1. Ki kitsoz liv Revelasion explike konsernan bann serviter Bondie?

 LIV Revelasion explike ki Rwayom Bondie pe dirize dan lesiel ek ki Satan inn gagn pouse depi lesiel. (Rev. 12:1-9) Savedir ki ena lape dan lesiel. Parkont, sa finn kree bann problem pou bann imin lor later. Kifer? Parski Satan bien ankoler ek li pe atak bann serviter Zeova ki lor later.​—Rev. 12:12, 15, 17.

2. Ki kitsoz pou ed nou pou res fidel anver Zeova?

² Kouma nou kapav res fidel ar Zeova mem si Satan pe atak nou? (Rev. 13:10) Kan nou kone seki pou arive dan lavenir, sa pou ed nou pou res fidel anver Zeova. Par exanp, dan liv Revelasion, lapot Zan koz lor bann benediksion ki nou pou gagne biento. Enn parmi sa bann benediksion-la, se ki bann lennmi Bondie pou detrir net. Asterla, anou gete seki liv Revelasion dir lor sa bann lennmi-la ek osi lor seki pou ariv zot.

3. Sit sertin sinbol ki ena dan liv Revelasion?

³ Dan premie verse liv Revelasion, nou aprann ki bann kitsoz ki ena dan sa liv-la, zot dan enn fason sinbolik. (Rev. 1:1, NW) Bann lennmi Bondie, zot reprezante par “bann sinbol.” Liv Revelasion koz lor plizir bebet sovaz. Par exanp, li koz lor “enn bebet [ki] sorti dan lamer, li ena dis korn ek set latet.” (Rev. 13:1) Apre sa, ena “enn lot bebet ki sorti depi later.” Sa bebet-la koz kouma enn  dragon ek li fer “dife sorti dan lesiel.” (Rev. 13:11-13) Apre, nou trouv enn lot bebet, “enn bebet rouz,” ek li ena enn prostitie lor li. Sa trwa bebet sovaz la reprezant bann lennmi ki pe lager kont Zeova ek so Rwayom depi bien lontan. Alor, li bien inportan ki nou kone kisannla zot ete.​—Rev. 17:1, 3.

4-5. Kouma Daniel 7:15-17 ed nou pou konpran seki bann bebet dan liv Revelasion reprezante?

⁴ Avan ki nou kone kisannla sa bann lennmi-la ete, nou bizin konpran ki sa bann bebet sovaz la ek sa prostitie-la reprezante. Meyer fason pou nou konpran sa, se kan nou les Labib explik Labib. Boukou sinbol ki ena dan liv Revelasion, nou gagn zot lexplikasion dan bann lezot liv Labib. Par exanp, profet Daniel ti fer enn rev ek li ti trouv “kat gro bebet [ki] ti pe sorti dan lamer.” (Dan. 7:1-3) Daniel explike kisannla zot reprezante. Sa bann gro bebet-la reprezant kat “lerwa,” ouswa gouvernman. (Lir Daniel 7:15-17. *) Sa lexplikasion-la ed nou pou konpran ki, bann bebet ki trouv dan liv Revelasion, zot osi zot bizin reprezant bann gouvernman.

⁵ Asterla, anou examinn sertin sinbol ki ena dan liv Revelasion. Amezir ki nou fer sa, nou pou gete kouma Labib ed nou pou konpran seki sa bann sinbol-la reprezante. Anou koumans par bann bebet sovaz. Pou koumanse, nou pou gete kisannla zot reprezante. Apre sa, nou pou gete seki pou ariv zot. Ek alafin,nou pou gete kouma sa konsern nou.

