1-2. Ki kestion kapav poz noumem konsernan lapriyer?

 ESKI tonn deza demann tomem si Zeova pe reponn to bann lapriyer? Si wi, to pa tousel. Ena boukou frer ek ser ki’nn deza poz zot sa kestion-la, sirtou kan zot inn pas par bann sitiasion bien difisil. Kan nou pe soufer, kitfwa nou kapav gagn difikilte pou trouve kouma Zeova pe reponn nou bann lapriyer.

² Dan sa lartik-la, nou pou gete kifer nou kapav sir ki Zeova reponn lapriyer so bann serviter. (1 Zan 5:15) Nou pou osi reponn sa bann kestion-la: Kifer parfwa nou ena linpresion ki Zeova pa pe reponn nou bann lapriyer? Kouma Zeova reponn nou bann lapriyer azordi?

3. Kifer Zeova anvi ki nou priye Li?

³ Labib dir nou ki Zeova bien kontan nou ek ki nou ena valer pou Li. (Aze 2:7; 1 Zan 4:10) Se pou sa rezon-la ki Li ankouraz nou pou demann Li so led dan lapriyer. (1 Pier 5:6, 7) Li anvi ed nou pou nou res pros ar Li ek ed nou pou andir nou bann difikilte.

4. Kouma nou kone ki Zeova ekout lapriyer so bann serviter? (Get zimaz osi.)

⁴ Dan Labib, souvan nou trouve kouma Zeova reponn lapriyer so bann serviter. Anou get lexanp lerwa David. Li ti ena boukou lennmi ki ti anvi touy li, ek souvan li ti priye Zeova pou rod so led. Enn fwa, li ti sipliye Zeova. Li ti dir: “SEGNER, ekout mo lapriyer! Dan to fidelite ekout mo siplikasion; dan to drwatir reponn mwa.” (Ps. 143:1) Zeova ti reponn lapriyer David ek Li ti sap li. (1 Sam. 19:10, 18-20; 2 Sam. 5:17-25) Akoz sa, David ti ena konfians an Zeova, ek li ti kapav dir: “LESEGNER pre  pou ed dimoun ki apel li.” Nou osi, nou kapav ena sa kalite konfians-la an Zeova.​—Ps. 145:18.

5. Dan lepase, eski Zeova inn touletan reponn lapriyer so bann serviter dan fason ki zot ti pe atann? Donn enn lexanp. (Get zimaz osi.)

⁵ Me Zeova kitfwa pa reponn nou lapriyer dan fason ki nou atann. Par exanp, anou gete seki ti ariv lapot Pol. Li ti demann Zeova pou tir “enn pikan dan [so] laser.” Trwa fwa Pol ti priye Zeova konsernan sa problem-la. Eski Zeova ti reponn so bann lapriyer? Wi, me pa dan fason ki li ti pe atann. Olie ki Li rezoud problem Pol, Zeova ti donn Pol lafors ki li ti bizin pou ki li kontign servi Li avek fidelite.​—2 Kor. 12:7-10.

6. Kifer parfwa nou kapav ena linpresion ki Zeova pa pe reponn nou bann lapriyer?

⁶ Parfwa, parey kouma Pol, Zeova kapav reponn nou dan enn fason ki nou pa atann. Selman, nou kapav sir ki Zeova kone ki pli bon fason Li kapav ed nou. Li kapav mem “fer bien plis kitsoz ki seki nou demande ouswa panse.” (Efe. 3:20) Se pou sa rezon-la ki kan Li reponn nou bann lapriyer, Li kapav fer li dan enn moman ouswa dan enn fason ki nou pa atann.

7. Kifer parfwa nou bizin sanz sertin kitsoz ki nou pe demann Zeova dan nou lapriyer? Donn enn exanp.

⁷ Parfwa, amezir ki nou konpran volonte Zeova pli bien, kitfwa nou bizin sanz sertin kitsoz ki nou pe demann Zeova dan nou lapriyer. Anou get lexanp Frer Martin Poetzinger. Inpe letan apre so maryaz, Frer Poetzinger ti al dan enn kan konsantrasion Nazi. O-koumansman, li ti demann Zeova pou tir li dan sa kan konsantrasion la, pou ki li kapav okip so madam ek kontign prese. Selman, apre de semenn, li pa ti trouve kouma Zeova ti pe reponn so lapriyer. Alor, li ti sanz so lapriyer ek li ti demann Zeova: “Silteple Zeova, montre mwa seki to anvi mo fer.” Lerla, li ti koumans mazinn bann lezot frer ki ti dan kan konsantrasion ek lezot difikilte ki zot ti pe gagne. Boukou parmi zot ti bien trakase akoz zot madam ek zot zanfan. Lerla, Frer Poetzinger ti dir Zeova: “Zeova, mersi boukou pou sa nouvo lafektasion ki to’nn donn mwa la. Ed mwa  pou ankouraz ek ranforsi lafwa mo bann frer.” Ek se samem ki Frer Poetzinger ti fer pandan sa nef-an ki li ti dan kan konsantrasion la!

