1. Kouma Labib dekrir vre lamour?

 “BANN laflam [lamour] parey kouma laflam enn dife, laflam Ya. Boukou delo pa pou kapav tengn lamour, ni bann gran larivier pa pou kapav sarye li ale.” b (Kantik S. 8:6, 7) Sa bann zoli parol-la dekrir bien vre lamour, pa vre! Dan sa bann parol-la, ena enn verite bien inportan pou bann koup: Zot kapav ena enn lamour bien for pou zot kamarad.

2. Ki kitsoz bann konzwin bizin fer pou ki zot lamour pa diminie?

² Pou ki bann konzwin kontign kontan zot kamarad toutlong zot lavi, zot bizin kontign fer bann zefor. Anou pran enn lexanp. Pou ki enn dife kontign brile, enn kikenn bizin kontign met dibwa ladan. Si personn pa pran dife-la kont, li pou tengn. Dan mem fason, lamour ki ena ant enn mari ek so fam pou kontign res for, si zot kontign fer zefor pou ena enn bon relasion ar zot kamarad. Parfwa, lamour ki ena ant enn koup kapav diminie, sirtou kan zot ena bann problem finans, bann problem lasante, ouswa kan zot gagn difikilte pou elve zot zanfan. Alor si to marye, kouma to kapav pa les “laflam Ya” tengn dan to maryaz? Dan sa lartik-la, nou pou get trwa kitsoz ki pou ed nou pou ena enn bon relasion ar nou konzwin ek pou ena enn zoli lavi maryaz. c

3. Kan bann konzwin ena enn bon lamitie ar Zeova, kouma sa kapav fer zot lamour grandi? (Ekleziast 4:12) (Get zimaz osi.)

³ Pou ki “laflam Ya” pa tengn, enn mari ek so fam bizin fer zefor pou ena enn bon lamitie ar Zeova. Kouma zot  lamitie ar Zeova kapav fer zot ena enn zoli lavi maryaz? Kan bann konzwin ena enn bon lamitie ar Zeova, ek ki sa lamitie-la ena valer pou zot, zot pa tarde pou swiv bann konsey Zeova. Lerla, sa kapav ed zot pou evit ouswa sirmont bann problem ki kapav diminie zot lamour pou zot kamarad. (Lir Ekleziast 4:12.) Bann dimounn spiritiel fer zefor osi pou imit Zeova ek pou devlop bann kalite ki Li ena, kouma bonte, pasians, ek pardon. (Efe. 4:32–5:1) Kan bann konzwin ena sa bann kalite-la, li pli fasil pou zot lamour grandi. Enn ser ki apel Lena, ek ki marye depi plis ki 25 an, dir: “Li pli fasil pou respekte ek kontan enn kikenn, kan sa dimounn-la spiritiel.”

4. Kifer Zeova ti swazir Zozef ek Mari pou vinn bann paran Lemesi?

⁴ Anou get enn lexanp Biblik. Kan Zeova ti bizin swazir enn koup parmi bann desandan David, pou vinn bann paran Lemesi, Li ti swazir Zozef ek Mari. Kifer? Toule-de ti ena enn bon lamitie ar Zeova, ek Zeova ti kone ki zot ti pou met Li an premie dan zot lavi maryaz. Ki kitsoz bann koup kapav aprann ar lexanp Zozef ek Mari?

5. Kouma bann mari kapav swiv lexanp Zozef?

⁵ Zozef pa ti tarde pou swiv bann instriksion Zeova, ek akoz sa li ti vinn enn pli bon mari. Omwin trwa fwa, Zeova ti donn li bann instriksion pou so fami. Ek sak fwa, li ti obeir deswit, mem kan sa ti difisil pou li. (Mat. 1:20, 24; 2:13-15, 19-21) Kan li ti swiv bann instriksion Zeova, Zozef ti protez Mari, li ti soutenir li, ek li ti pran li swin. Kan Zozef ti azir koumsa, sirman sa ti fer Mari ena pli boukou lamour ek pli boukou respe pou li! Bann mari kapav swiv lexanp Zozef kan zot rod bann konsey ki ena dan Labib pou zot pran swin zot fami. d Kan to fer sa, mem kan sa difisil pou twa, to montre ki to kontan to madam ek ki to anvi ki to maryaz vinn pli solid. Enn ser ki res Vanuatu, ek ki marye depi plis ki 20 an, dir: “Kan mo mari rod direksion Zeova ek ki li met li an pratik, mo ena plis respe pou li. Mo santi mwa an sekirite ek mo ena konfians ki li pou pran bann bon desizion.”

