1. Akoz linperfeksion, ki santiman boukou serviter Bondie ena?

LAPOT Pol ti dir: “Mo vremem enn dimoun malere!” (Romin 7:24) Azordi, boukou parmi nou ena mem santiman ki Pol. Nou santi nou dekouraze ek deprime. Kifer? Parski mem si nou anvi fer Zeova plezir, nou pa touletan reisi fer sa parski nou’nn erit pese ek nou inparfe. Alor, sa fer nou dekouraze. Sertin Kretien ki’nn fer enn pese grav inn mem panse ki Zeova zame pa pou kapav pardonn zot.

2. (a) Kouma eski Psom 34:22 montre ki bann serviter Bondie bizin pa les bann remor kontign fatig zot? (b) Ki nou pou aprann dan sa lartik-la? (Get lankadre “ Leson Ouswa Sinbolik?”)

² Me Labib rasir nou ki si nou rod proteksion Zeova, nou pa pou bizin les bann remor kontign fatig nou. (Lir Psom 34:22.) Me ki savedir rod proteksion Zeova? Ki nou bizin fer si nou anvi gagn mizerikord ek pardon Zeova? Nou pou gagn repons sa bann kestion-la kan nou examinn dispozision ki ti ena lontan dan Izrael konsernan bann lavil refiz. Ti ena sa dispozision-la kan ti ena lalians Lalwa. Selman apartir Lapantkot lane 33 ti ranplas sa  lalians-la. Me se Zeova ki ti donn Lalwa. Alor, sa dispozision-la, setadir bann lavil refiz, montre nou kouma Zeova konsider pese, bann dimounn ki fer pese, ek bann dimounn ki repanti. Premierman, anou gete kifer ti ena bann lavil refiz dan Izrael.

3. Ki bann Izraelit ti bizin fer ar enn kriminel?

³ Dan lepase, kan ti ena enn krim, Zeova ti konsider sa kouma enn kitsoz bien serye. Si enn Izraelit ti touy enn dimounn, zom ki ti fami pli pros ar sa dimounn ki’nn mor la ti bizin touy kriminel-la. Labib apel li “enn kikenn ki vanz disan.” (Nonb 35:19) Koumsa, sa kriminel-la ti donn so prop lavi pou pey pou sa lavi inosan ki li’nn touye la. Ti touy sa kriminel-la pli vit posib pou ki Later Promiz pa vinn inpir. Zeova ti donn sa lord-la: “Fode pa zot fer later kot zot pe reste vinn inpir” kan zot vers disan enn dimounn, setadir kan zot touy kikenn.​—Nonb 35:33, 34.

4. Ki ti arive kan enn Izraelit ti touy enn kikenn par aksidan?

⁴ Me ki ti arive kan enn Izraelit ti touy enn kikenn par aksidan? Mem si sa ti enn aksidan, li ti koupab parski li ti touy enn dimounn inosan. (Zenez 9:5) Selman, dan sa sitiasion-la, Zeova ti dir ki ti kapav manifeste mizerikord anver sa kriminel-la. Pou ki sa dimounn ki vanz disan la pa gagn li, sa dimounn ki ti fer krim la ti kapav sove ek al dan enn parmi bann sis lavil refiz. Dan sa lavil refiz la li ti gagn proteksion. Me selman, li ti bizin res dan lavil-la ziska lamor gran pret.​—Nonb 35:15, 28.

5. Kifer dispozision konsernan bann lavil refiz kapav ed nou pou konn Zeova pli bien?

⁵ Se pa bann dimounn ki ti ena lide pou fer bann lavil refiz. Me se Zeova ki ti pran sa dispozision-la. Li ti dir Zozwe: “Dir bann Izraelit, ‘Swazir pou zot bann lavil refiz.’” Sa bann lavil-la ti bann lavil “sakre.” (Zozwe 20:1, 2, 7, 8) Zeova Limem ti swazir pou met sa bann lavil-la apar. Alor, atraver sa dispozision-la  nou aprann boukou kitsoz lor Zeova. Par exanp, li ed nou pou konpran pli bien mizerikord Zeova. Ek li ansegn nou kouma nou kapav rod proteksion Zeova azordi.