8. Kan nou priye Zeova, ki kitsoz nou bizin rapel?

⁸ Nou bizin rapel ki Zeova ena enn proze, ek ki Li pou realiz so proze dan moman ki Li deside. Enn parmi bann kitsoz ki ena dan so proze, se ki Li pou tir tou bann problem ki pe fer bann dimounn soufer azordi. Par exanp, Li pou tir bann katastrof natirel, maladi, ek lamor. Zeova pou realiz so proze gras-a so Rwayom. (Dan. 2:44; Rev. 21:3, 4) Selman, an-atandan, Zeova pe les Satan diriz sa lemond-la. b (Zan 12:31; Rev. 12:9) Si Zeova ti regle tou bann problem ki ena dan lemond azordi mem, sa ti kapav donn linpresion ki Satan pe diriz sa lemond-la dan enn bon fason. Selman, mem si nou pe atann ki Zeova realiz so bann promes, sa pa vedir ki Li les nou tousel. Anou gete kouma Zeova ed nou azordi.

9. Kouma Zeova kapav ed nou kan nou bizin pran enn desizion? Donn enn lexanp.

⁹ Zeova donn nou sazes. Zeova promet ki Li pou donn nou sazes ki nou bizin pou nou pran bann bon desizion. Nou bizin sazes Bondie, sirtou kan nou pran bann desizion ki pou ena enn lefe lor nou lavi, kouma par exanp, si nou pou marye ouswa si nou pou res selibater. (Zak 1:5) Anou get lexanp enn ser selibater ki apel Maria. c Kan li ti zwenn enn frer, Maria ti pe servi kouma pionie permanan ek li ti bien zwaye dan so servis. Maria dir: “Amezir ki nou’nn aprann konn nou kamarad, nou’nn koumans ena bann santiman pou nou kamarad. Mo ti kone ki mo ti bizin pran enn desizion. Souvan mo ti priye Zeova lor la. Mo ti bizin led Zeova pou pran enn desizion, me mo ti kone osi ki Zeova pa ti pou pran desizion-la dan mo plas.” Maria ti santi ki Zeova ti reponn so bann lapriyer ek ti donn li sazes. Kouma? Kan li ti fer bann resers dan bann piblikasion, li ti trouv bann lartik ki ti pou ed li pou gagn bann repons pou so bann kestion. Maria so mama ti pe servi Zeova avek fidelite, ek Maria ti ekout bann bon konsey ki so mama ti donn li. Sa bann konsey-la ti ed Maria pou examinn bien bann santiman ki li ti ena. Ek alafin, Maria ti reisi pran enn bon desizion.

10. Dapre Filipien 4:13, ki Zeova pou fer pou ed so bann serviter? Donn enn lexanp. (Get zimaz osi.)

 ¹⁰ Zeova donn nou lafors pou andire. Parey kouma li ti fer pou lapot Pol, Zeova pou donn nou lafors ki nou bizin pou andir nou bann difikilte. (Lir Filipien 4:13.) Anou gete kouma Zeova ti ed enn frer ki apel Benjamin pou andir bann sitiasion difisil. Kan li ti zenn, Benjamin ek so fami ti res dan bann kan refizie dan Lafrik. Benjamin dir: “Souvan mo ti priye Zeova. Mo ti demann Li lafors pou fer bann kitsoz ki fer Li plezir. Zeova ti reponn mo bann lapriyer. Li ti donn mwa lape lespri, kouraz pou kontign prese, ek bann piblikasion pou res for lor plan spiritiel.” Benjamin dir osi: “Kan mo’nn lir biografi bann frer ek ser, ek kan mo’nn trouve kouma Zeova inn ed zot pou andire, sa inn donn mwa lafors pou mo res fidel ar Zeova.”

11-12. Kouma Zeova kapav servi nou bann frer ek ser pou reponn nou lapriyer? (Get zimaz osi.)

¹¹ Zeova servi nou bann frer ek ser. Lanwit avan so lamor, Zezi ti sipliy Zeova dan lapriyer. Li pa ti anvi ki bann dimounn pran li pou enn kikenn ki pena respe pou nom Zeova ek ki zot kondann li amor pou sa. Pou ed Zezi, Zeova ti avoy enn anz pou ankouraz li. (Lik 22:42, 43) Azordi osi, Zeova servi nou bann frer ek ser pou ed nou. Kitfwa zot kapav telefonn nou ouswa rann nou enn ti vizit pou ankouraz nou. Nou tou nou bizin rod bann lokazion pou ena “enn bon parol” pou nou bann frer ek ser.​—Prov. 12:25.

¹² Anou get lexanp enn ser ki apel Miriam. De-trwa semenn apre lamor so mari, Miriam ti tousel lakaz kot li. Li ti bien tris ek bien dekouraze. Li ti pe nek plore. Li ti bien bizin koz avek enn kikenn. Li dir: “Mo pa ti ena lafors pou telefonn personn, alor mo ti priye Zeova. Pandan ki mo ti pe plore ek priye, mo telefonn ti sone. Se enn ansien ki ti pe sone, enn bon kamarad.” Sa ansien-la ek so madam ti bien rekonfort Mariam. Li ti dir ki se Zeova ki ti pous sa frer-la pou sonn li.

