1-2. Ki desizion inportan bann Zwif ki ti res dan Babilonn ti bizin pran? (Esdras 1:2-4)

 LERWA inn fer enn lanons! Bann Zwif, ki ti an exil dan Babilonn depi apepre 70 an, ti kapav retourn dan zot pei dan Izrael. (Lir Esdras 1:2-4.) Zis Zeova tousel kapav fer enn kitsoz koumsa. Kifer nou dir sa? Parski Babilonn pa ti abitie larg so bann prizonie. (Iza. 14:4, 17) Me Babilonn ti perdi so pouvwar, ek enn nouvo dirizan ti dir bann Zwif ki zot ti kapav retourn dan zot pei. Akoz sa, sak Zwif, sirtou bann sef fami, ti bizin pran enn desizion: swa zot ti pou kit Babilonn, ouswa zot ti pou reste. Sa desizion-la pa ti enn desizion fasil pou pran. Kifer?

² Boukou Zwif kitfwa ti tro vie pou fer sa long vwayaz-la. Laplipar bann Zwif ti ne dan Babilonn. Pou zot, Babilonn ti vinn zot lakaz, ek Izrael ti pei zot bann anset. Anplis, sertin parmi zot kitfwa ti bien ris. Alor, zot ti kapav trouv sa difisil pou kit zot zoli lakaz ek zot bann biznes, pou al res dan enn landrwa ki zot pa kone.

3. Ki bienfe bann Zwif ki ti fidel ar Zeova ti pou gagne si zot ti retourn dan Izrael?

³ Selman, bann Zwif ki ti fidel ar Zeova ti kone ki zot ti pou gagn boukou bienfe si zot ti retourn Izrael. Sa bann bienfe-la ti pou pli boukou ki ninport ki sakrifis ki zot ti pou bizin fer. Ek pli gran bienfe ki zot ti pou gagne ti konsern zot ladorasion pou Zeova. Mem si ti ena plis ki 50 tanp pou bann bondie dan Babilonn, pa ti ena okenn tanp pou Zeova dan sa lavil-la. Anplis, dapre Lalwa Moiz, bann Izraelit ti bizin fer bann sakrifis. Me dan Babilonn  pa ti ena okenn lotel kot zot ti kapav fer sa bann sakrifis-la. Pa ti pran okenn dispozision osi pou ki bann pret fer sa bann sakrifis-la. Dan sa lavil-la, ti ena osi pli boukou dimounn ki ti pe ador bann fos bondie ek ki pa ti ena okenn respe pou Zeova ek so bann prinsip. Akoz sa, bann milye Zwif ki ti kontan Zeova, ti bien anvi retourn dan Izrael pou ki zot kapav ador Zeova kouma bizin.

4. Kouma Zeova ti pou ed bann Zwif ki ti pou retourn Izrael?

⁴ Sa ti pou pran apepre kat mwa pou ki bann Zwif sorti Babilonn pou retourn Zerizalem, ek sa vwayaz-la ti pou bien difisil. Selman, Zeova ti promet bann Izraelit ki Li ti pou tir tou bann obstak ki ti kapav anpes zot retourne. Izai ti ekrir: “Prepar semin pou Zeova! Fer enn gran larout drwat atraver dezer pou nou Bondie. . . . Ki terin ros vinn nivo, ek bann terin difisil vinn plat.” (Iza. 40:3, 4) Mazinn sa senn-la: Enn gran larout atraver dezer ek enn terin plat atraver bann montagn. Wi, sa vwayaz-la pa ti pou difisil! Sa ti pou vremem pli fasil pou zot pou fer sa vwayaz-la lor enn gran larout ki drwat, olie ki zot mont bann montagn ek bann kolinn, ouswa ki zot travers bann vale. Sa ti pou pli rapid osi.

5. Kouma sa semin sinbolik ki ti ena ant Babilonn ek Izrael la ti apele?

⁵ Azordi, boukou gran semin ena enn nom ouswa enn nimero. Semin sinbolik lor ki Izai ti pe koze, li osi ena enn nom. Labib dir: “Pou ena enn gran semin. Wi! Enn semin ki pou apel Semin ki Sin. Seki inpir pa pou pas lor la.” (Iza. 35:8) Ki sa promes-la ti inplike pou bann Izraelit sa lepok-la? Ek ki li inplike pou nou azordi?

6. Kifer ti apel sa semin-la, “Semin ki Sin”?

⁶ “Semin ki Sin”​—Enn zoli nom pou enn gran semin, pa vre! Me kifer ti apel sa semin-la, “Semin ki Sin”? Kan bann Zwif ti pou retourn dan Izrael, pa ti pou ena plas pou seki “inpir,” setadir pou bann Zwif ki ti pou kontign fer bann kitsoz ki imoral, ki ti pou kontign ador bann zidol, ouswa fer lezot pese ankor. Bann Zwif ki ti pe retourn Izrael ti bizin vinn “enn pep ki sin” pou zot Bondie. (Det. 7:6) Selman, sa pa vedir ki zot pa ti bizin fer bann sanzman pou fer Zeova plezir.

