1-2. Ki benediksion enn kikenn gagne apre so batem?

 NOU bien kontan ki nou’nn pran batem ek ki nou form parti fami Zeova, pa vre! Se enn gran loner pou ena sa kalite relasion-la ar Zeova! Sirman nou ena mem santiman ki David, ki ti dir: “Ere sa kikenn ki to [Zeova] swazir la ek ki to akeyir dan to lakour.”—Ps. 65:4.

² Zeova pa akeyir ninport kisann-la dan so fami. Kouma nou ti trouve dan lartik avan, Zeova vinn pros ar bann dimounn ki fer zefor pou vinn pros ar Li. (Zak 4:8) Ek kan to donn to lavi Zeova ek to pran batem, to vinn pli pros ar Li. To kapav sir ki, apre to batem, Li pou “vid enn benediksion lor [twa] ziska ki pa mank nanye.”—Mal. 3:10; Zer. 17:7, 8.

3. Ki responsabilite tou bann Kretien batize ena? (Ekleziast 5:4, 5)

³ Batem, se koumansman to lavi kouma enn serviter Zeova. Apre to batem, to bizin fer tou seki to kapav pou tini promes ki to’nn fer Zeova ek pou res fidel anver Li. To pou bizin fer sa mem si to gagn bann tantasion ek bann leprev. (Lir Ekleziast 5:4, 5.) To enn disip Zezi, alor to bizin fer to maximum pou swiv so lexanp ek so bann komannman. (Mat. 28:19, 20; 1 Pier 2:21) Sa lartik-la pou ed twa pou fer sa.

“KONTIGN SWIV” ZEZI MALGRE BANN TANTASION EK BANN LEPREV

4. Kan Zezi ti dir ki so bann disip ti pou bizin sarye enn “poto soufrans,” ki li ti pe rod dir? (Lik 9:23)

⁴ Fode pa to panse ki to lavi pou fasil apre to batem. Zezi ti dir ki so bann disip ti pou bizin sarye enn “poto soufrans.” Zot ti pou mem bizin fer sa “zour apre zour.”  (Lir Lik 9:23.) Eski Zezi ti pe rod dir ki so bann disip ti pou touletan ena problem? Non. Li ti pe rod dir ki, anplis bann benediksion ki zot ti pou gagne, zot ti pou osi gagn bann difikilte. Ek sertin parmi sa bann difikilte-la ti pou fer zot bien soufer!—2 Tim. 3:12.

5. Dapre Zezi, kan nou fer bann sakrifis, ki benediksion nou gagne?

⁵ Eski to’nn gagn persekision ar to fami? Ouswa, eski to’nn fer sertin sakrifis pou to kapav met Rwayom Bondie an premie dan to lavi? (Mat. 6:33) Si wi, to kapav sir ki Zeova inn trouv tou seki to’nn fer pou Li. (Ebre 6:10) Ek sirman to’nn trouv sa bann parol Zezi la realize: “Pena personn ki’nn kit lakaz, frer, ser, mama, papa, zanfan, ouswa karo akoz mwa ek akoz bon nouvel ki pa pou gagn 100 fwa plis dan sa lepok-la, lakaz, frer, ser, mama, zanfan, ek karo, avek so persekision, ek dan lemond ki pe vini lavi pou touletan.” (Mark 10:29, 30) Sirman to pou dakor ki bann benediksion ki to’nn gagne, zot boukou plis ki bann sakrifis ki to’nn fer.—Ps. 37:4.

6. Apre to batem, kifer to pou bizin kontign lit kont bann ‘dezir to lekor inparfe’?

⁶ Apre to batem, to pou bizin kontign lit kont bann ‘dezir to lekor inparfe.’ (1 Zan 2:16) Kifer? Parski apre to batem to pou touzour enn kikenn ki fer pese. Parfwa, kitfwa to pou ena mem santiman ki lapot Pol, ki ti dir: “Dan fon momem, mo vremem kontan lalwa Bondie, me dan mo lekor, mo trouv enn lot lalwa ki pe lager kont lalwa ki kontrol mo bann panse ek ki amenn mwa kouma enn prizonie ar lalwa pese ki ena dan mo lekor.” (Rom. 7:22, 23) Par moman, kitfwa to pou dekouraze parski to pe bizin kontign lit kont to bann move dezir. Selman, kan to reflesi lor promes ki to’nn fer Zeova kan to’nn donn Li to lavi, sa kapav ed twa pou fer fas ar ninport ki tantasion. Kifer nou dir sa?

7. Kan to donn to lavi Zeova, kouma sa ed twa pou res fidel anver Li?

⁷ Kan to donn to lavi Zeova, to aret viv pou tomem. Savedir ki to’nn rezet bann dezir ek bann lobzektif personel ki pa fer Zeova plezir. (Mat. 16:24) Lerla, kan to gagn enn tantasion ouswa enn leprev, to pa bizin demann tomem seki to bizin fer. To deza kone seki to bizin fer! To bizin res fidel ar Zeova, ek akoz sa, to pou fer tou seki to kapav pou fer Li plezir. To pou koumadir Zob! Mem si li ti gagn bann gro difikilte, Zob ti bien deside pou fer Zeova plezir. Li ti dir: “Mo pou kontign res fidel ar Bondie!”—Zob 27:5.

