1. Sit sertin benediksion ki nou ena parski nou form parti lorganizasion Zeova.

 NOU pe viv bann dernie zour ek se enn lepok bien difisil. Alor, nou bien kontan ki nou form parti dan lorganizasion Zeova, pa vre! Mem si lavi dan sa lemond-la pe vinn deplizanpli difisil, Zeova inn donn nou enn fami spiritiel ki anvi ed nou. (Ps. 133:1) Li osi ed nou pou ena enn zoli lavi fami. (Efe. 5:33–6:1) Ek Li donn nou sazes ki nou bizin pou ki nou kapav fer fas ar nou bann traka ek nou res anpe.

2. Ki nou bizin fer, ek kifer?

² Selman, nou bizin fer zefor pou kontign servi Zeova avek fidelite. Kifer? Parski parfwa lezot kapav ofans nou par zot bann parol ouswa zot bann aksion. Nou kapav osi dekouraze akoz nou bann erer, sirtou si sak fwa nou fer mem erer. Me kouma nou kapav kontign persevere dan nou servis pou Zeova (1) kan enn frer ouswa enn ser ofans nou, (2) kan nou konzwin desevwar nou, ek (3) kan nou dekouraze akoz nou bann erer? Dan sa lartik-la, nou pou koz lor sa trwa sitiasion-la, ek nou pou gete seki nou kapav aprann ar trwa personaz ki ena dan Labib.

PERSEVERE KAN ENN FRER OUSWA ENN SER OFANS TWA

3. Ki difikilte sertin kapav gagne?

³ Difikilte. Sertin frer ek ser kitfwa ena bann manier ki agas nou. Kitfwa ena sertin ki’nn desevwar nou, ouswa  ki’nn tret nou dan enn move fason. Bann ansien osi fer bann erer. Akoz bann sitiasion koumsa, kitfwa sertin ena bann dout lor lorganizasion Zeova. Olie ki zot kontign servi Zeova “kot-a-kot” avek zot bann frer ek ser, kitfwa zot aret frekant sa bann dimounn-la, ouswa zot aret vinn renion. (Sof. 3:9) Me eski se enn bon desizion sa? Anou get lexanp enn personaz Biblik ki’nn pas dan sa sitiasion-la.

4. Ki difikilte lapot Pol ti gagne?

⁴ Personaz Biblik. Lapot Pol ti kone ki so bann frer ek ser ti inparfe. Par exanp, o-koumansman, sertin dan lasanble Zerizalem pa ti’le krwar ki li ti enn disip Zezi. (Zist. 9:26) Apre sa, sertin ti koz so koze deryer so ledo pou gat so repitasion. (2 Kor. 10:10) Pol ti osi trouv enn frer responsab pran enn move desizion ki ti kapav fer lezot abandonn Zeova. (Gal. 2:11, 12) So bon kamarad Mark, ti bien desevwar li osi. (Zist. 15:37, 38) Bann sitiasion koumsa ti kapav fer Pol aret frekant bann ki ti ofans li. Selman, li ti kontign kontan so bann frer ek ser ek li ti res bien aktif dan so servis pou Zeova. Ki kitsoz ti ed Pol pou kontign persevere?

5. Ki kitsoz ti ed Pol pou pardonn so bann frer ek ser, ek pou res pros ar zot? (Kolosien 3:13, 14) (Get zimaz osi.)

⁵ Pol ti bien kontan so bann frer ek ser, ek sa ti ed li pou res konsantre lor zot bann zoli kalite, pa lor zot bann defo. Pol ti pardonn lezot parski li ti bien kontan zot, ek se seki li ankouraz nou pou fer dan Kolosien 3:13, 14. (Lir.) Par exanp, kan Mark ti abandonn Pol pandan so premie vwayaz misioner, Pol pa ti res ankoler ar li. Plitar, kan Pol ti ekrir enn zoli let lasanble Kolos, li ti dir ki Mark enn bon “kamarad travay” ek ki li ti “enn gran sours rekonfor.” (Kol. 4:10, 11) Ek kan li ti dan prizon dan Rom, Pol ti mem demande ki Mark vinn ed li. (2 Tim. 4:11) Alor, li kler ki Pol ti pardonn so bann frer ek ser, ek ki li ti res pros ar zot. Ki nou kapav aprann ar so lexanp?