7. Sit sertin sanzman ki bann Zwif ti bizin fer.

⁷ Kouma nou’nn trouve taler-la, laplipar bann Zwif ti ne dan Babilonn, ek boukou parmi zot ti fini abitie ar fason panse ek bann prinsip bann Babilonien. Plizir dizenn lane apre ki bann Zwif ti retourn Izrael, Esdras ti aprann ki sertin Zwif ti marye ar bann madam ki pa ti Zwif. (Ex. 34:15, 16; Esdr. 9:1, 2) Apre sa, Gouverner Neemi ti etone kan li ti aprann ki bann zanfan ki ti ne dan Izrael pa ti konn koz langaz bann Zwif. (Det. 6:6, 7; Ne. 13:23, 24) Kouma sa bann zanfan-la ti pou aprann kontan ek ador Zeova si zot pa ti konpran Ebre, langaz prinsipal ki’nn ekrir Parol Bondie? (Esdr. 10:3, 44) Alor, sa bann Zwif-la ti ena bann gran sanzman pou fer. Selman, li ti pou pli fasil pou zot fer sa bann sanzman-la dan Izrael, kot tigit-tigit ladorasion pou Zeova ti pe koumans retabli.​—Ne. 8:8, 9.

8. Kouma seki ti ariv bann Zwif konsern nou azordi? (Get zimaz lor kouvertir.)

⁸ Me sertin kapav dir: ‘Tousala bien interesan! Me kouma seki ti ariv bann  Zwif sa lepok-la konsern nou azordi?’ Sa konsern nou parski dan enn sertenn fason, nou osi nou pe mars lor “Semin ki Sin.” Ki nou form parti bann “lezot mouton” ouswa nou ena lesperans pou al dan lesiel, nou bizin res lor “Semin ki Sin.” Lerla, nou pou kontign ador Zeova aster-la ek dan lavenir kan Rwayom Bondie pou fer later vinn enn zoli paradi. b (Zan 10:16) Depi 1919, bann milyon dimounn inn kit Gran Babilonn, lanpir mondial fos relizion, ek zot inn koumans mars lor “Semin ki Sin.” Kitfwa twa osi to parmi zot! Mem si sa fer apepre 100 an ki sa semin-la inn ouver, boukou dimounn inn ede pou prepar sa semin-la depi plizir santenn lane avan.

9. Kouma Izai 57:14 montre ki ti pou bizin prepar “Semin ki Sin”?

⁹ Pou bann Zwif ki ti kit Babilonn, Zeova ti fer an-sort ki pena okenn obstak devan zot. (Lir Izai 57:14.) Eski li parey pou “Semin ki Sin” dan nou lepok? Plizir santenn lane avan 1919, Zeova ti servi bann zom ki ti ena enn gran respe pou Li, pou prepar enn semin pou ki lezot kapav sorti dan Gran Babilonn. (Konpar ar Izai 40:3.) Zot ti koumans fer bann travay pou ki laplipar bann dimounn ki kontan Bondie kapav kit fos relizion ek ador Zeova ansam ar so pep. Ki sa bann travay-la sa? Anou get sertin parmi zot.

10-11. Kan inn koumans inprim ek tradir Labib, kouma sa inn ed bann dimounn pou plis konpran Labib? (Get zimaz osi.)

¹⁰ Inprime. Ziska bann lane 1450, bann dimounn ti pe rekopie Labib ar lame. Sa travay-la ti pran boukou letan. Akoz sa, bann kopi Labib ti bien rar ek zot ti kout bien ser. Me kan ti koumans servi bann masinn pou fer bann kopi Labib, ti koumans inprim ek distribie pli boukou Labib.

¹¹ Tradiksion. Pandan plizir santenn lane, Labib ti disponib prinsipalman an Latin, ek zis bann dimounn ki ti ena enn gran ledikasion ki ti kapav konpran sa lang-la. Selman, kan inn koumans inprim Labib, bann dimounn ki ti ena respe pou Bondie ti koumans tradir Labib dan bann lang ki bann dimounn koze. Lerla, bann dimounn ki ti pe lir Labib, ti pe kapav konpar seki Labib ansegne ar seki Legliz ansegne.

12-13. Dan bann lane 1800, kouma bann dimounn ki ti ena respe pou Bondie ti montre ki Legliz ti pe ansegn bann fos lansegnman? Donn enn lexanp.

¹² Bann zouti pou etidie Labib. Parski zot ti reisi lir Parol Bondie, bann ki ti kontan etidie Labib ti koumans konpran so bann lansegnman. Me bann sef relizie ti bien ankoler parski sa bann etidian Labib la ti pe koumans partaz seki zot ti aprann ar lezot. Par exanp, dan bann lane 1800, plizir etidian Labib ti pibliye bann trak ki ti koz lor bann fos lansegnman ki Legliz ansegne.

