LARTIK LETID 20
KANTIK 67 Anou Al Prese
Lamour Bizin Motiv Twa pou Kontign Prese
“Fode ki pres bon nouvel avan, dan tou bann nasion.”—MARK 13:10.
PWIN PRINSIPAL
Dan sa lartik-la, nou pou gete kouma lamour motiv nou pou res bien aktif dan predikasion ek pou kontign prese ar tou nou leker.
1. Ki nou’nn aprann dan renion aniel 2023?
DAN renion aniel 2023, a nou’nn gagn bann nouvo lexplikasion konsernan sertin lansegnman, ek nou’nn gagn bann bon nouvel konsernan predikasion. Par exanp, nou’nn aprann ki sertin dimounn kitfwa pou gagn lokazion pou servi Zeova apre destriksion Gran Babilonn. Nou’nn aprann osi ki apartir Novam 2023, bann proklamater pou nepli bizin met sertin detay lor zot rapor. Eski sa bann sanzman-la vedir ki predikasion nepli sa kantite inportan-la aster? Non!
2. Sak zour ki pase, kifer li vinn deplizanpli inportan ki nou prese? (Mark 13:10)
2 Sak zour ki pase, li vinn deplizanpli inportan ki nou prese. Kifer nou dir sa? Parski pa res boukou letan avan ki lafin vini. Anou gete seki Zezi ti predir konsernan predikasion dan bann dernie zour. (Lir Mark 13:10.) Dan Levanzil Matie, Zezi ti dir ki bon nouvel ti pou prese partou lor later avan ki “lafin” vini. (Mat. 24:14) Lor ki lafin Zezi ti pe koze? Li ti pe koz lor lafin move lemond Satan. Zeova inn fini fixe ‘enn zour ek enn ler’ pou ki lafin arive. (Mat. 24:36; 25:13; Zist. 1:7) Ek sak zour ki pase, nou pe koste pli pre ar lafin. (Rom. 13:11) Me ziska ki lafin arive, nou bizin kontign prese.
3. Ki kitsoz motiv nou pou prese?
3 Enn kestion ki nou tou nou bizin poz nou-mem se: ‘Pou ki rezon nou bizin pres bon nouvel?’ Nou prese parski se lamour ki motiv nou pou prese. Kan nou prese, nou montre ki nou kontan bon nouvel, ki nou kontan bann dimounn, me pli inportan, ki nou kontan Zeova ek so nom. Anou examinn sakenn parmi sa bann rezon-la.
NOU PRESE PARSKI NOU KONTAN BON NOUVEL
4. Kouma nou reazir kan nou gagn enn bon nouvel?
4 Eski to rapel seki to ti resanti kan to ti gagn enn bon nouvel—kitfwa enn manb to fami inn gagn enn zanfan ouswa to’nn gagn enn nouvo travay? Kan to ti gagn sa nouvel-la, sirman to ti bien kontan ek to ti partaz sa ar to fami ek to bann kamarad! Eski to ti reazir dan mem fason kan to ti aprann pli bon nouvel ki ena, setadir bon nouvel lor Rwayom Bondie?
5. Ki to ti resanti kan to ti koumans aprann bann verite ki ena dan Labib? (Get zimaz osi.)
5 Eski to rapel seki to ti resanti kan to ti koumans aprann bann verite ki ena dan Labib? Par exanp, to ti aprann ki to Papa Zeova bien kontan twa ek ki Li anvi ki to form parti so fami. To ti aprann osi ki Li pou tir tou soufrans ek ki Li pou resisit bann dimounn ki to kontan me ki’nn mor, pou ki zot kapav viv dan enn nouvo lemond. (Mark 10:29, 30; Zan 5:28, 29; Rom. 8:38, 39; Rev. 21:3, 4) Sa bann verite-la ek lezot ankor, sirman ti bien tous to leker, pa vre! (Lik 24:32) To ti bien kontan seki to ti pe aprann ek to ti anvi partaz sa ar tou dimounn!—Konpar ar Zeremi 20:9.
