LARTIK LETID 19
KANTIK 22 Rwayom Bondie Inn Etabli—Ki Li Vini!
Ki Nou Kone lor Fason ki Zeova Pou Ziz Bann Dimounn dan Lavenir?
“Zeova . . . pa anvi ki personn detrir.”—2 PIER 3:9.
PWIN PRINSIPAL
Nou pou gete kifer nou kapav sir ki kan Zeova pou ziz bann dimounn dan lavenir, Li pou fer sa avek lazistis.
1. Kifer nou kapav dir ki nou pe viv enn lepok extraordiner?
NOU pe viv enn lepok extraordiner! Kifer nou dir sa? Parski sak zour nou pe trouv bann profesi Labib realize. Par exanp, nou pe trouv “lerwa dinor” ek “lerwa disid” pe lager ant zot parski zot pe anvi kontrol lemond. (Dan. 11:40) Nou pe trouv bon nouvel pe prese partou dan lemond, ek bann milyon dimounn pe aksepte laverite. (Iza. 60:22; Mat. 24:14) Ek nou pe osi gagn enn kantite manze spiritiel “dan ler ki bizin.”—Mat. 24:45-47.
2. Ki kitsoz nou kapav sir, me ki kitsoz nou bizin rekonet?
2 Zeova pe kontign ed nou pou konpran pli bien bann levennman inportan ki pou arive biento. (Prov. 4:18; Dan. 2:28) Nou kapav sir ki kan gran soufrans pou koumanse, nou pou deza konn tou seki nou bizin kone pou ki nou kapav res fidel ar Zeova ek kontign andire. Selman, nou bizin rekonet ki ena sertin kitsoz ki nou pa kone konsernan lavenir. Dan sa lartik-la, nou pou gete kifer nou bizin sanz fason ki nou ti pe explik sertin kitsoz dan lepase. Ek apre sa, nou pou examinn sertin kitsoz ki nou kone konsernan lavenir ek lor fason ki nou Papa Zeova pou azir.
SEKI NOU PA KONE
3. Dan lepase, ki nou ti dir konsernan bann dimounn ki pa aksepte laverite avan ki gran soufrans koumanse, ek kifer nou ti dir sa?
3 Dan lepase, nou ti dir ki kan gran soufrans pou koumanse, ti pou tro tar pou ki bann dimounn koumans servi Zeova ek ki zot gagn lavi sov. Nou ti dir sa parski nou ti panse ki seki ti arive dan lepok Deliz ti koumadir enn profesi ki ti ena lien ar nou lepok. Par exanp, avan ki Deliz koumanse, Zeova ti “ferm laport” lars ek personn pa ti kapav rantre. Akoz sa, nou ti panse ki kan gran soufrans pou koumanse, dan enn sertenn fason Zeova ti pou “ferm laport,” setadir ki personn ti pou nepli kapav aprann konn Li ek gagn lavi sov.—Mat. 24:37-39.
4. Eski nou bizin konsider seki ti arive dan lepok Deliz kouma enn profesi ki ena enn lien ar nou lepok? Explike.
4 Eski nou bizin konsider seki ti arive dan lepok Deliz kouma enn profesi ki ena enn lien ar nou lepok? Non! Kifer? Parski Labib pa dir sa. a Li vre ki Zezi ti konpar “lepok Noe” ar lepok so “prezans.” Selman, li pa ti dir ki seki ti arive pandan Deliz ti enn profesi, ek ki sak dimounn ek sak levennman ki ti arive dan sa lepok-la, ena enn lien ar nou lepok. Ek li pa ti dir osi ki kan Zeova ti ferm laport lars, ki sa ena enn lien avek seki pou arive dan lavenir. Selman, sa pa vedir ki nou pa kapav tir bann leson ar seki ti arive dan lepok Noe.
5. (a) Ki Noe ti fer avan ki Deliz vini? (Ebre 11:7; 1 Pier 3:20) (b) Ki lien ena ant predikasion Noe ek nou predikasion azordi?