6, 7. (a) Kan enn dimounn ti fer enn krim par aksidan, ki bann ansien ti bizin fer? (Get zimaz dan koumansman lartik.) (b) Kifer li ti inportan ki enn fizitif koz avek bann ansien?

⁶ Si enn Izraelit ti touy kikenn par aksidan, li ti bizin galoupe al kot lavil refiz. Devan lantre sa lavil-la, li ti bizin “explik bann ansien sa lavil-la seki finn arive.” Bann ansien-la ti bizin akeyir li. (Zozwe 20:4) Enn tipe apre, zot ti retourn li dan lavil kot finn ena sa krim-la. Laba, bann ansien sa lavil-la ti pou ziz li. (Lir Nonb 35:24, 25. *) Si bann ansien ti trouve ki sa lamor-la ti arive par aksidan, zot ti retourn fizitif-la dan lavil refiz.

⁷ Kifer fizitif-la ti bizin koz avek bann ansien? Bann ansien ti pou fer tou pou ki kongregasion gard so pirte ek pou ed sa fizitif-la gagn mizerikord Zeova. Enn Biblis ti ekrir ki, si sa fizitif-la pa ti al get bann ansien, li ti kapav trouv lamor. Ek li ti azoute ki fizitif-la limem ti pou responsab so prop lamor parski li pa ti fer seki Zeova ti demande. Enn dimounn ki ti fer enn krim par aksidan ti bizin al rod led ek aksepte sa led-la pou ki li pa mor. Si li pa ti al dan enn lavil refiz, fami pli pros ar sa dimounn ki li’nn touye la, ti gagn drwa touy li.

8, 9. Kifer enn Kretien ki’nn fer enn pese grav bizin al rod led bann ansien?

⁸ Azordi, enn Kretien ki fer enn pese grav bizin al get bann ansien, pou ki bannla ed li regagn enn bon relasion avek Zeova. Kifer li bien inportan ki li fer sa? Premierman, se Zeova ki’nn etabli bann ansien pou ziz bann ka kot ena bann pese grav. (Zak 5:14-16, NW.) Deziemman, bann ansien zot la pou ed enn kikenn ki pe repanti pou regagn faver Zeova ek pou evit refer mem pese. (Galat 6:1, NW; Ebre 12:11) Trwaziemman, inn etabli ek inn form bann ansien pou rekonfort bann ki repanti ek ed zot kan zot dan lapenn ek zot ena bann remor. Zeova apel sa bann ansien-la “enn refiz kont gro lapli.” (Izai 32:1, 2) Sa dispozision-la se enn fason kot Zeova montre nou so mizerikord.

⁹ Boukou serviter Bondie inn gagn enn soulazman kan zot inn al rod led bann ansien. Par exanp, enn frer ki apel Daniel ti fer enn pese grav. Me pandan plizir mwa li pa ti al get bann ansien. Li ti dir: “Mo ti les boukou letan pase, alor, mo ti panse ki bann ansien ti pou nepli kapav fer kitsoz pou mwa.” Me touletan li ti pe per tansion kikenn al kone ki li’nn fer enn pese. Ek sak fwa ki li ti fer enn lapriyer, li ti santi li oblize pou demann Zeova pardon koumansman so lapriyer. Finalman, li ti al rod led bann ansien. Azordi kan li reget lepase, li dir: “Li vre ki mo ti per pou al get bann ansien. Me apre ki mo  ti fer sa, se koumadir ti’nn tir enn pwa lor mo zepol.” Daniel ti kapav rekoumans koz avek Zeova avek enn konsians trankil. Azordi li ena enn konsians kler, ek li’nn fek nome asistan ministeryel.