6. Kisannla sa bebet ki ena set latet la? (Revelasion 13:1-4)

⁶ Kisannla sa bebet ki ena set latet la? (Lir Revelasion 13:1-4.) Sa bebet-la resanble enn leopar. Me li ena bann lapat enn lours, lagel enn lion, ek li ena dis korn. Nou trouv sa bann karakteristik-la lor kat bebet ki mansione dan Daniel sapit 7. Parkont, dan liv Revelasion, nou trouv tou sa bann karakteristik-la lor enn sel bebet, pa lor kat diferan bebet. Alor, sa bebet-la pa reprezant zis enn sel gouvernman. Lapot Zan dir ki li “ena lotorite lor tou tribi, pep, langaz ek nasion,” savedir ki li pli pwisan ki ninport ki gouvernman. (Rev. 13:7) Alor, sa bebet-la bizin reprezant tou bann gouvernman ki’nn diriz bann imin ziska zordi. *​—Ekle. 8:9.

7. Ki sak latet sa bebet-la reprezante?

⁷ Ki sak latet reprezante? Revelasion sapit 17 ed nou pou reponn sa kestion-la, parski li dekrir enn zimaz sa bebet ki mansione dan Revelasion sapit 13 la. Revelasion 17:9, 10 dir: “Zot reprezant osi set lerwa. Sink ant zot finn tonbe, asterla siziem la ki pe regne e setiem la pankor vini e ler li vini li pa pou res tro lontan.” Parmi tou bann gouvernman ki Satan inn servi, set ti koumadir bann “latet” parski zot ti ena boukou pouvwar. Sa bann gouvernman-la finn ena enn gran linflians lor pep Bondie. Kan lapot Zan ti ankor vivan, sink parmi  sa bann gouvernman-la ti fini perdi zot pouvwar: Lezip, Lasiri, Babilonn, Lanpir Medo-Pers, ek Lagres. Siziem gouvernman-la, Rom, ti ankor pe dirize kan Zan ti ekrir liv Revelasion. Ki gouvernman ti pou setiem ek dernie pwisans mondial?

8. Kisannla setiem latet sa bebet-la?

⁸ Bann profesi dan liv Daniel ed nou pou konpran kisannla sa setiem ek dernie latet-la. Ki pwisans mondial pe dirize pandan lepok lafin, setadir pandan “zour Lesegner”? (Rev. 1:10) Se de gouvernman bien pwisan ki pe travay ansam, Grand Bretagn ek Letazini, setadir Pwisans Mondial Anglo-Ameriken. Alor, nou kapav dir ki Pwisans Mondial Anglo-Ameriken, li setiem latet sa bebet ki mansione dan Revelasion 13:1-4 la.

9. Kisannla sa bebet ki ena “de korn parey kouma enn annyo” la?

⁹ Dan Revelasion sapit 13, nou aprann ki sa setiem latet-la, setadir Pwisans Mondial Anglo-Ameriken, li osi enn bebet ki ena “de korn parey kouma enn annyo” ek li “koz parey kouma enn dragon.” Sa bebet-la fer bann “gran-gran mirak; li ti mem fer dife sorti dan lesiel tom lor later devan tou dimoun.” (Rev. 13:11-15) Revelasion sapit 16 ek 19 dir ki sa bebet-la enn “fos profet.” (Rev. 16:13; 19:20) Profet Daniel ti koz lor enn kitsoz ki inpe parey. Li ti explike ki Pwisans Mondial Anglo-Ameriken ti pou “amenn enn gran destriksion.” (Dan. 8:19, 23, 24) Samem ti arive pandan Deziem Lager Mondial. Sa de bom atomik ki ti pou aret sa lager-la, ti fabrike par bann siantis Angle ek Ameriken. Kan zot ti servi sa bann bom-la, se koumadir Pwisans Mondial Anglo-Ameriken ti fer “dife sorti dan lesiel tom lor later.”

