LARTIK LETID 22
Bann Konsey ki Saz pou Nou Lavi Toulezour
“Zeova Limem donn sazes.”—PROV. 2:6.
KANTIK 89 Obeir ek Ekoute, To Pou Beni
REZIME *
1. Kifer nou tou nou bizin sazes ki sorti kot Bondie? (Proverb 4:7)
ESKI to’nn deza pran enn desizion inportan dan to lavi? Alor, sirman to’nn priye Zeova pou gagn lasazes. (Zak 1:5) Lerwa Salomon ti dir: “Sazes samem ki pli inportan.” (Lir Proverb 4:7. *) Biensir, Salomon pa ti pe koz lor ninport ki sazes. Li ti pe koz lor sazes ki sorti kot Zeova. (Prov. 2:6) Me eski sazes ki sorti kot Bondie kapav ed nou pou fer fas ar ninport ki problem nou gagne azordi? Wi, li kapav, ek se seki nou pou gete dan sa lartik-la.
2. Sit enn fason kouma nou kapav gagn lasazes.
2 Enn fason ki nou kapav gagn lasazes se kan nou etidie ek aplik bann lansegnman sa de zom ki ti ena boukou sazes la. Premierman, nou pou get lexanp Salomon. Labib dir ki “Bondie ti kontign donn Salomon boukou sazes ek lintelizans.” (1 Ler. 4:29) Deziemman, nou pou get lexanp Zezi, zom ki ti ena pli boukou sazes lor later. (Mat. 12:42) Konsernan Zezi, Labib dir: “Lespri Zeova pou lor li, lespri sazes ek lintelizans.”—Iza. 11:2.
3. Ki nou pou examine dan sa lartik-la?
3 Bondie ti donn Salomon ek Zezi boukou sazes. Alor, zot ti kapav donn bann bon konsey lor bann kitsoz bien inportan. Dan sa lartik-la, nou pou get trwa parmi sa bann kitsoz-la. Nou pou gete kifer nou bizin ena enn bon fason panse lor larzan, lor travay, ek lor noumem.
ENA ENN BON FASON PANSE LOR LARZAN
4. Ki diferans ti ena ant Zezi ek Salomon?
4 Salomon ti bien ris, ek li ti res dan enn gran pale. (1 Ler. 10:7, 14, 15) Parkont, Zezi pa ti ena boukou kitsoz materyel, ek li pa ti ena so prop lakaz. (Mat. 8:20) Kanmem sa, zot toulede ti ena enn bon fason panse lor bann kitsoz materyel parski Zeova ti donn zot lasazes.
5. Kouma Salomon ti konsider larzan?
5 Salomon ti dir ki larzan li “enn proteksion.” (Ekle. 7:12) Si nou ena larzan, nou kapav aste bann kitsoz ki nou bizin ek sertin kitsoz ki nou anvi. Me mem si Salomon ti bien ris, li ti kone ki ena bann kitsoz pli inportan ki larzan. Par exanp, li ti dir: “Enn bon repitasion pli bon ki boukou rises.” (Prov. 22:1) Salomon ti dir osi ki bann dimounn ki kontan larzan, zot pa touletan satisfe avek seki zot ena. (Ekle. 5:10, 12) Ek li ti dir osi ki fode pa nou panse ki larzan samem kitsoz pli inportan dan nou lavi, parski larzan kapav disparet bien vit.—Prov. 23:4, 5.
Eski nou fason panse lor bann kitsoz materyel anpes nou pou met Rwayom Bondie an premie dan nou lavi? (Get paragraf 6-7) *
6. Ki Zezi ti panse lor bann kitsoz materyel? (Matie 6:31-33)
6 Zezi ti ena enn bon fason panse lor bann kitsoz materyel. Li ti kontan manze ek bwar. (Lik 19:2, 6, 7) Pou so premie mirak, Zezi ti fer delo vinn enn bon divin. (Zan 2:10, 11) Ek zour so lamor, li ti met enn linz ki bien ser. (Zan 19:23, 24, NW) Me Zezi pa ti les bann kitsoz materyel vinn kitsoz pli inportan dan so lavi. Li ti dir so bann disip: “Personn pa kapav travay kouma enn esklav pou de met . . . Zot pa kapav travay kouma bann esklav pou Bondie ek pou Larzan.” (Mat. 6:24, NW) Zezi ti dir ki, si nou met Rwayom Bondie an premie dan nou lavi, Zeova pou donn nou seki nou bizin.—Lir Matie 6:31-33.