10. Si enn dimounn ti fer enn krim par aksidan, ki li ti bizin fer pou gagn pardon?

¹⁰ Pou ki enn kikenn ki ti komet enn krim par aksidan gagn pardon, li ti bizin degaze sove al dan lavil refiz ki pli pre. (Lir Zozwe 20:4. *) Pou ki li pa mor, sa fizitif-la ti bizin al dan lavil refiz ek res laba ziska lamor gran pret. Se enn sakrifis ki sa fizitif-la ti fer. Kifer? Li ti bizin kit so travay, so lakaz bien konfortab, ek so liberte pou vwayaze. * (Get not.) (Nonb 35:25) Me sa ti vo lapenn. Si sa fizitif-la ti kit sa lavil refiz la, li ti pou montre ki li pa kas latet ki li’nn touy enn dimounn, ek li ti pou met so lavi an danze.

11. Kouma enn Kretien kapav montre ki li ena rekonesans pou mizerikord Bondie?

¹¹ Azordi osi enn dimounn ki pe repanti bizin fer sertin kitsoz pou ki Bondie pardonn li. Li bizin aret fer pese. Sa inplik evit fer bann kitsoz ki kapav pous li pou fer enn pese grav. Get seki lapot Pol ti ekrir konsernan bann Kretien dan Korint ki ti repanti: “Parski zot finn ena enn tristes an-akor avek volonte Bondie, sa finn fer zot azir vit-vit, zot finn pirifie zot, zot finn regret seki zot finn fer, zot finn ena lakrint, zot finn devlop enn gran dezir, zot finn ena zel, zot finn koriz lemal!” (2 Korintien 7:10, 11, NW.) Si nou fer tou seki nou kapav pou aret fer pese, nou pou montre Zeova ki nou trakase akoz nou sitiasion ek ki nou pa panse ki otomatikman nou pou gagn so mizerikord.

12. Pou ki enn Kretien kontign gagn mizerikord Zeova, ki kitsoz kitfwa li bizin abandone?

¹² Pou ki enn Kretien kontign gagn mizerikord Zeova, ki kitsoz kitfwa li bizin abandone? Li bizin dispoze abandonn mem bann kitsoz ki li kontan si sa bann kitsoz-la kapav fer li komet enn pese. (Matie 18:8, 9, NW.) Par exanp, si to bann kamarad inflians twa pou fer bann kitsoz ki Zeova pa kontan, eski to pou aret frekant zot? Si to ena enn problem avek lalkol, eski to pou evit bann sitiasion ki kapav tant twa pou bwar tro boukou? Si to gagn difikilte pou kontrol to bann desir sexiel imoral, eski to pou evit bann fim, bann sit Internet, ouswa bann laktivite ki kapav pous twa pou ena bann panse inpir? Pa bliye ki tou bann sakrifis ki nou fer pou obeir lalwa Zeova li vo lapenn. Pena nanye pli pir ki resanti ki Zeova inn abandonn nou. Ek pena nanye pli bon ki resanti Zeova so “lamour fidel.”​—Izai 54:7, 8.

13. Explike kifer enn fizitif ti kapav santi li proteze, an sekirite, ek ere dan lavil refiz.

¹³ Kan sa fizitif-la ti dan lavil refiz, li ti an sekirite. Zeova ti dir konsernan sa  bann lavil-la: “Dan sa bann lavil-la, zot pou gagn proteksion.” (Zozwe 20:2, 3) Zeova pa ti atann ki re-ziz sa fizitif-la pou mem kitsoz. Anplis, sa dimounn ki vanz disan la pa ti gagn drwa rant dan lavil refiz pou touy sa fizitif-la. Kan fizitif-la ti dan lavil, li ti an sekirite parski li ti gagn proteksion Zeova. Li pa ti dan enn prizon. Li ti kapav travay, ed lezot, ek servi Zeova dan lape. Avredir, li ti kapav ena enn lavi ere ek agreab!