13. Donn enn lexanp pou montre kouma Zeova servi bann dimounn ki pa ador Li pou reponn nou lapriyer.

 ¹³ Zeova kapav servi bann dimounn ki pa ador Li. (Prov. 21:1) Parfwa, Zeova kapav servi bann dimounn ki pa ador Li pou reponn lapriyer so bann serviter. Par exanp, Li ti fer Lerwa Artakzerses les Neemi retourn Zerizalem pou ki li kapav ede pou rekonstrir lavil. (Ne. 2:3-6) Azordi osi, Zeova kapav servi bann dimounn ki pa ador Li, pou ed nou kan nou bizin led.

14. Kouma lexanp Soo Hing ankouraz twa? (Get zimaz osi.)

¹⁴ Enn ser ki apel Soo Hing inn trouve kouma Zeova inn servi so dokter pou ed li. So garson ti ena plizir problem mantal. Li ti fer enn aksidan bien grav, ek akoz sa, Soo Hing ek so misie ti bizin kit zot travay pou okip li. Akoz sa sitiasion-la, zot ti ena bann problem finans. Soo Hing dir ki li ti kouma enn lastik ki pe rise mem ek ki ti pre pou kase. Li ti devid so leker ar Zeova ek li ti demann Li so led. Dokter ki ti pe okip so garson, ti desid pou ed li ek so fami. Lerla, zot ti gagn led ar gouvernman ek enn plas ki pa tro ser pou reste. Apre sa, Soo Hing ti dir: “Dan sa moman difisil la, nou ti trouv lame Zeova dan nou lavi. Li vremem ‘ekout nou lapriyer.’”​—Ps. 65:2, NW.

15. Ki kitsoz ti ed enn ser pou trouve kouma Zeova ti pe reponn so bann lapriyer?

¹⁵ Bien souvan, Zeova pa reponn nou bann lapriyer dan enn fason extraordiner. Me fason ki Li reponn nou lapriyer, se zis seki nou bizin pou ki nou kapav res fidel anver Li. Alor, nou bizin pran letan pou reflesi lor kouma Zeova pe reponn nou bann lapriyer. Enn ser ki apel Yoko, ti ena linpresion ki Zeova pa ti pe reponn so bann lapriyer. Lerla, li’nn koumans ekrir dan enn kaye tou seki li’nn demann Zeova. Apre inpe letan, li ti re-trap so kaye ek li ti realize ki Zeova ti reponn laplipar so bann lapriyer, mem bann lapriyer ki limem li’nn bliye. Alor detanzantan, anou pran letan pou reflesi lor kouma Zeova pe reponn nou bann lapriyer.​—Ps. 66:19, 20.

16. Kan nou priye Zeova, kouma nou kapav montre ki nou ena lafwa? (Ebre 11:6)

 ¹⁶ Nou montre ki nou ena lafwa, pa zis kan nou priye Zeova, me osi kan nou aksepte ki Li kapav reponn nou lapriyer kouma Li Li anvi. (Lir Ebre 11:6.) Anou get lexanp Mike ek so madam Chrissy. Zot ti ena lobzektif pou al servi dan Betel. Mike dir: “Pandan plizir lane, nou ti ranpli form pou al servi Betel ek nou ti priye Zeova plizir fwa pou nou realiz sa lobzektif-la. Me zame nou pa ti gagn linvitasion pou al servi Betel.” Selman, Mike ek Chrissy ti sir ki Zeova kone ki pli bon fason Li kapav servi zot. Alor, zot ti kontign fer zot best pou Zeova. Zot ti fer pionie permanan dan bann landrwa kot bizin led ek zot ti ede lor bann proze konstriksion. Azordi, zot dan servis sirkonskripsion. Mike dir: “Zeova pa’nn touletan reponn nou lapriyer dan fason ki nou ti pe atann, me Li’nn reponn nou dan bann pli bon fason ankor.”

17-18. Dapre Psom 86:6, 7, ki kitsoz nou kapav sir?

¹⁷ Lir Psom 86:6, 7. David ti sir ki Zeova ti ekout ek ti reponn so bann lapriyer. Nou osi, nou kapav sir ki Zeova pou ekout ek pou reponn nou bann lapriyer. Bann lexanp ki nou’nn gete dan sa lartik-la inn montre ki Zeova kapav donn nou sazes ek lafors ki nou bizin pou andire. Li kapav servi nou bann frer ek ser, ouswa mem bann dimounn ki pa ador Li, pou ed nou.

¹⁸ Kitfwa Zeova pa pou reponn nou bann lapriyer dan fason ki nou atann, me nou sir ki Li pou reponn nou lapriyer. Li pou donn nou seki nou bizin, dan moman ki nou bizin. Alor, anou kontign priye ek ena lafwa ki Zeova pou ekout nou lapriyer. Nou kapav sir ki Zeova pou donn nou seki nou bizin aster-la, ek ki Li pou “satisfer dezir tou seki vivan” dan lemond nouvo.​—Ps. 145:16.