6-7. Kouma nou kapav kontign montre lamour anver nou bann frer ek ser malgre zot bann defo? (1 Zan 4:7)

⁶ Leson. Zeova anvi ki nou kontign montre lamour anver nou bann frer ek ser. (Lir 1 Zan 4:7.) Ek si enn frer ouswa enn ser pa’nn tret nou dan enn bon fason, fode pa nou panse ki li’nn fer sa par expre. Okontrer, li osi li pe  fer zefor pou swiv bann prinsip Zeova. (Prov. 12:18) Zeova kontan tou so bann serviter malgre zot bann defo. Li pa rezet zot ek Li pa gard zot dan leker mem si zot fer bann erer. (Ps. 103:9) Alor, anou kontign fer zefor pou imit nou Papa Zeova kan nou pardonn lezot!—Efe. 4:32–5:1.

⁷ Lafin sa move lemond-la bien pre! Alor, nou bizin res pros ar nou bann frer ek ser. Plis letan pase, plis nou pou gagn persekision. Nou kapav mem al dan prizon akoz nou lafwa. Ek si sa arive, nou pou bien bizin soutien nou bann frer ek ser. (Prov. 17:17) Anou gete seki ti ariv Josep, a enn ansien ki res Lespagn. Li ek bann lezot frer ti al dan prizon akoz zot netralite. Josep dir: “Dan prizon, nou tou nou ti pe res ansam. Alor, bien vit nou ti kapav santi nou agase ar lezot. Akoz sa, nou ti bizin siport nou kamarad ek fer zefor pou pardonn lezot. Sa ti ed nou pou viv dan linite ek pou soutenir nou kamarad. Anplis, nou ti antoure ar bann lezot prizonie ki pa ti servi Zeova. Enn fwa, mo ti blese ek mo lebra ti dan plak. Alor, ti ena boukou kitsoz ki mo pa ti kapav fer. Selman, enn frer ti lav mo linz ek li ti okip mwa bien. Dan sa moman-la, mo ti santi vre lamour Kretien.” Sa lexanp-la montre nou ki nou ena bann bon rezon pou rezoud bann problem ki nou ena ar lezot, ek li bien inportan ki nou fer sa depi aster-la mem!

PERSEVERE KAN TO KONZWIN DESEVWAR TWA

8. Ki difikilte bann koup kapav gagne?

⁸ Difikilte. Pena okenn maryaz ki parfe! Akoz sa, Labib dir ki kan de dimounn marye, zot pou gagn “bann problem dan zot lavi.” (1 Kor. 7:28) Kifer zot pou gagn bann problem? Parski se de dimounn ki inparfe ki pe marye; zot bien diferan ek zot pena bann mem gou. Kitfwa zot sorti dan diferan kiltir ek zot inn grandi dan diferan fason. Avek letan, kitfwa zot trouve ki zot konzwin ena bann manier ki zot pa ti remarke kan zot ti pe frekante, ek sa kapav kree bann dezakor. Me olie ki sakenn rekonet so tor ek esey regle bann problem, sakenn akiz so kamarad. Lerla, ariv enn moman, kitfwa zot panse ki separasion ouswa divors, se sel solision. Me eski separasion ouswa divors pou regle zot problem? b Anou gete seki nou kapav aprann ar enn personaz Biblik, ki ti kontign persevere mem si li ti ena bann problem dan so maryaz.

9. Kifer sitiasion Abigail ti bien difisil?

⁹ Personaz Biblik. Abigail ti marye ar Nabal, ek Labib dir ki Nabal “ti enn brit ek li ti azir dan enn move fason.” (1 Sam. 25:3) Alor, sirman sa ti bien difisil pou Abigail pou viv ar sa kalite zom-la. Eski Abigail ti gagn lokazion pou sorti dan sa sitiasion-la? Wi, li ti gagn sa lokazion-la kan David ti pe rod touy Nabal parski Nabal ti insilte li ek so bann zom. (1 Sam. 25:9-13) Abigail ti kapav sove ek les David touy so mari. Selman, li pa ti fer sa! Okontrer, li ti al get David pou anpes li touy Nabal. (1 Sam. 25:23-27) Kifer li ti fer sa?