5 Kan Noe ti tann mesaz Zeova, li ti montre ki li ti ena lafwa kan li ti aranz enn lars. (Lir Ebre 11:7; 1 Pier 3:20.) Dan mem fason, kan bann dimounn tann mesaz bon nouvel azordi, zot bizin montre ki zot ena lafwa kan zot met an pratik seki zot aprann. (Zist. 3:17-20) Pier ti dir ki Noe ti “enn predikater lazistis.” (2 Pier 2:5) Selman, kouma nou ti trouve dan lartik avan, nou pa kone si Noe ti reisi pres ar tou dimounn lor later avan ki Deliz vini. Azordi, ena enn gran travay predikasion ki pe fer partou lor later, ek nou pe fer boukou zefor pou pres ar tou dimounn. Kanmem sa, nou pa pou reisi pres ar sak dimounn ki ena lor later avan ki lafin vini. Kifer nou dir sa?
6-7. Kifer nou dir ki nou pa pou reisi pres ar sak dimounn ki ena lor later avan ki lafin vini? Explike.
6 Anou reflesi lor seki Zezi ti dir konsernan predikasion. Li ti predir ki bon nouvel ti pou prese “partou kot bann dimounn reste lor later kouma enn temwaniaz pou tou bann nasion.” (Mat. 24:14) Sa profesi-la pe realize azordi. Azordi, nou bann piblikasion disponib dan plis ki 1,000 lang, ek gras-a nou sit jw.org, laplipar bann dimounn lor later pe kapav tann koz lor bon nouvel Rwayom Bondie.
7 Selman, Zezi ti osi dir so bann disip ki zot pa ti pou “reisi al dan tou bann lavil,” setadir pres ar sak dimounn, avan ki li vini. (Mat. 10:23; 25:31-33) Sa bann parol-la vre, parski azordi ena bann milyon dimounn ki res dan bann landrwa kot nou predikasion interdi. Anplis, sak minit, plizir santenn ti-baba pe ne. Alor, mem si nou pe fer nou maximum pou pres “ar tou bann nasion, tribi, [ek] lang,” nou pa pou reisi pres bon nouvel ar sak dimounn ki ena lor later avan ki lafin vini.—Rev. 14:6.
8. Ki kestion nou kapav poz nou-mem? (Get zimaz osi.)
8 Selman, kitfwa nou poz nou-mem sa kestion-la: ‘Me ki pou ariv tou bann dimounn ki pa’nn gagn lokazion pou tann koz lor bon nouvel avan ki gran soufrans koumanse? Kouma Zezi, ki’nn gagn responsabilite pou ziz bann dimounn, ek Zeova, pou azir anver zot?’ (Zan 5:19, 22, 27; Zist. 17:31) Nou text prinsipal pou sa lartik-la rapel nou ki Zeova “pa anvi ki personn detrir.” Okontrer, Li anvi ki “tou dimounn repanti.” (2 Pier 3:9; 1 Tim. 2:4) Me mem si nou konn sa lor Zeova, Li pankor dir nou kouma Li pou ziz bann dimounn ki zame pa’nn tann koz lor bon nouvel, ek Li pa oblize dir nou sa.
Kouma Zeova pou azir anver bann dimounn ki pa’nn gagn lokazion pou tann koz lor bon nouvel avan ki gran soufrans koumanse? (Get paragraf 8) c
9. Ki kitsoz Zeova inn fer nou kone gras-a Labib?
9 Dan Labib, Zeova inn fer nou konn sertin kitsoz ki Li pou fer dan lavenir. Par exanp, Labib dir nou ki Zeova pou resisit “bann dimounn ki inzis,” setadir bann dimounn ki pa’nn gagn lokazion pou tann bon nouvel ek pou fer bann sanzman. (Zist. 24:15; Lik 23:42, 43) Ek akoz sa, nou kapav poz nou-mem bann lezot kestion.