Kan nou’nn koumans aprann bann verite ki ena dan Labib, sirman nou ti anvi partaz sa ar tou dimounn (Get paragraf 5)
6. Ki to’nn aprann ar lexanp Ernest ek Rose?
6 Anou get lexanp enn frer ki apel Ernest. b Li ti ena di-z-an kan so Papa ti mor. Ernest dir: “Mo ti demann momem: ‘Eski li’nn al dan lesiel? Ouswa eski li’nn aret existe?’ Mo ti bien zalou bann lezot zanfan ki ti ankor ena zot papa.” Ernest souvan ti al simitier, li ti azenou lor tom so papa, ek li ti demann Bondie: “Silteple Bondie, mo anvi kone kotsa mo papa ete.” Apepre 17 an apre lamor so papa, Ernest ti aksepte enn letid Labib. Li ti bien kontan kan li ti aprann ki bann mor pa konn nanye, ki zot dan enn profon somey, ek ki Labib promet ki pou ena enn rezireksion. (Ekle. 9:5, 10; Zist. 24:15) Ernest ti reisi gagn repons pou so bann kestion, ek li ti bien kontan seki li ti pe aprann dan Labib. Rose, Ernest so madam, ti koumans etidie Labib li osi, ek li osi li ti bien kontan seki li ti pe aprann. Zot ti pran batem an 1978, ek zot ti kontan partaz seki zot ti aprann ar zot fami, zot bann kamarad, ek ar ninport kisann-la ki ti ekout zot. Gras-a sa, Ernest ek Rose inn ed plis ki 70 dimounn pou vinn dan laverite.
7. Kan nou kontan bann verite ki ena dan Labib, ki sa motiv nou pou fer? (Lik 6:45)
7 Parey kouma Ernest ek Rose, kan nou kontan bann verite ki ena dan Labib, nou pa kapav gard sa pou nou. (Lir Lik 6:45.) Nou ena mem santiman ki bann disip Zezi dan premie siek, ki ti dir: “Nou pa kapav aret koz lor bann kitsoz ki nou’nn trouve ek tande.” (Zist. 4:20) Kan nou kontan bann verite ki ena dan Labib, nou anvi partaz sa ar tou dimounn.
NOU PRESE PARSKI NOU KONTAN BANN DIMOUNN
8. Ki kitsoz motiv nou pou pres bon nouvel ar lezot? (Get lankadre “ Lamour Motiv Nou—Pou Fer Bann Disip.”) (Get zimaz osi.)
8 Parey kouma Zeova ek Zezi, nou kontan bann dimounn. (Prov. 8:31; Zan 3:16) Nou ena boukou konpasion pou bann dimounn ki ‘pa konn Bondie ek ki pena lesperans.’ (Efe. 2:12) Zot pe nwaye ar zot bann problem, ek nou, nou ena enn zile sovtaz ki kapav sov zot. Sa zile-la se bon nouvel lor Rwayom Bondie. Parski nou kontan zot ek nou ena konpasion pou zot, nou anvi fer nou maximum pou pres bon nouvel ar zot. Bon nouvel lor Rwayom Bondie kapav donn zot enn lespwar, fer zot ena enn pli bon lavi depi aster-la mem, ek sa donn zot posibilite pou gagn “vre lavi,” setadir pou viv pou touletan dan lemond nouvo.—1 Tim. 6:19.