10. Mem si so lavi maryaz ti bien difisil, kifer Abigail ti anpes David touy Nabal?

¹⁰ Abigail ti bien kontan Zeova ek li ti  pans parey kouma Zeova lor maryaz. Sirman li ti kone seki Zeova ti dir kan Li ti marye Adan ek Ev. (Zen. 2:24) Abigail ti kone ki maryaz enn kitsoz sakre pou Zeova, ek li ti anvi fer Zeova plezir. Se kitfwa akoz sa ki li ti fer tou seki li kapav pou sov bann dimounn ki dan so lakaz, mem so mari. Li ti azir deswit pou anpes David touy Nabal. Li ti mem demann David pardon pou enn kitsoz ki li pa ti fer. Abigail pa ti egois ek li ti ena boukou kouraz. Nou sir ki Zeova ti bien kontan li! Me ki kitsoz bann mari ek bann fam kapav aprann ar lexanp Abigail?

11. (a) Ki kitsoz Zeova anvi? (Efezien 5:33) (b) Ki leson nou kapav aprann ar lexanp Carmen? (Get zimaz osi.)

¹¹ Leson. Zeova anvi ki enn mari ek so fam res ansam, mem si zot ena bann problem dan zot maryaz. Zeova bien kontan kan Li trouv bann konzwin fer zefor pou rezoud bann problem ki ena dan zot maryaz ek pou montre lamour ek respe anver zot kamarad. (Lir Efezien 5:33.) Anou get lexanp Carmen. Si-z-an apre ki li ti marye, li ti koumans etidie Labib ar bann Temwin Zeova, ek apre li ti pran batem. Carmen dir: “Mo misie pa ti kontan ditou! Li ti zalou parski mo ti kontan Zeova. Li ti maltret mwa ek li ti menas mwa ki li ti pou kit mwa.” Malgre so sitiasion, Carmen ti fer zefor pou res ar so mari. Ek pandan 50 an, li’nn kontign montre respe ek lamour anver so mari. Li dir: “Avek letan, mo’nn konpran kifer mo mari ti ena sa santiman-la. Sa finn ed mwa pou koz ar li avek respe. Mo ti kone ki maryaz li sakre pou Zeova, alor mo ti fer tou seki mo kapav pou ki mo maryaz reisi. Zame mo pa’nn bes lebra, parski mo kontan Zeova!” c Twa osi, to kapav sir ki Zeova pou soutenir twa ek ki Li pou ed twa pou kontign persevere dan to maryaz, mem si to gagn bann difikilte.

PERSEVERE KAN TO DEKOURAZE AKOZ TO BANN ERER

12. Kan nou fer enn pese grav, ki difikilte nou kapav gagne?

¹² Difikilte. Kan nou fer enn pese grav, sa kapav bien dekouraz nou. Labib dir ki nou vremem santi nou “dan lapenn” kan nou fer enn pese. (Ps. 51:17) Enn frer ki apel Robert, ti fer boukou zefor pandan plizir lane pou ki li vinn enn serviter lasanble. Selman, li ti fer enn pese bien grav ek li ti rann li kont ki li ti kas  leker Zeova. Li dir: “Kan mo ti konpran seki mo ti fer, mo konsians ti fatig mwa boukou. Sa ti rann mwa malad. Mo ti plore ek mo ti priye Zeova. Sa lepok-la, mo ti panse ki Zeova zame pa ti pou ekout mo lapriyer ankor, parski mo ti extra desevwar Li.” Kan nou fer enn pese grav, nou kapav santi nou telman mal ki nou koumans panse ki Zeova inn abandonn nou. Nou panse ki li nepli vo lapenn nou servi Li, parski zame Li pa pou pardonn nou. (Ps. 38:4) Eski to ena sa santiman-la? Anou get lexanp enn personaz Biblik ki ti kontign servi Zeova, mem si li ti fer enn pese bien grav.