6. Kouma bann madam kapav swiv lexanp Mari?

⁶ Mari ti ena enn bon lamitie ar Zeova. So lafwa an Zeova pa ti depann lor Zozef. Mari ti konn bien bann Lekritir. (Get not pou letid pou Lik 1:46.) Li ti osi pran letan pou reflesi lor seki li ti aprann. (Lik 2:19, 51) Nou kapav sir ki Mari ti enn bon madam, parski li ti  ena enn bon lamitie ar Zeova. Azordi, boukou madam fer bann gro zefor parey kouma Mari. Par exanp, enn ser ki apel Emiko dir: “Kan mo ti selibater, mo ti ena mo bann labitid spiritiel. Me apre ki mo’nn marye, mo mari ti priye pou nou ek li ti diriz nou ladorasion an fami. Ariv enn moman, mo ti rann mwa kont ki mo ti pe depann lor li pou fer sa bann kitsoz-la pou mwa. Lerla, mo’nn konpran ki mo ti bizin fer zefor pou mo fer mo lamitie ar Zeova vinn pli for. Azordi, mo rezerv letan pou mo tousel ar Zeova, pou mo priye Li, pou mo lir Labib, ek pou mo reflesi lor seki mo aprann.” (Gal. 6:5) Kan bann madam kontign fer zot lamitie ar Zeova vinn pli for, zot mari pou plis kontan zot ek pou donn zot loner.​—Prov. 31:30.

7. Kouma lexanp Zozef ek Mari kapav ed bann konzwin pou ador Zeova ansam?

⁷ Zozef ek Mari ti osi fer bann zefor ansam pou ki zot ena enn bon lamitie avek Zeova. Zot ti konpran ki li bien inportan ki zot ador Zeova ansam kouma enn fami. (Lik 2:22-24, 41; 4:16) Kitfwa zot ti pe gagn bann difikilte pou fer sa, sirtou kan lafami ti pe grandi. Me kanmem sa, zot ti reisi fer li. Zot enn bon lexanp pou bann koup azordi! Si to ena bann zanfan, parey kouma Zozef ek Mari, kitfwa to gagn difikilte pou asiste renion ouswa pou trouv letan pou fer to ladorasion an fami. Kitfwa to gagn difikilte osi pou trouv letan pou etidie ouswa pou priye ansam ar to konzwin. Selman, pa bliye ki, kan to ador Zeova ansam ar to konzwin, to vinn pli pros ar Zeova ek to vinn pli pros ar to konzwin osi. Alor, fer to ladorasion an fami vinn enn priorite.

8. Kan bann koup ena bann problem dan zot maryaz, ki zot kapav fer pou zot profit pli bien zot ladorasion an fami?

⁸ Me ki to kapav fer si to ena bann problem dan to maryaz? Akoz sa bann problem-la, kitfwa zot kapav trouv sa difisil pou asiz ansam ek fer zot ladorasion an fami. Ki kitsoz kapav ed zot? Zot kapav examinn enn ti kitsoz interesan ansam, lor ki zot toule-de dakor pou koze. Sa kapav ogmant zot lamour pou zot kamarad ek zot dezir pou ador Zeova ansam.

9. Kifer bann konzwin bizin pas letan ansam?

⁹ Bann konzwin kapav osi ogmant lamour ki zot ena pou zot kamarad kan zot pas letan ansam. Kan zot fer sa, sa pou ed zot pou kone seki zot konzwin panse ek resanti. (Zen. 2:24) Sa fer plis ki 15 an aster-la ki Lilia ek Ruslan inn marye. Avan zot marye, zot ti panse ki zot ti pou kapav pas boukou letan ansam. Me apre zot maryaz, zot ti realiz enn kitsoz bien inportan. Lilia dir: “Nou ti realize ki nou pa ti pou kapav pas sa kantite letan-la ansam. Nou ti bien okipe ar nou travay, ar bann louvraz lakaz, ek plitar ar nou bann zanfan. Nou ti rann nou kont ki, si nou pa fer zefor pou pas letan ansam, tigit-tigit nou ti pou elwagn nou ar nou kamarad.”