10. Ki lezot kestion nou kapav poz nou-mem?
10 Eski tou dimounn ki pou mor pandan gran soufrans pa pou resisite? Labib dir ki tou bann ki opoz ar Zeova, ek tou bann ki Zeova ek so larme pou detrir pandan Armagedon, pa pou resisite. (2 Tes. 1:6-10) Me pandan gran soufrans, ki pou ariv bann dimounn ki pou mor parski zot vie, zot malad, zot inn fer enn aksidan, ouswa parski enn kikenn inn touy zot? (Ekle. 9:11; Zaka. 14:13) Eski sa bann dimounn-la pou form parti “bann dimounn ki inzis,” ki pou resisite dan lemond nouvo? Nou pa kone.
SEKI NOU KONE
11. Pandan Armagedon, lor ki kitsoz pou ziz bann dimounn?
11 Nou konn plizir kitsoz ki pou arive dan lavenir. Par exanp, nou kone ki pandan Armagedon, nou Lerwa pou ziz bann dimounn dapre fason ki zot inn tret bann frer Zezi. (Mat. 25:40) Bann ki’nn soutenir bann 144,000 ek Zezi, pou konsider zot kouma bann mouton. Nou kone osi ki sertin frer Zezi pou ankor lor later kan gran soufrans pou koumanse, ek ki zot pou mont dan lesiel inpe avan Armagedon. Tanki bann frer Zezi ankor lor later, kitfwa bann dimounn pou ankor ena lokazion pou soutenir zot ek travay ansam ar zot. (Mat. 25:31, 32; Rev. 12:17) Kifer sa bann kitsoz-la bien inportan?
12-13. Kouma sertin dimounn kitfwa pou reazir kan zot pou trouv destriksion “Gran Babilonn”? (Get zimaz osi.)
12 Apre ki gran soufrans koumanse, li posib ki sertin dimounn ki’nn trouv destriksion “Gran Babilonn,” rapel ki pandan plizir lane bann Temwin Zeova ti anonse ki sa ti pou arive. Eski li posib ki sa bann dimounn-la koumans ena lafwa dan Zeova?—Rev. 17:5; Eze. 33:33.
13 Si sa arive, sa pou resanble seki ti arive dan lepok Moiz. Kan bann Izraelit ti kit Lezip, “enn gran pep tou sort kalite dimounn” ti al ansam ar zot. Sertin parmi zot ti koumans ena lafwa dan Zeova kan zot ti trouv Dis Fleo ki Moiz ti anonse, realize. (Ex. 12:38) Si enn kitsoz koumsa arive apre destriksion Gran Babilonn, eski nou pou panse ki li inzis ki bann dimounn pe gagn lokazion pou zwenn ansam ar nou zis avan ki lafin arive? Fode pa nou pans koumsa! Nou bizin ena mem fason panse ki nou Papa Zeova, ki “enn Bondie ki ena mizerikord ek konpasion, ki pa ankoler vit, ek ki ena lamour fidel ek laverite an-abondans.” b—Ex. 34:6.
Sertin dimounn ki pou trouv destriksion “Gran Babilonn” pou rapel ki pandan plizir lane bann Temwin Zeova ti anonse ki sa ti pou arive (Get paragraf 12-13) d
14-15. Pou ki enn dimounn viv pou touletan, eski sa depann lor kan li’nn mor ouswa lor kotsa li reste? Explike. (Psom 33:4, 5)
14 Parfwa, nou kapav tann bann frer ek ser dir, “Ti pou pli bon ki mo bann fami ki pa Temwin mor avan ki gran soufrans koumanse, koumsa ena enn posibilite ki zot resisite.” Sa bann parol-la montre ki sa bann frer ek ser la bien kontan zot fami. Selman, pou ki enn kikenn resisite ek ki li gagn posibilite pou viv pou touletan, sa pa depann lor kan li’nn mor. Zeova Li enn Ziz ki parfe ek Li touletan pran bann bon desizion. (Lir Psom 33:4, 5.) Alor, nou kapav sir ki “sa Ziz lor later antie la” pou fer seki drwat.—Zen. 18:25.
