1. Kifer to ti etone kan, pou premie fwa, to ti partaz laverite ar lezot?

ESKI to rapel moman kot to ti konpran ki to’nn dekouver laverite? Bann lansegnman Labib ki to ti pe aprann ti paret telman kler, pa vre! Kitfwa to ti panse ki tou dimounn ti pou aksepte sa bann verite-la. To ti sir ki bann verite Biblik ti pou ed zot pou ena enn zoli lavi, ek donn zot enn zoli lespwar pou lavenir. (Ps. 119:105) Alor, avek boukou lazwa, to ti partaz bann verite ki to ti aprann avek to bann fami ek to bann kamarad. Me ki ti arive? To ti etone, parski boukou parmi zot ti rezet bann verite ki to ti pe partaz avek zot.

2-3. Dan lepok Zezi, ki kitsoz laplipar dimounn ti panse lor Zezi ek so mesaz?

² Fode pa nou etone si bann dimounn rezet mesaz ki nou prese! Dan lepok Zezi, laplipar dimounn ti rezet li, mem si li ti pe fer bann mirak ki ti montre ki li ti ena faver Bondie. Par exanp, Zezi ti resisit Lazar. Mem so bann opozan pa ti kapav dir ki Zezi pa ti fer sa mirak-la. Me kanmem sa, bann sef relizie Zwif pa ti aksepte Zezi kouma Lemesi. Zot ti mem anvi touy Zezi ek touy Lazar osi!​—Zan 11:47, 48, 53; 12:9-11.

³ Zezi ti kone ki boukou dimounn pa ti pou aksepte li kouma Lemesi. (Zan 5:39-44) Li ti dir bann disip Zan Batis: “Ere sa dimounn ki pa trouv okenn rezon pou tonbe akoz mwa.” (Mat. 11:2, 3, 6, NW) Kifer sa kantite dimounn-la ti rezet Zezi?

4. Ki nou pou examine dan sa lartik-la?

⁴ Dan sa lartik-la, ek osi dan prosin lartik, nou pou get plizir rezon kifer boukou dimounn dan premie siek pa ti ena lafwa an Zezi. Nou pou gete osi kifer boukou  dimounn azordi rezet mesaz ki nou prese. Me pli inportan, nou pou aprann kouma nou kapav ena enn lafwa for an Zezi pou ki nou pa tonbe.

5. Kifer sertin ti panse ki Zezi pa ti Lemesi?

⁵ Boukou dimounn ti rezet Zezi akoz so pase. Zot ti dakor ki Zezi ti enn gran ansegnan ek ki li ti pe fer boukou mirak. Me pou zot, li ti zis garson enn sarpantie. Anplis, li ti sorti Nazaret, enn lavil ki pa ti inportan pou boukou dimounn. Mem Natanael, ki ti vinn disip Zezi apre, ti dir: “Eski kiksoz de bon kapav sorti Nazaret?” (Zan 1:46) Kitfwa Natanael pa ti kontan lavil kot Zezi ti grandi. Ouswa kitfwa li ti konn profesi ki trouv dan Mishe 5:2, ki ti predir ki Lemesi ti pou ne dan Betleem, pa dan Nazaret.

6. Dan lepok Zezi, ki kitsoz ti kapav ed bann dimounn pou kone ki Zezi limem Lemesi?

⁶ Ki Labib dir? Profet Izai ti predir ki bann lennmi Zezi pa ti pou interese pou kone dan ki fami Lemesi ti sorti. (Iza. 53:8) Pourtan, ti ena boukou profesi ki ti donn bann linformasion lor la. Si sa bann dimounn-la ti pran letan pou examinn sa bann linformasion-la, zot ti pou kone ki Zezi ti ne dan Betleem ek ki li ti enn desandan Lerwa David. (Lik 2:4-7) Alor, parey kouma Mishe 5:2 montre, Zezi ti ne dan Betleem. Ki problem sa bann dimounn-la ti ena? Zot pa ti pran letan pou verifie tou bann linformasion ek zot ti tir zot prop konklizion. Akoz sa, zot ti rezet Zezi.

