1-2. Ki kitsoz enn ekrivin ti dir, ek ki nou pou examine dan sa lartik-la?

AZORDI, bann milyon dimounn dir ki zot krwar dan Zezi, me zot pa aksepte so lansegnman. (2 Tim. 4:3, 4) Enn ekrivin ti dir: “Si ti ena enn lot Zezi parmi nou azordi ki ti dir bann mem kitsoz ki Zezi ti dir . . . , eski nou ti pou rezet li parey kouma bann dimounn ti rezet li dan premie siek? . . . Repons-la se: Wi, nou ti pou rezet li.”

² Dan premie siek, boukou dimounn ti tann Zezi ansegne ek zot ti trouv li fer bann mirak, me zot pa ti ena lafwa an li. Kifer? Dan lartik avan, nou ti get kat rezon kifer bann dimounn ti rezet Zezi. Anou get kat lezot rezon ankor. Nou pou gete osi kifer boukou dimounn azordi rezet bann disip Zezi, ek kouma nou kapav fer sir ki nou pa les nanye anpes nou servi Zeova.

3. Kifer boukou dimounn ti rezet Zezi?

³ Kan li ti lor later, Zezi ti frekant tou kalite dimounn. Li ti al manze kot bann dimounn ki ris ek ki ena lotorite, me li ti osi pas letan avek bann ti-dimounn ki ti mizer. Anplis, li ti ena konpasion pou bann dimounn ki lezot ti konsider kouma bann “peser.” Akoz sa, bann dimounn ki fier ti rezet Zezi. Zot ti demann so bann disip: “Kifer zot pe manze-bwar avek bann komi tax ek bann peser?” Lerla, Zezi ti reponn: “Seki bien pa bizin dokter, me seki malad ki bizin; mo pa finn vinn apel bann zis me bann peser pouki zot repanti.”​—Lik 5:29-32.

4. Dapre profet Izai, ki kitsoz bann Zwif ti bizin atann konsernan Lemesi?

⁴ Ki Labib dir? Boukou lane avan ki Lemesi vini, profet  Izai ti fini predir ki lemond pa ti pou aksepte li. Li ti dir: “Zot ti mepriz li ek bann dimounn ti evit li . . . Se koumadir ti kasiet so figir pou nou pa trouv li. Dimounn ti mepriz li ek nou ti konsider li kouma enn nanye ditou.” (Iza. 53:3) Sa profesi-la montre ki bann “dimounn” ti pou evit Lemesi. Alor, bann Zwif dan premie siek ti bizin atann ki bann dimounn ti pou rezet Zezi.

5. Ki lopinion boukou dimounn ena lor bann disip Zezi azordi?

⁵ Eski ena mem problem azordi? Wi. Boukou sef relizie bien kontan kan bann dimounn inportan ek ris vinn bann manb zot relizion. Zot aksepte sa bann dimounn-la dan zot relizion mem si sa bann dimounn-la fer bann kitsoz ki Zeova deteste. Parkont, bann sef relizie pena enn bon lopinion lor bann Temwin ki fer zefor pou servi Zeova ek ki ena bann bon prinsip moral. Kifer? Parski pou boukou dimounn, bann Temwin Zeova zot pa bann dimounn inportan. Parey kouma lapot Pol ti dir, Bondie finn swazir bann dimounn ki lezot “meprize.” (1 Kor. 1:26-29) Selman, pou Zeova, tou so bann fidel serviter ena valer pou Li.

6. Ki Zezi ti dir dan Matie 11:25, 26, ek kouma nou kapav imit li?

⁶ Ki nou bizin fer pou ki nou lafwa pa vinn feb? (Lir Matie 11:25, 26.) Fode pa nou les nou inflianse par fason ki lemond konsider bann serviter Bondie. Nou bizin aksepte ki Zeova servi zis bann dimounn ki ena limilite pou fer so volonte. (Ps. 138:6) Ek reflesi osi komie kitsoz Zeova inn reisi fer gras-a bann dimounn ki lemond konsider kouma bet ek san lintelizans.