Nou kontan bann dimounn ek nou ena konpasion pou zot, akoz sa nou anvi fer nou maximum pou pres bon nouvel ar zot (Get paragraf 8)
9. Ki kitsoz nou bizin dir bann dimounn konsernan seki pou arive biento, ek kifer? (Ezekiel 33:7, 8)
9 Nou lamour pou bann dimounn motiv nou osi pou averti zot ki lafin sa move lemond-la bien pre. (Lir Ezekiel 33:7, 8.) Nou bien sagrin nou bann fami ki pa servi Zeova ek bann lezot dimounn, parski zot pa kone ki pou arive biento. Zot pe kontign viv zot ti lavi, alor ki biento pou ena “enn gran soufrans kouma zame pa finn ena avan, depi koumansman lemond ziska zordi, ek ki zame pa pou ena ankor.” (Mat. 24:21) Nou bizin dir zot seki pou arive biento, setadir ki fos relizion pou detrir, ek ki apre sa, move lemond Satan osi pou detrir pandan lager Armagedon. (Rev. 16:14, 16; 17:16, 17; 19:11, 19, 20) Nou bizin priye pou ki zot ekout nou mesaz ek ki sa pous zot pou koumans servi Zeova. Me ki pou ariv bann dimounn ek nou fami ki pa ekout nou mesaz azordi?
10. Kifer li bien inportan ki nou fer bann dimounn kone seki pou arive biento?
10 Kouma nou ti trouve dan lartik avan, kitfwa sertin dimounn ki pou trouv destriksion Gran Babilonn, pou koumans ena lafwa dan Zeova, ek li posib ki Zeova pou sov zot. Akoz sa, li bien inportan ki nou fer bann dimounn kone seki pou arive biento. Alor, pa bliye sa: Pou ki bann dimounn rapel seki nou ti dir zot, fode ki depi aster-la mem nou dir zot seki pou arive biento! (Konpar ar Ezekiel 33:33.) Kitfwa zot pou rapel ki nou ti dir zot ki sa bann kitsoz-la ti pou arive, ek kitfwa sa pou motiv zot pou servi Zeova ansam ar nou, avan ki li tro tar. Parey kouma sa gardien prizon ki ti koumans ena lafwa dan Zeova apre ki “ti ena enn gran tranbleman-de-ter,” li posib ki sertin dimounn ki pa ekout nou mesaz aster-la, pou koumans ena lafwa kan zot pou trouv destriksion Gran Babilonn.—Zist. 16:25-34.
NOU PRESE PARSKI NOU KONTAN ZEOVA EK NOU KONTAN SO NOM
11. Kouma nou donn Zeova laglwar, loner, ek pwisans? (Revelasion 4:11) (Get zimaz osi.)
11 Rezon prinsipal kifer nou pres bon nouvel se parski nou kontan Zeova ek nou kontan so nom ki sin. Kan nou prese, se enn fason ki nou loue nou Bondie ki nou bien kontan. (Lir Revelasion 4:11.) Avek tou nou leker, nou dakor ar bann kreatir spiritiel ki ti dir: “To dign, Zeova nou Bondie, pou gagn laglwar, loner ek pwisans.” Nou donn Zeova ‘laglwar ek loner’ kan nou montre bann dimounn ki se Li ki’nn “kree tou kitsoz” ek ki se gras-a Li ki nou existe. Ek nou donn Zeova nou pwisans kan nou servi nou letan, nou lafors, ek nou bann kitsoz materyel pou fer nou maximum dan predikasion dapre nou sitiasion. (Mat. 6:33; Lik 13:24; Kol. 3:23) Parski nou kontan Zeova, nou fer bann dimounn konn so nom, ek nou fer zot kone osi ki kalite Bondie Li ete.
Nou donn Zeova nou pwisans kan nou servi nou letan, nou lafors, ek nou bann kitsoz materyel pou fer nou maximum dan predikasion dapre nou sitiasion (Get paragraf 11)
12. Kan nou prese, kouma nou sanktifie nom Zeova?
12 Nou lamour pou Zeova motiv nou pou sanktifie so nom. (Mat. 6:9) Ek sa pous nou pou dir bann dimounn ki seki Satan inn dir lor Zeova li fos. (Zen. 3:1-5; Zob 2:4; Zan 8:44) Kan nou prese, nou dir tou bann dimounn ki ekout nou kisann-la Zeova ete ek ki kalite Bondie Li ete. Nou anvi dir tou dimounn ki so pli gran kalite se lamour, ki Limem meyer Dirizan ki ena, ek ki so Rwayom biento pou tir tou soufrans ek pou amenn lape. Lerla, tou dimounn pou ere. (Ps. 37:10, 11, 29; 1 Zan 4:8) Kan nou dir bann dimounn sa bann kitsoz-la, nou sanktifie nom Zeova, ek sa rann nou ere parski se samem ki bann Temwin Zeova sipoze fer. Kifer nou dir sa?