7. Azordi, kifer boukou dimounn rezet bann serviter Zeova?

⁷ Eski ena mem problem azordi? Wi. Azordi, laplipar parmi bann serviter Zeova zot pa ris ek zot pa bann dimounn inportan. Akoz sa, boukou dimounn panse ki zot bann dimounn “sinp e san ledikasion.” (Zist. 4:13) Sertin dimounn panse ki bann Temwin Zeova bizin pa ansegn Labib, parski zot pa finn al dan bann gran lekol relizie. Ena osi ki panse ki bann Temwin Zeova zot enn “relizion Ameriken.” Me an realite, laplipar bann Temwin Zeova pa res dan Lamerik. Ena dimounn osi ki panse ki bann Temwin Zeova pa krwar dan Zezi. Pandan plizir lane, sertin dimounn finn konsider nou kouma bann “Konimist,” “bann espion Ameriken,” ouswa “bann extremis.” Akoz bann zistwar ki zot inn tande lor nou, boukou dimounn pa anvi vinn Temwin Zeova, ek zot pa konn laverite lor bann serviter Zeova.

8. Dapre Zistwar Bann Apot 17:11, ki kitsoz bann dimounn bizin fer si zot anvi kone kisannla pe servi Bondie azordi?

⁸ Ki kitsoz enn kikenn bizin fer pou ki so lafwa pa vinn feb? Li bizin examinn tou bann linformasion pou konn laverite. Se seki Lik, enn ekrivin Levanzil, ti fer. Li ti fer zefor “pou bien pran ransegnman lor seki finn pase exakteman.” Li ti anvi ki so bann lekter “trouve ki sa bann lansegnman” ki zot finn gagne lor Zezi la, “zot bien solid.” (Lik 1:1-4) Bann abitan Bere osi ti parey kouma Lik. Kan zot ti tann bonn nouvel lor Zezi pou premie fwa, zot ti al examinn bann Lekritir Ebre pou verifie si seki zot ti tande ti vre. (Lir Zistwar Bann Apot 17:11.) Dan mem fason, si enn dimounn anvi konn laverite, li bizin examinn tou bann linformasion. Li bizin konpar seki bann serviter Bondie pe ansegn li avek seki ena dan Labib. Li bizin osi etidie listwar bann  serviter Zeova dan nou lepok. Si li fer sa, li pa pou tir bann fos konklizion, ek li pa pou les li inflianse par bann zistwar ki li tande.

9. Ki ti arive kan Zezi ti refiz fer enn mirak?

⁹ Dan lepok Zezi, sertin dimounn ti pe rod bann prev ki Zezi ti Lemesi. Me so bann lansegnman pa ti ase pou zot. Zot ti demann li “enn sign depi lesiel.” (Mat. 16:1) Kitfwa zot ti anvi ki li donn zot enn sign akoz seki zot ti lir dan Daniel 7:13, 14. Selman, pa ti ankor ler pou ki Zeova realiz sa profesi-la. Seki Zezi ti ansegn zot ti bizin ase pou konvink zot ki limem Lemesi. Me kan Zezi ti refiz fer enn mirak, zot ti rezet li.​—Mat. 16:4.

10. Kouma Zezi ti realiz seki Izai ti ekrir lor Lemesi?

¹⁰ Ki Labib dir? Konsernan Lemesi, profet Izai ti ekrir: “Li pa pou kriye, ni koz for, ek li pa pou fer tann so lavwa lor sime.” (Iza. 42:1, 2) Zezi ti akonpli so minister san ki li atir latansion lor limem. Li pa ti aranz bann gran-gran tanp, li pa ti met bann linz extravagan lor li, ek li pa ti fer apel li par bann gran-gran tit relizie. Devan Lerwa Erod, Zezi ti refiz fer enn mirak pou fer plezir Lerwa Erod, mem si so lavi ti an danze. (Lik 23:8-11) Li vre ki Zezi ti fer bann mirak, me seki ti pli inportan pou li se pres bonn nouvel. Li ti dir so bann disip: “Akoz samem mo finn vini.”​—Mark 1:38.