10. Kouma bann konzwin kapav swiv prinsip ki ena dan Efezien 5:15, 16?

¹⁰ Ki kitsoz bann konzwin kapav fer pou zot fer an-sort ki zot pas letan ansam? Kitfwa zot pou bizin rezerv enn moman pou zot kapav pas letan ansam. (Lir Efezien 5:15, 16.) Enn frer ki apel Uzondu ek ki res Nizeria dir: “Kan mo organiz mo lasemenn, mo rezerv bann  moman pou mo pas letan ar mo madam, ek mo fer sa vinn mo priorite.” (Fil. 1:10) Anou gete kouma Anastasia servi bien so letan. Anastasia li madam enn responsab sirkonskripsion dan Moldavi. Li dir: “Mo esey fer mo bann aktivite personel kan mo mari pe okip so bann responsabilite. Koumsa nou kapav pas letan ansam apre.” Me ki to pou fer si to telman okipe ki to pa reisi trouv letan pou pas ar to konzwin?

11. Ki kitsoz Akila ek Priska ti fer ansam?

¹¹ Bann konzwin kapav aprann boukou kitsoz ar lexanp Akila ek Priska, enn koup ki bann Kretien dan premie siek ti bien apresie. (Rom. 16:3, 4) Mem si Labib pa koz boukou lor zot maryaz, li dir nou ki zot ti pe travay, prese, ek ed lezot ansam. (Zist. 18:2, 3, 24-26) An realite, sak fwa Labib koz lor Akila ek Priska, li touletan mansionn zot nom ansam.

12. Ki kitsoz bann konzwin kapav fer pou zot pas plis letan ansam? (Get zimaz osi.)

¹² Kouma bann koup kapav swiv lexanp Akila ek Priska? Reflesi lor tou bann kitsoz ki twa ek to konzwin zot ena pou fer. Eski zot kapav fer sertin sa bann kitsoz-la ansam, olie ki zot fer li sakenn so kote? Par exanp, Akila ek Priska ti prese ansam. Eski twa osi to kapav organiz twa pou to prese regilierman ar to konzwin? Akila ek Priska ti osi travay ansam. Kitfwa twa ek to konzwin zot pa travay ansam, me eski zot kapav fer bann louvraz lakaz ansam? (Ekle. 4:9) Kan zot fer enn travay ansam, zot pou koumadir enn lekip, ek zot pou gagn pli boukou lokazion pou koze. Sa fer plis ki 50 an ki Robert ek Linda inn marye. Robert dir: “An realite, nou pena boukou letan pou pas bann moman detant ansam. Me kan mo pe lav lasiet, mo madam vinn souy zot, ouswa kan mo pe tay lerb deor, li vinn travay akote ar mwa. Sa vremem rann mwa ere! Kan nou fer bann kitsoz ansam, sa fer nou vinn pli pros. Lerla, nou lamour kontign grandi.”

13. Ki kitsoz bann konzwin bizin fer pou zot vinn pli pros ar zot kamarad?

¹³ Selman, mem si nou ansam ar nou konzwin, sa pa vedir ki nou pou vinn pros ar li. Enn ser ki res Brezil dir: “Azordi, nou telman okipe ki nou kapav panse ki nou pe pas letan ansam zis parski nou res dan mem lakaz. Me mo’nn konpran ki sa li pa ase. Mo bizin vremem donn mo konzwin tou mo latansion.” Anou gete kouma Bruno ek so madam Tays fer sa. Bruno dir: “Kan nou pas letan ansam, nou met nou portab enn kote ek nou vremem profit letan ki nou pase ansam.”

14. Si enn koup pa kontan pas letan ansam, ki zot kapav fer?

 ¹⁴ Me ki to kapav fer si twa ek to konzwin zot pa kontan pas letan ansam? Kitfwa zot pa interese ar bann mem kitsoz, ouswa kitfwa zot agase kan zot ansam. Anou reget lexanp ki nou ti servi dan koumansman. Enn dife pa vinn for enn kout koumsa. O-koumansman, bizin met bann ti bout dibwa ar li, ek tigit-tigit met bann pli gro bout dibwa. Dan mem fason, zot kapav pas bann ti moman ansam sak zour. Fer bann kitsoz ki zot toule-de kontan, ek pa fer bann kitsoz ki pou fer enn parmi zot agase. (Zak 3:18) Kan zot koumans fer bann ti kitsoz ansam, tigit-tigit zot lamour pou ogmante.

