1. Ki bon lexanp Zezi inn donn so bann disip, ek kouma zot inn swiv so lexanp? (Get zimaz lor kouvertir.)

KAN li ti lor later, Zezi ti gard enn latitid pozitif lor so minister, ek li ti anvi ki so bann disip osi fer parey. (Zan 4:35, 36) Kan Zezi ti avek so bann disip, zot ti bien kontan prese. (Lik 10:1, 5-11, 17) Selman, kan bann dimounn ti aret Zezi ek ti touy li, bann disip pandan enn tan ti perdi zot lanvi pou prese. (Zan 16:32) Apre so rezireksion, Zezi ti ankouraz so bann disip pou kontign prese. Ek apre ki Zezi ti mont dan lesiel, so bann disip ti fer telman zefor pou prese, ki zot bann lennmi ti dir: “Zot finn ranpli Zerizalem avek zot lansegnman.”​—Zist. 5:28.

2. Kouma Zeova ti beni zot travay predikasion?

² Zezi ti diriz travay predikasion bann Kretien dan premie siek, ek Zeova ti ed zot. Alor, boukou dimounn ti aksepte zot mesaz. Par exanp, pandan Lapantkot 33 Nou Lepok, anviron 3,000 dimounn ti pran batem. (Zist. 2:41) Ek kantite bann disip ti pe kontign ogmante. (Zist. 6:7) Anplis, Zezi ti predir ki ti pou ena pli boukou dimounn ankor ki ti pou aksepte bonn nouvel pandan bann dernie zour.​—Zan 14:12; Zist. 1:8.

3-4. Kifer predikasion kapav difisil dan sertin landrwa, ek ki nou pou examine dan sa lartik-la?

³ Nou tou nou anvi gard enn latitid pozitif lor nou minister. Dan sertin pei, li fasil pou fer sa. Kifer? Dan sa bann pei-la, ena telman boukou dimounn ki interese pou etidie Labib, ki nou bann frer ek ser bizin fer enn lalis avek nom bann dimounn ki interese ek atann ki enn proklamater disponib pou fer letid-la. Me dan lezot pei, bann proklamater gagn boukou difikilte pou prese. Par exanp, bann dimounn pa souvan lakaz kot zot, ek bann ki kot zot, zot pa interese ar Labib.

 ⁴ Si to res dan enn landrwa kot difisil pou prese, dan sa lartik-la to pou trouv de-trwa sigzesion ki kapav ed twa. Nou pou gete osi seki sertin finn fer pou zwenn pli boukou dimounn dan predikasion. Ek nou pou gete kouma nou kapav res pozitif mem si bann dimounn pa interese ar nou mesaz.

5. Ki difikilte boukou Temwin gagne?

⁵ Boukou Temwin inn remarke ki li pe vinn deplizanpli difisil pou zwenn bann dimounn kot zot. Sertin proklamater res dan bann landrwa kot boukou dimounn res dan bann flat ki bien sekirize ouswa dan bann morselman prive. Dan sa bann plas-la, kitfwa bann gardien sekirite anpes bann dimounn pou rantre, amwin ki zot ena permision enn dimounn ki res la. Ena lezot proklamater ki kapav prese lakaz-lakaz san okenn problem, selman zot pa zwenn boukou dimounn kot zot. Ena osi bann proklamater ki bizin pres dan bann lakanpagn ouswa dan bann landrwa izole, kot bien tigit dimounn reste. Sa bann proklamater-la kitfwa bizin al bien lwin pou kapav zwenn enn sel dimounn, ek li posib ki sa dimounn-la pa lakaz kot li. Si nou pres dan bann teritwar koumsa, fode pa nou bes lebra! Ki nou kapav fer pou sirmont sa bann difikilte-la ek pres ar pli boukou dimounn?

6. Kifer nou kapav konpar bann proklamater ar bann peser pwason?

⁶ Zezi ti konpar travay predikasion ar metie peser. (Mark 1:17) Bann peser kapav lapes pandan plizir zour san gagn okenn pwason. Pourtan, zot pa bes lebra; zot adapte zot. Par exanp, zot sanz plas, ler, ek fason ki zot lapes. Dan mem fason, nou bizin adapte nou kan nou prese. Anou get de-trwa sigzesion.