15 Posibilite pou viv pou touletan, li pa depann osi lor kotsa enn kikenn reste. Par exanp, ena bann milyon dimounn ki res dan bann pei kot nou pa reisi prese, ek Zeova zame pa pou konsider sa bann milyon dimounn-la kouma “bann kabri.” (Mat. 25:46) Zeova, “sa Ziz lor later antie la,” gagn traka sakenn parmi sa bann dimounn-la. Nou pa kone kouma Zeova pou diriz bann kitsoz pandan gran soufrans. Kitfwa sertin parmi sa bann dimounn-la pou gagn lokazion pou aprann konn Zeova, pou ena lafwa dan Li, ek pou servi Li avan ki Li sanktifie so nom devan tou bann pep.—Eze. 38:16.
Apre ki gran soufrans koumanse, . . . eski li posib ki sa bann dimounn-la koumans ena lafwa dan Zeova?
16. Ki kitsoz nou’nn aprann lor Zeova? (Get zimaz osi.)
16 Gras-a nou letid Labib, nou’nn aprann ki lavi sak dimounn ena valer pou Zeova. Se pou sa rezon-la ki Li’nn donn nou lavi so Garson, ek gras-a sa, nou ena posibilite pou viv pou touletan. (Zan 3:16) Nou tou nou’nn resanti lamour Zeova, pa vre! (Iza. 49:15) Li kone kouma nou apele ek Li konn sakenn parmi nou personelman. Li konn nou telman bien ki si arive nou mor, Li kapav resisit nou parey kouma nou ti ete ek avek tou nou bann souvenir. (Mat. 10:29-31) Alor, nou kapav sir ki nou Papa Zeova pou fer seki drwat kan Li pou ziz sak dimounn, parski Li enn Bondie ki ena sazes, lazistis, ek mizerikord.—Zak 2:13.
Nou kapav sir ki Zeova pou fer seki drwat kan Li pou ziz sak dimounn, parski Li ena sazes, lazistis, ek mizerikord (Get paragraf 16)
17. Ki nou pou examine dan prosin lartik?
17 Avek bann nouvo lexplikasion ki nou’nn examine dan sa lartik-la, nou konpran ki li bien inportan ki nou kontign prese. Kifer nou dir sa? Ek ki kitsoz bizin motiv nou pou kontign pres bon nouvel? Dan prosin lartik, nou pou reponn sa bann kestion-la.
KANTIK 76 Ki To Pe Resanti?
a Pou konpran kifer nou’nn fer sa sanzman-la, get lartik “Samem To Volonte” dan Latour Degard 15 Mars 2015, p. 7-11.
b Apre destriksion Gran Babilonn, lafwa tou bann serviter Zeova pou teste pandan latak Gog ki sorti pei Magog. Tou bann dimounn ki’nn zwenn ansam ar bann serviter Zeova apre destriksion Gran Babilonn, zot osi zot lafwa pou teste.
c DESKRIPSION ZIMAZ Paz 9: Trwa zimaz ki montre kifer sertin dimounn pa’nn tann koz lor bon nouvel: (1) Enn madam ki res dan enn pei ki bien relizie ek kot nou predikasion interdi, (2) enn koup ki res dan enn pei kot nou laktivite ilegal ek kot li bien danzere pou nou prese akoz gouvernman, ek (3) enn misie ki res dan enn landrwa ki bien lwin ek kot nou pa reisi al prese.
d DESKRIPSION ZIMAZ: Enn tifi ki’nn kit laverite, rapel seki li ti aprann lor destriksion “Gran Babilonn.” Li desid pou retourn ar Zeova ek li retourn kot so bann paran ki bann Temwin. Si enn kitsoz koumsa arive, nou bizin ena mizerikord ek konpasion parey kouma nou Papa Zeova, ek nou bizin zwaye parski enn kikenn ki ti abandonn Zeova inn retourn ver Li.