11. Ki fos lide sertin dimounn ena azordi?

¹¹ Eski ena mem problem azordi? Wi. Azordi, boukou dimounn inpresione ar bann gran batiman relizie kot ena bann dekorasion bien ser ladan. Zot inpresione osi par bann sef relizie ki ena bann gran tit, ek bann seremoni ki laplipar dimounn nepli rapel zot lorizinn ek zot sinifikasion. Bann dimounn ki asiste sa bann seremoni relizie la, zot pa aprann boukou kitsoz lor Bondie ek so proze. Parkont, bann dimounn ki asiste nou bann renion, zot aprann kouma zot  bizin servi Zeova ek osi kouma zot bizin azir an-akor avek so volonte. Nou bann Lasal Renion zot prop ek sinp, ek pena bann dekorasion ki extravagan ladan. Bann frer ki diriz nou laktivite zot pa met bann linz spesial, ek zot pena bann gran-gran tit ki fer zot paret inportan. Nou lansegnman ek nou krwayans sorti dan Labib. Me kanmem sa, boukou dimounn azordi rezet nou mesaz parski zot panse ki fason ki nou ador Bondie li tro sinp. Anplis, seki nou ansegne pa fer zot plezir.

12. Dapre Ebre 11:1, 6, kouma nou ranforsi nou lafwa?

¹² Ki nou bizin fer pou ki nou lafwa pa vinn feb? Lapot Pol ti dir bann Kretien ki ti res Rom: “Dimoun gagn lafwa par mesaz ki zot tande, e mesaz ki anonse, li lor Lekris.” (Rom. 10:17) Alor, nou ranforsi nou lafwa kan nou etidie Labib, pa kan nou partisip dan bann seremoni relizie ki pa Biblik, mem si sa bann seremoni-la zot bien zoli ek zot inpresionan. Nou ranforsi nou lafwa gras-a enn konesans exakt lor bann verite Biblik, ek “san lafwa, personn pa kapav fer Bondie plezir.” (Lir Ebre 11:1, 6.) Alor, nou pa bizin trouv bann gran-gran sign dan lesiel pou kone ki nou dan laverite. Kan nou etidie Labib an profonder ek ki nou ranforsi nou lafwa, sa pou konvink nou ki nou dan laverite ek sa pou tir tou bann dout ki nou kapav ena.

13. Kifer boukou dimounn ti rezet Zezi?

¹³ Bann disip Zan Batis ti etone parski bann disip Zezi pa ti gard karem. Zezi ti explik zot ki so bann disip pa ti bizin gard karem parski li ti ankor vivan. (Mat. 9:14-17) Me kanmem sa, bann Farizien ek bann opozan Zezi ti rezet li, parski li pa ti swiv zot bann koutim ek tradision. Zot ti ankoler osi parski li ti geri bann dimounn malad pandan Saba. (Mark 3:1-6; Zan 9:16) Mem si zot ti fier  pou dir ki zot ti pe obeir Lalwa lor Saba, sa bann sef relizie la pa ti ena okenn problem pou fer biznes dan tanp. Ek zot ti bien ankoler kan Zezi ti kondann zot pou sa. (Mat. 21:12, 13, 15) Ek kan Zezi ti prese dan sinagog dan Nazaret, boukou dimounn ti ankoler parski li ti servi bann lexanp dan lepase pou fer zot konpran ki zot ti egois ek ki zot pa ti ena lafwa. (Lik 4:16, 25-30) Zezi pa ti azir kouma zot ti pe atann. Akoz sa, boukou dimounn ti rezet li.​—Mat. 11:16-19.

14. Kifer Zezi ti kondann bann tradision ki pa an-akor avek bann Lekritir?

¹⁴ Ki Labib dir? Zeova ti fer profet Izai ekrir: “Sa pep-la inn vinn ver mwa avek zot labous ek zot onor mwa avek zot lalev, me zot leker bien lwin ar mwa, ek zot lakrint pou mwa, li dapre bann komannman ki bann zom finn ansegn zot.” (Iza. 29:13) Zezi ti ena rezon pou kondann bann tradision ki pa ti an-akor avek bann Lekritir. Bann dimounn ki ti panse ki bann lalwa ek tradision imin ti pli inportan ki bann Lekritir, zot ti rezet Zeova ek so Garson, Zezi.

