1. Ki bann sante ed nou pou fer?

ENN zour, enn konpoziter bien seleb ti dir: “Kan to tann bann parol, sa fer twa reflesi. Kan to tann lamizik, sa fer twa resanti kitsoz. Me kan to sante, bann parol-la tous to leker.” Atraver bann sante nou loue Zeova, nou Papa ki dan lesiel ek nou exprim Li nou lamour. Bann sante fer nou vinn pli pros ar Li. Alor, li fasil pou konpran kifer bann sante ena enn gran linportans dan vre ladorasion, ki nou sant tousel ouswa avek nou bann frer ek ser.

2, 3. (a) Ki sertin resanti kan zot ena pou sant for ar kongregasion? (b) Ki bann kestion nou pou examine dan sa lartik-la?

² Ki to resanti kan to ena pou sant for ar kongregasion? Eski to onte pou fer sa? Dan sertin kiltir, kitfwa bann misie pa alez pou sant devan lezot. Sa latitid-la kapav ena enn move lefe lor kongregasion, sirtou si bann ansien ezite pou sante ouswa si pandan ki pe sant bann kantik zot okipe ar lezot kitsoz.​—Psom 30:12.

³ Bann sante form parti dan nou ladorasion pou Zeova.  Alor, nou pa pou anvi kit nou plas ouswa mem pa la kan pe sant kantik. Akoz sa, nou bizin demann noumem: ‘Ki mo resanti kan mo ena pou sant bann kantik pandan renion? Ki mo kapav fer si mo ezite pou sante devan lezot? Ek kouma mo kapav sant bann kantik avek santiman?’

4, 5. Dan lepase, ki bann laranzman ti fer pou sante dan tanp dan Izrael?

⁴ Toutlong listwar, bann serviter Zeova finn servi lamizik pou loue Zeova. Li interesan pou kone ki, kan bann Izraelit ti fidel anver Zeova, bann sante ti ena enn gran linportans dan zot ladorasion. Par exanp, kan David ti fer bann preparasion pou tanp, li ti organiz 4,000 Levit pou loue Zeova avek lamizik. Parmi ti ena 288 ki “ti gagn formasion pou sant pou Zeova, zot tou ti bann exper.”​—1 Kronik 23:5; 25:7.

⁵ Lamizik ek sante ti ena osi enn gran linportans pandan linogirasion tanp. Labib dir nou: “Letan bann ki zwe tronpet ek bann santer ti pe loue ek remersie Zeova ansam dan linite, ek kan son bann tronpet, bann sinbal, ek lezot linstriman lamizik ti pe monte pandan ki zot ti pe loue Zeova, . . . laglwar Zeova ti ranpli lakaz vre Bondie.” Sey mazine kouma sa levennman-la ti ranforsi lafwa bann Izraelit!​—2 Kronik 5:13, 14; 7:6.

6. Kan Neemia ti gouverner dan Zerizalem, ki bann dispozision li ti pran konsernan lamizik ek sante?

⁶ Neemia, ki ti organiz bann Izraelit pou rekonstrir bann miray Zerizalem, ti osi organiz bann Levit pou sante ek pou zwe lamizik. Sa ti rann linogirasion tanp ankor pli zwaye. Neemia ti organiz “de gran koral pou sant bann sante remersiman.” Bann koral-la ti mars lor miray lavil dan bann direksion opoze ziska ki zot ti zwenn lor miray ki ti pli pre ar tanp. Bann son ki zot ti pe fer ti telman for ki bann dimounn ti kapav tann zot depi bien lwin. (Neemia 12:27, 28, 31, 38, 40, 43) Nou kapav sir ki Zeova ti kontan pou tann so bann serviter sant avek tou zot leker pou loue Li.

7. Kouma Zezi ti montre ki bann sante ti pou ena enn gran linportans dan ladorasion pou bann Kretien?

⁷ Dan lepok Zezi, lamizik ti kontign ena enn gran linportans dan vre ladorasion. Reflesi lor seki ti arive lanwit pli inportan dan listwar limanite. Apre ki Zezi ti pran Repa Lesegner avek so bann disip, zot tou ti sant bann louanz pou Zeova.​—Lir Matie 26:30.