7. Ki rezilta nou kapav gagne si nou prese dan diferan ler?

⁷ Pres dan diferan ler. Nou pou zwenn pli boukou dimounn si nou prese kan zot lakaz kot zot. Ariv enn moman, tou dimounn bizin retourn lakaz kot li, pa vre! Boukou frer ek ser inn trouve ki zot zwenn pli boukou dimounn kan zot prese dan lapremidi ouswa dan lasware. Anplis, dan sa bann ler-la, kitfwa bann dimounn pli rilax ek plis dispoze pou koz ar nou. Nou kapav osi swiv sigzesion enn ansien ki apel David. Li explike ki, kan li ek so konpagnon fini prese dan enn teritwar, deswit zot fer bann absan ki zot inn gagne sa zour-la. David dir: “Mo etone komie dimounn mo zwenn kan mo fer bann absan.” *

8. Kouma nou kapav aplik Ekleziast 11:6 dan nou minister?

⁸ Nou bizin kontign esey rod bann dimounn lakaz kot zot. Text prinsipal sa lartik-la rapel nou latitid ki nou bizin ena. (Lir Ekleziast 11:6. *) David, ki nou’nn mansione avan, pa ti bes lebra. Apre plizir fwa ki li ti esey zwenn enn absan, finalman li ti reisi zwenn dimounn-la. Dimounn-la ti interese pou koz lor Labib, ek li ti dir: “Sa fer apepre wit an ki mo res la, ek zame mo pa’nn zwenn enn Temwin Zeova devan mo laport.” David dir: “Mo’nn remarke ki, kan nou  reisi zwenn enn dimounn kot li, souvan li ekout nou mesaz.”

9. Kouma sertin Temwin inn reisi zwenn bann dimounn ki zot ti pe gagn difikilte pou zwenn?

⁹ Pres dan diferan plas. Pou zot reisi zwenn bann dimounn ki pa lakaz kot zot, sertin proklamater inn al rod sa bann dimounn-la dan lezot plas. Par exanp, zot prese lor semin ek zot fer prezantwar. Sa bann metod-la bien efikas pou zwenn bann dimounn ki res dan bann flat kot pa kapav prese. Lerla, sa bann proklamater-la reisi koz avek bann dimounn ki normalman zot pa ti pou zwenn. Sertin proklamater inn remarke osi ki bann dimounn plis dispoze pou ekoute ek aksepte bann piblikasion kan zot dan bann zardin piblik, bann bazar, ek bann landrwa komersial. Floiran, enn responsab sirkonskripsion dan Bolivi, dir: “Nou pres dan bann bazar ek dan bann landrwa komersial ant enn-er ek trwa-z-er lapremidi, parski sa ler-la bann marsan mwin okipe. Souvan, nou gagn bann bon konversasion, ek nou mem koumans bann letid Labib.”

10. Ki metod ankor to kapav servi pou prese?

¹⁰ Pres dan diferan fason. Fer koumadir to’nn esey zwenn enn dimounn plizir fwa. To’nn esey zwenn li dan diferan ler, me to pa’nn reisi zwenn li. Eski ena lezot fason pou to reisi pres avek sa dimounn-la? Katarína dir: “Mo ekrir bann let pou bann dimounn ki mo pa zwenn kot zot. Mo ekrir seki mo ti pou dir zot si mo ti zwenn zot.” Ki leson nou aprann? Kan to prese, esey diferan metod pou to kapav pres ar tou bann dimounn dan to teritwar.

11. Kifer sertin dimounn pa interese ar nou mesaz?

¹¹ Sertin dimounn pa interese ar nou mesaz. Zot pa trouv sa inportan pou konn Bondie, ouswa pou kone ki ena dan Labib. Zot pa krwar dan Bondie akoz sa kantite soufrans ki ena dan lemond-la. Zot rezet Labib parski zot trouve kouma bann sef relizie, ki swadizan swiv bann lansegnman ki ena dan Labib, zot bann ipokrit. Ena bann dimounn osi ki okipe ar zot travay ek zot fami, ouswa zot ena bann problem personel, ek zot pa trouve kouma Labib kapav ed zot. Kan nou pres ar bann dimounn ki panse ki nou mesaz pa inportan, kouma nou kapav gard nou lazwa?