8. Kan to reflesi lor promes ki to’nn fer Zeova, kouma sa kapav donn twa lafors pou fer fas ar bann tantasion?

⁸ Kan to reflesi lor promes ki to’nn fer Zeova kan to’nn donn Li to lavi, sa kapav donn twa lafors pou fer fas ar ninport ki tantasion. Anou pran enn lexanp. Eski to pou interese ar enn kikenn ki deza marye? Non zame! To’nn fini promet Zeova ki zame to pa pou fer enn kitsoz koumsa! To’nn promet Li ki to pa pou “fer mem larout ki bann move.” (Prov. 4:14, 15) Alor, kan to pa les bann move dezir devlope dan to leker, to pa bizin lite pou rezet sa bann move dezir-la.

9. Kan to reflesi lor promes ki to’nn fer Zeova, kouma sa kapav ed twa pou fer bann laktivite spiritiel pas an premie dan to lavi?

⁹ Ki to pou fer si to gagn enn travay  ki anpes twa asiste to bann renion regilierman? To deza konn repons sa kestion-la. Avan mem ki to al rod enn travay, to ti deza kone ki to pa pou aksepte enn travay ki pou anpes twa gagn to bann renion. Eski to pou aksepte travay-la, ek apre ki to’nn gagn li, to gete kouma to kapav fer pou met Zeova an premie dan to lavi? To pa pou fer sa, pa vre! Parey kouma Zezi, to pou bien deside pou rezet deswit ninport ki kitsoz ki pa fer Zeova plezir.—Mat. 4:10; Zan 8:29.

10. Apre to batem, kouma Zeova kapav ed twa pou “kontign swiv” Zezi?

¹⁰ Kan to gagn bann leprev ek bann tantasion, sa donn twa lokazion pou montre ki to bien deside pou “kontign swiv” Zezi. Ek to kapav sir ki Zeova pou ed twa pou to reisi fer sa, parski Labib dir: “Bondie li fidel, ek li pa pou les zot gagn enn tantasion ki zot pa kapav siporte, me avek sa tantasion-la, li pou osi donn zot enn mwayin pou sorti ladan, pou ki zot kapav andir sa.”—1 Kor. 10:13.

KI TO BIZIN FER POU KONTIGN SWIV ZEZI?

11. Apre to batem, ki to bizin fer pou to kontign swiv Zezi? (Get zimaz osi.)

¹¹ Zezi ti bien aktif dan so servis pou Zeova, ek gras-a lapriyer, li ti res pros ar Zeova. (Lik 6:12) Apre to batem, ki to bizin fer pou to kontign swiv Zezi? To bizin pran labitid pou fer bann kitsoz ki pou fer twa vinn pros ar Zeova. Labib dir: “Ninport ki kantite progre ki nou finn fer, anou kontign mars dan enn fason ordone dan sa mem direksion-la.” (Fil. 3:16) Detanzantan, to pou tann  koz lor bann frer ek ser ki’nn desid pou fer plis dan zot servis pou Zeova. Kitfwa zot inn fer Lekol pou Bann Evanzelizater Rwayom Bondie, ouswa zot inn al servi kot ti bizin plis proklamater. Si to kapav fixe bann lobzektif koumsa, fer li. Bann serviter Zeova fer zefor pou fer plis dan predikasion. (Zist. 16:9) Me si pou linstan, to pa pe reisi fer plis pou Zeova, fode pa to panse ki lezot pli bon ki twa. Seki pli inportan, se ki to kontign andire ek persevere. (Mat. 10:22) Kan to fer to maximum dapre to kapasite ek to sitiasion, se enn bann meyer fason pou to kontign swiv Zezi ek pou to fer leker Zeova kontan.—Ps. 26:1.

12-13. Ki to kapav fer si to santi ki to nepli aktif parey kouma avan dan to servis pou Zeova? (1 Korintien 9:16, 17) (Get lankadre “ Persevere dan Lekours Kretien.”)

¹² Eski to santi ki to nepli pe priye Zeova ar tou to leker? Eski to’nn perdi to lazwa pou prese, ouswa to’nn perdi gou pou lir Labib? Akoz nou inparfe, li kapav arive ki nou ena sa bann santiman-la. Si to dan sa sitiasion-la, fode pa to panse ki Zeova nepli pe donn twa so lespri sin. Si to santi ki to nepli aktif parey kouma avan dan to servis pou Zeova, reflesi lor lexanp lapot Pol. Pol ti fer boukou zefor pou imit Zezi. Me parfwa, li pa ti santi li motive pou fer sa. (Lir 1 Korintien 9:16, 17.) Selman, li ti dir: “Mem si mo fer sa kont mo volonte, mo ankor ena sa responsabilite ki Bondie finn konfie mwa la.” Alor, mem si parfwa Pol pa ti santi li motive, li ti bien deside pou res aktif dan so servis pou Zeova.