¹³ Ver 1835, enn zom ki ti ena respe pou Bondie ek ki ti apel Henry Grew, ti pibliye enn trak ki ti koz lor seki arive apre lamor. Dan sa trak-la, li ti servi Labib pou montre ki limortalite, se enn kado ki Bondie done ek ki li pa enn kitsoz ki nou gagne depi nou nesans, parey kouma laplipar bann legliz ti pe ansegne. An 1837, enn sef relizie ki ti apel George Storrs ti  trouv enn sa bann trak-la kan li ti dan enn trin. Li ti lir li, ek li ti sir ki li ti dekouver enn verite bien inportan. Lerla, li ti desid pou partaz seki li ti aprann ar lezot. An 1842, li ti fer plizir diskour ki ti ena tem “Eski Bann Move Zot Imortel?” Parmi bann dimounn ki ti aprann boukou kitsoz gras-a George Storrs, ti ena enn zenn zom ki ti apel Charles Taze Russell.

14. Kouma Frer Russell ek so bann kamarad ti profit travay ki sertin avan zot ti fer? (Get zimaz osi.)

¹⁴ Kouma Frer Russell ek so bann kamarad ti profit travay ki sertin avan zot ti fer? Kan zot ti etidie Labib, Frer Russell ek so bann kamarad ti servi plizir tradiksion Labib ek osi bann liv resers ki lezot ti fer. Par exanp, zot ti servi bann liv resers ki Henry Grew ek George Storrs ti ekrir. Frer Russell ek so bann kamarad osi ti ede dan sa travay-la kan zot ti pibliye boukou liv ek trak ki ti koz lor seki Labib ansegne.

15. Ki bann kitsoz inportan inn arive an 1919?

¹⁵ An 1919, Gran Babilonn, ti nepli ena okenn kontrol lor bann serviter Bondie. Sa lane-la, enn “esklav fidel ek saz” ti koumans travay pou ki bann dimounn ki kontan Bondie kapav koumans mars lor “Semin ki Sin.” (Mat. 24:45-47) Gras-a travay ki lezot ti fer dan lepase pou prepar sa semin-la, boukou inn kapav koumans mars lor “Semin ki Sin” kan zot inn aprann plis lor Zeova ek lor so proze. (Prov. 4:18) Zot ti osi fer bann sanzman dan zot lavi pou ki zot kapav swiv bann prinsip Zeova. Zeova pa ti atann ki so bann serviter fer tou sa bann sanzman-la enn sel kout. Okontrer, tigit-tigit Li ti ed so pep pou fer bann sanzman. (Get lankadre “ Tigit-Tigit Zeova Ed So Pep pou Fer Bann Sanzman.”) Nou tou nou pou bien kontan kan nou pou reisi fer Zeova plezir dan tou seki nou fer!​—Kol. 1:10.

16. Depi 1919, ki bann travay inn fer lor “Semin ki Sin”? (Izai 48:17; 60:17)

¹⁶ Pou ki enn semin res dan enn bon leta, ena bann travay ki bizin fer. Dan mem fason, depi 1919, bann travay pe kontigne lor “Semin ki Sin” pou ki pli boukou dimounn kapav sorti dan Gran Babilonn. Sa lane-la, “esklav fidel ek saz” inn koumans travay, ek an 1921, li’nn pibliye enn liv pou ed bann dimounn pou aprann bann verite ki ena dan Labib. Sa liv-la ti apel La Harpe de Dieu, ek inn pibliye anviron sis milyon kopi sa liv-la dan 36 lang. Boukou dimounn inn konn laverite gras-a sa liv-la. Pa tro lontan, nou’nn gagn enn nouvo liv pou fer bann letid Labib, liv Viv Ere pou Touletan! Pandan bann dernie zour, Zeova pe servi so lorganizasion pou donn nou nou manze spiritiel, pou ki nou tou nou kapav kontign mars lor “Semin ki Sin.”​—Lir Izai 48:17; 60:17.

17-18. Kotsa “Semin ki Sin” pou amenn nou?

¹⁷ Kan enn dimounn aksepte enn letid Labib, li gagn lokazion pou koumans mars lor “Semin ki Sin.” Sertin vwayaz enn ti moman lor sa semin-la ek apre zot kit li. Me ena lezot ki bien deside pou kontign mars lor sa semin-la ziska ki zot ariv zot destinasion. Ki sa destinasion-la sa?

¹⁸ Pou bann ki ena lesperans pou viv dan lesiel, “Semin ki Sin” pou amenn zot dan “paradi Bondie” ki dan lesiel. (Rev. 2:7) Pou bann ki ena lesperans pou viv lor later, “Semin ki Sin” pou amenn zot ziska lafin Regn Mil An Zezi Kris, kot tou dimounn pou vinn parfe. Si to lor sa semin-la azordi, pa pans bann kitsoz ki to’nn kite deryer twa. Me sirtou, pa kit sa semin-la ziska ki to ariv dan lemond nouvo! Nou swet twa enn “bon vwayaz!”