12. Kan nou swiv konsey ki ena dan Filipien 2:4, kouma sa kapav ed nou dan nou minister?

¹² Montre dimounn-la ki to gagn so traka. Boukou dimounn ki, o-koumansman pa ti interese ar nou mesaz, inn aksepte pou ekout nou kan zot inn remarke kouma bann proklamater vremem gagn zot traka. (Lir Filipien 2:4.) Par exanp, David, ki nou’nn mansione avan, dir: “Si enn dimounn dir nou ki li pa interese, nou ramas nou Labib ek nou piblikasion, ek nou demann li, ‘Eski mo kapav kone kifer ou pa interese?’” Bann dimounn santi kan lezot gagn zot traka. Zot kapav bliye seki nou’nn dir zot, me kitfwa zot pou rapel seki zot inn resanti kan nou’nn koz avek zot. Mem kan nou prese lakaz-lakaz ek ki enn dimounn pa anvi koz avek nou, par nou latitid ek bann expresion nou figir, nou kapav montre li ki nou gagn so traka.

13. Kouma nou kapav fer nou mesaz vinn pli interesan?

¹³ Kan nou prese lakaz-lakaz, nou montre ki nou interese ar bann dimounn kan nou adapte nou mesaz ar sak dimounn ki nou zwenn. Par exanp, kitfwa nou’nn ariv devan enn lakaz ek nou remarke ki ena bann zanfan ki res la. Alor, nou kapav koz ar bann paran-la lor bann bon konsey ki Labib done lor kouma pou elve bann zanfan, ouswa lor kouma pou gagn enn lavi fami ki ere. Eski nou’nn remarke ki enn lakaz ena kamera, alarm, ouswa antivol? Si nou zwenn dimounn ki res dan sa lakaz-la, nou kapav koz lor laviolans ek kouma bann dimounn per azordi. Kitfwa dimounn-la pou bien kontan pou aprann ki tousala pou arete enn zour. Sak fwa ki to zwenn enn dimounn ki anvi ekout twa, esey montre li kouma bann konsey ki ena  dan Labib kapav ed li. Katarína, ki nou’nn mansione avan, dir: “Mo mazine momem kouma laverite finn sanz mo lavi.” Lerla, sa santiman-la fer Katarína ena plis konviksion kan li koze, ek bann dimounn avek ki li koze resanti sa.

14. Dapre Proverb 27:17, kouma nou bann konpagnon Kretien kapav ed nou?

¹⁴ Aprann ar lezot. Dan premie siek, lapot Pol ti montre Timote kouma pou prese ek ansegne, ek li ti ankouraz Timote pou fer parey avek lezot. (1 Kor. 4:17, NW) Parey kouma Timote, nou osi nou kapav aprann boukou ar bann frer ek ser ki ena lexperyans. (Lir Proverb 27:17. *) Anou get lexanp enn frer ki apel Shawn. Pandan enn tan, li ti fer pionie dan bann vilaz kot bann dimounn kontan zot relizion. Kouma li ti reisi gard so lazwa? Li dir: “Laplipar ditan, mo pa ti pres tousel, mo ti ena enn konpagnon avek mwa. Ant de lakaz, nou ti ed nou kamarad pou amelior nou fason ansegne. Par exanp, ant de lakaz, nou ti koz lor seki dimounn-la inn dir nou ek lor kouma nou’nn reponn li. Apre sa, nou ti reflesi lor kouma nou ti pou kapav reponn dan enn lot fason si nou ti regagn mem sitiasion.”

15. Kifer lapriyer bien inportan pou nou minister?

¹⁵ Priye Zeova pou gagn so led. Rod led Zeova sak fwa ki to prese. Dan tou seki nou fer, nou bizin led lespri sin. (Ps. 127:1; Lik 11:13) Kan to priye Zeova, to bizin presi. Par exanp, to kapav demann Li pou gid twa ver enn kikenn ki anvi aprann konn Li ek ki dispoze pou ekout twa. Apre sa, to bizin fer zefor pou pres ar tou dimounn ki to zwenn.