8. Ki bon lexanp bann premie Kretien inn les nou an rapor avek loue Bondie avek bann sante?

⁸ Bann premie Kretien finn les nou enn bon lexanp parski zot osi zot ti pe loue Bondie avek bann sante. Bann Izraelit ti al dan tanp pou ador Zeova, parkont sa bann Kretien-la ti zwenn dan bann lakaz. Mem si sa bann lakaz-la pa ti otan zoli ek inpresionan ki tanp, kanmem sa, sa bann Kretien-la ti sante avek zel. Lapot Pol ti dir so bann frer ek ser: “Kontign ansegne ek ankouraz sakenn zot kamarad par  bann psom, bann louanz pou Bondie, bann sante spiritiel ki zot sante avek rekonesans, ek sant dan zot leker pou Zeova.” (Kolosien 3:16, NW.) Alor, nou bizin sant bann kantik ki trouv dan nou liv kantik “avek rekonesans.” Sa form parti “nouritir dan ler ki bizin” ki “lesklav fidel ek saz” donn nou.​—Matie 24:45, NW.

9. (a) Kifer sertin kitfwa ezite pou sant for pandan bann renion ek lasanble? (b) Kouma nou bizin sant bann louanz pou Zeova, ek kisannla bizin donn lexanp? (Get zimaz dan koumansman lartik.)

⁹ Sit bann rezon ki kapav fer twa ezite pou sante. Sirman dan to fami ouswa dan to kiltir bann dimounn pa abitie sante. Ouswa sirman to ekout bann santer profesionel sante lor radio, lor televizion, ek kan to konpar to lavwa ar bannla, to onte ouswa to pa satisfe ar to lavwa. Me nou tou nou ena responsabilite pou sant bann louanz pou Zeova. Alor, met to liv kantik bien lao, lev to latet, ek sant avek lantouziasm! (Ezra 3:11; lir Psom 147:1, NW.) Azordi, dan boukou Lasal kot nou fer renion, pas parol bann kantik lor lekran, ek sa kapav ed nou pou sant for. Li interesan osi pou kone ki asterla bann sante form parti dan Lekol pou Bann Frer Nome. Sa montre bann ansien ki kantite li inportan ki zot donn lexanp kan bizin sant bann kantik pandan renion.

10. Ki nou bizin rapel si nou per pou sant for?

¹⁰ Boukou per pou sant for parski zot panse ki zot pou sant tro for ouswa ki zot pena enn bon lavwa. Selman, reflesi lor la. “Nou tou fer fot” kan nou  koze, me sa pa anpes nou koze. (Zak 3:2) Alor, kifer nou bizin les nou lavwa inparfe anpes nou sant kantik pou loue Zeova?

11, 12. Kouma nou kapav amelior nou fason sante?

¹¹ Kitfwa nou per pou sante parski nou pa konn sant bien. Pourtan, ena bann sinp ti kitsoz ki nou kapav fer pou amelior nou fason sante. *​—Get not.

¹² To kapav sante avek enn lavwa for ek pwisan kan to aprann kouma respir bien. Parey kouma kouran donn enn glob lenerzi, to respirasion donn lafors to lavwa kan to koze ouswa sante. To bizin sant lor mem ton ki to koze ouswa mem pli for. (Get bann sigzesion ki trouv dan liv Tirez profit de l’École du ministère théocratique, paz 181 ziska 184, anba soutit « Utilisez correctement votre provision d’air ».) Ofet, parfwa Labib dir bann serviter Zeova “sant for-for zot lazwa” kan zot sant bann louanz.​—Psom 33:1-3.

13. Explike kouma nou kapav sant avek plis lasirans.

¹³ Pandan ladorasion an fami ouswa par tomem, esey fer sa: Swazir enn parmi to bann kantik prefere dan nou liv kantik. Lir bann parol-la for ek avek lasirans. Apre sa, avek mem volim, dir tou bann parol ki ena dan enn fraz avek enn sel lesouf. Apre sa, sant fraz-la avek mem volim. (Izai 24:14) To lavwa pou vinn pli pwisan, ek sa li enn bon kitsoz. Pa les sa fer twa per ouswa gagn onte!

14. (a) Kan to ouver to labous gran, kouma sa kapav ed twa pou sante? (Get lankadre “ Kouma To Kapav Amelior To Fason Sante?”) (b) Ki bann sigzesion to trouv pratik pou amelior to lavwa?