7. Ki bienfe enn frer inn gagne parski li finn ena enn bon fason panse lor larzan?
7 Boukou frer ek ser inn gagn bann bienfe kan zot inn swiv bann konsey ki Zeova done konsernan larzan. Anou get lexanp enn frer selibater ki apel Daniel. Li dir: “Kan mo ti zenn, mo ti deside ki servi Zeova ti pou kitsoz pli inportan dan mo lavi.” Daniel ti gard enn lavi sinp. Gras-a sa, li ti kapav servi Zeova dan plizir fason. Li dir osi: “Zame mo’nn regret desizion ki mo’nn pran. Li vre ki mo ti kapav gagn boukou larzan si larzan ti enn priorite pou mwa. Me lerla, mo pa ti pou gagn bann bon kamarad ki mo ena asterla. Larzan pa kapav ranplas lazwa ki mo ena asterla parski mo priorite se Rwayom Bondie. Larzan pa ti pou kapav donn mwa bann benediksion ki Zeova finn donn mwa.” Li kler ki nou gagn bann bienfe kan nou priorite se nou servis pou Zeova, pa larzan.
ENA ENN BON FASON PANSE LOR TRAVAY
8. Kouma nou kone ki Salomon ti ena enn bon fason panse lor travay? (Ekleziast 5:18, 19)
8 Salomon ti dir ki, kan enn kikenn travay dir, sa kapav fer li gagn boukou lazwa. Li ti apel sa “enn kado ki Bondie finn done.” (Lir Ekleziast 5:18, 19. *) Li ti dir: “Kan enn dimounn fer ninport ki travay dir, sa pou dan so lavantaz.” (Prov. 14:23) Salomon ti kone ki sa bann parol-la ti vre, parski limem li ti travay dir. Li ti aranz bann lakaz, plant bann karo rezin, ek li ti fer bann zardin ek bann pisinn. Li ti mem aranz bann lavil. (1 Ler. 9:19; Ekle. 2:4-6) Sa bann travay-la ti bien dir, ek sirman sa ti rann li ere. Me Salomon ti kone ki li ti bizin fer plis ki sa pou ki li vremem ere. Akoz sa, li ti fer boukou kitsoz pou Zeova. Par exanp, li ti organiz travay konstriksion tanp Zeova, enn konstriksion ki ti dir set an. (1 Ler. 6:38; 9:1) Apre ki Salomon ti fer plizir diferan kitsoz, li ti konpran ki, kitsoz pli inportan ki enn dimounn kapav fer, se servi Zeova. Li ti dir: “Konklizion, apre ki’nn fini tann tou kitsoz: Ena lakrint pou vre Bondie ek gard so bann komannman.”—Ekle. 12:13.
9. Kouma nou kone ki Zezi ti ena enn bon fason panse lor so travay?
9 Zezi osi ti travay dir. Kan li ti zenn, li ti travay kouma sarpantie. (Mark 6:3) So bann paran ti travay bien dir pou pran swin zot fami, ek sirman zot ti bien rekonesan ki li ti ed zot. Zezi ti parfe ek li ti kapav fer bann travay ki parfe. Alor, sirman boukou dimounn ti anvi ki li fer bann travay pou zot! Zezi ti bien kontan so travay. Mem si li ti bien serye dan so travay, li ti touletan rezerv letan pou Zeova. (Zan 7:15) Apre ki li ti koumans so minister, li ti dir bann dimounn: “Napa travay pou manze ki kapav gate, travay pou manze ki pa fini zame e ki donn lavi eternel.” (Zan 6:27) Ek dan so Sermon lor Montagn, Zezi ti dir: “Ramas zot trezor plito dan lesiel.”—Mat. 6:20.