16. Kifer nou letid personel bien inportan pou nou minister?

¹⁶ Rezerv letan pou to letid personel. Labib dir: “Verifie par zotmem ki volonte Bondie, li bon, li akseptab ek li parfe.” (Rom. 12:2, NW) Kan nou etidie Labib, nou aprann konn Bondie pli bien. Lerla, kan nou koz lor Bondie avek lezot, zot pou trouve ki nou vremem krwar dan seki nou ansegne. Katarína, ki nou’nn mansione avan, dir: “Pa tro lontan, mo ti realize ki mo ti bizin ranforsi mo lafwa dan bann lansegnman inportan ki ena dan Labib. Alor, mo ti etidie an detay bann prev ki montre ki ena enn Kreater, ki Labib vremem Parol Bondie, ek ki Bondie ena enn lorganizasion ki reprezant Li lor later.” Katarína dir ki so letid personel ti ranforsi so lafwa ek ti fer li gagn plis lazwa dan so minister.

17. Kifer Zezi ti gard enn latitid pozitif lor so minister?

¹⁷ Mem si boukou dimounn pa ti interese ar so mesaz, Zezi ti res bien pozitif ek li ti kontign prese. Kifer? Li ti kone ki bann dimounn ti bien bizin konn laverite, ek li ti anvi ki maximum dimounn gagn lokazion pou aksepte bonn nouvel. Li ti kone osi ki, bann dimounn ki o-koumansman pa ti aksepte laverite, avek letan zot ti kapav sanze. Par exanp, anou gete seki ti arive dan Zezi so fami. Pandan sa trwa-z-an edmi ki Zezi ti prese la, okenn parmi so bann frer pa ti vinn so disip. (Zan 7:5) Selman, zot ti vinn bann Kretien apre so rezireksion.​—Zist. 1:14.

18. Kifer nou kontign prese?

¹⁸ Nou pa kone kisannla pou aksepte laverite ek servi Zeova. Sertin dimounn  kapav pran plis letan ki lezot pou konpran laverite. Ena osi bann dimounn ki pa anvi ekout nou, me kan zot trouv nou bon kondwit ek nou latitid pozitif, avek letan zot kapav sanze ek koumans “glorifie Bondie.”​—1 Pier 2:12.

19. Ki kitsoz 1 Korintien 3:6, 7 ansegn nou konsernan nou minister?

¹⁹ Mem si se nou ki plante ek aroze, nou bizin rapel ki se Bondie ki fer pouse. (Lir 1 Korintien 3:6, 7.) Getahun, enn frer dan Letiopi, dir: “Pandan plis ki 20 an, mo ti sel Temwin Zeova dan mo landrwa. Me asterla, ena 14 proklamater dan landrwa. Trez parmi zot inn fini pran batem, parmi ena mo madam ek mo trwa zanfan. Ena anviron 32 dimounn ki asiste renion.” Getahun bien kontan ki li’nn kontign prese ek atann ki Zeova ed bann dimounn pou koumans servi Li!​—Zan 6:44.

20. Kifer nou parey kouma bann sovter?

²⁰ Lavi tou dimounn ena valer pou Zeova. Li’nn donn nou privilez pou travay ansam avek so Garson pou rasanble bann dimounn ki sorti dan tou bann nasion, avan ki lafin vini. (Aze 2:7) Nou kapav konpar nou travay predikasion ar enn mision sovtaz. Ek nou, nou form parti enn lekip sovter ki pe al sov bann dimounn ki’nn pieze dan enn laminn. Mem si se zis de-trwa sovter dan lekip-la ki pou trouv bann dimounn, travay ki sak sovter fer li bien inportan. Li parey pou nou travay predikasion osi. Nou pa kone komie dimounn nou pou reisi sove dan lemond Satan, me Zeova kapav servi sakenn parmi nou pou ed zot. Andreas, ki res Bolivi, dir: “Kan enn dimounn aksepte laverite ek pran batem, se gras-a zefor boukou dimounn ki’nn travay ansam pou ed li.” Nou osi, anou kontign gard enn latitid pozitif lor nou minister. Si nou fer sa, Zeova pou beni nou ek nou pou gagn boukou lazwa dan nou minister.