14. Ki lasirans enn Kretien ki’nn repanti kapav ena?

¹⁴ Sertin serviter Bondie ki’nn fer bann pese grav ankor ena bann remor mem si zot inn repanti. Ena mem ki panse ki Zeova zame pa pou bliye seki zot inn fer. Si to pans koumsa, rasir twa ki kan Zeova pardone, Li pardone vremem. Fode pa to kontign ena bann remor. Samem ki ti ariv Daniel, ki nou ti mansione pli avan. Me, apre ki bann ansien ti disiplinn li ek ti ed li pou regagn enn bon konsians, li ti santi li soulaze. Li dir: “Mo ti nepli bizin santi mwa koupab. Enn fwa ki sa pese-la inn pardone, li’nn pardone. Parey kouma Zeova ti dir, Li tir to bann fardo lor twa ek Li al kit sa bien lwin ar twa. To pou nepli bizin trouv zot ankor.” Kan enn fizitif ti dan lavil refiz, li pa ti ena pou per tansion sa dimounn ki vanz disan la vini ek touy li. Li parey, kan Zeova inn pardonn nou pese, nou pa bizin per tansion Li revinn lor la ouswa pini nou pou sa.​—Lir Psom 103:8-12.

15, 16. Kan to kone ki Zezi inn donn so lavi kouma enn ranson ek ki li nou Gran Pret, kouma sa ogmant to konfians dan mizerikord Zeova?

 ¹⁵ Avredir, nou ena plis rezon ki bann Izraelit pou ena konfians dan mizerikord Zeova. Apre ki Pol ti dir ki li santi li “malere” parski li pa ti kapav obeir Zeova dan enn fason parfe, li ti dir: “Granmersi Bondie, par nou Segner Zezi Kris!” (Romin 7:25) Ki li ti pe rod dir? Pol ti kone ki li bizin kontign lit kont so bann dezir pou fer pese. Li ti kone osi ki li ti fer pese dan lepase ek ki li’nn repanti. Selman, li ti ena konfians ki Zeova inn pardonn li lor baz sakrifis Zezi. Parski Zezi inn pey laranson, nou kapav ena enn konsians kler ek nou anpe avek noumem. (Ebre 9:13, 14) Zezi li nou Gran Pret, akoz “samem li kapav sov dimoun ki vinn kot [“apros ar,” NW] Bondie atraver li, parski li touzour vivan pou pled dan zot faver.” (Ebre 7:24, 25) Dan lepase, gran pret ti ed bann Izraelit pou ena konfians ki Zeova ti pou pardonn zot pese. Avek Zezi kouma nou Gran Pret, nou ena plis rezon pou ena konfians ki nou kapav gagn Bondie “so mizerikord ek so lagras [“so faver ki personn pa merite,” NW] pou ed nou kan nou bizin.”​—Ebre 4:15, 16.

¹⁶ Alor, pou gagn proteksion Zeova, nou bizin ena lafwa dan sakrifis Zezi. Pa panse ki laranson li aplik zis ar bann dimounn an zeneral. Ena lafwa ki laranson li aplik ar twa personelman. (Galat 2:20, 21, NW.) Ena lafwa ki gras-a laranson, Zeova pardonn to bann pese. Ena lafwa ki gras-a laranson to ena lesperans pou viv pou touletan. Sakrifis Zezi se enn kado ki Zeova inn donn twa!

17. Kifer to anvi rod proteksion Zeova?

¹⁷ Bann lavil refiz ed nou pou konpran mizerikord Zeova. Atraver sa dispozision-la, Bondie montre nou ki lavi li sakre. Sa dispozision-la montre nou osi kouma bann ansien kapav ed nou, ki savedir ena enn vre repantans, ek kifer nou kapav sir ki Zeova pardonn nou vremem. Eski to pe rod proteksion Zeova? Pena enn lot refiz kot to pou plis an sekirite! (Psom 91:1, 2) Dan prosin lartik, nou pou trouve kouma bann lavil refiz kapav ed nou imit Zeova, Limem ki donn nou pli gran lexanp kouma pou manifeste lazistis ek mizerikord.