7. Kifer Zezi ti dir bann Farizien ki zot bann ipokrit, ek kouma zot ti reazir?

⁷ Avek kouraz, Zezi ti kondann bann sef relizie dan so lepok parski zot pa ti ansegn lepep kouma pou ador Zeova dan enn bon fason. Par exanp, Zezi ti dir bann Farizien ki zot ti bann ipokrit parski zot ti plis trakase ar fason ki zot ti lav zot lame, ki pran swin zot paran. (Mat. 15:1-11) Bann disip Zezi kitfwa ti etone kan Zezi ti dir sa. Akoz sa, zot ti dir li: “Eski to kone ki bann Farizien ofanse kan zot tann twa koz koumsa?” Zezi ti reponn zot: “Les zot trankil; zot kouma enn lider aveg ki pe diriz bann aveg. E si enn aveg diriz enn lot aveg, toulede pou tom dan trou.” (Mat. 15:12-14) Mem si bann sef relizie ti ankoler avek Zezi akoz bann kitsoz ki li ti dir, Zezi pa ti aret dir laverite.

8. Kouma Zezi ti montre ki Bondie pa aksepte tou bann lansegnman relizie?

⁸ Zezi ti montre osi ki sertin lansegnman relizie ti fos. Li pa ti dir ki Bondie aksepte tou bann lansegnman relizie. Okontrer, li ti explike ki ti pou ena boukou dimounn lor semin ki larz ek ki amenn ver destriksion, alor ki ti pou ena enn tigit dimounn mem lor semin ki tipti ek ki amenn ver lavi. (Mat. 7:13, 14, NW) Li ti explike osi ki sertin dimounn ti pou dir ki zot pe servi Bondie, alor ki an realite zot pa pe servi Li. Zezi ti donn sa lavertisman-la: “Fer atansion ar bann fos profet ki vini kouma bann mouton me ki an-verite bann loulou feros. Zot pou rekonet li par so fri.”​—Mat. 7:15-20.

9. Sit sertin fos lansegnman lor ki Zezi ti koze.

⁹ Ki Labib dir? Bann profesi Biblik ti  predir ki Lemesi ti pou ena enn gran lamour pou ladorasion Zeova. (Ps. 69:9; Zan 2:14-17) Sa lamour-la ti motiv Zezi pou kondann bann fos lansegnman relizie. Par exanp, bann Farizien ti krwar ki nam imortel; me Zezi ti ansegne ki bann mor pe dormi. (Zan 11:11) Bann Sadisein pa ti krwar dan rezireksion; me Zezi ti resisit so kamarad Lazar. (Zan 11:43, 44; Zist. 23:8) Bann Farizien ti krwar dan destin ek zot ti dir ki Bondie fini deside ki pou ariv nou; me Zezi ti ansegne ki bann dimounn kapav swazir si zot pou servi Zeova ouswa non.​—Mat. 11:28.

10. Azordi, kifer boukou dimounn rezet nou akoz nou lansegnman?

¹⁰ Eski ena mem problem azordi? Wi. Boukou dimounn rezet nou parski nou servi Labib pou montre bann dimounn ki sertin lansegnman relizie fos. Bann sef relizie ansegn zot bann manb ki Bondie pini bann move dimounn dan lanfer. Zot servi sa fos lansegnman-la pou ena enn kontrol lor zot bann manb. Parkont, bann ki ador Zeova, Bondie lamour, zot ed bann dimounn pou konpran ki sa lansegnman-la fos. Bann sef relizie ansegn osi ki nam imortel. Si sa lansegnman-la ti vre, personn pa ti pou bizin rezireksion. Nou montre ki sa lansegnman-la pa Biblik. Ek mem si boukou relizion ansegne ki Bondie ouswa enn lafors invizib fini desid tou kitsoz alavans, nou ansegn bann dimounn ki zot kapav swazir si zot pou servi Bondie ouswa non. Kouma bann sef relizie reazir kan nou montre ki zot bann fos ansegnan? Bien souvan, zot ankoler!

11. Dapre Zan 8:45-47, ki kitsoz Bondie atann ki so bann serviter fer?

¹¹ Ki nou bizin fer pou ki nou lafwa pa vinn feb? Si nou kontan laverite, nou bizin krwar ek obeir bann lansegnman Bondie. (Lir Zan 8:45-47.) Nou pa pou rezet laverite, parey kouma Satan ti fer. Zame nou pa pou fer enn kitsoz ki pa an-akor avek nou bann krwayans. (Zan 8:44) Bondie atann ki so bann serviter  “deteste seki move” ek “atas zot ar seki bien,” parey kouma Zezi ti fer.​—Rom. 12:9; Ebre 1:9.