Kouma nou kapav trouv enn lekilib ant nou travay ek nou bann laktivite spiritiel? (Get paragraf 10-11) *
10. Ki difikilte sertin kapav gagne akoz zot travay?
10 Kan nou swiv bann konsey ki Zeova donn nou, nou pou ena enn bon fason panse lor nou travay. Antan ki Kretien, nou aprann ki nou bizin travay dir ek fer enn bon travay. (Efe. 4:28) Nou bann patron sirman trouve ki nou onet ek ki nou travay dir. Ek kitfwa zot bien apresie nou travay. Akoz sa, sirman nou pou anvi travay plis, parski nou anvi ki nou patron ena enn bon lopinion lor bann Temwin Zeova. Me si nou fer sa, kitfwa nou pa pou ena ase letan pou nou fami ek pou Zeova. Alor, nou bizin fer bann sanzman pou ki nou ena plis letan pou fer bann kitsoz ki pli inportan.
11. Ki leson enn frer inn aprann konsernan travay?
11 Enn zenn frer, ki apel William, ti aprann pou ena enn bon fason panse lor so travay gras-a lexanp enn frer pou ki li ti pe travay avan. William dir: “[Sa frer-la] vremem ena enn bon fason panse lor so travay. Li travay bien dir, ek li ena enn bon relasion avek so bann klian parski so travay top. Me kan li fini travay, li aret pans so travay, ek li koumans okip so fami ek so bann aktivite spiritiel. Li enn parmi bann dimounn ki mo kone, ki pli ere!” *
ENA ENN BON LOPINION LOR NOUMEM
12. Kouma Salomon ti montre ki li ti ena enn bon lopinion lor limem, me kouma sa finn sanze apre?
12 Kan li ti fidel anver Zeova, Salomon ti ena enn bon lopinion lor limem. Kan li ti zenn, li ti rekonet ki li ti ena bann limit ek li ti demann Zeova pou ed li. (1 Ler. 3:7-9) Kan li ti fek vinn lerwa, Salomon ti kone ki lorgey bien danzere. Li ti dir: “Avan larwinn, ena lorgey, ek avan enn move pa, ena enn lespri vantar.” (Prov. 16:18) Malerezman, plitar Salomon pa’nn swiv so prop konsey. Pandan so regn, li ti vinn orgeye ek li ti koumans dezobeir Zeova. Par exanp, enn parmi bann lalwa ki enn lerwa ti bizin obeir, ti dir ki “fode pa li ena boukou madam, pou ki so leker pa detourne.” (Det. 17:17) Salomon ti dezobeir sa lalwa-la. Li ti pran 700 madam ek 300 konkibinn, ek boukou parmi zot pa ti ador Zeova! (1 Ler. 11:1-3) Kitfwa Salomon ti panse ki sa pa ti pou enn danze pou li. Me apre, Salomon ti konn bann move konsekans parski li ti dezobeir Zeova.—1 Ler. 11:9-13.
13. Ki nou kapav aprann kan nou reflesi lor limilite ki Zezi ti ena?
13 Zezi ti ena limilite ek li ti ena enn bon lopinion lor limem. Avan ki Zezi vinn lor later, li ti fer boukou kitsoz extraordiner pou Zeova. Gras-a Zezi, tou kitsoz finn “existe dan lesiel e lor later.” (Kol. 1:16) Kan li ti pran batem, Zezi ti rapel tou bann kitsoz ki li ti fer kan li ti avek so Papa. (Mat. 3:16; Zan 17:5) Me Zezi pa ti vinn orgeye kan li ti rapel tou sa bann kitsoz-la. Okontrer, zame li ti azir dan enn fason pou montre ki li pli bon ki lezot. Li ti dir so bann disip ki li ti vinn lor later, pa pou ki “dimoun servi li, me pou servi dimoun e donn so lavi kouma enn ranson pou boukou dimoun.” (Mat. 20:28) Li ti dir osi ki li pa kapav fer nanye par limem. (Zan 5:19) Zezi ti ena boukou limilite, pa vre! Li’nn donn nou enn bon lexanp pou nou swiv.
14. Ki nou aprann ar Zezi konsernan lopinion ki nou bizin ena lor noumem?
14 Zezi ti ansegn so bann disip ki zot ti bizin ena enn bon lopinion lor zotmem. Enn fwa, Zezi ti dir zot: “Sak brin zot seve konte.” (Mat. 10:30) Sa bann parol-la bien rekonfort nou, sirtou si nou pena enn bon lopinion lor noumem. Sa montre ki nou Papa vremem interese avek nou ek ki nou ena valer devan so lizie. Si Zeova pe permet ki nou ador Li ek ki Li panse ki nou merite viv pou touletan dan lemond nouvo, fode pa nou panse ki Li ena tor!
