki nou ena so faver. Par exanp, dan premie siek, Zeova ti servi lapot Pol pou ekrir 14 let. Dan sa bann let-la, ena  bann konsey ki ranpli ar lamour, me ki bien fran. Kifer Zeova ti fer Pol ekrir sa bann konsey-la? Se parski Zeova Li enn bon Papa, ek Li koriz so bann zanfan “ki li kontan.” (Prov. 3:11, 12) Alor, si enn kikenn servi Labib pou donn twa enn konsey, sa pa vedir ki Zeova inn rezet twa. Okontrer, sa vedir ki Li kontan twa ek ki to ena so faver. (Ebre 12:6) Ki bann lezot prev montre ki nou ena faver Zeova?

BANN LEZOT PREV KI MONTRE KI NOU ENA FAVER ZEOVA

15. Kisann-la Zeova donn so lespri sin, ek ki sa fer nou konpran?

¹⁵ Kan nou ena faver Zeova, Li donn nou so lespri sin. (Mat. 12:18) To kapav demann tomem, ‘Dan mo lavi toulezour, eski mo reisi montre ki mo ena bann kalite ki form parti frwi lespri sin Bondie? Par exanp, eski mo ena plis pasians azordi, ki kan mo ti fek konn laverite?’ Avredir, plis nou reisi devlop bann kalite ki form parti frwi lespri sin Bondie, plis sa montre nou ki nou ena faver Zeova!—Get lankadre “ Frwi Lespri Sin Se . . .”

16. Kisann-la Zeova servi pou pres bon nouvel, ek ki sa fer nou konpran? (1 Tesalonisien 2:4)

¹⁶ Zeova servi bann dimounn ki ena so faver pou pres bon nouvel. (Lir 1 Tesalonisien 2:4.) Enn ser ki apel Jocelyn ti gagn boukou bienfe kan li ti pres bon nouvel ar lezot. Selman enn zour, li ti santi li bien dekouraze. Li dir: “Sa zour-la, mo ti santi mwa initil ek mo pa ti ena lafors. Selman, mo ti pe fer pionie, ek sa zour-la, mo ti ena enn zourne predikasion pou fer. Alor, mo ti priye Zeova ek mo ti al prese.” Sa zour-la, Jocelyn ti zwenn Mary, enn madam bien zanti ki ti aksepte enn letid Labib. De-trwa mwa apre, Jocelyn ti aprann enn kitsoz ki ti bien ankouraz li. Mary ti dir li ki li ti pe sipliy Bondie pou ed li, sa zour ki Jocelyn ti vinn tap so laport-la. Jocelyn dir: “Kan mo’nn tann sa, se koumadir Zeova ti pe dir mwa, ‘To ena mo faver.’” Li vre ki pa tou dimounn pou ekout nou kan nou prese. Selman, nou kapav sir ki Zeova bien kontan kan Li trouv nou fer tou seki nou kapav pou pres bon nouvel ar lezot.

17. Ki bienfe Vicky ti gagne kan li ti reflesi lor laranson? (Psom 5:12)

 ¹⁷ Kan nou ena faver Zeova, nou gagn bann bienfe ki ena enn lien ar laranson. (1 Tim. 2:5, 6) Selman, li kapav arive ki sertin panse ki zot pena faver Zeova, mem si zot inn pran batem ek ki zot ena lafwa dan laranson. Si to dan sa sitiasion-la, to bizin rapel ki to pa kapav touletan fer konfians to bann santiman. Parkont, to kapav touletan fer Zeova konfians. Zeova konsider bann dimounn ki ena lafwa dan laranson kouma bann dimounn ki drwat, ek Li promet ki Li pou beni zot. (Lir Psom 5:12; Rom. 3:26) Enn ser ki apel Vicky ti reflesi boukou lor laranson, ek sa ti bien ed li. Li dir: “Mo ti konpran ki Zeova ti ena boukou pasians anver mwa. . . . Avan, mo ti panse ki Li pa ti kontan mwa ek ki sakrifis so Garson pa ti ase pou pardonn mo bann pese.” Kan li ti pran letan pou reflesi lor laranson, Vicky ti koumans konpran ki Zeova bien kontan li. Nou osi, anou pran letan pou reflesi lor laranson, parski sa pou ed nou pou trouve ki Zeova bien kontan nou ek ki nou ena so faver.

18. Si nou kontign kontan Zeova, ki kitsoz nou kapav sir?

¹⁸ Mem si nou fer zefor pou met an pratik seki nou’nn aprann dan sa lartik-la, li kapav arive ki nou dekouraze ek ki nou panse ki nou’nn perdi faver Zeova. Si sa arive, pa bliye ki Zeova donn so faver “bann ki kontign kontan Li.” (Zak 1:12) Alor, kontign vinn pros ar Zeova, ek kontign fer zefor pou trouve kouma Li pe montre twa so faver. Ek pa bliye ki Zeova zame Li “lwin ar sakenn parmi nou.”—Zist. 17:27.