 ¹³ Parey kouma Pol, fode pa ki to les bann santiman negatif afekte to servis pou Zeova. To bizin bien deside pou kontign servi Li, mem si parfwa to pa santi twa motive pou fer sa. Si to kontign fer to maximum pou Zeova, avek letan to bann santiman pou sanze. Alor, apre to batem, gard bann bon labitid spiritiel parski sa pou ed twa pou kontign swiv Zezi. Anplis, kan to bann frer ek ser pou trouv to landirans ek to perseverans, sa pou bien ankouraz zot.—1 Tes. 5:11.

“KONTIGN EXAMINN . . . KONTIGN VERIFIE”

14. Kifer to bizin examinn tomem, ek kouma to kapav fer sa? (2 Korintien 13:5)

¹⁴ Apre to batem, li bien inportan ki to examinn tomem regilierman. (Lir 2 Korintien 13:5.) Par exanp, gete si to pe priye Zeova toulezour, si to pe lir ek etidie Labib, si to pe asiste bann renion, ek si to pe sorti predikasion. Trouv bann fason osi pou to apresie plis sa bann kitsoz-la. Par exanp, poz tomem bann kestion kouma: ‘Kan mo prese, eski mo kapav explik bann lansegnman inportan ki ena dan Labib? Ki mo kapav fer pou mo gagn plis lazwa dan predikasion? Eski mo bann lapriyer presi, ek eski zot montre ki mo kont lor Zeova? Eski mo asiste bann renion regilierman? Kouma mo kapav plis konsantre ek reponn plis dan renion?’

15-16. Ki nou aprann ar lexanp Robert?

¹⁵ Li bien inportan osi ki to konn to bann febles. Enn frer ki apel Robert explike seki ti ariv li. Li dir: “Kan mo ti ena anviron 20 an, mo ti ena enn travay part-time. Enn zour, apre travay, enn tifi dan travay ti invit mwa kot li. Li ti dir mwa ki nou ti pou tousel ek ki nou ti pou ‘pas enn bon moman.’ O-koumansman, mo ti tir bann pretext pou mo pa ale. Me apre, mo ti dir li non kare-kare, ek mo ti explik li kifer.” Robert inn rezet sa tantasion-la, ek nou vremem felisit li pou sa! Selman, kan li’nn repans sa sitiasion-la, li ti rann li kont ki li ti kapav azir pli bien. Li dir: “Mo ti bizin rezet sa tantasion-la deswit, parey kouma Zozef ti fer ar madam Potifar. (Zen. 39:7-9) Mo pa ti atann ki sa ti pou otan difisil pou mo rezet sa tantasion-la. Sa ti ed mwa pou  konpran ki mo ti bien bizin ranforsi mo lamitie ar Zeova.”

¹⁶ Twa osi to pou gagn bann bienfe si to examinn tomem parey kouma Robert ti fer. Mem si to’nn reisi rezet enn tantasion, li bon ki to demann tomem, ‘Eski mo’nn tarde pou rezet sa tantasion-la?’ Si to trouve ki to ti kapav azir pli bien, fode pa to dekouraze. Okontrer, aster-la to kone ki to ena sa febles-la, alor to kapav travay lor la. Priye Zeova lor la, ek fer bann kitsoz ki pou motiv twa pou obeir Li deswit.—Ps. 139:23, 24.

17. Kan nou res fidel ar Zeova, kouma sa donn so nom laglwar?

¹⁷ Ena enn lot kitsoz ankor ki nou kapav aprann ar seki ti ariv Robert. Robert dir: “Apre ki mo ti refiz pou al kot sa tifi-la, li ti dir mwa, ‘To’nn pas test-la!’ Mo ti demann li ki li ti pe rod dir. Li ti explik mwa ki enn so bann kamarad, ki ti enn Temwin avan, ti dir li ki tou bann zenn Temwin amenn doub rol ek ki si zot gagn enn lokazion pou fer enn kitsoz ki pa bon, zot pou fer li. Lerla, li ti dir so kamarad ki li ti pou teste mwa. Kan mo ti aprann sa, mo ti extra fier parski mo ti reisi donn laglwar nom Zeova.”

18. Ki to bien deside pou fer apre to batem? (Get lankadre “ De Lartik ki Pou Ed Twa.”)

¹⁸ Kan to donn to lavi Zeova ek to pran batem, to montre ki to anvi donn laglwar nom Zeova, ninport ki arive. To kapav sir ki Zeova trouv bann tantasion ek bann leprev ki to gagne, ek Li beni tou bann zefor ki to fer pou res fidel anver Li. Li pou osi donn twa so lespri sin pou ki to gagn lafors pou res fidel anver Li. (Lik 11:11-13) Avek led Zeova, to pou kapav kontign swiv Zezi apre to batem.