1-2. (a) Ki kapav ed nou pou andir bann difikilte sak zour? Explike. (b) Ki nou pou examine dan sa lartik-la?

“KAN mo mazinn difikilte ki mo’nn gagne, mo kone ki mo pa’nn reisi fer fas ar sa par momem.” Boukou parmi nou finn deza ena sa santiman-la. Eski twa osi, to’nn deza dir enn kitsoz koumsa? Kitfwa to’nn dir sa apre ki to’nn reisi fer fas ar enn maladi grav ouswa ar lamor enn kikenn ki to kontan. Plitar, kan to repans lor la, kitfwa to konpran ki to’nn reisi andire sak zour zis parski lespri sin Zeova finn donn twa “pwisans ki plis ki seki normal.”​—2 Kor. 4:7-9, NW.

² Lespri sin ed nou osi pou reziste kont linflians sa move lemond-la. (1 Zan 5:19) Anplis, nou bizin lit kont “bann pwisans spiritiel lemal.” (Efe. 6:12) Dan sa lartik-la, nou pou examinn de fason kouma lespri sin ed nou pou andir sa bann difikilte-la. Nou pou osi gete seki nou bizin fer pou ki nou kapav gagn maximum led ar lespri sin.

3. Sit enn fason kouma Zeova ed nou pou andir bann leprev.

³ Lespri sin Zeova donn nou lafors pou asim nou bann responsabilite malgre bann difikilte. Malgre so bann leprev, lapot Pol ti kone ki li ti pe reisi servi Zeova parski li ti kont lor “pwisans Lekris.” (2 Kor. 12:9) Pandan so deziem vwayaz misioner, Pol pa ti zis pas boukou letan pou prese, me li ti osi travay pou pey so bann depans. Li ti res dan Korint kot Akila ek Prisil, ki ti fabrik bann latant. Pol ti fer mem metie ki bannla, alor li ti travay ansam avek zot pandan enn sertenn tan. (Zist. 18:1-4) Lespri sin ti donn Pol lafors pou travay ek pou prese.

4. Dapre 2 Korintien 12:7b-9, ki difikilte Pol ti gagne?

 ⁴ Lir 2 Korintien 12:7b-9, NW. * Dan sa bann verse-la, Pol dir ki li ti ena “enn pikan dan laser.” Ki li ti pe rod dir? Si to ti ena enn pikan dan to laser, sirman to ti pou bien soufer, pa vre? Alor, Pol ti pe rod dir ki li ti pe fer fas ar enn problem personel ki ti pe fer li bien soufer. Li ti dir ki sa difikilte-la ti kouma “enn anz Satan” ki ti pe kontign “bat” li. Kitfwa se pa Satan ouswa so bann demon ki ti fer Pol gagn sa difikilte ki ti kouma enn pikan dan so laser la. Me kan zot ti remark sa ‘pikan-la,’ kitfwa zot ti bien kontan pou pous li pli andan, dan enn sertenn fason, pou ogmant soufrans Pol. Ki Pol ti fer?

5. Kouma Zeova ti reponn bann lapriyer Pol?

⁵ O-koumansman, Pol ti anvi ki Zeova tir sa ‘pikan-la.’ Li ti dir: “Trwa fwa mo finn sipliy nou Segner [Zeova] . . . pou ki Li tir sa ar mwa.” Me malgre bann lapriyer ki Pol ti fer, sa pikan-la ti res dan so laser. Eski savedir ki Zeova pa ti reponn Pol so bann lapriyer? Li ti reponn so bann lapriyer. Me Zeova pa ti tir problem-la. Li ti donn Pol lafors pou andire. Zeova ti dir: “Mo pwisans pe vinn parfe dan to febles.” (2 Kor. 12:8, 9, NW) Avek led Bondie, Pol ti reisi gard so lazwa ek so kalm.​—Fil. 4:4-7.

6. (a) Kouma Zeova kapav reponn nou bann lapriyer? (b) Dapre bann verse dan sa paragraf-la, ki bann promes kapav donn twa lafors?

⁶ Parey kouma Pol, eski to finn deza sipliy Zeova pou Li tir twa dan enn problem? Kitfwa plizir fwa to’nn fer bann lapriyer sinser, me problem-la touzour la ouswa li’nn mem anpire. Eski akoz sa to’nn panse ki Zeova inn ankoler ar twa? Si wi, rapel lexanp Pol. Parey kouma Zeova ti reponn so bann lapriyer, pena dout ki Li pou reponn to bann lapriyer osi! Kitfwa Zeova pa pou tir problem-la. Me Li pou donn twa lafors ki to bizin gras-a so lespri sin pou ki to andir sa problem-la. (Ps. 61:3, 4) Nou bann problem kapav “zet nou parter,” me Zeova zame pou abandonn nou.​—2 Kor. 4:8, 9; Fil. 4:13, NW.

7-8. (a) Kifer nou kapav konpar lespri sin ar divan? (b) Kouma Pier ti dekrir fason ki lespri sin azir?