12. Kifer boukou Zwif ti rezet Zezi akoz fason ki li ti mor?

¹² Anou get enn lot rezon kifer boukou Zwif ti rezet Zezi. Pol ti dir: “Nou anonse ki Lekris inn mor lor enn poto. Se enn obstak pou bann Zwif.” (1 Kor. 1:23, NW) Kifer boukou Zwif ti rezet Zezi akoz fason ki li ti mor? Parski li ti mor lor enn poto, parey kouma enn kriminel ek enn pese. Akoz sa, zot pa ti krwar ki li ti Lemesi.​—Det. 21:22, 23.

13. Ki kitsoz bann dimounn ki ti rezet Zezi pa ti anvi krwar?

¹³ Bann Zwif ki ti rezet Zezi pa ti anvi krwar ki li ti inosan, ki ti met bann fos lakizasion lor li, ek ki ti tret li dan enn fason inzis. Bann dimounn ki ti ziz Zezi devan lakour pa ti fer sa avek lazistis. Bann ziz lakour siprem Zwif ti rasanble vit-vit pou ziz Zezi, ek zot pa ti obeir bann lalwa pou fer sa zizman-la. (Lik 22:54; Zan 18:24) Kan bann ziz ti ekout bann lakizasion ek bann temwaniaz kont Zezi, zot pa ti ziz avek lazistis. Okontrer, zot ti mem esey “met enn fos sarz lor Zezi pou kapav kondann li amor.” Kan zot pa ti reisi fer sa, gran pret ti esey fer Zezi dir enn kitsoz ki ti pou rann li koupab. Sa bann kitsoz-la ti kont lalwa. (Mat. 26:59; Mark 14:55-64) Apre rezireksion Zezi, sa bann ziz-la ti donn bann solda Romin, ki ti pe gardien tom Zezi, “enn gro som lamone” pou ki bann-la fann enn fos zistwar pou explike kifer tom-la ti vid.​—Mat. 28:11-15.

14. Ki kitsoz bann Lekritir ti predir konsernan lamor Lemesi?

¹⁴ Ki Labib dir? Mem si boukou Zwif dan lepok Zezi pa ti konpran ki Lemesi ti pou bizin mor, get seki bann Lekritir dir: “Li’nn donn so lavi ziska lamor ek finn met li parmi bann ki fer pese; li’nn sarye pese boukou dimounn, ek li’nn pled an faver bann ki fer pese.” (Iza. 53:12) Alor,  bann Zwif pa ti ena okenn rezon pou rezet Zezi, mem si li ti mor kouma enn peser.

15. Akoz ki lakizasion boukou dimounn finn rezet bann Temwin Zeova?

¹⁵ Eski ena mem problem azordi? Wi! Bann dimounn ti met bann fos lakizasion lor Zezi ek zot ti kondann li, ek azordi bann dimounn fer parey ar bann Temwin Zeova. Anou get de-trwa lexanp. Dan Letazini, ant 1930 ek 1950, ti ena boukou case dan lakour konsernan nou liberte pou ador Bondie. Sertin ziz pa ti kontan bann Temwin Zeova ditou. Dan Québéc, Kanada, Legliz ek Gouvernman ti travay ansam pou aret nou travay predikasion. Boukou proklamater ti al dan prizon zis parski zot ti koz lor Rwayom Bondie ar zot bann vwazin. Kan bann Nazi ti pe diriz Lalmagn, sa gouvernman-la ti touy boukou zenn frer fidel. Ek pa tro lontan, dan Larisi, boukou parmi nou bann frer ti al dan prizon parski zot ti pe prese. Bann lotorite konsider nou laktivite predikasion kouma enn “laktivite extremis.” Zot inn mem interdi La Bible. Traduction du monde nouveau dan lang Ris. Zot konsider sa liv-la kouma enn liv ki ena bann linformasion “extremis” akoz ena nom Zeova ladan.