15. Azordi, kifer boukou dimounn pa kontan bann Temwin Zeova?

¹⁵ Eski ena mem problem azordi? Wi. Boukou dimounn ankoler parski bann Temwin Zeova pa selebre bann fet ki pa an-akor avek Labib, kouma par exanp bann laniverser ek Nwel. Boukou dimounn ankoler osi parski bann Temwin Zeova pa partisip dan bann fet nasional, ek zot pa swiv bann koutim ki ena enn lien avek bann dimounn mor ek ki pa an-akor avek Labib. Sa bann dimounn-la kitfwa panse ki Bondie aksepte fason ki zot ador Li. Me zot pa kapav fer Bondie plezir si zot prefer swiv bann tradision sa lemond-la olie ki zot swiv bann lansegnman Labib.​—Mark 7:7-9.

16. Dapre Psom 119:97, 113, 163-165, ki kitsoz nou bizin fer ek ki kitsoz nou bizin rezete?

¹⁶ Ki nou bizin fer pou ki nou lafwa pa vinn feb? Nou bizin ogmant nou lamour pou bann lalwa ek bann prinsip Zeova. (Lir Psom 119:97, 113, 163-165.) Kan nou kontan Zeova, nou pou rezet tou bann tradision ki pa fer Li plezir. Nou pa pou les nanye vinn pli inportan ki nou lamour pou Zeova.

17. Dan lepok Zezi, ki kitsoz boukou dimounn ti panse Lemesi ti pou fer ?

¹⁷ Dan lepok Zezi, boukou dimounn ti anvi ki ena enn sanzman politik. Zot ti panse ki Lemesi ti pou liber zot ar dominasion bann Romin, ki ti pe fer bien dominer ar zot. Me kan zot ti esey fer Zezi vinn zot lerwa, li ti refize. (Zan 6:14, 15) Bann pret ek lezot ankor ti per tansion Zezi esey sanz gouvernman. Lerla, bann Romin ti pou ankoler ek zot ti pou tir lotorite ki zot ti donn bann pret. Akoz sa bann problem politik la, boukou Zwif ti rezet Zezi.

18. Ki profesi konsernan Lemesi boukou dimounn pa ti pran kont?

¹⁸ Ki Labib dir? Mem si boukou profesi ti predir ki Lemesi ti pou enn gran Gerye, ti ena lezot profesi ki ti montre ki li ti pou bizin mor pou nou bann pese avan. (Iza. 53:9, 12) Bann Zwif ti ena enn lide bien presi lor seki Lemesi ti pou fer kan li ti pou vini, me sa pa ti pas kouma zot ti pe atann. Ki problem boukou Zwif ti ena? Zot pa ti pran kont bann profesi ki  pa ti pou rezoud zot bann problem deswit.​—Zan 6:26, 27.

19. Kifer boukou dimounn rezet bann Temwin azordi?

¹⁹ Eski ena mem problem azordi? Wi. Boukou dimounn rezet bann Temwin azordi, parski nou pa partisip dan bann zafer politik. Zot panse ki nou bizin vote pou bann eleksion. Selman, si nou vot pou enn dirizan imin, se koumadir nou pe rezet Zeova. (1 Sam. 8:4-7) Sertin dimounn panse osi ki nou bizin konstrir bann lekol ek bann lopital, ek fer bann travay sosial. Zot rezet bann Temwin parski nou fer boukou zefor pou pres bonn nouvel, olie ki nou esey rezoud bann problem ki ena dan lemond.

20. Kouma nou trouve dan Matie 7:21-23, ki kitsoz bizin nou priorite?

²⁰ Ki nou bizin fer pou ki nou lafwa pa vinn feb? (Lir Matie 7:21-23.) Nou priorite se fer travay ki Zezi inn donn nou lord pou fer. (Mat. 28:19, 20) Fode pa ki nou les nou distrer par bann problem sosial ek politik ki ena dan sa lemond-la. Nou kontan bann dimounn ek nou gagn zot traka, me nou kone ki meyer fason ki nou kapav ed zot se kan nou ansegn zot lor Rwayom Bondie ek nou ed zot pou vinn kamarad Zeova.

21. Ki kitsoz nou bien deside pou fer?

²¹ Dan sa lartik-la, nou finn examinn kat rezon kifer boukou dimounn finn rezet Zezi dan premie siek ek kifer zot pe rezet bann disip Zezi azordi. Dan prosin lartik, nou pou examinn kat lezot rezon ankor. Anou bien deside pou pa les nanye fer nou rezet Zezi ek anou gard nou lafwa bien for!