13. Kifer nou fier ki nou enn Temwin Zeova? (Izai 43:10-12)
13 Zeova inn swazir nou pou vinn so “bann temwin.” (Lir Izai 43:10-12.) Finn gagn de-trwa lane, enn let Komite Santral ti dir: “Nou ena pli gran privilez ki kapav ena, privilez pou port nom Temwin Zeova.” c Kifer? Anou pran enn lexanp. Si to bizin enn kikenn pou dibout pou twa kouma temwin devan lakour, kisann-la to pou swazir? Sirman to pou swazir enn dimounn ki to konn bien, ki to fer konfians, ek ki ena enn bon repitasion, koumsa bann dimounn pou krwar li. Kan Zeova inn swazir nou kouma so bann temwin, sa montre ki Li konn nou bien, ki Li fer nou konfians, ek ki Li kone ki nou pou dir laverite lor Li. Nou bien kontan ki nou enn Temwin Zeova! Akoz sa, nou sezi tou lokazion ki nou gagne pou fer bann dimounn konn so nom, ek pou fer zot kone ki tou seki Satan inn dir lor Li fos. Kan nou fer sa, nou montre ki nou fier ki nou enn Temwin Zeova!—Ps. 83:18; Rom. 10:13-15.
NOU BIZIN KONTIGN PRESE ZISKA KI LAFIN ARIVE
14. Ki kitsoz kitfwa pou arive dan lavenir?
14 Nou vremem inpasian pou trouv tou seki pou arive dan lavenir! Avek led Zeova, kitfwa nou pou trouv boukou dimounn ankor aksepte laverite avan ki gran soufrans koumanse. Ek pandan gran soufrans, kitfwa pou ena bann dimounn ki pou kit lemond Satan ek pou koumans ador Zeova ansam ar nou.—Zist. 13:48.
15-16. Ki nou bien deside pou fer, ek ziska kan nou bizin fer sa?
15 Me an-atandan, nou ena enn travay inportan pou fer; enn travay ki zame nou pa pou fer ankor. Nou ena privilez pou pres bon nouvel lor Rwayom Bondie partou lor later. Nou bizin osi dir bann dimounn seki pou arive biento. Bann dimounn bizin kone ki lafin sa lemond-la bien pre, ek kan zour zizman arive, zot pou konpran ki mesaz ki nou ti pe prese sorti kot Zeova.—Eze. 38:23.
16 Alor, ki nou bien deside pou fer? Nou bien deside pou res aktif dan predikasion ek pou kontign prese ar tou nou leker. Nou fer sa parski nou kontan bon nouvel, nou kontan bann dimounn, me pli inportan, nou kontan Zeova ek nou kontan so nom. Ek nou bien deside pou kontign prese ziska ki Zeova dir nou, “Ase!”
KANTIK 54 Samem Sa Semin-La
a Le 7 Oktob 2023, ti ena renion aniel dan Lasal Lasanble bann Temwin Zeova dan Newburgh, New York, Letazini. Premie parti sa renion aniel la trouv dan Program Televizion JW Novam 2023 ek deziem parti-la trouv dan Program Televizion JW Zanvie 2024.
b Get lartik “Labib Sanz Bann Dimounn—Bann Repons Biblik ki Kler ek Lozik Ti Inpresionn Mwa,” dan Latour Degard 1e Fevriye 2015.
c Get Ministere du Royaume Fevriye 2007, p. 5.