15. Kifer respe bien inportan dan maryaz?

¹⁵ Respe bien inportan dan enn maryaz. Nou kapav konpar respe ar loxizenn ki enn dife bizin pou li brile. Si pena loxizenn, dife-la pou tengn. Dan mem fason, si pena respe dan maryaz, lamour ki ena ant enn koup pou diminie. Parkont, kan bann konzwin fer zefor pou montre respe anver zot kamarad, zot lamour pou kontign ogmante. Me pa bliye sa: Seki pli inportan, se pa ki twa to panse ki to pe respekte to konzwin; seki pli inportan, se ki to konzwin santi ki to pe respekte li. Sa fer plis ki 25 an ki Penny ek Aret inn marye. Penny dir: “Nou respekte nou kamarad. Akoz sa, ena boukou lamour dan nou lakaz. Nou santi nou lib pou dir seki nou panse parski nou kone ki sakenn respekte lopinion so kamarad.” Ki to kapav fer pou ki to konzwin santi ki to vremem respekte li? Anou get lexanp Abraam ek Sara.

16. Kouma bann mari kapav swiv lexanp Abraam? (1 Pier 3:7) (Get zimaz osi.)

¹⁶ Abraam ti ena respe pou Sara. Li ti ekout Sara kan Sara ti koze ek li ti pran kont so santiman. Enn fwa, Sara ti bien trakase ek li ti ouver so leker ar Abraam. Li ti mem met tor lor Abraam. Eski Abraam ti ankoler ek ti reponn li brit? Non. Li ti kone ki Sara enn bon madam, ki ti respekte bann desizion ki li pran. Abraam ti ekout li ek li ti esey regle problem-la. (Zen. 16:5, 6) Ki leson nou kapav aprann? Zeova inn donn bann mari lotorite pou pran bann desizion pou zot fami. (1 Kor. 11:3) Selman, enn mari pou montre ki li kontan so madam, kan li pran kont so lopinion avan ki li pran enn desizion, sirtou si sa desizion-la konsern so madam osi. (1 Kor. 13:4, 5) Parfwa, kan enn madam strese, kitfwa li bizin dir seki li resanti. Enn  mari pou montre ki li respekte so madam kan li pran letan pou ekout li? (Lir 1 Pier 3:7.) Sa fer anviron 30 an ki Angela ek Dmitry inn marye. Angela explike kouma li kone ki so mari ena respe pou li. Li dir: “Kan mo ankoler, ouswa kan mo zis anvi koze, Dmitry touletan pre pou ekout mwa. Li ena boukou pasians anver mwa, mem kan mo gagn ner.”

17. Kouma bann madam kapav swiv lexanp Sara? (1 Pier 3:5, 6)

¹⁷ Sara ti respekte Abraam. Li ti montre sa kan li ti soutenir bann desizion ki Abraam ti pran. (Zen. 12:5) Enn fwa, bann dimounn ti vinn get Abraam. Abraam pa ti pe atann personn sa zour-la. Me kanmem sa, li’nn desid pou montre lospitalite anver zot. Li ti demann Sara pou aret fer seki li ti pe fer, ek pou prepar boukou dipin. (Zen. 18:6) Sara ti ale deswit ek li ti fer seki Abraam ti demann li. Bann madam kapav swiv lexanp Sara kan zot soutenir bann desizion ki zot mari pran. Kan zot fer sa, zot ede pou ki zot maryaz vinn pli solid. (Lir 1 Pier 3:5, 6.) Dmitry, ki nou ti mansione taler-la, explike kouma so madam montre ki li respekte li. Li dir: “Mo vremem apresie bann zefor ki Angela fer pou soutenir mo bann desizion, mem si parfwa li pa dakor. Si arive ki mo’nn pran enn move desizion, zame li pou kritik mwa.” Kan enn kikenn respekte nou, li pli fasil pou nou kontan li!

18. Kan bann konzwin fer zefor pou ogmant lamour ki zot ena pou zot kamarad, ki bienfe zot gagne?

¹⁸ Satan anvi ki bann konzwin aret kontan zot kamarad. Li kone ki si li reisi fer sa, tigit-tigit sa bann konzwin-la kapav al lwin ar Zeova. Selman, vre lamour se pa enn dife ki kapav tengn! Alor, fer zefor pou ki to lamour pou to konzwin vinn parey kouma bann parol ki ena dan Kantik Salomon. Fer zefor osi pou ki to met Zeova an premie dan to maryaz, pas letan ar to konzwin, ek respekte so santiman. Si to fer sa, to maryaz pou donn laglwar Zeova, Lasours vre lamour. Lerla, parey kouma enn gran dife ki alime bien for, to lamour pou to konzwin pou kontign ogmante.