16. Kouma nou trouve dan 1 Zan 4:1, kifer fode pa nou ekout bann fos zistwar konsernan bann Temwin Zeova?

¹⁶ Ki nou bizin fer pou ki nou lafwa pa vinn feb? Verifie bien bann linformasion. Dan so Sermon lor Montagn, Zezi ti averti bann dimounn ki sertin ti pou “koz manti pou dir tou sort kalite move kitsoz lor zot.” (Mat. 5:11, NW) Se Satan ki fann sa bann mansonz-la. Li inflians nou bann opozan pou ki zot dir bann foste lor bann dimounn ki kontan laverite. (Rev. 12:9, 10) Nou bizin rezet bann mansonz ki nou bann opozan fane. Fode zame ki nou les sa bann mansonz-la fer nou gagn per pou servi Bondie ouswa afebli nou lafwa.​—Lir 1 Zan 4:1, NW. *

17. Avan ki Zezi mor, ki bann kitsoz ti arive, ki ti kapav fer sertin rezet Zezi?

¹⁷ Avan ki Zezi mor, enn parmi so 12 zapot ti trayir li. Enn lot zapot trwa fwa ti dir ki li pa konn Zezi, ek tou bann zapot ti abandonn Zezi inpe avan so lamor. (Mat. 26:14-16, 47, 56, 75) Me Zezi pa ti etone. Li ti mem predir ki sa ti pou arive. (Zan 6:64; 13:21, 26, 38; 16:32) Kan zot ti trouv sa bann kitsoz-la, sertin dimounn ti kapav deside pou pa vinn disip Zezi. Zot ti kapav pans koumsa, ‘Si se koumsa ki bann zapot Zezi azir, mo pa anvi form parti sa group-la!’

18. Kouma bann kitsoz ki ti arive avan lamor Zezi ti akonpli bann profesi?

¹⁸ Ki Labib dir? Plizir santenn lane avan ki Zezi vinn lor later, Zeova ti fini fer ekrir dan so Parol ki ti pou trayir Lemesi pou 30 pies an arzan. (Zaka. 11:12, 13) Sa tret-la ti pou enn parmi bann kamarad Zezi. (Ps. 41:9) Profet Zakari ti ekrir: “Bat berze-la, ek les bann mouton dan troupo fane partou-partou.” (Zaka. 13:7) Bann dimounn ki kontan Zeova pa ti rezet Zezi akoz seki ti arive. Okontrer, zot lafwa ti vinn pli for kan zot ti trouve ki Zezi ti pe akonpli sa bann profesi-la.

19. Ki kitsoz bann dimounn ki kontan Zeova kone?

 ¹⁹ Eski ena mem problem azordi? Wi. Dan nou lepok, sertin Temwin ki boukou dimounn kone, ti kit laverite, zot ti vinn bann aposta, ek zot ti esey ris bann frer ek ser avek zot. Zot ti fann bann fos zistwar, zot ti koz manti, ek zot ti dir bann move kitsoz lor bann Temwin Zeova dan lagazet, lor radio, televizion, ek lor Internet. Me bann ki kontan Zeova pa ti les bann dimounn anbet zot. Okontrer, zot kone ki Labib ti predir ki bann kitsoz koumsa ti pou arive.​—Mat. 24:24; 2 Pier 2:18-22.

20. Pou ki bann dimounn ki’nn kit laverite pa anbet nou, ki nou bizin fer? (2 Timote 4:4, 5)

²⁰ Ki nou bizin fer pou ki nou lafwa pa vinn feb? Pou ki nou lafwa res for, nou bizin etidie Labib ek priye regilierman, ek nou bizin res bien okipe dan travay ki Zeova inn donn nou. (Lir 2 Timote 4:4, 5.) Si nou ena lafwa, nou pa pou panike kan nou tann bann move kitsoz lor bann Temwin Zeova. (Iza. 28:16) Si nou kontan Zeova, so Parol, ek nou bann frer ek ser, bann dimounn ki’nn kit laverite pa pou kapav anbet nou.

21. Mem si azordi laplipar dimounn rezet nou mesaz, ki kitsoz nou kapav sir?

²¹ Dan premie siek, boukou dimounn ti rezet Zezi. Selman, ti ena boukou dimounn osi ki ti aksepte li kouma Lemesi. Parmi sa bann dimounn-la, ti ena omwin enn manb lakour siprem Zwif, ek “mem enn lafoul pret.” (Zist. 6:7; Mat. 27:57-60; Mark 15:43) Dan mem fason, azordi bann milyon dimounn inn desid pou swiv Zezi. Kifer? Parski zot konn bann verite ki ena dan Labib ek zot kontan sa bann verite-la. Labib dir: “Bann ki kontan to lalwa zot viv dan lape e nannye pa kapav fer zot tonbe.”​—Ps. 119:165.