⁷ Dan ki fason ankor lespri sin kapav ed nou? Nou kapav konpar lespri sin ar divan. Mem si lamer pa bon, enn bato lavwal kapav servi enn divan ki pe soufle dan bon direksion pou ariv so destinasion. Dan mem fason, lespri sin pou ed nou kontign servi Zeova malgre bann leprev, ziska ki nou rant dan lemond nouvo ki Bondie inn promet nou.

⁸ Lapot Pier ti enn peser ek li ti abitie al lapes lor bato. Kitfwa akoz samem li ti servi lexanp enn bato ki pe navige lor lamer pou dekrir fason ki lespri sin azir. Li ti ekrir: “Parski zame okenn profesi pa finn anonse par volonte bann dimounn, me se lespri sin ki’nn pous bann dimounn pou transmet mesaz Bondie.” Mo Grek ki’nn servi pou tradir “pous” vedir “gide” ouswa “dirize.”​—2 Pier 1:21, NW; not.

9. Ki zimaz Pier ti anvi ki bann dimounn mazine kan li ti servi lexpresion ‘pouse’ par lespri sin?

⁹ Ki zimaz Pier ti anvi ki bann dimounn  mazine kan li ti servi lexpresion ‘pouse’ par lespri sin? Lik, ekrivin liv Zistwar Bann Apot, ti servi enn form sa mo Grek-la pou dekrir kouma divan “antrenn” enn bato. (Zist. 27:15) Enn Biblis dir ki, kan Pier ti ekrir ki bann ekrivin Labib ti ‘pouse’ par lespri sin, li ti servi enn lexpresion ki ti fer bann dimounn pans enn bato ki pe navige. Pier ti dir ki, parey kouma divan pous enn bato pou li ariv so destinasion, lespri sin ti diriz bann ekrivin Labib pou fer zot travay. Sa Biblis-la ti dir osi ki bann ekrivin Labib ti kouma bann bato ki ti “lev zot lavwal.” Zot ti pre pou fer travay ki lespri sin ti diriz zot pou fer. Ek Zeova ti fer so par. Li ti donn zot “divan,” setadir lespri sin. Lerla, bann ekrivin Labib ti fer travay ki Zeova ti donn zot pou fer. Zot ti swiv direksion lespri sin.

10-11. Ki de kitsoz nou bizin fer pou ki lespri sin gid nou? Donn enn lexanp.

¹⁰ Azordi, Zeova pa servi so lespri sin pou fer bann dimounn ekrir bann liv Labib. Selman, Li ankor servi so lespri sin pou gid so bann serviter. Zeova ankor touzour pe fer so par. Me kouma nou kapav fer sir ki lespri sin Bondie diriz nou? Nou osi nou bizin fer nou par. Kouma nou kapav fer sa?

¹¹ Reflesi lor sa lexanp-la. Si enn kikenn ki pe navige anvi ki divan pous so bato, li bizin fer de kitsoz. Premierman, li bizin met so bato kot divan pe soufle. Kifer? Parski so bato pa pou avanse si li res dan lepor, lwin ar divan. Deziemman, li bizin lev so lavwal ek ouver li an-gran. Ek mem si ena divan, bato-la pou avanse zis si so lavwal dan divan. Li parey, nou pou reisi andire dan servis Zeova zis si nou gagn led lespri sin. Pou gagn led lespri sin, nou bizin fer de kitsoz. Premierman, nou bizin met nou anba linflians lespri sin. Kouma? Kan nou fer bann laktivite ki lespri sin gid bann serviter Bondie pou fer. Deziemman,  nou bizin “lev nou lavwal” ek ouver li an-gran, setadir fer nou maximum pou partisip dan sa bann laktivite-la. (Ps. 119:32) Kan nou fer sa de kitsoz-la, lespri sin pou donn nou lafors pou kontign servi Zeova avek fidelite ziska ki nou rant dan lemond nouvo ki Bondie inn promet nou.

12. Ki nou pou examine asterla?

¹² Ziska ler, nou’nn trouv de fason kouma lespri sin kapav ed nou. Lespri sin donn nou lafors ek ed nou pou res fidel kan nou fer fas ar bann difikilte. Li ed nou osi pou fer travay ki Zeova anvi nou fer ek pou res lor semin ki pou fer nou gagn lavi eternel. Asterla, anou examinn kat kitsoz ki nou bizin fer pou ki nou kapav gagn maximum led ar lespri sin.

13. Dapre 2 Timote 3:16, 17, ki Labib kapav fer pou nou, me ki nou nou bizin fer?

¹³ Premierman, etidie Labib. (Lir 2 Timote 3:16, 17, NW. *) Mo Grek ki’nn servi pou tradir “inspire par Bondie” vedir “soufle par Bondie.” Bondie ti servi so lespri sin pou “soufle” so bann panse dan lespri bann ekrivin Labib. Kan nou lir Labib ek medit lor seki nou lir, bann instriksion Bondie rant dan nou leker ek nou lespri. Sa bann panse inspire la pous nou pou fer bann sanzman dan nou lavi pou ki nou kapav fer Zeova plezir. (Ebre 4:12) Me pou ki nou kapav gagn maximum led ar lespri sin, nou bizin pran letan pou etidie Labib regilierman ek pou reflesi an profonder lor seki nou lir. Lerla, Parol Bondie pou inflians tou seki nou dir ek fer.