Ki kapav arive si nou pena enn bon lopinion lor noumem? (Get paragraf 15) *
15. (a) Kouma Latour Degard ti ankouraz nou pou ena enn bon lopinion lor noumem? (b) Dapre zimaz paz 24, ki benediksion nou kapav rate si nou tro konsantre lor noumem?
15 Inn gagn apepre 15 an, Latour Degard ti dir ki nou bizin ena enn bon lopinion lor noumem. Li ti dir: “Nou pa anvi ena enn telman gran lopinion lor noumem ki nou vinn vantar, ni nou anvi tom dan lot extrem ek panse ki nou pa vo nanye. Plito, nou lobzektif, se pou ena enn lopinion rezonab lor noumem, enn lopinion ki pran an konsiderasion nou bann limit ek osi nou bann pwin for. Enn Kretienn exprim li dan sa fason-la: ‘Mo pa ni enn demon, ni enn anz. Mo ena mo bann pwin for ek mo bann pwin feb, ek tou dimounn parey koumsa.’” * Eski to trouve kifer li inportan ki to ena enn bon lopinion lor tomem?
16. Kifer Zeova donn nou bann konsey ki saz?
16 Atraver Labib, Zeova donn nou bann konsey ki saz. Li kontan nou, ek Li anvi ki nou ere. (Iza. 48:17, 18) Pli bon desizion ki nou kapav pran se kontign fer bann kitsoz ki fer Zeova plezir. Bann dimounn ki ena enn move fason panse lor larzan, lor travay, ouswa lor zotmem, zot gagn boukou problem. Parkont, kan nou met Zeova an premie dan nou lavi, nou evit boukou problem. Alor, anou bien deside pou kontign azir avek sazes ek fer Zeova so leker kontan!—Prov. 23:15.
KANTIK 94 Rekonesans pou Parol Bondie
^ Salomon ek Zezi ti ena boukou sazes. Se Zeova ki ti donn zot sa sazes-la. Salomon ek Zezi ti donn bann konsey lor fason ki nou bizin konsider larzan, travay, ek noumem. Dan sa lartik-la, nou pou get sertin parmi sa bann konsey-la. Nou pou gete osi kouma sertin frer ek ser finn gagn bann bienfe kan zot finn swiv sa bann konsey-la.
^ Proverb 4:7: “Sazes samem ki pli inportan. Gagn lasazes ek avek tou seki to gagne, gagn lintelizans.”
^ Ekleziast 5:18, 19: “18 Ala seki mo’nn remarke: Li bon ki enn zom manze, bwar, ek apresie tou bann travay dir ki li’nn fer anba soley pandan sa tigit zour ki vre Bondie inn donn li pou viv la, parski samem so rekonpans. 19 Ek kan vre Bondie donn enn zom bann rises ek bann dibien, ek ki li kapav profit sa bann kitsoz-la, sa zom-la bizin pran so rekonpans ek apresie tou bann travay dir ki li’nn fer. Sa se enn kado ki Bondie finn done.”
^ Get lartik “Kouma Nou Kapav Kontan pou Travay Dir?” dan Latour Degard 1e Fevriye 2015.
^ Get lartik “La Bible kapav aide ou pou trouve la joie” dan Latour Degard 1e Out 2005.
^ DESKRIPSION ZIMAZ: John ek Tom, se de zenn frer ki dan mem lasanble. John pas boukou letan pou okip so loto. Tom servi so loto pou amenn bann frer ek ser renion ek predikasion.
^ DESKRIPSION ZIMAZ: John pe fer overtime. Li pa anvi desevwar so patron. Alor, ninport kan so patron demann li pou travay ziska tar, John aksepte. Sa swar-la, Tom, ki enn asistan ministeryel, pe akonpagn enn ansien pou enn vizit pastoral. Dan lepase, Tom ti explik so patron ki li pa ti pou kapav travay plizir sware dan lasemenn, parski li ti rezerv sa pou servi Zeova.
^ DESKRIPSION ZIMAZ: John pans zis limem. Tom met Zeova an premie dan so lavi. Gras-a sa, li fer boukou nouvo kamarad kan li al ede pou fer renovasion enn Lasal Lasanble.