10. Kisannla zimaz sa bebet-la reprezante? (Revelasion 13:14, 15; 17:3, 8, 11)

¹⁰ Asterla, nou trouv enn lot bebet. Sa bebet-la preske parey kouma sa lot bebet ki ena set latet la, selman li rouz. Labib apel li “zimaz bebet la” ek dir ki li “enn witiem lerwa.” * (Lir Revelasion 13:14, 15; 17:3, 8, 11.) Zan ti aprann ki sa lerwa-la ti aparet, ti disparet, ek ti re-aparet. Sa reprezant bien l’Organisation des Nations unies (ONU) ki ankouraz bann dimounn pou soutenir sistem politik sa lemond-la. O-koumansman, li ti apel Société des Nations, ek li ti disparet pandan Deziem Lager Mondial. Me apre, li ti re-aparet kouma l’Organisation des Nations unies.

11. Ki sa bann bebet sovaz la fer, ek kifer nou pena pou per zot?

¹¹ Sa bann bebet sovaz la, ouswa sa bann gouvernman-la, fann bann fos linformasion pou ankouraz bann dimounn pou opoz zot ar Zeova ek so pep. Dan enn fason sinbolik, zot pe rasanble “bann lerwa lemonn antie” pou Armagedon, “gran zour Bondie Toupwisan.” (Rev. 16:13, 14, 16) Me nou pena pou per! Nou gran Bondie, Zeova, pou azir vit ek Li pou sov tou bann ki soutenir so Rwayom.​—Eze. 38:21-23.

12. Ki pou ariv tou sa bann bebet-la?

¹² Ki pou ariv tou sa bann bebet-la? Revelasion 19:20 dir: ‘Alor zot finn trap bebet  la anmemtan ki sa fos profet ki ti fer bann mirak dan so prezans; ki ti sedwir tou bann ki ti ena mark bebet e ti ador so zimaz. Zot ti ankor vivan kan ti zet bebet la ek fos profet dan enn landrwa ranpli ar dife ki brile kouma souf.’ Sa verse-la montre ki sa bann gouvernman-la pou ankor pe dirize kan Bondie pou detrir zot.

13. Ki difikilte bann Kretien gagne akoz bann gouvernman sa lemond-la?

¹³ Kouma sa konsern nou? Antan ki Kretien, nou bizin res fidel anver Bondie ek so Rwayom. (Zan 18:36) Pou nou reisi fer sa, nou bizin gard nou netralite ek pa pran par dan bann zafer politik sa lemond-la. Me li kapav bien difisil pou nou gard nou netralite, parski bann gouvernman sa lemond-la anvi ki nou soutenir zot par nou bann parol ek nou bann aksion. Bann ki pa reisi gard zot netralite, zot pou gagn mark sa bebet sovaz la. (Rev. 13:16, 17) Kan enn kikenn ena sa mark-la, li perdi faver Zeova ek li pa pou gagn lavi eternel. (Rev. 14:9, 10; 20:4) Alor, li bien inportan ki nou gard nou netralite, mem si bann gouvernman met presion lor nou pou nou soutenir zot!

14. Dapre Revelasion 17:3-5, ki kitsoz Zan ti trouve?

¹⁴ Lapot Zan “ti etone” kan li ti trouv enn fam pe mont enn parmi sa bann bebet sovaz la. (Rev. 17:1, 2, 6) Sa fam-la enn prostitie ek li apel “Gran Babilonn.” Li komet “imoralite” avek “bann lerwa later.”​—Lir Revelasion 17:3-5.

15-16. Kisannla “Gran Babilonn,” ek kouma nou konn sa?

¹⁵ Kisannla “Gran Babilonn”? Sa fam-la pa kapav reprezant enn lorganizasion politik, parski li pe komet limoralite ar bann sef politik sa lemond-la. (Rev. 18:9) Anplis, parski li pe mont sa bebet sovaz la, sa montre ki li pe esey kontrol sa bann sef politik la. Li pa kapav osi reprezant sistem komersial sa lemond-la, parski se enn lot parti liv Revelasion ki koz lor sistem komersial lemond Satan, ek Labib apel zot “bann marsan lor later.”​—Rev. 18:11, 15, 16.