13. Ki pese bien grav lapot Pier ti fer, ek ki bann lezot erer li ti fer avan ki li fer sa pese-la?

¹³ Personaz Biblik. Lanwit avan lamor Zezi, lapot Pier ti fer plizir erer, ek akoz sa li ti fer enn pese bien grav. Pou koumanse, Pier ti ena tro konfians an limem. Li ti fer gran-nwar kan li ti dir ki, mem si bann lezot zapot abandonn Zezi, li li pou res fidel anver Zezi. (Mark 14:27-29) Apre sa, dan Zardin Zetsemani, plizir fwa Pier pa ti reisi “kontign veye.” (Mark 14:32, 37-41) Ek apre, kan enn lafoul dimounn ti vinn trap Zezi, Pier ti abandonn li. (Mark 14:50) Alafin, Pier ti fer enn pese bien grav kan trwa fwa li ti dir ki li pa konn Zezi. Li ti mem “fer serman ek dir ki li [ti] pou gagn malediksion si li [ti] pe koz manti.” (Mark 14:66-71) Kouma Pier ti reazir kan li ti rann li kont ki li ti fer enn pese bien grav? Li ti abat net ek li ti plore boukou, sirman parski li ti santi li koupab pou seki li ti fer. (Mark 14:72) Sey mazine seki Pier ti resanti kan, de-trwa lertan apre, bann-la ti touy so bon kamarad Zezi! Dan sa ler-la, kitfwa li ti santi li kouma enn lamone zete!

14. Ki kitsoz ti ed Pier pou kontign servi Zeova? (Get lor kouvertir.)

¹⁴ Selman, Pier ti kontign servi Zeova, ek li ti fer sa pou plizir rezon. Pou koumanse, li pa ti res dan so kwin; li ti aksepte led so bann frer ek ser, ki ti rekonfort li ek ankouraz li. (Lik 24:33) Anplis, kan Zezi ti resisite, li ti aparet ar Pier pou ankouraz li. (Lik 24:34; 1 Kor. 15:5) Ek apre, olie ki li ti repros Pier pou so bann erer, Zezi ti dir so bon kamarad Pier ki li ti pou gagn bann gran responsabilite. (Zan 21:15-17) Pier ti kone ki li ti fer enn pese bien grav, selman li ti kontign fer zefor pou fer seki bon. Kifer? Parski li ti sir ki Zezi pa ti abandonn li. Li ti osi gagn led so bann frer ek ser ki ti kontign soutenir  li. Ki leson nou kapav aprann ar lexanp Pier?

15. Ki kitsoz nou bizin sir? (Psom 86:5; Romin 8:38, 39) (Get zimaz osi.)

¹⁵ Leson. Zeova kontan nou ek Li pre pou pardonn nou. (Lir Psom 86:5; Romin 8:38, 39.) Kan nou fer enn pese, li normal ki nou santi nou koupab. Selman, fode pa nou panse ki Zeova pa kontan nou ek ki zame Li pa pou pardonn nou. Okontrer, nou bizin pa tarde pou al rod led. Se seki Robert, ki nou ti mansione taler-la, ti fer. Li dir: “Mo ti fer enn pese parski mo ti tro kont lor momem pou fer fas ar enn tantasion.” Robert ti rann li kont ki li ti bizin rod led bann ansien. Li dir: “Kan mo ti al get bann ansien, deswit zot ti fer mwa santi lamour Zeova. Bann ansien pa ti rezet mwa. Okontrer, zot ti ed mwa pou trouve ki Zeova pa ti abandonn mwa.” Nou osi, nou kapav sir ki Zeova kontan nou ek ki Li pre pou pardonn nou si nou repanti, si nou rod so led, ek si nou fer zefor pou pa refer mem erer. (1 Zan 1:8, 9) Si nou sir ki Zeova kontan nou ek ki Li pre pou pardonn nou, nou pa pou aret servi Li, mem kan nou fer bann erer.

16. Ki nou bien deside pou fer pou nou kontign persevere dan nou servis pou Zeova?

¹⁶ Zeova bien apresie bann zefor ki nou fer pou servi Li dan sa lepok bien difisil la. Avek so led, nou kapav kontign persevere malgre bann difikilte. Nou bizin kontign kontan nou bann frer ek ser, ek pardonn zot kan zot ofans nou. Nou montre ki nou kontan Zeova kan nou konsider nou maryaz kouma enn kitsoz ki sakre, ek kan nou fer tou seki nou kapav pou rezoud bann problem ki nou gagne. Ek kan nou fer enn pese, fode pa nou aret servi Zeova. Okontrer, nou bizin rod so led parski Li kontan nou ek Li pre pou pardonn nou. Nou kapav sir ki nou pou gagn boukou benediksion, si nou pa “dekouraze pou fer seki bon.”—Gal. 6:9.