¹⁴ Pou ki to ena enn lavwa pwisan kan to sante, to bizin fer lespas dan to labous. Alor kan to sante, ouver to labous pli gran ki kan to koze. Me ki to kapav fer si to remarke ki to ena enn ti lavwa ouswa enn lavwa tro persan? To kapav gagn bann sigzesion pratik dan lankadre « Quelques problèmes particuliers à surmonter » ki trouv dan liv Tirez profit de l’École du ministère théocratique, paz 184.

15. (a) Ki lanons ti fer dan renion aniel 2016? (b) Sit sertin rezon kifer finn reviz nou liv kantik.

¹⁵ Tou bann ki ti asiste renion aniel 2016 ti extra kontan kan Frer Stephen Lett, manb Komite Santral ti anons nouvo liv kantik, “Sant Avek Lazwa” pou Zeova. Parey kouma Frer Lett ti explike, enn rezon kifer nou ti bizin enn nouvo liv kantik se parski Les Saintes Écritures. Traduction du monde nouveau, an Angle finn revize. Finn sanz bann parol dan nou kantik parski finn tir sertin expresion dan Traduction du monde nouveau. Anplis, finn azout bann nouvo kantik lor predikasion ek laranson. Ek parski bann sante ena enn gran linportans dan nou ladorasion, Komite Santral ti anvi fer enn liv kantik ki ena enn kalite siperyer. Akoz sa so kouvertir parey kouma Labib Traduction du monde nouveau revize.

16, 17. Sit lezot sanzman ki finn fer dan nouvo kantik.

¹⁶ Pou ki li pli fasil pou servi nou liv kantik, finn regroup bann sante par diferan size. Par exanp, 12 premie kantik koz lor Zeova, ek 8 kantik ki vinn apre koz lor Zezi ek laranson. Dan koumansman liv kantik ena enn  lalis konple tou bann size. Sa kapav ed sirtou bann frer kan zot ena pou swazir enn kantik pou zot diskour piblik.

¹⁷ Pou ki tou dimounn kapav sant avek zot leker, finn sanz sertin parol sa bann kantik-la pou ki mesaz-la li pli kler. Finn osi ranplas sertin mo par bann mo ki bann dimounn plis servi zordi ek ki pli fasil pou konpran. Finn osi sanz tit kantik “Protez To Leker” ki ti enn lord ek finn fer li vinn “Nou Protez Nou Leker.” Kifer? Dan nou bann renion, ek nou bann lasanble ena boukou nouvo, bann ki interese, bann zenn, ek bann ser ki ti pe santi zot malalez pou dir lezot seki zot bizin fer. Akoz sa finn sanz tit sa kantik-la ek so bann parol.

18. Kifer nou bizin aprann bann kantik ki trouv dan nou nouvo liv kantik? (Get not.)

¹⁸ Boukou bann kantik ki ena dan “Sant Avek Lazwa” pou Zeova zot kouma bann lapriyer. Sa bann kantik-la kapav ed twa pou dir Zeova seki to resanti. Ena lezot kantik ki pou ankouraz nou “pou ena lamour ek pou fer dibien.” (Ebre 10:24) Nou anvi konn bann kantik-la zot ler, zot kadans ek zot parol. Enn fason ki nou kapav fer sa se kan nou ekout bann lanrezistreman kot nou bann frer ek ser pe sant sa bann kantik-la. To pou gagn sa bann lanrezistreman-la lor jw.org. Kan to pratik sa bann kantik-la lakaz, to pou kapav sant zot avek lasirans ek santiman. *​—Get not.

19. Kouma tou dimounn dan kongregasion kapav ador Zeova?

¹⁹ Rapel bien ki bann sante ena enn gran linportans dan nou ladorasion. Se enn bon fason pou montre Zeova ki nou kontan Li ek nou ena rekonesans pou tou seki Li’nn fer pou nou. (Lir Izai 12:5. *) Kan to sant avek lantouziasm, to ankouraz lezot osi pou fer parey. Tou dimounn dan kongregasion, ki li zenn, vie, ouswa nouvo dan laverite, kapav ador Zeova dan sa fason-la. Alor pa ezite pou sante avek tou to leker. Anou obeir seki sa ekrivin psom la ti dir: “Sant pou Zeova!” Wi, anou sant avek lazwa!​—Psom 96:1, NW.