14. (a) Kifer nou kapav dir ki lespri sin azir pandan bann renion? (b) Kouma nou kapav gagn maximum led ar lespri sin dan nou bann renion?

¹⁴ Deziemman, ador Zeova ansam avek to bann frer ek ser. (Ps. 22:22) Dan enn sertenn fason, nou bann renion se bann moman kot “divan pe soufle,” parski lespri sin Zeova azir pandan bann renion. (Rev. 2:29, NW) Kan nou ador Zeova ansam avek nou bann frer ek ser, nou priye pou gagn lespri sin ek nou sant bann kantik ki baze lor Parol Bondie. Nou osi ekout bann lansegnman Biblik ki bann frer ki’nn etabli par lespri sin donn nou. Lespri sin ed osi nou bann ser pou prepar ek fer zot bann demonstrasion. Selman, pou ki nou kapav gagn maximum led ar lespri sin, nou bizin bien prepar nou pou reponn dan renion. Kan nou fer sa, nou asiste nou bann renion avek nou ‘lavwal bien leve ek ouver an-gran.’

15. Kouma lespri sin ed nou pou prese?

¹⁵ Trwaziemman, prese. Kan nou servi Labib pou prese ek ansegne, nou les lespri sin ed nou dan nou minister. (Rom. 15:18, 19) Selman, pou to kapav gagn maximum led ar lespri sin, to bizin prese regilierman ek servi Labib pli souvan posib. Enn fason ki to kapav gagn bann bon konversasion avek bann dimounn kan to prese, se kan to servi bann model konversasion ki trouv dan Nou Lavi Kretien ek Nou Minister​—Kaye Renion.

16. Ki fason pli direk pou gagn lespri sin?

¹⁶ Katriemman, priye Zeova. (Mat. 7:7-11; Lik 11:13) Fason pli direk pou gagn lespri sin se kan nou demann Zeova dan lapriyer. Pena nanye ki kapav anpes nou lapriyer mont ver Zeova ouswa blok lespri sin ki Zeova donn nou, pa mem Satan. Ek mem si nou dan prizon, lespri sin kapav ed nou. (Zak 1:17, NW) Kouma nou bizin  priye pou nou kapav gagn maximum led ar lespri sin? Pou reponn sa kestion-la, anou aprann plis lor lapriyer atraver enn lexanp ki trouv zis dan Levanzil Lik. *

17. Dapre Lik 11:5-9, 13, ki leson nou aprann lor lapriyer?

¹⁷ Lir Lik 11:5-9, 13. Lexanp ki Zezi inn servi montre dan ki fason nou bizin priye pou gagn lespri sin. Dan sa lexanp-la, sa misie-la ti gagn seki li ti bizin “akoz toupe ki li ena pou insiste.” Mem si ti bien tar, li pa ti per pou demann so kamarad pou ed li. (Lik 11:8) * Dapre Zezi, ki sa lexanp-la ansegn nou lor lapriyer? Li ti dir: “Dimande, zot pou gagne; rode, zot pou trouve; tape, laport pou ouver pou zot.” Alor, ki leson nou aprann? Pou ki nou gagn led lespri sin, nou bizin persevere dan lapriyer.

18. Dapre lexanp ki Zezi ti servi, kifer nou kapav sir ki Zeova pou donn nou so lespri sin?

¹⁸ Lexanp ki Zezi ti servi ed nou pou trouve osi kifer Zeova pou donn nou so lespri sin. Misie dan sa lexanp-la ti anvi bien akeyir so bann invite. Mem si ti tar aswar ek ki li pa ti ena nanye pou donn so bann invite, li ti santi li oblize pou donn zot inpe manze. Zezi ti dir ki vwazin-la ti donn misie-la dipin parski li ti kontign demande. Ki Zezi ti pe rod ansegne? Si enn dimounn inparfe ti dispoze ed so vwazin ki ti kontign demann li led, eski nou Papa ki dan lesiel ek ki zenere pa pou ed bann ki kontign demann Li so lespri sin? Wi, Li pou ed zot. Alor, nou kapav sir ki Zeova pou reponn nou bann lapriyer kan nou demann Li so lespri sin.​—Ps. 10:17; 66:19.

19. Kifer nou kapav sir ki nou pou reisi andire?

¹⁹ Malgre bann zefor ki Satan fer pou atak nou, nou kapav sir ki nou pou reisi andire. Kifer? Parski lespri sin ed nou dan de fason. Premierman, li donn nou lafors ki nou bizin pou andir bann difikilte. Deziemman, li donn nou lafors pou kontign servi Zeova ziska ki nou rant dan lemond nouvo. Alor, anou bien determine pou rod maximum led ar lespri sin!