¹⁶ Labib servi mo “prostitie” pou dekrir bann dimounn ki dir zot servi Bondie, me ki pratik fos relizion ouswa ki kamarad ar sa lemond-la. (1 Kro. 5:25; Zak 4:4) Parkont, bann dimounn ki servi Bondie avek fidelite, Labib dekrir zot kouma bann “vierz.” (2 Kor. 11:2; Rev. 14:4) Ansien lavil Babilonn ti enn sant fos ladorasion. Alor, Gran Babilonn bizin reprezant tou bann fos ladorasion ki existe. An realite, limem lanpir mondial fos relizion.​—Rev. 17:5, 18; get lartik « Qu’est-ce que Babylone la Grande ? » lor jw.org.

17. Ki pou ariv Gran Babilonn?

¹⁷ Ki pou ariv Gran Babilonn? Revelasion 17:16, 17 dir: “Sa dis korn ki to finn trouve, ansam avek bebet la, zot pou ena laenn pou prostitie la; zot pou pran tou seki li ena e met li touni, zot pou manz so laser e bril seki reste dan dife. Parski Bondie finn met dan zot leker proze pou realiz so plan.” Wi, Zeova pou fer bann nasion servi bebet sovaz kouler rouz, setadir l’Organisation des Nations unies, pou  detrir net lanpir mondial fos relizion.​—Rev. 18:21-24.

18. Kouma nou kapav fer sir ki nou pena okenn lien ar Gran Babilonn?

¹⁸ Kouma sa konsern nou? Nou bizin kontign donn Zeova enn “ladorasion ki pir ek ki pa kontamine.” (Zak 1:27, NW) Fode zame nou les nou inflianse par Gran Babilonn so bann fos lansegnman, so bann fet, so bann valer moral, ek so bann pratik ki ena enn lien avek bann demon. Ek nou bizin kontign averti bann dimounn pou ki zot “kit sa lavil la.” Koumsa, zot pa pou partisip dan so bann pese.​—Rev. 18:4.

19. Kisannla sa “gran dragon rouz” la?

¹⁹ Liv Revelasion koz osi lor “enn gran dragon rouz.” (Rev. 12:3) Sa dragon-la lager kont Zezi ek so bann anz. (Rev. 12:7-9) Li atak bann serviter Bondie ek li donn pouvwar bann bebet sovaz, setadir bann gouvernman imin. (Rev. 12:17; 13:4) Kisannla sa dragon-la? Li “sa vie serpan” ki apel “diab ek Satan.” (Rev. 12:9; 20:2) Se limem ki inflians tou bann lennmi Zeova.

20. Ki pou ariv sa dragon-la?

²⁰ Ki pou ariv sa dragon-la? Revelasion 20:1-3 dir ki enn anz pou zet Satan dan pwi-san-fon. Sa pou koumadir enn prizon pou li. Kan li pou dan pwi-san-fon, Satan pa pou kapav “sedwir bann pep ankor ziska lafin sa mil an la.” Apre sa, pou zet Satan ek so bann demon dan lak “dife ek souf,” savedir ki zot pou detrir net. (Rev. 20:10) Esey mazinn enn lemond san Satan ek so bann demon. Sa lepok-la pou vremem extraordiner!

21. Kifer nou bizin ere kan nou lir liv Revelasion?

²¹ Kan nou konpran bann sinbol ki ena dan liv Revelasion, sa bien ankouraz nou! Dan sa lartik-la, nou’nn aprann kisannla bann lennmi Zeova, ek nou’nn trouve seki pou ariv zot. Wi, “bienere dimoun ki lir, e bienere bann ki tann parol profesi”! (Rev. 1:3) Me kan Zeova pou detrir so bann lennmi, ki benediksion so bann serviter ki fidel pou gagne? Nou pou reponn sa kestion-la dan prosin lartik.